ലോകത്തെ വീക്ഷിക്കൽ

സൗഹൃ​ദ​ബ​ന്ധങ്ങൾ ഹൃദയ​ത്തി​നു ഗുണകരം

“നല്ല കുടുംബ ബന്ധങ്ങളും സുഹൃ​ത്തു​ക്ക​ളും ഉണ്ടായി​രി​ക്കു​ന്നത്‌ ഹൃദയാ​ഘാ​ത​മോ മസ്‌തി​ഷ്‌കാ​ഘാ​ത​മോ ഉണ്ടാകാ​നുള്ള സാധ്യത കുറയ്‌ക്കു​ന്ന​താ​യി കണ്ടെത്തി​യി​രി​ക്കു​ന്നു” എന്ന്‌ സ്‌പാ​നീഷ്‌ വർത്തമാ​ന​പ്പ​ത്ര​മായ ഡിയാ​ര്യോ മെഡി​ക്കോ പറയുന്നു. കൊള​സ്‌​ട്രോ​ളി​ന്റെ അളവ്‌, രക്തസമ്മർദം, ശരീര​ഭാ​രം എന്നിവ ഹൃദയ​ത്തി​ന്റെ ആരോ​ഗ്യ​നി​ലയെ ബാധി​ക്കുന്ന പ്രധാന ഘടകങ്ങ​ളാ​ണെന്ന്‌ ഡോക്ടർമാർക്കു വളരെ​ക്കാ​ല​മാ​യി അറിയാ​മാ​യി​രു​ന്നു. എന്നാൽ നെഞ്ചു​വേദന അനുഭ​വ​പ്പെട്ട അഞ്ഞൂ​റോ​ളം സ്‌ത്രീ​കളെ ഉൾപ്പെ​ടു​ത്തി​ക്കൊ​ണ്ടുള്ള ഒരു സമീപ​കാല പഠനം കാണി​ക്കു​ന്നത്‌ രോഗി​ക്കു കുടും​ബാം​ഗ​ങ്ങ​ളു​മാ​യും സുഹൃ​ത്തു​ക്ക​ളു​മാ​യുള്ള ബന്ധത്തിന്റെ ആഴവും പരപ്പും കൂടെ കണക്കി​ലെ​ടു​ക്കണം എന്നാണ്‌. “മെച്ചപ്പെട്ട സാമൂ​ഹിക ബന്ധങ്ങൾ വെച്ചു​പു​ലർത്തുന്ന സ്‌ത്രീ​ക​ളോ​ടുള്ള താരത​മ്യ​ത്തിൽ അക്കാര്യ​ത്തിൽ വളരെ പിന്നാക്കം നിൽക്കുന്ന സ്‌ത്രീ​കൾ അകാല​ത്തിൽ മരിക്കാ​നുള്ള സാധ്യത ഇരട്ടി​യാണ്‌” എന്ന്‌ ആ പുതിയ പഠനം വെളി​പ്പെ​ടു​ത്തി. “ഒന്നോ രണ്ടോ അടുത്ത സുഹൃ​ത്തു​ക്കൾ ഉണ്ടായി​രി​ക്കു​ന്ന​തു​പോ​ലും [ഹൃദയാ​ഘാ​ത​മോ മസ്‌തി​ഷ്‌കാ​ഘാ​ത​മോ] ഉണ്ടാകാ​നുള്ള സാധ്യത കുറയ്‌ക്കു​ന്ന​താ​യി കണ്ടെത്തി​യി​രി​ക്കു​ന്നു” എന്ന്‌ പഠനത്തി​നു നേതൃ​ത്വം വഹിച്ച​വ​രിൽ ഒരാളായ കാൾ ജെ. പെപ്പിൻ കൂട്ടി​ച്ചേർക്കു​ന്നു.

