ഈ ലോക​ത്തി​ന്റെ പോക്ക്‌ എങ്ങോട്ട്‌?

അടുത്ത പത്തോ ഇരുപ​തോ മുപ്പതോ വർഷത്തി​നു​ള്ളിൽ എന്തൊക്കെ സംഭവി​ക്കും? ഭീകരർ വലവി​രി​ച്ചി​രി​ക്കുന്ന ഈ യുഗത്തിൽ ഭാവി​യെ​ക്കു​റി​ച്ചു ചിന്തി​ക്കു​ന്ന​തു​തന്നെ ആളുകളെ പേടി​പ്പെ​ടു​ത്തി​യേ​ക്കാം. സാങ്കേ​തി​ക​വി​ദ്യ കുതി​ച്ചു​പാ​യു​ക​യാണ്‌. ആഗോ​ള​വ​ത്‌ക​രണം നിരവധി രാഷ്‌ട്ര​ങ്ങളെ പരസ്‌പ​രാ​ശ്ര​യ​ത്വ​ത്തി​ലേക്കു കൈപി​ടിച്ച്‌ അടുപ്പി​ച്ചു. ലോക​നേ​താ​ക്കൾ ഒരുമി​ക്കു​ക​യും ഒരു നല്ല നാളെയെ ആനയി​ക്കു​ക​യും ചെയ്യു​മോ? ഉവ്വ്‌ എന്നാണ്‌ ചിലരു​ടെ ഉത്തരം. ഇവരുടെ പ്രതീ​ക്ഷകൾ എന്തെല്ലാ​മാ​ണെന്നു കാണുക: 2015 ആകു​മ്പോ​ഴേക്ക്‌ ലോക​നാ​യ​ക​ന്മാർ ദാരി​ദ്ര്യ​ത്തി​നും പട്ടിണി​ക്കും എയ്‌ഡ്‌സി​ന്റെ വ്യാപ​ന​ത്തി​നും കടിഞ്ഞാ​ണി​ടും, ശുദ്ധമായ കുടി​വെ​ള്ള​വും മാലി​ന്യ​നിർമാർജന സൗകര്യ​ങ്ങ​ളും എത്തുപാ​ടി​ന​കലെ ആയിരി​ക്കു​ന്ന​വ​രു​ടെ എണ്ണം പകുതി​യാ​യി കുറയ്‌ക്കും.—“ശുഭ​പ്ര​തീ​ക്ഷ​ക​ളും യാഥാർഥ്യ​വും” എന്ന ചതുരം കാണുക.

പക്ഷേ ഭാവി​യെ​ക്കു​റി​ച്ചുള്ള മനുഷ്യ​ന്റെ സുന്ദര​സ്വ​പ്‌നങ്ങൾ പലപ്പോ​ഴും വെറും ജലരേ​ഖ​ക​ളാ​യി മാറി​യി​രി​ക്കു​ന്നു എന്നതാണു സത്യം. ഉദാഹ​ര​ണ​ത്തിന്‌, 1984 ആകു​മ്പോ​ഴേക്ക്‌ കർഷകർ ജലത്തി​ന​ടി​യിൽ ഉപയോ​ഗി​ക്കുന്ന ട്രാക്ടർകൊണ്ട്‌ കടൽത്തട്ട്‌ ഉഴുതു​മ​റി​ക്കു​മെന്നു ദശകങ്ങൾക്കു​മുമ്പ്‌ ഒരു വിദഗ്‌ധൻ പറഞ്ഞി​രു​ന്നു. 1995 ആകു​മ്പോൾ, കൂട്ടി​യി​ടി ഒഴിവാ​ക്കാൻ സഹായി​ക്കുന്ന കമ്പ്യൂ​ട്ടർവ​ത്‌കൃത ഭാഗങ്ങൾ സഹിത​മുള്ള കാറുകൾ നിർമി​ക്കാ​നാ​കു​മെന്ന്‌ മറ്റൊ​രാൾ പറഞ്ഞു. 2000-ത്തോടെ 50,000-ലേറെ പേർ ബഹിരാ​കാ​ശത്തു താമസിച്ച്‌ അവിടെ ജോലി​ചെ​യ്യു​ന്നു​ണ്ടാ​യി​രി​ക്കും എന്നാണ്‌ വേറൊ​രാൾ പറഞ്ഞത്‌. അന്നു മിണ്ടാ​തി​രു​ന്നാൽ മതിയാ​യി​രു​ന്നെന്ന്‌ ഇവർക്കൊ​ക്കെ ഇപ്പോൾ തോന്നു​ന്നു​ണ്ടാ​യി​രി​ക്കാം. ഒരു പത്ര​പ്ര​വർത്തകൻ ഇങ്ങനെ എഴുതി: “ലോക​ത്തി​ലെ മിടു​മി​ടു​ക്ക​ന്മാ​രെ പമ്പരവി​ഡ്‌ഢി​ക​ളാ​ക്കാൻ കാലത്തി​നു മാത്രമേ കഴിയൂ.”

നമുക്കു വഴികാ​ണി​ക്കാൻ ഒരു “ഭൂപടം”

ആളുകൾ ഭാവി​യെ​ക്കു​റി​ച്ചു നെയ്‌തു​കൂ​ട്ടുന്ന സ്വപ്‌ന​ങ്ങൾക്കു കയ്യും​ക​ണ​ക്കു​മില്ല. പക്ഷേ അവയിൽ പലതും യാഥാർഥ്യ​ത്തിൽനിന്ന്‌ എത്രയോ അകലെ​യാണ്‌. ഭാവി​യെ​ക്കു​റിച്ച്‌ ആശ്രയ​യോ​ഗ്യ​മായ ഒരു കാഴ്‌ച​പ്പാട്‌ നമുക്ക്‌ എവി​ടെ​നി​ന്നു കിട്ടും?

