ഒരു പ്രത്യേകതരം നടപ്പ്‌!
ഒരു പ്രത്യേകതരം നടപ്പ്‌!
ഫിൻലൻഡിലെ ഉണരുക! ലേഖകൻ
നോർഡിക്‌ നടത്തത്തെക്കുറിച്ചു നിങ്ങൾ കേട്ടിട്ടുണ്ടോ? വടികൾ ഉപയോഗിച്ചുള്ള ഒരു നടത്തമാണിത്‌. ഫിൻലൻഡിൽ ഇത്‌ ഏറ്റവും ജനപ്രീതിയാർജിച്ച ഒരു വ്യായാമമാണ്‌. സ്‌കീയിങ്ങിൽ ഉപയോഗിക്കുന്ന വടികൾക്കു സമാനമായവയാണ്‌ ഇതിനുവേണ്ടത്‌. ഇതിന്റെ ഉത്ഭവം എന്താണ്‌? ഈ നടത്തത്തിന്‌ എന്തെല്ലാം പ്രയോജനങ്ങളുണ്ട്‌?
ഒരു നോർഡിക്‌ നടത്തക്കാരനെ കാണുമ്പോൾ സ്‌കികൾ (ഷൂസിലോ ബൂട്ടുകളിലോ ഘടിപ്പിച്ചിട്ടുള്ള ഒരുജോടി നീണ്ടുപരന്ന ഹിമപാദുകങ്ങൾ) ഇല്ലാതെ ക്രോസ്‌-കൺട്രി സ്‌കീയിങ്‌ നടത്തുന്ന ഒരാളുടെ ചിത്രം ചിലരുടെ മനസ്സിലേക്കു വന്നേക്കാം. വാസ്‌തവത്തിൽ നോർഡിക്‌ നടത്തത്തിനു ജന്മംനൽകിയതുതന്നെ സ്‌കീയിങ്‌ മത്സരത്തിൽ പങ്കെടുക്കുന്നവരാണ്‌, സ്‌കി ദണ്ഡുകൾ ഉപയോഗിച്ചു നടത്തമാരംഭിച്ചുകൊണ്ട്‌ അവർ വേനൽക്കാല പരിശീലനം തീവ്രമാക്കാൻ തുടങ്ങിയപ്പോഴായിരുന്നു അതിന്റെ പിറവി. 1980-കളിൽ ഫലപ്രദമായ ഒരു വ്യായാമമെന്ന നിലയിൽ ഇത്‌ മറ്റ്‌ അത്‌ലറ്റുകൾക്കും പരിചയപ്പെടുത്തുകയുണ്ടായി. 1990-കളുടെ അവസാനത്തോടെ നോർഡിക്‌ നടത്തം പൊതുജനങ്ങളും സ്വാഗതം ചെയ്‌തുതുടങ്ങി. 7,60,000 ഫിൻലൻഡുകാർ, അതായത്‌ ജനസംഖ്യയുടെ 19 ശതമാനം ആഴ്‌ചയിൽ ഒരു തവണയെങ്കിലും നോർഡിക്‌ നടത്തത്തിൽ ഏർപ്പെടുന്നുവെന്ന്‌ 2004-ൽ നടത്തിയ ഒരു അഭിപ്രായവോട്ടെടുപ്പ്‌ കാണിക്കുന്നു. “നോർഡിക്‌ നടത്തം ഇപ്പോൾ ഫിൻലൻഡിലെ ഏറ്റവും ജനസമ്മിതിയുള്ള രണ്ടാമത്തെ വ്യായാമമായിത്തീർന്നിരിക്കുന്നു, ഒന്നാം സ്ഥാനം നടപ്പിനാണ്‌,” പ്രസ്‌തുത സർവേ നടത്തിയ സൂവോമെൻ ലാടൂ എന്ന സംഘടനയുടെ എക്‌സിക്യൂട്ടിവ്‌ ഡയറക്ടർ ടുവോമോ യാൻടുനെൻ പറയുന്നു. നോർഡിക്‌ നടത്തം കുറച്ചുകാലത്തേക്കുള്ള വെറുമൊരു ഭ്രമം ആയിരുന്നില്ലെന്നു തെളിഞ്ഞു. അടുത്ത കാലങ്ങളിൽ മറ്റു രാജ്യങ്ങളിലും ഇതു സ്ഥാനം പിടിച്ചുകഴിഞ്ഞു.