 ഒരു അസാധാ​രണ സ്‌പഞ്ച

ജർമനി​യി​ലുള്ള സ്റ്റട്ട്‌ഗാർട്ട്‌ സർവക​ലാ​ശാ​ല​യി​ലെ ഗവേഷകർ അടുത്ത​യി​ടെ ചില അസാമാ​ന്യ കഴിവു​കൾ പ്രകടി​പ്പി​ക്കുന്ന, വെളുത്ത്‌ ഗോളാ​കൃ​തി​യി​ലുള്ള ഒരു സ്‌പഞ്ചി​നെ കണ്ടെത്തി എന്ന്‌ ജർമൻ ദിനപ​ത്ര​മായ ഡി വെൽറ്റ്‌ റിപ്പോർട്ടു ചെയ്യുന്നു. ഈ സ്‌പഞ്ച്‌ വളരെ ചെറു​താ​ണെ​ങ്കി​ലും ദിവസം ഏതാനും സെന്റി​മീ​റ്റർ എന്ന നിരക്കിൽ ഇതിനു ചലിക്കാ​നാ​കും. അതു​കൊ​ണ്ടു​തന്നെ ഇതുവരെ കണ്ടെത്തി​യി​ട്ടു​ള്ള​തിൽവെച്ച്‌ ഏറ്റവും വേഗത്തിൽ ചലിക്കുന്ന സ്‌പഞ്ച്‌ ഇതാണ്‌. ക്രമമായ ഇടവേ​ള​ക​ളിൽ സങ്കോ​ചി​ക്കു​മ്പോൾ ശരീര​ത്തിൽനി​ന്നും വെള്ളം പുറ​ത്തേക്കു കളഞ്ഞു​കൊണ്ട്‌ ഈ ജീവി അതിന്റെ ശരീര വ്യാപ്‌തം 70 ശതമാ​നം​വരെ കുറയ്‌ക്കു​ന്നു. അത്‌ ശ്വസി​ക്കു​മ്പോൾ—വെള്ളം വലി​ച്ചെ​ടു​ത്തു​കൊണ്ട്‌—വെള്ളത്തിൽ ലയിച്ചി​രി​ക്കുന്ന ഓക്‌സി​ജ​നും പോഷ​ക​വ​സ്‌തു​ക്ക​ളും ഉള്ളി​ലേക്കു ചെല്ലുന്നു. അക്വേ​റി​യ​ത്തി​ലേക്ക്‌ ചെറിയ ക്രസ്റ്റേ​ഷ്യ​നു​കളെ (കവച​പ്രാ​ണി​കൾ) കടത്തി​വി​ടു​മ്പോൾ ഈ സ്‌പഞ്ച്‌ കൂടുതൽ ശക്തമായി സങ്കോ​ചി​ക്കു​ന്ന​താ​യി ഗവേഷകർ കണ്ടെത്തി. ഗവേഷ​ക​നായ മൈക്കൽ നിക്കൽ പറയുന്നു, സ്‌പഞ്ചിന്‌ “നാഡീ​വ്യൂ​ഹം ഇല്ലാത്ത​തി​നാൽ വളരെ അസാധാ​ര​ണ​മായ ഒരു കാര്യ​മാ​ണിത്‌.” നാഡീ​വ്യൂ​ഹ​മി​ല്ലെ​ങ്കി​ലും ചലനങ്ങളെ നിയ​ന്ത്രി​ക്കാ​നും അന്യജീ​വി​ക​ളു​ടെ സാന്നി​ധ്യം തിരി​ച്ച​റി​യാ​നും സ്‌പഞ്ചിന്‌ എങ്ങനെ​യാ​ണു സാധി​ക്കു​ന്നത്‌? ഈ കാര്യ​ങ്ങ​ളെ​ല്ലാം അത്‌ എങ്ങനെ നിർവ​ഹി​ക്കു​ന്നു എന്നു മനസ്സി​ലാ​ക്കാൻ ഗവേഷകർ സ്‌പഞ്ചി​നെ​പ്പറ്റി ആഴത്തിൽ പഠിക്കു​ക​യാണ്‌.