ഒരു ഉദാഹ​രണം പരിചി​ന്തി​ക്കുക. പരിച​യ​മി​ല്ലാത്ത ഒരു ദേശത്തു​കൂ​ടെ നിങ്ങൾ ബസ്സിൽ സഞ്ചരി​ക്കു​ക​യാ​ണെ​ന്നി​രി​ക്കട്ടെ. ആ പ്രദേശം ഒട്ടും പരിച​യ​മി​ല്ലാ​ത്ത​തു​കൊണ്ട്‌ നിങ്ങൾക്കു പരി​ഭ്രമം തോന്നി​ത്തു​ട​ങ്ങു​ന്നു. ‘ഞാൻ ഇതെവി​ടെ​യാണ്‌?’ ‘ഈ ബസ്‌ എന്നെ ലക്ഷ്യസ്ഥാ​ന​ത്തു​തന്നെ കൊ​ണ്ടെ​ത്തി​ക്കു​മോ?’ ‘എനിക്ക്‌ ഇറങ്ങേണ്ട സ്ഥലം ഇവി​ടെ​നി​ന്നും എത്രദൂ​രെ​യാണ്‌?’ നിങ്ങൾ ചിന്തി​ക്കു​ന്നു. എന്നാൽ കൃത്യ​മായ വഴികൾ രേഖ​പ്പെ​ടു​ത്തിയ ഒരു ഭൂപടം പരി​ശോ​ധി​ക്കു​ക​യും പുറ​ത്തേ​ക്കു​നോ​ക്കി അതിൽ പറഞ്ഞി​രി​ക്കുന്ന അടയാ​ള​ങ്ങ​ളൊ​ക്കെ കണ്ടെത്തു​ക​യും ചെയ്യു​മ്പോൾ നിങ്ങളു​ടെ സംശയ​ങ്ങ​ളൊ​ക്കെ ദൂരീ​ക​രി​ക്ക​പ്പെ​ടു​ന്നു.

ഭാവി​യെ​ക്കു​റി​ച്ചു ചിന്തി​ക്കു​മ്പോൾ ആകുല​രാ​കുന്ന അനേക​രു​ടെ​യും സാഹച​ര്യം ഇതി​നോ​ടു സമാന​മാണ്‌. ‘നമ്മൾ എവി​ടേ​ക്കാ​ണു പോകു​ന്നത്‌?’ അവർ ചിന്തി​ക്കു​ന്നു. ‘ലോക​സ​മാ​ധാ​ന​ത്തി​ന്റെ പാതയി​ലൂ​ടെ​യാ​ണോ ശരിക്കും നമ്മുടെ യാത്ര? ആണെങ്കിൽ എപ്പോ​ഴാ​യി​രി​ക്കും നാം ആ ലക്ഷ്യത്തി​ലെ​ത്തുക?’ ഈ ചോദ്യ​ങ്ങൾക്ക്‌ ഉത്തരം നൽകാൻ കഴിയുന്ന  ഒരു “ഭൂപട”മാണ്‌ ബൈബിൾ. അതു ശ്രദ്ധാ​പൂർവം വായി​ക്കുക, എന്നിട്ട്‌ ‘പുറത്ത്‌’ അതായത്‌ ലോക​രം​ഗത്ത്‌ അരങ്ങേ​റുന്ന സംഭവ​വി​കാ​സങ്ങൾ അടുത്തു നിരീ​ക്ഷി​ക്കുക. എങ്കിൽ നാം ഇപ്പോൾ എവി​ടെ​യാ​ണെ​ന്നും നമ്മുടെ പോക്ക്‌ എങ്ങോ​ട്ടാ​ണെ​ന്നും നന്നായി മനസ്സി​ലാ​ക്കാൻ നമുക്കു കഴിയും. എന്നാൽ ആദ്യം​തന്നെ ഈ കുഴപ്പ​ങ്ങ​ളെ​ല്ലാം എവി​ടെ​ത്തു​ട​ങ്ങി​യെന്നു നമുക്കു നോക്കാം.

ദുരന്ത​മ​യ​മായ തുടക്കം

ദൈവം ആദ്യത്തെ പുരു​ഷ​നെ​യും സ്‌ത്രീ​യെ​യും സൃഷ്ടി​ച്ച​പ്പോൾ അവർ പൂർണ​രാ​യി​രു​ന്നെ​ന്നും അവൻ അവരെ ഒരു പറുദീ​സ​യി​ലാ​ക്കി​യെ​ന്നും ബൈബിൾ പറയുന്നു. ആദാമി​നെ​യും ഹവ്വാ​യെ​യും എന്നേക്കും ജീവി​ക്കാ​നാ​ണു സൃഷ്ടി​ച്ചത്‌, അല്ലാതെ വെറും 70-ഓ 80-ഓ വർഷ​ത്തേക്ക്‌ ആയിരു​ന്നില്ല. ദൈവം അവരോ​ടു പറഞ്ഞു: “നിങ്ങൾ സന്താന​പു​ഷ്ടി​യു​ള്ള​വ​രാ​യി പെരുകി ഭൂമി​യിൽ നിറഞ്ഞു അതിനെ അടക്കി . . . വാഴു​വിൻ.” ആദാമും ഹവ്വായും അവരുടെ സന്തതി​പ​ര​മ്പ​ര​ക​ളും കൂടി പറുദീസ മുഴു​ഭൂ​മി​യി​ലും വ്യാപി​പ്പി​ക്കണം എന്നതാ​യി​രു​ന്നു ദൈവ​ത്തി​ന്റെ ഉദ്ദേശ്യം.—ഉല്‌പത്തി 1:28; 2:8, 15, 22.

