ഉലകം ചുറ്റിയ കാപ്പി

ഒരു മനുഷ്യൻ ഒരു കാപ്പി​ത്തൈ​യോ​ടു കാണിച്ച പ്രതി​ബ​ദ്ധ​ത​യു​ടെ കഥയെ “കാപ്പി​ച്ചെ​ടി​യു​ടെ വ്യാപ​ന​ത്തെ​ക്കു​റി​ച്ചുള്ള ചരി​ത്ര​ത്തി​ലെ ഏറ്റവും മനംക​വ​രുന്ന അധ്യായം” എന്നു വിശേ​ഷി​പ്പി​ക്കു​ന്നു​വെന്ന്‌ “ഓൾ എബൗട്ട്‌ കോഫി” എന്ന പുസ്‌തകം പറയുന്നു. വാർഷി​ക​മാ​യി 3.15 ലക്ഷം കോടി രൂപ നേടുന്ന ഇന്നത്തെ കാപ്പി വ്യവസാ​യം ആരംഭി​ക്കു​ന്ന​തിൽ ആ ചെറു​ചെടി പ്രധാ​ന​പ്പെട്ട ഒരു പങ്കുവ​ഹി​ച്ചെ​ന്നും ഡോളർ നിരക്കിൽ നോക്കു​ക​യാ​ണെ​ങ്കിൽ പെ​ട്രോ​ളി​യ​ത്തി​ന്റെ ആഗോള വ്യാപാ​രം മാത്ര​മാണ്‌ കാപ്പി വ്യവസാ​യത്തെ കവച്ചു​വെ​ക്കു​ന്ന​തെ​ന്നും “സയന്റി​ഫിക്‌ അമേരി​ക്കൻ” എന്ന പത്രിക പറയുന്നു.

കാപ്പി​യു​ടെ വിസ്‌മ​യ​ജ​ന​ക​മായ കഥ ആരംഭി​ക്കു​ന്നത്‌ എത്യോ​പ്യൻ മലനി​ര​ക​ളി​ലാണ്‌. അവി​ടെ​യാണ്‌ കാപ്പി​ച്ചെടി ജന്മം​കൊ​ണ്ടത്‌. കോഫിയ അറബിക്ക എന്നു വിളി​ക്ക​പ്പെ​ടുന്ന അതിന്റെ പിൻത​ല​മു​റ​ക്കാ​രിൽനി​ന്നാണ്‌ ആഗോള കാപ്പി ഉത്‌പാ​ദ​ന​ത്തി​ന്റെ മൂന്നിൽ രണ്ടു ഭാഗം ലഭ്യമാ​കു​ന്നത്‌. വറുത്ത കാപ്പി​ക്കു​രു​വി​ന്റെ ഗുണങ്ങൾ കൃത്യ​മാ​യി കണ്ടെത്തി​യത്‌ എപ്പോ​ഴാണ്‌ എന്നതു സംബന്ധി​ച്ചുള്ള അനിശ്ചി​ത​ത്വം നിലനിൽക്കു​ന്നെ​ങ്കി​ലും പൊ.യു. 15-ാം നൂറ്റാ​ണ്ടിൽ അറേബ്യൻ ഉപദ്വീ​പിൽ അറബിക്ക കാപ്പി കൃഷി ചെയ്യ​പ്പെ​ട്ടി​രു​ന്നു. പ്രത്യു​ത്‌പാ​ദ​ന​ശേ​ഷി​യുള്ള വിത്തുകൾ കയറ്റു​മതി ചെയ്യു​ന്നത്‌ നിരോ​ധി​ക്ക​പ്പെ​ട്ടി​രു​ന്നെ​ങ്കി​ലും 1616-ൽ ഡച്ചുകാർ, ചെടി​ക​ളോ പ്രത്യു​ത്‌പാ​ദ​ന​ശേ​ഷി​യുള്ള വിത്തു​ക​ളോ കൈവ​ശ​മാ​ക്കി. അധികം താമസി​യാ​തെ അവർ, ഇപ്പോൾ ശ്രീലങ്ക എന്നറി​യ​പ്പെ​ടുന്ന സിലോ​ണി​ലും നിലവിൽ ഇന്തൊ​നീ​ഷ്യ​യു​ടെ ഭാഗമായ ജാവയി​ലും തോട്ടങ്ങൾ സ്ഥാപിച്ചു.

