പൂപ്പൽ—ശത്രു​വും മിത്ര​വും!

സ്വീഡനിലെ ഉണരുക! ലേഖകൻ

ചില പൂപ്പലു​കൾ ജീവൻ രക്ഷിക്കു​ന്നു, എന്നാൽ ചിലത്‌ മരണത്തിന്‌ ഇടയാ​ക്കു​ന്നു. ചിലത്‌ ചീസി​ന്റെ​യും വീഞ്ഞി​ന്റെ​യും സ്വാദു വർധി​പ്പി​ക്കു​ന്നു; എന്നാൽ ചിലത്‌ ഭക്ഷ്യവ​സ്‌തു​ക്കളെ വിഷമ​യ​മാ​ക്കു​ന്നു. ചിലത്‌ തടിക​ളിൽ വളരുന്നു; മറ്റു ചിലത്‌ കുളി​മു​റി​ക​ളി​ലും പുസ്‌ത​ക​ങ്ങ​ളി​ലും പടർന്നു പിടി​ക്കു​ന്നു. വാസ്‌ത​വ​ത്തിൽ, പൂപ്പൽ എല്ലായി​ട​ത്തു​മുണ്ട്‌—എന്തിന​ധി​കം, ഈ വാചകം വായി​ച്ചു​കൊ​ണ്ടി​രി​ക്കു​മ്പോൾ പൂപ്പലു​ക​ളു​ടെ വിത്തു​ക​ളായ സ്‌പോ​റു​കൾ നിങ്ങളു​ടെ മൂക്കി​ലൂ​ടെ കടന്നു​പോ​കു​ന്നു​ണ്ടാ​യി​രി​ക്കാം.

നമുക്കു ചുറ്റും പൂപ്പലു​ണ്ടെന്നു നിങ്ങൾ സംശയി​ക്കു​ന്നെ​ങ്കിൽ, പുറത്തോ റെഫ്രി​ജ​റേ​റ്റ​റി​ലോ ഒരു കഷണം റൊട്ടി വെക്കുക. അധികം താമസി​യാ​തെ അതിൽ പഞ്ഞി​പോ​ലത്തെ ഒരു ആവരണം രൂപം​കൊ​ള്ളും—പൂപ്പൽ!

പൂപ്പൽ എന്താണ്‌?

കരിമ്പൻ, കൂണുകൾ, സസ്യ തുരു​മ്പു​കൾ, യീസ്റ്റുകൾ എന്നിവ ഉൾപ്പെടെ 1,00,000-ത്തിലധി​കം സ്‌പീ​ഷീ​സു​കൾ അടങ്ങുന്ന ഫംഗൈ സാമ്രാ​ജ്യ​ത്തിൽ ഉൾപ്പെ​ടു​ന്ന​താണ്‌ പൂപ്പൽ. ഏകദേശം 100 തരം ഫംഗസ്സു​കൾ മാത്രമേ മനുഷ്യ​രി​ലും മൃഗങ്ങ​ളി​ലും രോഗ​മു​ണ്ടാ​ക്കു​ന്ന​താ​യി കരുത​പ്പെ​ടു​ന്നു​ള്ളൂ. മറ്റു പലതും, മൃതമായ ജൈവ വസ്‌തു​ക്കളെ വിഘടി​പ്പി​ക്കു​ക​യും അങ്ങനെ അവശ്യ മൂലക​ങ്ങളെ സസ്യങ്ങൾക്ക്‌ ഉപയോ​ഗി​ക്കാൻ കഴിയുന്ന രൂപത്തിൽ പുനഃ​പ​ര്യ​യനം ചെയ്യു​ക​യും ചെയ്‌തു​കൊണ്ട്‌ ഭക്ഷ്യശൃം​ഖ​ല​യിൽ സുപ്ര​ധാ​ന​മായ പങ്കു വഹിക്കു​ന്നു. ഇനിയും ചിലത്‌ മണ്ണിൽനി​ന്നു പോഷ​കങ്ങൾ വലി​ച്ചെ​ടു​ക്കാൻ സസ്യങ്ങളെ സഹായി​ച്ചു​കൊണ്ട്‌ അവയു​മാ​യി പരാ​ശ്ര​യ​ബ​ന്ധങ്ങൾ സ്ഥാപി​ക്കു​ന്നു. ചിലതു പരാദ​ങ്ങ​ളാണ്‌.