ആദാമും ഹവ്വായും ദൈവ​ത്തോ​ടു മത്സരിച്ചു. ഫലമോ? അവരുടെ പറുദീ​സാ​ഭ​വനം അവർക്കു നഷ്ടപ്പെട്ടു. കൂടാതെ, ശാരീ​രി​ക​വും മാനസി​ക​വു​മാ​യി അവർ ക്രമേണ ക്ഷയിക്കാൻ തുടങ്ങി. ഓരോ ദിവസ​വും അവർ ശവക്കു​ഴി​യോട്‌ ഓരോ ചുവട്‌ അടുക്കു​ക​യാ​യി​രു​ന്നു. എന്തു​കൊണ്ട്‌? അവരുടെ സ്രഷ്ടാ​വി​നെ​തി​രെ തിരി​യു​ക​വഴി അവർ പാപം​ചെ​യ്‌തു. “പാപത്തി​ന്റെ ശമ്പളം മരണമ​ത്രേ.”—റോമർ 6:23.

ആദാമും ഹവ്വായും കാലാ​ന്ത​ര​ത്തിൽ മരിച്ചു. പക്ഷേ അതിനു​മുമ്പ്‌ അവർക്ക്‌ കുറെ ആൺമക്ക​ളും പെൺമ​ക്ക​ളും ജനിച്ചു. ദൈവ​ത്തി​ന്റെ ആദിമ ഉദ്ദേശ്യം പൂർത്തീ​ക​രി​ക്കാൻ ഈ മക്കളെ​ക്കൊ​ണ്ടു കഴിയു​മാ​യി​രു​ന്നോ? ഇല്ല. കാരണം അവർ മാതാ​പി​താ​ക്ക​ളിൽനിന്ന്‌ അപൂർണത അവകാ​ശ​പ്പെ​ടു​ത്തി​യി​രു​ന്നു. അതേ, ഒരു തലമു​റ​യിൽനിന്ന്‌ അടുത്ത​തി​ലേക്ക്‌ എന്ന കണക്കിൽ ആദാമി​ന്റെ സന്തതി​ക​ളിൽ എല്ലാവ​രി​ലേ​ക്കും പാപവും മരണവും കൈമാ​റ്റം ചെയ്യ​പ്പെട്ടു. നമുക്കും അതു പകർന്നു​കി​ട്ടി. അതു​കൊണ്ട്‌ ബൈബിൾ പറയുന്നു: “ഏകമനു​ഷ്യ​നാൽ പാപവും പാപത്താൽ മരണവും ലോക​ത്തിൽ കടന്നു. ഇങ്ങനെ എല്ലാവ​രും പാപം ചെയ്‌ക​യാൽ മരണം സകലമ​നു​ഷ്യ​രി​ലും പരന്നി​രി​ക്കു​ന്നു.”—റോമർ 3:23; 5:12.

 ഇപ്പോൾ നാം എവി​ടെ​യാണ്‌?

ആദാമി​ന്റെ​യും ഹവ്വായു​ടെ​യും മത്സര​ത്തോ​ടെ മനുഷ്യ​വർഗം ദുരി​ത​പൂർണ​മായ ജീവി​ത​പാ​ത​യി​ലൂ​ടെ ഒരു ദീർഘ​പ്ര​യാ​ണം തുടങ്ങി, ആ യാത്ര ഇപ്പോൾ നമ്മുടെ കാലം​വരെ എത്തിയി​രി​ക്കു​ന്നു. മനുഷ്യ​വർഗം “മായെക്കു കീഴ്‌പെ​ട്ടി​രി​ക്കു​ന്നു” അഥവാ വ്യർഥ​ത​യ്‌ക്ക്‌ അടിമ​പ്പെ​ട്ടി​രി​ക്കു​ന്നെന്ന്‌ ഒരു ബൈബിൾ എഴുത്തു​കാ​രൻ എഴുതി. (റോമർ 8:20) മനുഷ്യ​രാ​ശി​യു​ടെ അരിഷ്ട​ത​ക​ളു​ടെ എത്ര അനു​യോ​ജ്യ​മായ ഒരു വർണന! ആദാമി​ന്റെ സന്തതി​പ​ര​മ്പ​ര​ക​ളിൽ ശാസ്‌ത്ര​ലോ​കത്തെ പ്രതി​ഭാ​ശാ​ലി​ക​ളായ പുരു​ഷ​ന്മാ​രും സ്‌ത്രീ​ക​ളു​മുണ്ട്‌, വൈദ്യ​ശാ​സ്‌ത്ര​രം​ഗത്തെ അതികാ​യ​ന്മാ​രുണ്ട്‌, പുതു​പു​ത്തൻ സാങ്കേ​തി​ക​വി​ദ്യ​കൊ​ണ്ടു ലോകത്തെ വിസ്‌മ​യി​പ്പി​ക്കുന്ന മിടു​മി​ടു​ക്ക​ന്മാ​രുണ്ട്‌. പക്ഷേ, ഇവരിൽ ഒരാൾക്കു​പോ​ലും മനുഷ്യ​വർഗ​ത്തി​നു​വേണ്ടി ദൈവം ഉദ്ദേശിച്ച സമാധാ​ന​വും ആയുരാ​രോ​ഗ്യ​വും ഈ ഭൂഗ്ര​ഹ​ത്തി​ലേക്ക്‌ ആനയി​ക്കാൻ കഴിഞ്ഞി​ട്ടില്ല.