നടക്കുന്നതിന്റെ പ്രയോജനങ്ങൾ പലർക്കും അറിവുള്ളതാണ്‌. എന്നാൽ വടികൾകൊണ്ടുള്ള നടത്തത്തിന്റെ പ്രയോജനങ്ങളോ? “നോർഡിക്‌ നടത്തത്തിന്റെ ഒരു പ്രധാനഗുണം, അരയ്‌ക്കുമേൽപ്പോട്ടുള്ള ഭാഗത്തിനു വ്യായാമം ലഭിക്കുന്നു എന്നതാണ്‌. കൈയിലെയും പുറത്തെയും വയറിലെയും പേശികൾക്കുൾപ്പെടെ” എന്ന്‌ ഫിസിക്കൽ തെറാപ്പിസ്റ്റും നോർഡിക്‌ നടത്ത വിദഗ്‌ധനുമായ യാർമോ ആഹോനെൻ പറയുന്നു. “ഓഫീസ്‌ജോലി ചെയ്യുന്നവരുടെ ഒരു സ്ഥിരം പ്രശ്‌നമായ, പിടലിക്കും തോളുകളിലും ഉള്ള വലിവിന്‌ അയവുവരുത്താനും ഇതു സഹായിക്കുന്നു,” അദ്ദേഹം കൂട്ടിച്ചേർക്കുന്നു.
സാധാരണ നടത്തത്തെക്കാൾ നോർഡിക്‌ നടത്തം പേശികൾക്കു കൂടുതൽ വ്യായാമം നൽകുന്നതിനാൽ, കൂടുതൽ കലോറി കത്തിച്ചുകളയാനും ഉപകരിക്കുന്നു. വടികൾ ഉപയോഗിക്കുന്നത്‌ നടപ്പിന്റെ വേഗം കൂട്ടുക കൂടുതൽ എളുപ്പമാക്കിത്തീർക്കുന്നു, അത്‌ വേഗത്തിൽ നാഡിമിടിപ്പ്‌ വർധിപ്പിക്കുകയും ചെയ്യുന്നു. ഇനിയുമുണ്ട്‌ പ്രയോജനങ്ങൾ. വടികൾ ശരിയായ രീതിയിൽ ഉപയോഗിക്കുമ്പോൾ നീണ്ടുനിവർന്ന്‌ നടക്കാനും അങ്ങനെ ശരീരനില മെച്ചപ്പെടുത്താനും സാധിക്കുന്നു എന്ന്‌ ഇതിന്റെ വക്താക്കൾ അവകാശപ്പെടുന്നു. “ശരീരഭാരത്തിന്റെ ഒരുഭാഗം വടികളിൽ ചെലുത്തുന്നതിനാൽ സന്ധികളിലെ പിടുത്തം കുറയ്‌ക്കാനും നോർഡിക്‌ നടത്തം സഹായിക്കുന്നു” എന്ന്‌ ആഹോനെൻ അഭിപ്രായപ്പെടുന്നു. വഴുവഴുപ്പുള്ള പ്രതലത്തിലൂടെ നടക്കുമ്പോൾ തെന്നിവീഴാതിരിക്കാൻ അറ്റം കൂർത്ത വടികൾ സഹായകമാണെന്ന്‌ ഒരു നോർഡിക്‌ നടത്തക്കാരൻ പറയുന്നു. അതിനാൽ പലപ്പോഴും മഞ്ഞോ ഐസോ മൂടിക്കിടക്കുന്ന ശീതകാലത്തെ നടത്തത്തിന്‌ പ്രായംചെന്നവർ ഈ പുതിയ രീതി സ്വീകരിച്ചിരിക്കുന്നു.
[20-ാം പേജിലെ ചതുരം]
തുടക്കമിടൽ
നോർഡിക്‌ നടത്തത്തിന്‌ ചെലവേറിയ ഉപകരണങ്ങൾ ആവശ്യമില്ല. നടക്കുമ്പോൾ ധരിക്കാൻ പറ്റിയ സുഖപ്രദമായ ഷൂസ്‌, പ്രത്യേകാൽ തയ്യാറാക്കിയ, അനുയോജ്യമായ നീളമുള്ള വടികൾ, ഇത്രയും മതി. ഉറച്ച പ്രതലത്തിലൂടെയാണു നടക്കാൻപോകുന്നതെങ്കിൽ വടികളുടെ കൂർത്ത അഗ്രങ്ങളിൽ റബ്ബർ പ്ലഗ്ഗുകൾ ഇടണം. നോർഡിക്‌ നടത്തത്തിൽ പ്രാവീണ്യം നേടുക അത്ര ബുദ്ധിമുട്ടുള്ള കാര്യമല്ല, നിങ്ങൾക്ക്‌ അതു പഠിച്ചെടുക്കാവുന്നതേയുള്ളൂ. എന്നാൽ നിങ്ങൾ ഒരു തുടക്കക്കാരനാണെങ്കിൽ നോർഡിക്‌ നടത്തത്തിൽ വൈദഗ്‌ധ്യം നേടിയ ഒരാളിൽനിന്ന്‌ ഉപദേശം തേടുന്നതു നന്നായിരിക്കും.