വായു​വി​ലൊ​ഴു​കി നടക്കുന്ന സൂക്ഷ്‌മ​ക​ണ​ങ്ങ​ളായ സ്‌പോ​റു​ക​ളാ​യാണ്‌ പൂപ്പൽ ഉത്ഭവി​ക്കു​ന്നത്‌. മറ്റു കാര്യ​ങ്ങ​ളോ​ടൊ​പ്പം ശരിയായ അളവി​ലുള്ള ഊഷ്‌മാ​വും ഈർപ്പ​വു​മുള്ള അനു​യോ​ജ്യ​മായ ഭക്ഷ്യ​സ്രോ​ത​സ്സിൽ സ്‌പോ​റു​കൾ പതിക്കു​ക​യാ​ണെ​ങ്കിൽ അവ മുളയ്‌ക്കു​ക​യും ഹൈഫ എന്നറി​യ​പ്പെ​ടുന്ന നൂലു​പോ​ലുള്ള കോശങ്ങൾ രൂപം​കൊ​ള്ളു​ക​യും ചെയ്യും. അന്യോ​ന്യം പിണഞ്ഞു ചേർന്നു​ണ്ടാ​കുന്ന ഹൈഫ​ക​ളു​ടെ കൂട്ട​ത്തെ​യാണ്‌ മൈസീ​ലി​യം എന്നു വിളി​ക്കു​ന്നത്‌. മൈസീ​ലി​യം പഞ്ഞി​പോ​ലെ മൃദു​വാണ്‌. ഇതാണ്‌ നാം കാണുന്ന പൂപ്പൽ. കുളി​മു​റി​യി​ലെ ടൈൽസു​കൾക്കി​ട​യി​ലുള്ള വെള്ള സിമെന്റ്‌ പോലു​ള്ള​തിൽ രൂപം​കൊ​ള്ളു​മ്പോൾ പൂപ്പൽ അഴുക്കോ കറയോ പോലെ കാണ​പ്പെ​ട്ടേ​ക്കാം.

പ്രത്യു​ത്‌പാ​ദനം നടത്തു​ന്ന​തിൽ പൂപ്പൽ വിരു​ത​നാണ്‌. റൊട്ടി​യിൽ സാധാരണ കാണ​പ്പെ​ടുന്ന റൈ​സോ​പസ്‌ സ്റ്റോ​ളോ​ണി​ഫർ എന്ന പൂപ്പലിൽ കാണുന്ന സൂക്ഷ്‌മ​മായ കറുത്ത പുള്ളികൾ ബീജബി​ന്ദു​ക്കൾ അഥവാ സ്‌പൊ​റാ​ഞ്ചിയ ആണ്‌. ഓരോ ബീജബി​ന്ദു​വി​ലും 50,000-ത്തിനു​മേൽ സ്‌പോ​റു​കൾ അടങ്ങി​യി​ട്ടുണ്ട്‌, അതിൽ ഓരോ​ന്നി​നും ഏതാനും ദിവസ​ങ്ങൾക്കകം കോടി​ക്ക​ണ​ക്കി​നു പുതിയ സ്‌പോ​റു​കളെ ഉത്‌പാ​ദി​പ്പി​ക്കാൻ സാധി​ക്കും. അനുകൂല സാഹച​ര്യ​ങ്ങൾ ലഭിക്കു​ക​യാ​ണെ​ങ്കിൽ കാട്ടിലെ തടിയിൽ വളരു​ന്ന​തു​പോ​ലെ ഒരു പുസ്‌ത​ക​ത്തി​ലോ ബൂട്ടി​ലോ അല്ലെങ്കിൽ വാൾപേ​പ്പ​റി​ലോ വളരാൻ അതിനു നിഷ്‌പ്ര​യാ​സം സാധി​ക്കും.

പൂപ്പൽ “ആഹാരം അകത്താ​ക്കു​ന്നത്‌” എങ്ങനെ​യാണ്‌? ആദ്യം ആഹാരം കഴിക്കു​ക​യും പിന്നെ ദഹനത്തി​ലൂ​ടെ ആ ആഹാരം ആഗിരണം ചെയ്യു​ക​യും ചെയ്യുന്ന മനുഷ്യ​രിൽനി​ന്നും മൃഗങ്ങ​ളിൽനി​ന്നും വ്യത്യ​സ്‌ത​മാ​യി, പൂപ്പൽ ഈ പ്രക്രിയ നേരെ​തി​രി​ച്ചാ​ണു നിർവ​ഹി​ക്കു​ന്നത്‌. ജൈവ​ത​ന്മാ​ത്രകൾ പൂപ്പലു​കൾക്കു ഭക്ഷിക്കാൻ സാധി​ക്കാ​ത്ത​വി​ധം വളരെ വലുതും സങ്കീർണ​വു​മാ​കു​മ്പോൾ അവ ദഹനര​സങ്ങൾ പുറത്തു​വി​ടു​ന്നു. ഈ രസങ്ങൾ തന്മാ​ത്ര​കളെ കൂടുതൽ ലഘുവായ ഘടകങ്ങ​ളാ​യി വിഘടി​പ്പി​ക്കു​ക​യും പിന്നീട്‌ പൂപ്പൽ അവയെ ആഗിരണം ചെയ്യു​ക​യും ചെയ്യുന്നു.  തന്നെയു​മല്ല, പൂപ്പലു​കൾക്കു ഭക്ഷണം അന്വേ​ഷി​ച്ചു പോകാൻ സാധി​ക്കാ​ത്ത​തി​നാൽ അവ തങ്ങളുടെ ഭക്ഷണത്തിൽ തന്നെയാ​ണു വസിക്കു​ന്നത്‌.