ആദാമി​ന്റെ​യും ഹവ്വായു​ടെ​യും മത്സരം നമ്മെ ഓരോ​രു​ത്ത​രെ​യും വ്യക്തി​പ​ര​മാ​യി ബാധി​ച്ചി​ട്ടുണ്ട്‌. അനീതി​യു​ടെ നൊമ്പരം, കുറ്റകൃ​ത്യ​ങ്ങ​ളെ​പ്ര​തി​യുള്ള ഭയം, ഗുരു​ത​ര​മായ രോഗ​ങ്ങ​ളു​ടെ വേദന, നമ്മെ ദുഃഖ​ത്തി​ന്റെ നിലയി​ല്ലാ​ക്ക​യ​ത്തി​ലേക്ക്‌ ആഴ്‌ത്തി​ക്കൊ​ണ്ടുള്ള പ്രിയ​പ്പെ​ട്ട​വ​രു​ടെ വേർപാട്‌ ഇവയൊ​ക്കെ അനുഭ​വി​ക്കാ​ത്ത​താ​യി നമ്മിൽ ആരാണു​ള്ളത്‌? ശാന്തമാ​യി ഒഴുകുന്ന ജീവി​ത​ത്തി​ലേക്ക്‌ എത്ര പെട്ടെ​ന്നാ​ണു ദുരന്തം തീമഴ​പോ​ലെ പെയ്‌തി​റ​ങ്ങു​ന്നത്‌. ആനന്ദനി​മി​ഷ​ങ്ങ​ളു​ണ്ടെ​ങ്കി​ലും നമ്മുടെ ജീവിതം പുരാ​ത​ന​കാ​ലത്തെ ഒരു ഗോ​ത്ര​പി​താ​വായ ഇയ്യോബ്‌ പറഞ്ഞതു​പോ​ലെ​യാണ്‌, “മനുഷ്യൻ അല്‌പാ​യു​സ്സു​ള്ള​വ​നും കഷ്ടസമ്പൂർണ്ണ​നും ആകുന്നു.”—ഇയ്യോബ്‌ 14:1.

നാം എവി​ടെ​നി​ന്നു വന്നു എന്നതി​നെ​ക്കു​റി​ച്ചും ഇപ്പോൾ നാം ആയിരി​ക്കുന്ന ദാരു​ണ​മായ അവസ്ഥ​യെ​ക്കു​റി​ച്ചും പരിചി​ന്തി​ക്കു​മ്പോൾ ഭാവി ഇരുള​ട​ഞ്ഞ​താ​യി തോന്നി​യേ​ക്കാം. എന്നാൽ ഇത്തരം അവസ്ഥകൾ അന്തമി​ല്ലാ​തെ  തുടരാൻ ദൈവം അനുവ​ദി​ക്കു​ക​യി​ല്ലെന്നു ബൈബിൾ നമുക്ക്‌ ഉറപ്പു​ത​രു​ന്നു. മനുഷ്യ​കു​ല​ത്തെ​ക്കു​റി​ച്ചുള്ള ദൈവ​ത്തി​ന്റെ ആദി​മോ​ദ്ദേ​ശ്യം നിവൃ​ത്തി​യേ​റു​ക​തന്നെ ചെയ്യും. (യെശയ്യാ​വു 55:10, 11) അതു പെട്ടെന്നു സംഭവി​ക്കു​മെന്നു നമുക്ക്‌ ഉറപ്പു​ണ്ടാ​യി​രി​ക്കാൻ കഴിയു​ന്നത്‌ എന്തു​കൊ​ണ്ടാണ്‌?

നാം ഇപ്പോൾ “അന്ത്യകാല”മെന്നു വിളി​ക്ക​പ്പെ​ടുന്ന ഒരു കാലഘ​ട്ട​ത്തി​ലൂ​ടെ കടന്നു​പൊ​യ്‌ക്കൊ​ണ്ടി​രി​ക്കു​കയാ​ണെന്നു ബൈബിൾ പറയുന്നു. (2 തിമൊ​ഥെ​യൊസ്‌ 3:1) അന്ത്യകാ​ലം എന്ന പദത്തിന്‌ ഈ ഭൂഗ്ര​ഹ​ത്തി​ന്റെ​യും അതിലെ സകല ജീവജാ​ല​ങ്ങ​ളു​ടെ​യും അന്ത്യ​മെന്നല്ല അർഥം; മറിച്ച്‌ “വ്യവസ്ഥി​തി​യു​ടെ സമാപനം” എന്നാണ്‌, അതായത്‌ നമ്മെ ദുഃഖി​പ്പി​ക്കുന്ന സാഹച​ര്യ​ങ്ങൾക്ക്‌ ഒരു അവസാനം എന്ന്‌. (മത്തായി 24:3, NW) അന്ത്യകാ​ലത്ത്‌ സർവസാ​ധാ​ര​ണ​മാ​യി​രി​ക്കുന്ന സംഭവ​ങ്ങ​ളെ​യും ആളുക​ളു​ടെ സ്വഭാ​വ​ത്തി​ന്റെ വിശേ​ഷ​ത​ക​ളെ​യും കുറിച്ചു ബൈബിൾ വിവരി​ക്കു​ന്നു. 8-ാം പേജിലെ ചതുര​ത്തിൽ ഇവയിൽ ചിലതി​നെ​ക്കു​റി​ച്ചു വായി​ക്കുക, എന്നിട്ട്‌ ‘പുറ​ത്തേക്ക്‌’ അതായത്‌ ലോക​രം​ഗ​ത്തേക്ക്‌ കണ്ണോ​ടി​ക്കുക. ബൈബി​ളാ​കുന്ന നമ്മുടെ ഭൂപടം നാം ഇപ്പോൾ എവി​ടെ​യാ​ണു നിൽക്കു​ന്ന​തെന്നു കാണി​ച്ചു​ത​രു​ന്നു. അതേ, ഈ വ്യവസ്ഥി​തി​യു​ടെ അന്ത്യ​ത്തോ​ടു വളരെ അടു​ത്തെ​ത്തി​യി​രി​ക്കു​ക​യാ​ണു നാം. അടുത്ത​താ​യി സംഭവി​ക്കാൻ പോകു​ന്നത്‌ എന്താണ്‌?