വിഭ്രാ​ന്തി​രോ​ഗം

“വിഭ്രാ​ന്തി​രോ​ഗം എപ്പോൾ വേണ​മെ​ങ്കി​ലും ശല്യ​പ്പെ​ടു​ത്തി​യേ​ക്കാം. നെഞ്ചു​വേദന, ശ്വാസ​ത​ടസ്സം, തീവ്ര​മായ ഭയം, വിമ്മിട്ടം, വിയർപ്പ്‌, ഓടാ​നുള്ള തോന്നൽ എന്നിവ ഉൾപ്പെ​ടെ​യുള്ള അതിന്റെ ലക്ഷണങ്ങൾ രാത്രി​യിൽപ്പോ​ലും രോഗി​കളെ വിളി​ച്ചു​ണർത്തു​ന്നു” എന്ന്‌ വാൻകൂ​വർ സൺ വർത്തമാ​ന​പ്പ​ത്രം പറയുന്നു. 36,894 പേരു​മാ​യി നടത്തിയ അഭിമു​ഖ​ങ്ങ​ളിൽനി​ന്നും സമാഹ​രിച്ച ഒരു സമീപ​കാല റിപ്പോർട്ട്‌ സൂചി​പ്പി​ക്കു​ന്നത്‌, 15-നും അതിനു മുകളി​ലും പ്രായ​മുള്ള കാനഡ​ക്കാ​രു​ടെ 3.7 ശതമാ​നത്തെ അല്ലെങ്കിൽ ഏകദേശം പത്തു ലക്ഷം പേരെ ഈ രോഗം പിടി​കൂ​ടി​യി​രി​ക്കു​ന്നു എന്നാണ്‌. പുരു​ഷ​ന്മാ​രെ​ക്കാൾ (2.8 ശതമാനം) സ്‌ത്രീ​കൾക്കാണ്‌ (4.6 ശതമാനം) വിഭ്രാ​ന്തി​രോ​ഗം അനുഭ​വ​പ്പെ​ട്ടി​ട്ടു​ള്ള​താ​യി റിപ്പോർട്ടു കാണി​ക്കു​ന്നത്‌. “രോഗ​മി​ല്ലാ​ത്ത​വ​രോ​ടുള്ള താരത​മ്യ​ത്തിൽ” വിഭ്രാ​ന്തി​രോ​ഗ​വു​മാ​യി മല്ലിടു​ന്നവർ “ഈ പ്രയാ​സ​ക​ര​മായ സാഹച​ര്യ​ത്തെ കൈകാ​ര്യം ചെയ്യാ​നുള്ള ഒരു മാർഗ​മെന്ന നിലയിൽ മദ്യപി​ക്കാ​നുള്ള സാധ്യത ഏകദേശം രണ്ടു മടങ്ങും പുകവ​ലി​ക്കാ​നുള്ള സാധ്യത ഏകദേശം മൂന്നു മടങ്ങും ആണ്‌” എന്ന്‌ പത്രം പറയുന്നു. 70 ശതമാ​ന​ത്തോ​ളം രോഗി​ക​ളും വിദഗ്‌ധ​മായ വൈദ്യ​സ​ഹാ​യം തേടുന്നു എന്നത്‌ നല്ല സംഗതി​യാണ്‌. രോഗ​മു​ണ്ടാ​കാൻ ജനിത​ക​വും ജീവശാ​സ്‌ത്ര​പ​ര​വു​മായ ഘടകങ്ങൾ കാരണ​മാ​യേ​ക്കാ​മെ​ങ്കി​ലും “സമ്മർദ​പൂ​രി​ത​മായ ജീവിത സംഭവ​ങ്ങ​ളും പങ്കുവ​ഹി​ക്കു​ന്നു” എന്ന്‌ ഒട്ടാവ സർവക​ലാ​ശാ​ല​യി​ലെ മനോ​രോഗ വിഭാ​ഗ​ത്തി​ന്റെ ചെയർമാ​നായ ഡോ. ഷാക്ക്‌ ബ്രാ​ഡ്വേൻ വിശ്വ​സി​ക്കു​ന്ന​താ​യി റിപ്പോർട്ട്‌ പ്രസ്‌താ​വി​ക്കു​ന്നു.