പൂപ്പലു​കൾക്ക്‌ മൈ​ക്കൊ​ടോ​ക്‌സി​നു​കൾ എന്നറി​യ​പ്പെ​ടുന്ന വിഷവ​സ്‌തു​ക്കൾ ഉത്‌പാ​ദി​പ്പി​ക്കാൻ സാധി​ക്കും. ഇത്‌ മനുഷ്യ​രെ​യും മൃഗങ്ങ​ളെ​യും പ്രതി​കൂ​ല​മാ​യി ബാധി​ക്കാ​നി​ട​യുണ്ട്‌. ശ്വസന​ത്തി​ലൂ​ടെ​യോ വായി​ലൂ​ടെ​യോ ത്വക്കി​ലൂ​ടെ​യോ പൂപ്പൽ ശരീര​ത്തി​ന​കത്തു കടന്നേ​ക്കാം. പക്ഷേ അത്‌ എല്ലായ്‌പോ​ഴും അപകട​കാ​രി​യല്ല. പൂപ്പലിന്‌ പ്രയോ​ജ​ന​പ്ര​ദ​മായ പല സവി​ശേ​ഷ​ത​ക​ളു​മുണ്ട്‌.

പൂപ്പലി​ന്റെ പ്രയോ​ജ​ന​പ്ര​ദ​മായ സവി​ശേ​ഷ​ത​കൾ

1928-ൽ ശാസ്‌ത്ര​ജ്ഞ​നായ അലക്‌സാ​ണ്ടർ ഫ്‌ളെ​മിങ്‌ പച്ച നിറത്തി​ലുള്ള പൂപ്പലിന്‌ അണുക്കളെ നശിപ്പി​ക്കാൻ കഴിവു​ള്ള​താ​യി യാദൃ​ച്ഛി​ക​മാ​യി നിരീ​ക്ഷി​ച്ചു. പെനി​സി​ലി​യം നൊ​ട്ടേറ്റം എന്ന പേരിൽ പിന്നീടു തിരി​ച്ച​റി​യ​പ്പെ​ടാ​നി​ട​യായ ആ പൂപ്പൽ ബാക്ടീ​രി​യയെ നശിപ്പി​ക്കു​മെ​ങ്കി​ലും മനുഷ്യർക്കും മൃഗങ്ങൾക്കും ഹാനി​ക​ര​മ​ല്ലെന്നു തെളിഞ്ഞു. ഈ കണ്ടുപി​ടി​ത്തം “ആധുനിക വൈദ്യ​ശാ​സ്‌ത്ര​ത്തി​ലെ ഏറ്റവും വലിയ ജീവര​ക്ഷകൻ” എന്നറി​യ​പ്പെട്ട പെനി​സി​ലിൻ വികസി​പ്പി​ച്ചെ​ടു​ക്കു​ന്ന​തി​ലേക്കു നയിച്ചു. ഈ കണ്ടുപി​ടി​ത്ത​ത്തിന്‌ ഫ്‌ളെ​മി​ങ്ങി​നും സഹ ഗവേഷ​ക​രായ ഹോവാർഡ്‌ ഫ്‌ളോ​റി​ക്കും ഏണസ്റ്റ്‌ ചെയ്‌നി​നും 1945-ൽ വൈദ്യ​ശാ​സ്‌ത്ര​ത്തി​നുള്ള നോബൽ സമ്മാനം ലഭിച്ചു. അന്നുമു​തൽ, വളരെ​യ​ധി​കം ഔഷധ​പ​ദാർഥങ്ങൾ പൂപ്പലിൽനിന്ന്‌ ഉത്‌പാ​ദി​പ്പി​ച്ചി​രി​ക്കു​ന്നു—രക്തം കട്ടപി​ടി​ക്കൽ, കൊടി​ഞ്ഞി, പാർക്കിൻസൺസ്‌ രോഗം എന്നിവ ചികി​ത്സി​ക്കാ​നുള്ള മരുന്നു​കൾ ഇതിൽ പെടുന്നു.