മുന്നിലെ പാത

ആദാമും ഹവ്വായും തെറ്റു ചെയ്‌ത​യു​ടനെ “ഒരുനാ​ളും നശിച്ചു​പോ​കാത്ത” ഒരു രാജ്യം സ്ഥാപി​ക്കു​ന്ന​തി​നുള്ള തന്റെ ഉദ്ദേശ്യം ദൈവം വെളി​പ്പെ​ടു​ത്തി​ത്തു​ടങ്ങി. (ദാനീ​യേൽ 2:44) കർത്താ​വി​ന്റെ പ്രാർഥന എന്നറി​യ​പ്പെ​ടുന്ന പ്രാർഥ​ന​യി​ലൂ​ടെ ആ രാജ്യം വരുന്ന​തി​നാ​യി അപേക്ഷി​ക്കാൻ അനേക​രും പഠിച്ചി​ട്ടുണ്ട്‌. ആ രാജ്യം മനുഷ്യ​വർഗ​ത്തി​ന്മേൽ അളവറ്റ അനു​ഗ്ര​ഹങ്ങൾ വർഷി​ക്കും.—മത്തായി 6:9, 10.

മനുഷ്യ​ന്റെ ഹൃദയ​ത്തി​ലുള്ള എന്തെങ്കി​ലും അവ്യക്ത​മായ ഒരു സങ്കൽപ്പമല്ല ദൈവ​രാ​ജ്യം. ഭൂമി​യു​ടെ​മേൽ കാതലായ പ്രഭാവം ചെലു​ത്താൻ പോകുന്ന ഒരു യഥാർഥ സ്വർഗീയ ഗവൺമെ​ന്റാണ്‌ അത്‌. തന്റെ രാജ്യം മുഖേന മനുഷ്യ​രാ​ശിക്ക്‌ ദൈവം വാഗ്‌ദാ​നം ചെയ്‌തി​രി​ക്കു​ന്നത്‌ എന്തൊ​ക്കെ​യാ​ണെന്നു നോക്കുക. ആദ്യം​തന്നെ അവൻ “ഭൂമിയെ നശിപ്പി​ക്കു​ന്ന​വരെ നശിപ്പി”ക്കുമെന്നു ബൈബിൾ പറയുന്നു. (വെളി​പ്പാ​ടു 11:18) തന്നെ അനുസ​രി​ക്കു​ന്ന​വർക്കു​വേണ്ടി അവൻ എന്തു ചെയ്യും? അവന്റെ എഴുത​പ്പെട്ട നിശ്വസ്‌ത വചനം ഇങ്ങനെ പറയുന്നു, “അവൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല.” (വെളി​പ്പാ​ടു 21:4-5) മനുഷ്യ​രിൽ ആർക്കെ​ങ്കി​ലും എന്നെങ്കി​ലും ഇതൊക്കെ കൈവ​രി​ക്കാൻ സാധി​ക്കു​മോ? മനുഷ്യ​വർഗ​ത്തി​നു​വേണ്ടി ആദിയിൽ താൻ ഉദ്ദേശിച്ച അവസ്ഥകൾ ഒരു യാഥാർഥ്യ​മാ​ക്കാൻ ദൈവ​ത്തി​നു മാത്രമേ കഴിയൂ.

ദൈവ​രാ​ജ്യം കൊണ്ടു​വ​രുന്ന അനു​ഗ്ര​ഹ​ങ്ങ​ളിൽനി​ന്നു നിങ്ങൾക്ക്‌ എങ്ങനെ പ്രയോ​ജനം നേടാ​നാ​കും? യോഹ​ന്നാൻ 17:3 പറയുന്നു: “ഏകസത്യ​ദൈ​വ​മായ നിന്നെ​യും നീ അയച്ചി​രി​ക്കുന്ന യേശു​ക്രി​സ്‌തു​വി​നെ​യും അറിയു​ന്നതു തന്നേ നിത്യ​ജീ​വൻ ആകുന്നു.” ഈ പരിജ്ഞാ​നം നേടു​ന്ന​തിന്‌ ആളുകളെ സഹായി​ക്കു​ക​യെന്ന ലക്ഷ്യത്തിൽ യഹോ​വ​യു​ടെ സാക്ഷികൾ ഒരു ആഗോള വിദ്യാ​ഭ്യാ​സ വേല ചെയ്യു​ന്നുണ്ട്‌. ആ വേല ഇന്ന്‌ 230-ലധികം രാജ്യ​ങ്ങ​ളിൽ നടക്കുന്നു, അവരുടെ സാഹി​ത്യ​ങ്ങൾ 400-ലധികം ഭാഷക​ളിൽ പ്രസി​ദ്ധീ​ക​രി​ക്ക​പ്പെ​ടു​ന്നു. കൂടുതൽ അറിയാൻ നിങ്ങൾക്കു താത്‌പ​ര്യ​മു​ണ്ടെ​ങ്കിൽ നിങ്ങളു​ടെ പ്രദേ​ശ​ത്തുള്ള യഹോ​വ​യു​ടെ സാക്ഷി​കളെ സമീപി​ക്കു​ക​യോ ഈ മാസി​ക​യു​ടെ 5-ാം പേജിൽ കൊടു​ത്തി​രി​ക്കുന്ന അനു​യോ​ജ്യ​മായ വിലാ​സ​ത്തിൽ എഴുതു​ക​യോ ചെയ്യുക.