യുവാ​ക്ക​ളും മൊ​ബൈൽ ഫോണും

“മൊ​ബൈൽ ഫോണു​ക​ളി​ല്ലെ​ങ്കിൽ ജീവി​ത​കാ​ര്യാ​ദി​കൾ ക്രമ​പ്പെ​ടു​ത്തുക അസാധ്യ​മാ​ണെന്ന്‌ യുവ ബ്രിട്ടീ​ഷു​കാർക്കു തോന്നു​ന്നു” എന്ന്‌ ലണ്ടനിലെ ഡെയിലി ടെല​ഗ്രാഫ്‌ റിപ്പോർട്ടു ചെയ്യുന്നു. 15 മുതൽ 24 വരെ വയസ്സുള്ള ഒരു കൂട്ടം യുവജ​ന​ങ്ങളെ രണ്ടാഴ്‌ച​ത്തേക്ക്‌ മൊ​ബൈൽ ഫോൺ ഉപയോ​ഗി​ക്കാൻ ഗവേഷകർ അനുവ​ദി​ച്ചില്ല. “അത്‌ വിചി​ത്ര​മായ ഒരു അനുഭ​വ​മാ​യി​രു​ന്നു. . . . മാതാ​പി​താ​ക്ക​ളു​മാ​യി സംസാ​രി​ക്കുക, സുഹൃ​ത്തു​ക്കളെ നേരിൽ ചെന്നു​കാ​ണുക, കൂട്ടു​കാ​രു​ടെ മാതാ​പി​താ​ക്കളെ കണ്ടുമു​ട്ടുക എന്നിങ്ങനെ പുതിയ ചില അനുഭ​വ​ങ്ങ​ളി​ലൂ​ടെ കടന്നു​പോ​കാൻ യുവജ​നങ്ങൾ നിർബ​ന്ധി​ത​രാ​യി” എന്നു റിപ്പോർട്ടു പറയുന്നു. ഇംഗ്ലണ്ടി​ലെ ലാങ്കസ്റ്റർ സർവക​ലാ​ശാ​ല​യി​ലെ പ്രൊ​ഫസർ മൈക്കൽ ഹ്യൂം, യുവ ഉപയോ​ക്താ​ക്ക​ളു​ടെ സാധാരണ സെൽഫോൺ സംഭാ​ഷ​ണ​ങ്ങളെ “സാന്ത്വനം കണ്ടെത്താ​നും തങ്ങളു​ടേ​തായ ഒരു വ്യക്തി​ത്വം സ്ഥാപി​ക്കാ​നു​മുള്ള ഒരു വഴി” എന്നാണു വിശേ​ഷി​പ്പി​ക്കു​ന്നത്‌. മൊ​ബൈൽ ഫോൺ ഉപയോ​ഗി​ക്കാൻ കഴിയാ​തി​രു​ന്ന​പ്പോൾ ഒരു കൗമാ​ര​പ്രാ​യ​ക്കാ​രിക്ക്‌ “അസ്വസ്ഥ​ത​യും പിരി​മു​റു​ക്ക​വും” അനുഭ​വ​പ്പെ​ട്ട​താ​യി പത്രം റിപ്പോർട്ടു ചെയ്യുന്നു. ഒരു കൗമാ​ര​പ്രാ​യ​ക്കാ​ര​നാ​ണെ​ങ്കിൽ ഒറ്റപ്പെടൽ അനുഭ​വ​പ്പെ​ട്ടു​വെന്നു മാത്രമല്ല “തോന്നു​മ്പോ​ഴെ​ല്ലാം സുഹൃ​ത്തു​ക്ക​ളോ​ടു സംസാ​രി​ച്ചി​രുന്ന” സ്ഥാനത്ത്‌ “നിശ്ചിത സമയങ്ങ​ളിൽ ആളുകളെ കണ്ടുമു​ട്ടു​ന്ന​തിന്‌ മുന്നമേ ആസൂ​ത്രണം ചെയ്യേ​ണ്ട​താ​യും വന്നു.”

“ഏറ്റവും ഉത്‌കൃ​ഷ്ട​മായ ഗൃഹാ​ല​ങ്കാ​രം”?