ഭക്ഷണപ​ദാർഥ​ങ്ങൾക്കു വ്യത്യ​സ്‌ത​തരം രുചികൾ നൽകുന്ന കാര്യ​ത്തി​ലും പൂപ്പൽ ഒരു അനു​ഗ്ര​ഹ​മാണ്‌. ചീസ്സിന്റെ കാര്യ​മെ​ടു​ക്കുക. ബ്രീ, കാം​മെം​ബെർ, ഡാനിഷ്‌ ബ്ലൂ, ഗൊർഗോൻസോല, റോക്‌ഫോർട്ട്‌, സ്റ്റിൽട്ടൻ എന്നീ ചീസ്സുകൾ അവയുടെ തനതായ രുചി​കൾക്കാ​യി പെനി​സി​ലി​യ​ത്തി​ലെ ചില സ്‌പീ​ഷീ​സു​ക​ളോ​ടാ​ണു കടപ്പെ​ട്ടി​രി​ക്കു​ന്നത്‌. അതു​പോ​ലെ സലാമി, സോയാ സോസ്‌, ബിയർ എന്നിവ​യു​ടെ ഉത്‌പാ​ദ​ന​ത്തി​ലും ചിലതരം പൂപ്പലു​കൾ പങ്കുവ​ഹി​ക്കു​ന്നുണ്ട്‌.

വീഞ്ഞിന്റെ കാര്യ​ത്തി​ലും ഇതു സത്യമാണ്‌. ഉചിത​മായ സമയത്തു വിള​വെ​ടു​ക്കുന്ന, ഓരോ കുലയി​ലും ആവശ്യ​മായ അളവിൽ പൂപ്പലുള്ള, പാകമായ ചില മുന്തി​രി​കൾ വിശി​ഷ്ട​മായ വീഞ്ഞു​ത്‌പാ​ദ​ന​ത്തിന്‌ ഉപയോ​ഗി​ക്കു​ന്നു. ബോ​ട്രൈ​റ്റിസ്‌ സിനെ​രിയ അഥവാ “നോബിൾ റോട്ട്‌” എന്നറി​യ​പ്പെ​ടുന്ന പൂപ്പൽ മുന്തി​രി​യി​ലെ പഞ്ചസാ​ര​യു​ടെ അളവ്‌ വർധി​പ്പി​ക്കു​ക​യും തത്‌ഫ​ല​മാ​യി വീഞ്ഞിന്റെ സ്വാദു വർധി​ക്കു​ക​യും ചെയ്യുന്നു. വീഞ്ഞു കലവറ​യിൽ, വീഞ്ഞു മൂക്കുന്ന സമയത്ത്‌ ക്ലാഡോ​സ്‌പോ​റി​യം സെല്ലാറെ എന്ന പൂപ്പൽ അതിന്‌ ഒന്നുകൂ​ടി സ്വാദു വർധി​പ്പി​ക്കു​ന്നു. ഹംഗേ​റി​യൻ വീഞ്ഞു​ത്‌പാ​ദ​കർക്കി​ട​യി​ലുള്ള ഒരു പഴഞ്ചൊ​ല്ലി​ന്റെ പരാവർത്തനം ഇങ്ങനെ​യാണ്‌: “മേന്മയുള്ള പൂപ്പൽ നല്ല വീഞ്ഞ്‌ ഉത്‌പാ​ദി​പ്പി​ക്കു​ന്നു.”

പൂപ്പൽ ഒരു ശത്രു ആകു​മ്പോൾ

ചില പൂപ്പലു​ക​ളു​ടെ ഹാനി​ക​ര​മായ സ്വഭാ​വ​വി​ശേ​ഷ​ത​കൾക്കും നീണ്ട ചരി​ത്ര​മുണ്ട്‌. പൊ.യു.മു. ആറാം നൂറ്റാ​ണ്ടിൽ, അസ്സീറി​യ​ക്കാർ ശത്രു​ക്ക​ളു​ടെ കിണറു​കൾ വിഷമ​യ​മാ​ക്കാൻ കാൽവി​സെ​പ്‌സ്‌ പർപു​റിയ എന്ന പൂപ്പൽ ഉപയോ​ഗി​ച്ചു—ജൈവ​യു​ദ്ധ​ത്തി​ന്റെ ഒരു പ്രാചീന രൂപമാ​യി​രു​ന്നു അത്‌. ചില​പ്പോൾ വരകിനെ ബാധി​ക്കാ​റുള്ള ഈ പൂപ്പൽ മധ്യകാ​ല​ഘ​ട്ട​ങ്ങ​ളിൽ അനേക​രിൽ കോച്ചി​പ്പി​ടി​ത്തം, നീറ്റൽ, വ്രണങ്ങൾ, മതി​ഭ്രമം എന്നിവ​യ്‌ക്ക്‌ ഇടയാക്കി. ഇപ്പോൾ എർഗോ​ട്ടി​സം എന്ന്‌ അറിയ​പ്പെ​ടുന്ന ആ രോഗത്തെ സെന്റ്‌ ആന്റണീസ്‌ ഫയർ എന്നാണു വിളി​ച്ചി​രു​ന്നത്‌, കാരണം പല രോഗി​ക​ളും അത്ഭുത​ക​ര​മായ രോഗ​ശാ​ന്തി പ്രതീ​ക്ഷി​ച്ചു​കൊണ്ട്‌ ഫ്രാൻസി​ലെ അന്തോ​ണീസ്‌ പുണ്യ​വാ​ളന്റെ ദൈവാ​ല​യ​ത്തി​ലേക്കു തീർഥാ​ടനം നടത്തി.