[6-ാം പേജിലെ ആകർഷക വാക്യം]

“ഇന്നോ നാളെ​യോ ഞങ്ങൾ ഇന്ന പട്ടണത്തിൽ പോയി അവിടെ ഒരാണ്ടു കഴിച്ചു വ്യാപാ​രം ചെയ്‌തു ലാഭം ഉണ്ടാക്കും എന്നു പറയു​ന്ന​വരേ, കേൾപ്പിൻ: നാളെ​ത്തേതു നിങ്ങൾ അറിയു​ന്നി​ല്ല​ല്ലോ.”—യാക്കോബ്‌ 4:13, 14

[6-ാം പേജിലെ ആകർഷക വാക്യം]

ബൈബിൾ മനുഷ്യ​ച​രി​ത്രത്തെ, ആദ്യത്തെ പുരു​ഷ​നും സ്‌ത്രീ​യും അസ്‌തി​ത്വ​ത്തിൽ വന്ന കാലത്തി​ലേക്കു കൊ​ണ്ടെ​ത്തി​ക്കു​ന്നു. നാം എവി​ടെ​നി​ന്നു വന്നെന്ന്‌ അതു പറയുന്നു, എവി​ടേക്കു പോകു​ന്നെ​ന്നും. എന്നാൽ ബൈബിൾ നമ്മോടു പറയു​ന്നതു മനസ്സി​ലാ​ക്ക​ണ​മെ​ങ്കിൽ നാം അത്‌ ഒരു ഭൂപടം പരി​ശോ​ധി​ക്കു​ന്ന​തു​പോ​ലെ അടുത്തു പരിചി​ന്തി​ക്കേ​ണ്ട​തുണ്ട്‌

[7-ാം പേജിലെ ആകർഷക വാക്യം]

“പാപം” എന്നത്‌ ദുഷ്‌പ്ര​വൃ​ത്തി​യോ​ടോ മോശ​മായ കാര്യ​ങ്ങ​ളോ​ടോ ഉള്ള ഒരു ചായ്‌വ്‌ ആണ്‌. നാം ജനിച്ചി​രി​ക്കു​ന്നതു പാപി​ക​ളാ​യി​ട്ടാണ്‌, അതു നമ്മുടെ പ്രവൃ​ത്തി​കളെ ബാധി​ക്കു​ന്നു. “പാപം ചെയ്യാതെ നന്മ മാത്രം ചെയ്യുന്ന ഒരു നീതി​മാ​നും ഭൂമി​യിൽ ഇല്ല.”—സഭാ​പ്ര​സം​ഗി 7:20

[8-ാം പേജിലെ ആകർഷക വാക്യം]

ഒരു കറുത്ത അടയാ​ള​മുള്ള ഒരു കടലാ​സി​ന്റെ പതി​പ്പെ​ടു​ക്കു​ക​യാ​ണെ​ങ്കിൽ എല്ലാ പതിപ്പു​ക​ളി​ലും ആ അടയാളം പതിഞ്ഞി​രി​ക്കും. ആദാമി​ന്റെ പിൻഗാ​മി​ക​ളെന്ന നിലയിൽ നാം അവന്റെ പതിപ്പാണ്‌. അതു​കൊണ്ട്‌ അവൻ ചെയ്‌ത പാപത്തി​ന്റെ പാട്‌ നമ്മി​ലെ​ല്ലാം പതിഞ്ഞി​രി​ക്കു​ന്നു, ആദാം എന്ന “അസ്സലിൽ” പതിഞ്ഞ അതേ കറുത്ത പാട്‌

[8-ാം പേജിലെ ആകർഷക വാക്യം]

“നടക്കു​ന്ന​വന്നു തന്റെ കാലടി​കളെ നേരെ ആക്കുന്ന”തിനു കഴിയി​ല്ലെന്നു ബൈബിൾ പറയുന്നു. (യിരെ​മ്യാ​വു 10:23) ലോക​സ​മാ​ധാ​നം കൊണ്ടു​വ​രാ​നുള്ള മനുഷ്യ​ന്റെ ശ്രമങ്ങൾ ദാരു​ണ​മാ​യി പരാജ​യ​പ്പെ​ട്ട​തി​ന്റെ കാരണം ഇതിൽനി​ന്നു വ്യക്തമാണ്‌. ദൈവ​ത്തി​ന്റെ സഹായ​മി​ല്ലാ​തെ “തന്റെ കാലടി​കളെ നേരെ ആക്കുന്ന”തിനുള്ള പ്രാപ്‌തി​യോ​ടെയല്ല മനുഷ്യൻ സൃഷ്ടി​ക്ക​പ്പെ​ട്ടത്‌