“ചൈന​യിൽ കടുവ​യു​ടെ തോലു​കൾ നിയമ​വി​രു​ദ്ധ​മാ​യി വാങ്ങി​ക്കുന്ന പാശ്ചാത്യ ടൂറി​സ്റ്റു​ക​ളും ബിസി​ന​സ്സു​കാ​രും ലോക​ത്തിൽ ഏറ്റവും വംശനാ​ശ​ഭീ​ഷണി നേരി​ടുന്ന ജീവി​ക​ളിൽ ഒന്നിനെ കൊ​ന്നൊ​ടു​ക്കു​ന്ന​തിന്‌ ഉത്തരവാ​ദി​ക​ളാണ്‌” എന്ന്‌ ലണ്ടനിലെ ദ സൺഡേ ടെല​ഗ്രാഫ്‌ പറയുന്നു. വനങ്ങളിൽ ജീവി​ക്കുന്ന കടുവ​ക​ളു​ടെ എണ്ണം, ഒരു നൂറ്റാണ്ടു മുമ്പ്‌ ഏകദേശം 1,00,000 ആയിരു​ന്നത്‌ ഇന്ന്‌ 5,000-ത്തിലും കുറഞ്ഞി​രി​ക്കു​ന്നു. ബഹുഭൂ​രി​പക്ഷം കടുവ​ക​ളും ഇന്ത്യയി​ലാ​ണു​ള്ളത്‌, ഏതാനും എണ്ണം മറ്റു ദക്ഷി​ണേ​ഷ്യൻ രാജ്യ​ങ്ങ​ളി​ലും വിദൂര പൗരസ്‌ത്യ രാജ്യ​ങ്ങ​ളി​ലു​മുണ്ട്‌. ലണ്ടനിലെ ഒരു ധർമസ്ഥാ​പ​ന​മായ പരിസ്ഥി​തി പര്യ​വേക്ഷണ ഏജൻസി റിപ്പോർട്ടു ചെയ്യു​ന്ന​ത​നു​സ​രിച്ച്‌ കടുവാ​ത്തോല്‌ വാങ്ങു​ന്നവർ അതിനെ “ഏറ്റവും ഉത്‌കൃ​ഷ്ട​മായ ഗൃഹാ​ല​ങ്കാ​ര​മാ​യി” വീക്ഷി​ക്കു​ന്നു, “എന്നാൽ അവർ കടുവയെ വംശനാ​ശ​ത്തി​ലേക്കു തള്ളിവി​ടു​ക​യാണ്‌. . . . ഈ മൃഗങ്ങൾ വംശനാ​ശ​ത്തി​ന്റെ വക്കി​ലെത്തി നിൽക്കു​ന്ന​തി​നാൽ ഈ ജീവി​വർഗ​ത്തി​ന്റെ അതിജീ​വ​ന​ത്തിന്‌ ശേഷി​ക്കുന്ന ഓരോ കടുവ​യും കൂടി​യേ​തീ​രൂ.” 1994-നും 2003-നും ഇടയ്‌ക്ക്‌, 684 കടുവാ​ത്തോ​ലു​കൾ പിടി​ച്ചെ​ടു​ത്തു, എന്നാൽ ഈ സംഖ്യ അവയുടെ കള്ളക്കട​ത്തി​ന്റെ ചെറിയ ഒരംശം മാത്ര​മാ​ണെന്നു കരുത​പ്പെ​ടു​ന്നു.

കടുത്ത കാലാവസ്ഥ നേരിട്ട ഒരു വർഷം

“1990-നു ശേഷം ഏറ്റവും കൂടുതൽ ചൂട്‌ അനുഭ​വ​പ്പെട്ട 10 വർഷങ്ങ​ളിൽ നാലാം സ്ഥാനം 2004-നായി​രു​ന്നു. ആ വർഷം കരീബി​യ​നിൽ നാല്‌ ശക്തമായ ചുഴലി​ക്കൊ​ടു​ങ്കാ​റ്റു​ക​ളു​ണ്ടാ​യി, ഏഷ്യയി​ലും മാരക​മായ ചുഴലി​ക്കാ​റ്റു​കൾ ആഞ്ഞടിച്ചു” എന്ന്‌ അസോ​സി​യേ​റ്റഡ്‌ പ്രസ്സിന്റെ ഒരു റിപ്പോർട്ടു പറയുന്നു. കാലാ​വ​സ്ഥ​യു​മാ​യി ബന്ധപ്പെ​ട്ടു​ണ്ടായ നാശന​ഷ്ടങ്ങൾ കാരണം ഏറ്റവും കൂടുതൽ സാമ്പത്തി​ക​ന​ഷ്ട​മു​ണ്ടാ​യ​തും കഴിഞ്ഞ വർഷമാണ്‌. ഐക്യ​നാ​ടു​ക​ളി​ലും കരീബി​യ​നി​ലും മാത്ര​മാ​യി, ചുഴലി​ക്കാ​റ്റു​കൾ 4,300 കോടി​യി​ല​ധി​കം ഡോള​റി​ന്റെ (1,93,500 കോടി​യി​ല​ധി​കം രൂപയു​ടെ) നഷ്ടം വരുത്തി​വെ​ച്ച​താ​യി കണക്കാ​ക്ക​പ്പെ​ടു​ന്നു. ചില സ്ഥലങ്ങളിൽ കൊടു​ങ്കാ​റ്റും ഉയർന്ന താപനി​ല​യു​മാണ്‌ അനുഭ​വ​പ്പെ​ട്ട​തെ​ങ്കിൽ മറ്റുചി​ല​ടത്ത്‌ കൊടും തണുപ്പാ​യി​രു​ന്നു പ്രശ്‌നം. ഉദാഹ​ര​ണ​ത്തിന്‌ ദക്ഷിണ അർജന്റീ​ന​യി​ലും ചിലി​യി​ലും പെറു​വി​ലും ജൂൺ-ജൂലൈ മാസങ്ങ​ളിൽ രൂക്ഷമായ മഞ്ഞുവീ​ഴ്‌ച​യും തണുപ്പും അനുഭ​വ​പ്പെട്ടു. ആ റിപ്പോർട്ട്‌ അനുസ​രിച്ച്‌, “ശാസ്‌ത്രജ്ഞർ പറയു​ന്നത്‌, അന്തരീക്ഷ ഊഷ്‌മാവ്‌ ഉയർന്നു​തന്നെ നിൽക്കു​ക​യാ​ണെ​ങ്കിൽ അത്‌ ആഗോള കാലാ​വ​സ്ഥയെ തുടർന്നും താറു​മാ​റാ​ക്കി​യേ​ക്കും” എന്നാണ്‌.