അറിയ​പ്പെ​ടു​ന്ന​തിൽവെച്ച്‌ കാൻസ​റി​നു കാരണ​മാ​കുന്ന ഏറ്റവും മാരക​മായ പദാർഥം അഫ്‌ളാ​ടോ​ക്‌സിൻ ആണ്‌.  ഈ വിഷം ഉത്‌പാ​ദി​പ്പി​ക്കു​ന്ന​തും പൂപ്പലാണ്‌. ഒരു ഏഷ്യൻ രാജ്യത്ത്‌, ഓരോ വർഷവും അഫ്‌ളാ​ടോ​ക്‌സിൻ 20,000 പേരുടെ മരണത്തിന്‌ ഇടയാ​ക്കു​ന്നു. ഈ മാരക പദാർഥം ആധുനിക ജൈവാ​യു​ധ​ങ്ങ​ളിൽ ഉപയോ​ഗി​ച്ചു​വ​രു​ന്നു.

എന്നിരു​ന്നാ​ലും അനുദി​ന​ജീ​വി​ത​ത്തിൽ സാധാരണ പൂപ്പലു​ക​ളു​മാ​യി സമ്പർക്ക​ത്തിൽ വരുന്ന​തി​ന്റെ ലക്ഷണങ്ങൾ ഗുരു​ത​ര​മായ ആരോഗ്യ ഭീഷണി എന്നതി​ലു​പരി അസഹ്യ​പ്പെ​ടു​ത്തു​ന്ന​താണ്‌. “മിക്ക പൂപ്പലു​ക​ളും, അവയുടെ മണം നിങ്ങൾക്ക്‌ അനുഭ​വ​പ്പെ​ടു​ന്നെ​ങ്കിൽപ്പോ​ലും, ദോഷ​മൊ​ന്നും ചെയ്യു​ക​യില്ല” എന്ന്‌ യുസി ബെർക്ലി വെൽനസ്‌ ലെറ്റർ പറയുന്നു. സാധാരണ ഇതി​നോട്‌ അസഹ്യ​ത​യോ​ടെ പ്രതി​ക​രി​ക്കു​ന്ന​വ​രിൽ ആസ്‌തമ പോലുള്ള ശ്വാസ​കോശ തകരാ​റു​ള്ള​വ​രും അലർജി​കൾ, രാസസം​വേ​ദ​ക​ത്വം അല്ലെങ്കിൽ ദുർബ​ല​മായ രോഗ​പ്ര​തി​രോധ വ്യവസ്ഥ ഉള്ളവരും വലിയ അളവിൽ പൂപ്പലു​മാ​യി സമ്പർക്ക​ത്തിൽ വരുന്ന കർഷക​രും ഉൾപ്പെ​ടു​ന്നു. പൂപ്പലു​മാ​യി സമ്പർക്ക​ത്തിൽ വരുന്ന​തി​ന്റെ ഫലങ്ങൾ കുഞ്ഞു​ങ്ങ​ളി​ലും പ്രായം ചെന്നവ​രി​ലും കൂടുതൽ തീവ്ര​മാ​യി​രു​ന്നേ​ക്കാം.

‘ശ്വസന തകരാ​റു​ക​ളായ വലിവ്‌, ശ്വാസ​ത​ടസ്സം, ത്വരി​ത​ഗ​തി​യി​ലുള്ള ശ്വാ​സോ​ച്ഛ്വാ​സം, മൂക്കട​പ്പും കഫക്കെ​ട്ടും, കണ്ണിലെ അസ്വസ്ഥത (ചൂടാ​കു​ക​യോ വെള്ളം വരുക​യോ അല്ലെങ്കിൽ ചുവക്കു​ക​യോ ചെയ്യുക), കുത്തി​ക്കു​ത്തി​യുള്ള വരണ്ട ചുമ, മൂക്കി​ലോ തൊണ്ട​യി​ലോ ഉള്ള അസ്വസ്ഥത, ത്വക്കിലെ തടിപ്പ്‌ അല്ലെങ്കിൽ ചൊറി​ച്ചിൽ’ എന്നീ ലക്ഷണങ്ങൾ പൂപ്പൽ ഉളവാ​ക്കി​യേ​ക്കാ​മെന്ന്‌ ഐക്യ​നാ​ടു​ക​ളി​ലെ കാലി​ഫോർണി​യ​യി​ലുള്ള ഡിപ്പാർട്ടു​മെന്റ്‌ ഓഫ്‌ ഹെൽത്ത്‌ സർവീ​സസ്‌ പറയുന്നു.