[9-ാം പേജിലെ ആകർഷക വാക്യം]

ദൈവത്തോടുള്ള സങ്കീർത്ത​ന​ക്കാ​രന്റെ വാക്കുകൾ ബൈബി​ളിൽ രേഖ​പ്പെ​ടു​ത്തി​യി​രി​ക്കു​ന്നു: “നിന്റെ വചനം എന്റെ കാലിന്നു ദീപവും എന്റെ പാതെക്കു പ്രകാ​ശ​വും ആകുന്നു.” (സങ്കീർത്തനം 119:105) തീരു​മാ​നങ്ങൾ എടു​ക്കേ​ണ്ടി​വ​രു​മ്പോൾ ജ്ഞാനപൂർവം ഓരോ ചുവടും വെക്കാൻ ഒരു വിള​ക്കെ​ന്ന​പോ​ലെ ബൈബിൾ നമ്മെ സഹായി​ക്കു​ന്നു. മനുഷ്യ​വർഗ​ത്തി​ന്റെ ഭാവി എന്തായി​രി​ക്കു​മെന്നു വിവേ​ചി​ച്ച​റി​യാൻ മുന്നിലെ പാതയെ പ്രദീ​പ്‌ത​മാ​ക്കി​ക്കൊണ്ട്‌ അതു നമ്മുടെ ‘പാതെക്കു പ്രകാശം’ പരത്തുന്നു

[7-ാം പേജിലെ ചതുരം]

ശുഭപ്രതീക്ഷകളും യാഥാർഥ്യ​വും

2000 സെപ്‌റ്റം​ബർ. ഐക്യ​രാ​ഷ്‌ട്ര സംഘട​ന​യി​ലെ അംഗരാ​ഷ്‌ട്രങ്ങൾ 2015-ാമാ​ണ്ടോ​ടെ നേടി​യെ​ടു​ക്കേണ്ട ചില ലക്ഷ്യങ്ങൾ ഐകക​ണ്‌ഠ്യേന പ്രഖ്യാ​പി​ച്ചു. പിൻവ​രു​ന്നവ അതിൽപ്പെ​ടു​ന്നു:

◼ ദിവസം ഒരു ഡോള​റിൽ താഴെ വരുമാ​ന​മു​ള്ള​വ​രു​ടെ​യും പട്ടിണി അനുഭ​വി​ക്കു​ന്ന​വ​രു​ടെ​യും എണ്ണം പകുതി​യാ​ക്കി കൊണ്ടു​വ​രുക.

◼ എല്ലാ കുട്ടി​കൾക്കും പ്രൈ​മറി സ്‌കൂൾ വിദ്യാ​ഭ്യാ​സം ഉറപ്പു​വ​രു​ത്തുക.

◼ വിദ്യാ​ഭ്യാ​സ​ത്തി​ന്റെ സമസ്‌ത മേഖല​ക​ളി​ലും ലിംഗ​വ്യ​ത്യാ​സ​ത്തെ​പ്ര​തി​യുള്ള അസമത്വം ഇല്ലാതാ​ക്കുക.

◼ അഞ്ചു വയസ്സിൽ താഴെ​യുള്ള കുട്ടി​കൾക്കി​ട​യി​ലെ മരണനി​രക്ക്‌ 66 ശതമാനം കുറയ്‌ക്കുക.

◼ പ്രസവ​ത്തോട്‌ അനുബ​ന്ധിച്ച മരണനി​രക്ക്‌ 75 ശതമാനം കുറച്ചു​കൊ​ണ്ടു​വ​രുക.

◼ എച്ച്‌ഐവി/എയ്‌ഡ്‌സി​ന്റെ കുതി​പ്പി​നു കടിഞ്ഞാ​ണി​ടുക, അതിന്റെ വ്യാപ​ന​ത്തി​നുള്ള സാധ്യ​തകൾ കുറച്ചു​കൊ​ണ്ടു​വ​രുക, മലേറിയ പോലുള്ള മറ്റു മാരക​രോ​ഗങ്ങൾ പൊട്ടി​പ്പു​റ​പ്പെ​ടു​ന്നതു കുറയ്‌ക്കുക.

◼ കുടി​ക്കാൻ ശുദ്ധജലം കിട്ടാ​ത്ത​വ​രു​ടെ എണ്ണം പകുതി​യാ​യി കുറയ്‌ക്കുക.