സംഭാ​ഷണം ചൂളമ​ടി​യി​ലൂ​ടെ

കാനറി ദ്വീപു​ക​ളി​ലുള്ള ലാ ഗോ​മേ​റാ​യി​ലെ ആട്ടിട​യ​ന്മാർ ചൂളമ​ടി​യെ അടിസ്ഥാ​ന​മാ​ക്കി​യുള്ള സിൽബോ എന്ന ഭാഷ ഉപയോ​ഗി​ക്കു​ന്നു. രണ്ട്‌ സ്വരങ്ങ​ളും നാല്‌ വ്യഞ്‌ജ​ന​ങ്ങ​ളും അടങ്ങുന്ന ഒരു കോഡ്‌, വ്യത്യസ്‌ത ഈണങ്ങ​ളിൽ ചൂളമ​ടിച്ച്‌ ആട്ടിട​യ​ന്മാർക്ക്‌ വളരെ അകലെ​യു​ള്ള​വ​രു​മാ​യി​പ്പോ​ലും ആശയവി​നി​മയം നടത്താൻ സാധി​ക്കു​ന്നു. സ്‌പാ​നീഷ്‌ സംസാ​രി​ക്കുന്ന അഞ്ചു പേരു​ടെ​യും സ്‌പാ​നീ​ഷും സിൽബോ​യും സംസാ​രി​ക്കുന്ന അഞ്ച്‌ ആട്ടിട​യ​ന്മാ​രു​ടെ​യും മസ്‌തിഷ്‌ക പ്രവർത്ത​ന​ങ്ങളെ താരത​മ്യം ചെയ്യാൻ അടുത്ത​യി​ടെ ഗവേഷകർ മാഗ്നറ്റിക്‌ റെസൊ​ണൻസ്‌ ഇമേജിങ്‌ (എംആർഐ) ഉപയോ​ഗി​ച്ചു. ആട്ടിട​യ​ന്മാർ ചൂളമ​ടി​ച്ചു​കൊണ്ട്‌ ആശയവി​നി​മയം നടത്തു​മ്പോൾ “അവർ സംസാ​രി​ക്കു​മ്പോ​ഴത്തെ അതേ സംജ്ഞക​ളാണ്‌ തലച്ചോറ്‌ പുറ​പ്പെ​ടു​വി​ക്കു​ന്നത്‌” എന്ന്‌ ഗവേഷകർ കണ്ടെത്തി​യി​രി​ക്കു​ന്ന​താ​യി സ്‌പാ​നീഷ്‌ ദിനപ​ത്ര​മായ എൽ പായിസ്‌ പ്രസ്‌താ​വി​ച്ചു. ഒരു ഗവേഷകൻ ഇങ്ങനെ പറഞ്ഞതാ​യി റിപ്പോർട്ട്‌ ഉദ്ധരി​ക്കു​ന്നു: “വ്യത്യസ്‌ത തരം ഭാഷ ഉപയോ​ഗി​ക്കാ​നുള്ള മനുഷ്യ​ന്റെ പ്രാപ്‌തി വഴക്കമു​ള്ള​താ​ണെ​ന്ന​തിന്‌ ഞങ്ങളുടെ ഗവേഷണ ഫലങ്ങൾ കൂടുതൽ തെളി​വു​കൾ പ്രദാനം ചെയ്യുന്നു.”