പൂപ്പലും കെട്ടി​ട​ങ്ങ​ളും

പൂപ്പൽ നിവാ​ര​ണ​ത്തി​നാ​യി സ്‌കൂ​ളു​കൾ അടച്ചി​ട്ട​താ​യോ ആളുകൾക്കു വീടു​ക​ളും ഓഫീ​സു​ക​ളും ഒഴി​യേണ്ടി വന്നതാ​യോ കേൾക്കു​ന്നതു ചില രാജ്യ​ങ്ങ​ളിൽ വളരെ സാധാ​ര​ണ​മാണ്‌. സ്വീഡ​നി​ലെ സ്റ്റോക്‌ഹോ​മിൽ പുതി​യ​താ​യി തുറന്ന മ്യൂസി​യം ഓഫ്‌ മോഡേൺ ആർട്ട്‌സ്‌ 2002-ന്റെ ആരംഭ​ത്തിൽ പൂപ്പൽ കാരണം അടച്ചി​ടേ​ണ്ടി​വന്നു. പൂപ്പൽ നിവാ​ര​ണ​ത്തിന്‌ ഏകദേശം 22.5 കോടി രൂപ ചെലവു​വന്നു. എന്തു​കൊ​ണ്ടാണ്‌ അടുത്ത​കാ​ലത്ത്‌ ഈ പ്രശ്‌നം വളരെ സാധാ​ര​ണ​മാ​യി​രി​ക്കു​ന്നത്‌?

ഉത്തരത്തിൽ രണ്ടു പ്രധാന ഘടകങ്ങൾ അടങ്ങി​യി​രി​ക്കു​ന്നു: നിർമാണ വസ്‌തു​ക്ക​ളും രൂപകൽപ്പ​ന​യും. അടുത്ത കാലത്താ​യി നിർമാണ വസ്‌തു​ക്ക​ളിൽ പൂപ്പലി​ന്റെ ആക്രമ​ണ​ത്തിന്‌ എളുപ്പം വിധേ​യ​മാ​കുന്ന ഉത്‌പ​ന്നങ്ങൾ ഉൾപ്പെ​ടു​ത്തു​ന്നു. ഡ്രൈ​വാൾ അല്ലെങ്കിൽ ജിപ്‌സം ബോർഡ്‌ ആണ്‌ ഒരു ഉദാഹ​രണം. പ്രബല​മാ​ക്കിയ ജിപ്‌സം പ്ലാസ്റ്റർ, ഉറപ്പുള്ള കടലാസ്‌ പാളി​കൾക്കി​ട​യിൽ നിറച്ചാണ്‌ ഇതു നിർമി​ക്കു​ന്നത്‌. ജിപ്‌സം പ്ലാസ്റ്ററിൽ ഈർപ്പം നിലനിൽക്കും. അതു​കൊണ്ട്‌ ജിപ്‌സം ബോർഡ്‌ വളരെ​ക്കാ​ലം നനഞ്ഞി​രു​ന്നാൽ, പൂപ്പലു​ക​ളു​ടെ വിത്തായ സ്‌പോ​റു​കൾ മുളയ്‌ക്കു​ക​യും അതിലെ കടലാസു ഭക്ഷിച്ചു​കൊ​ണ്ടു വളരു​ക​യും ചെയ്യും.