ഈ ലക്ഷ്യങ്ങൾ വെളിച്ചം കാണു​മോ? 2004-ൽ ഇവയെ​ല്ലാം പുനഃ​പ​രി​ശോ​ധി​ച്ച​ശേഷം ലോക​മെ​മ്പാ​ടു​നി​ന്നു​മുള്ള ആരോ​ഗ്യ​വി​ദ​ഗ്‌ധ​രു​ടെ ഒരു സംഘം നിഗമനം ചെയ്‌തത്‌, പ്രതീ​ക്ഷി​ക്കുന്ന നേട്ടങ്ങൾ പലപ്പോ​ഴും കൈവ​രി​ക്ക​പ്പെ​ടാ​തെ പോകു​ന്നു​വെന്ന വസ്‌തുത തിരി​ച്ച​റി​ഞ്ഞു​കൊണ്ട്‌ നാം ശുഭ​പ്ര​തീ​ക്ഷ​ക​ളു​ടെ വർണ​ലോ​ക​ത്തു​നിന്ന്‌ ഇറങ്ങി​വ​രേ​ണ്ട​തുണ്ട്‌ എന്നാണ്‌. ലോക​സ്ഥി​തി 2005 (ഇംഗ്ലീഷ്‌) എന്ന പുസ്‌ത​ക​ത്തി​ന്റെ ആമുഖം പറയുന്നു: “ഇപ്പോ​ഴും പലയി​ട​ങ്ങ​ളി​ലെ​യും പുരോ​ഗ​തി​ക്കുള്ള വിലങ്ങു​ത​ടി​യാണ്‌ ദാരി​ദ്ര്യം. എച്ച്‌ഐവി/എയ്‌ഡ്‌സ്‌ പോലുള്ള രോഗങ്ങൾ കുതി​ക്കു​ക​യാണ്‌. എണ്ണമറ്റ രാജ്യ​ങ്ങ​ളിൽ അവ പൊതു​ജ​നാ​രോ​ഗ്യ​ത്തി​നു നേർക്കു​വെ​ച്ചി​രി​ക്കുന്ന ഒരു ടൈം​ബോംബ്‌ പോ​ലെ​യാണ്‌. കഴിഞ്ഞ അഞ്ച്‌ വർഷത്തി​നു​ള്ളിൽ ഏകദേശം രണ്ടു​കോ​ടി കുട്ടികൾ, തടയാൻ കഴിയു​മാ​യി​രുന്ന ജലജന്യ​രോ​ഗ​ങ്ങ​ളാൽ മരണമ​ടഞ്ഞു. കുടി​ക്കാൻ നല്ലവെ​ള്ള​വും ആവശ്യ​ത്തി​നു മാലി​ന്യ​നിർമാർജന സൗകര്യ​ങ്ങ​ളു​മി​ല്ലാ​തെ വൃത്തി​ഹീ​ന​വും ദുരിതം നിറഞ്ഞ​തു​മായ ചുറ്റു​പാ​ടു​ക​ളിൽ ജീവിതം തള്ളിനീ​ക്കുന്ന കോടി​ക്ക​ണ​ക്കിന്‌ ആളുകൾ ഇന്നുമുണ്ട്‌.”

[8, 9 പേജു​ക​ളി​ലെ ചതുരം/ചിത്രങ്ങൾ]

“അന്ത്യകാല”ത്തിന്റെ ചില പ്രത്യേ​ക​ത​കൾ

മുമ്പ്‌ ഉണ്ടായി​ട്ടി​ല്ലാ​ത്ത​വി​ധ​മുള്ള യുദ്ധങ്ങൾ.—മത്തായി 24:7; വെളി​പ്പാ​ടു 6:4.

ക്ഷാമം.—മത്തായി 24:7; വെളി​പ്പാ​ടു 6:5, 6, 8.

മഹാവ്യാധികൾ.—ലൂക്കൊസ്‌ 21:11; വെളി​പ്പാ​ടു 6:8.

പെരുകുന്ന അധർമം.—മത്തായി 24:12.

ഭൂമിയെ നശിപ്പി​ക്കൽ.—വെളി​പ്പാ​ടു 11:18.

വൻ ഭൂകമ്പങ്ങൾ.—ലൂക്കൊസ്‌ 21:11.

ദുർഘട സമയങ്ങൾ.—2 തിമൊ​ഥെ​യൊസ്‌ 3:1.

പണത്തോടുള്ള അത്യാർത്തി.—2 തിമൊ​ഥെ​യൊസ്‌ 3:2.

അനുസരണംകെട്ട മക്കൾ.—2 തിമൊ​ഥെ​യൊസ്‌ 3:2.

വാത്സല്യമില്ലാത്തവർ.—2 തിമൊ​ഥെ​യൊസ്‌ 3:3.

ദൈവത്തോടുള്ള സ്‌നേ​ഹ​ത്തെ​ക്കാൾ ഉല്ലാസത്തെ പ്രിയ​പ്പെ​ടു​ന്നവർ.—2 തിമൊ​ഥെ​യൊസ്‌ 3:4, 5.

അജിതേന്ദ്രിയന്മാർ അഥവാ ആത്മനി​യ​ന്ത്ര​ണ​മി​ല്ലാ​ത്തവർ.—2 തിമൊ​ഥെ​യൊസ്‌ 3:3.

സദ്‌ഗുണങ്ങളെ ദ്വേഷി​ക്കു​ന്നവർ.—2 തിമൊ​ഥെ​യൊസ്‌ 3:4.

പാഞ്ഞടുക്കുന്ന അപകടത്തെ തെല്ലും ഗൗനി​ക്കാ​ത്തവർ.—മത്തായി 24:39.

അന്ത്യകാലത്തിന്റെ തെളി​വു​കൾ പുച്ഛി​ച്ചു​ത​ള്ളുന്ന പരിഹാ​സി​കൾ.—2 പത്രൊസ്‌ 3:3, 4.

ദൈവരാജ്യത്തെക്കുറിച്ചുള്ള ആഗോള പ്രസം​ഗ​വേല.—മത്തായി 24:14.

[കടപ്പാട്‌]

© G.M.B. Akash/Panos Pictures

© Paul Lowe/Panos Pictures

[9-ാം പേജിലെ ചിത്രം]

ദൈവരാജ്യ സുവാർത്ത പ്രസം​ഗി​ക്കു​ന്ന​വ​രാ​യി യഹോ​വ​യു​ടെ സാക്ഷികൾ പരക്കെ അറിയ​പ്പെ​ടു​ന്നു