രൂപകൽപ്പ​ന​കൾക്കും മാറ്റം സംഭവി​ച്ചി​രി​ക്കു​ന്നു. 1970-കൾക്കു മുമ്പ്‌, ഐക്യ​നാ​ടു​ക​ളി​ലെ​യും മറ്റു പല രാജ്യ​ങ്ങ​ളി​ലെ​യും മിക്ക കെട്ടി​ട​ങ്ങ​ളും പിന്നീ​ടു​വന്ന രൂപകൽപ്പ​ന​ക​ളിൽനി​ന്നു വ്യത്യ​സ്‌ത​മാ​യി കൂടുതൽ ചൂടും വായു​വും കടത്തി​വി​ടു​ന്ന​താ​യി​രു​ന്നു. വായു​സ​ഞ്ചാ​ര​വും താപന​ഷ്ട​വും ആർജന​വും കുറച്ചു​കൊണ്ട്‌ ഊർജം കൂടുതൽ കാര്യ​ക്ഷ​മ​മാ​യി ഉപയോ​ഗി​ക്കാൻ കെട്ടി​ട​ങ്ങളെ പ്രാപ്‌ത​മാ​ക്കു​ക​യെന്ന ആഗ്രഹ​ത്തി​ന്റെ ഫലമാ​യി​ട്ടാണ്‌ ഈ മാറ്റങ്ങൾ വന്നത്‌. ഇക്കാര​ണ​ത്താൽ കെട്ടി​ടങ്ങൾ ഇപ്പോൾ കൂടുതൽ കാലം ഈർപ്പം നിലനി​റു​ത്തു​ന്നു. ഇത്‌ പൂപ്പൽ വളർച്ച​യ്‌ക്കു സഹായ​ക​മാ​കു​ന്നു. പ്രശ്‌ന​ത്തിന്‌ ഒരു പരിഹാ​ര​മു​ണ്ടോ?

പൂപ്പൽ മൂലമു​ണ്ടാ​കുന്ന പ്രശ്‌നങ്ങൾ പരിഹ​രി​ക്കാൻ, കുറഞ്ഞ​പക്ഷം ലഘൂക​രി​ക്കാ​നുള്ള ഏറ്റവും ഫലപ്ര​ദ​മായ മാർഗം വീടിന്‌ അകത്തുള്ള എല്ലാ വസ്‌തു​ക്ക​ളും വൃത്തി​യാ​യും നനവു തട്ടാ​തെ​യും സൂക്ഷി​ക്കു​ന്ന​തും ഈർപ്പ​ത്തി​ന്റെ അളവു കുറയ്‌ക്കു​ന്ന​തു​മാണ്‌. എവി​ടെ​യെ​ങ്കി​ലും ഈർപ്പം തങ്ങിനിൽക്കു​ക​യാ​ണെ​ങ്കിൽ പെട്ടെ​ന്നു​തന്നെ നനവു നീക്കം​ചെ​യ്യുക. അതു​പോ​ലെ, വെള്ളം വീണ്ടും കെട്ടി​നിൽക്കാ​തി​രി​ക്കാൻ ആവശ്യ​മായ മാറ്റങ്ങ​ളോ കേടു​പോ​ക്ക​ലു​ക​ളോ വരുത്തുക. ഉദാഹ​ര​ണ​ത്തിന്‌ മേൽക്കൂ​ര​യും ഓവു​ക​ളും വൃത്തി​യാ​യും കേടു​പാ​ടി​ല്ലാ​തെ​യും സൂക്ഷി​ക്കുക. കെട്ടി​ട​ത്തി​ന്റെ അടിസ്ഥാ​ന​ത്തി​നു ചുറ്റും വെള്ളം കെട്ടി​നിൽക്കാ​തി​രി​ക്കാൻ കെട്ടി​ട​ത്തി​നു ചുറ്റു​മുള്ള സ്ഥലം തറനി​ര​പ്പി​ല​ല്ലെന്ന്‌ ഉറപ്പു​വ​രു​ത്തുക. എയർ കണ്ടീഷനർ ഉണ്ടെങ്കിൽ, ഡ്രിപ്പ്‌ പാനുകൾ വൃത്തി​യാ​യും ഡ്രയിൻ ലൈനു​ക​ളി​ലെ തടസ്സങ്ങൾ നീക്കി​യും സൂക്ഷി​ക്കുക.

“പൂപ്പൽ നിയ​ന്ത്ര​ണ​ത്തി​നുള്ള താക്കോൽ ഈർപ്പ നിയ​ന്ത്ര​ണ​മാണ്‌” എന്ന്‌ ഒരു ആധികാ​രിക ഉറവിടം പറയുന്നു. ലളിത​മായ നടപടി​കൾ സ്വീക​രി​ക്കു​ക​യാ​ണെ​ങ്കിൽ പൂപ്പലു​ക​ളു​ടെ അനഭി​കാ​മ്യ വിശേ​ഷ​ത​ക​ളു​മാ​യുള്ള പോരാ​ട്ട​ത്തിൽനി​ന്നു നിങ്ങളും നിങ്ങളു​ടെ കുടും​ബാം​ഗ​ങ്ങ​ളും ഒഴിവു​ള്ള​വ​രാ​യി​രി​ക്കും. ചില വിധങ്ങ​ളിൽ പൂപ്പൽ അഗ്നി സമാന​മാണ്‌. അതിന്‌ ഉപദ്ര​വ​ക​ര​മാ​യി​രി​ക്കാൻ കഴിയും, എന്നാൽ അങ്ങേയറ്റം ഉപകാ​ര​പ്ര​ദ​മാ​യി​രി​ക്കാ​നും കഴിയും. ഏറെയും ആശ്രയി​ച്ചി​രി​ക്കു​ന്നത്‌, നാം അത്‌ എങ്ങനെ ഉപയോ​ഗി​ക്കു​ക​യും നിയ​ന്ത്രി​ക്കു​ക​യും ചെയ്യുന്നു എന്നതി​നെ​യാണ്‌. തീർച്ച​യാ​യും പൂപ്പലി​നെ​ക്കു​റിച്ച്‌ ഇനിയും വളരെ​യ​ധി​കം കാര്യങ്ങൾ നമുക്കു മനസ്സി​ലാ​ക്കാ​നുണ്ട്‌. ദൈവ​ത്തി​ന്റെ വിസ്‌മ​യാ​വ​ഹ​മായ സൃഷ്ടി​ക​ളെ​ക്കു​റി​ച്ചുള്ള അറിവ്‌ നമുക്കു പ്രയോ​ജ​നമേ ചെയ്യൂ.

[14, 15 പേജു​ക​ളി​ലെ ചതുരം/ചിത്രം]

ബൈബി​ളിൽ പൂപ്പലി​നെ​ക്കു​റി​ച്ചു പരാമർശ​മു​ണ്ടോ?

ബൈബി​ളിൽ “വീട്ടിൽ കുഷ്‌ഠ​ബാധ” എന്ന ഒരു പരാമർശം നാം കാണുന്നു. കെട്ടി​ട​ത്തി​നു​ത​ന്നെ​യുള്ള ബാധ​യെ​യാണ്‌ അത്‌ അർഥമാ​ക്കു​ന്നത്‌. (ലേവ്യ​പു​സ്‌തകം 14:34-48) “തിന്നെ​ടു​ക്കുന്ന കുഷ്‌ഠം” എന്നും അറിയ​പ്പെ​ടുന്ന ഈ പ്രതി​ഭാ​സം ഒരുതരം കരിമ്പ​നോ പൂപ്പലോ ആയിരു​ന്നി​രി​ക്കാ​നി​ട​യുണ്ട്‌ എന്ന അഭി​പ്രാ​യ​മു​ണ്ടെ​ങ്കി​ലും ഇതി​നെ​ക്കു​റിച്ച്‌ അനിശ്ചി​ത​ത്വം നിലനിൽക്കു​ന്നു. അത്‌ എന്തായാ​ലും, ബാധി​ക്ക​പ്പെ​ട്ട​താ​യി തോന്നുന്ന കല്ലുക​ളെ​ല്ലാം വീട്ടു​ട​മസ്ഥർ നീക്കണ​മെ​ന്നും വീടിന്റെ അകം ഒക്കെയും ചുരണ്ടി​ക്ക​ള​യ​ണ​മെ​ന്നും സംശയ​മുള്ള വസ്‌തു​ക്ക​ളെ​ല്ലാം പട്ടണത്തി​നു പുറത്ത്‌ ഒരു “അശുദ്ധ​സ്ഥ​ലത്തു” ഉപേക്ഷി​ക്ക​ണ​മെ​ന്നും ദൈവ​ത്തി​ന്റെ നിയമം അനുശാ​സി​ച്ചു. വീട്ടിൽ പിന്നെ​യും ബാധയു​ണ്ടാ​യാൽ മുഴു വീടും അശുദ്ധ​മാ​യി പ്രഖ്യാ​പിച്ച്‌ അത്‌ ഇടിച്ചു​പൊ​ളി​ക്കു​ക​യും ഉപേക്ഷി​ക്കു​ക​യും ചെയ്യണ​മാ​യി​രു​ന്നു. യഹോ​വ​യു​ടെ വിശദ​മായ നിർദേ​ശങ്ങൾ, തന്റെ ജനത്തി​ലും അവരുടെ ഭൗതിക ക്ഷേമത്തി​ലു​മുള്ള അവന്റെ ആഴമായ താത്‌പ​ര്യ​ത്തെ പ്രതി​ഫ​ലി​പ്പി​ച്ചു.

[13-ാം പേജിലെ ചിത്രം]

പൂപ്പലിൽനിന്ന്‌ എടുക്കുന്ന ഔഷധങ്ങൾ നിരവധി ജീവൻ രക്ഷിച്ചി​ട്ടുണ്ട്‌

[15-ാം പേജിലെ ചിത്രം]

ഡ്രൈവാളും വൈന​ലും ഈർപ്പം ആഗിരണം ചെയ്യുന്നു, ഇത്‌ പൂപ്പൽ വളർച്ച​യ്‌ക്കു വളമാ​കു​ന്നു