1706-ൽ ഡച്ചുകാർ ജാവയി​ലുള്ള തോട്ട​ങ്ങ​ളിൽനിന്ന്‌ ഒരു കാപ്പി​ത്തൈ നെതർലൻഡ്‌സി​ലെ ആംസ്റ്റർഡാ​മി​ലുള്ള സസ്യശാ​സ്‌ത്ര ഉദ്യാ​ന​ത്തി​ലേക്കു മാറ്റി. ചെടി തഴച്ചു​വ​ളർന്നു. പിന്നീട്‌ അതിന്റെ തൈകൾ സുരി​നാ​മി​ലും കരീബി​യ​നി​ലു​മുള്ള ഡച്ച്‌ കോള​നി​ക​ളി​ലേക്കു കയറ്റി അയച്ചു. 1714-ൽ ആംസ്റ്റർഡാ​മി​ലെ മേയർ അതിൽ ഒരു തൈ ഫ്രാൻസി​ലെ ലൂയി പതിന്നാ​ലാ​മൻ രാജാ​വി​നു കൊടു​ത്തു. രാജാവ്‌ അത്‌ പാരീ​സി​ലെ രാജകീയ ഉദ്യാ​ന​മായ ഷാർദാൻ ഡി പ്ലാന്റിലെ ഹരിത​ഗൃ​ഹ​ത്തിൽ നട്ടുപി​ടി​പ്പി​ക്കാൻ ഏർപ്പാ​ടാ​ക്കി.

 കാപ്പി വ്യാപാ​ര​ത്തിൽ ഏർപ്പെ​ടാൻ ഫ്രഞ്ചു​കാർക്കു തിടു​ക്ക​മാ​യി. അവർ വിത്തു​ക​ളും തൈക​ളും വാങ്ങി റീയൂ​ണി​യൻ ദ്വീപി​ലേക്കു കയറ്റി അയച്ചു. വിത്തുകൾ കിളിർത്തി​ല്ലെന്നു മാത്രമല്ല ചില ആധികാ​രിക ഉറവു​ക​ള​നു​സ​രിച്ച്‌ ഒന്നൊ​ഴി​കെ മറ്റെല്ലാ തൈക​ളും നശിച്ചു​പോ​കു​ക​യും ചെയ്‌തു. എന്നിരു​ന്നാ​ലും ആ ഒരൊറ്റ ചെടി​യിൽനിന്ന്‌ ഉണ്ടായ 15,000 വിത്തുകൾ പാകി മുളപ്പി​ക്കു​ക​യും 1720-ൽ ഒരു തോട്ടം സ്ഥാപി​ക്ക​പ്പെ​ടു​ക​യും ചെയ്‌തു. ആരെങ്കി​ലും ഒരു ചെടി നശിപ്പി​ക്കു​ന്ന​താ​യി കണ്ടാൽ അയാൾ മരണശി​ക്ഷ​യ്‌ക്ക്‌ അർഹനാ​കു​മാ​യി​രു​ന്നു. അത്രയ്‌ക്കു അമൂല്യ​മാ​യി​രു​ന്നു ആ ചെടികൾ! കരീബി​യ​നി​ലും തോട്ടങ്ങൾ സ്ഥാപി​ക്കാൻ ഫ്രഞ്ചു​കാർ പദ്ധതി​യി​ട്ടു, പക്ഷേ അവരുടെ ആദ്യത്തെ രണ്ട്‌ ഉദ്യമ​ങ്ങ​ളും പരാജ​യ​പ്പെട്ടു.

പാരീ​സിൽ അവധി​ക്കാ​ലം ചെലവി​ടു​ക​യാ​യി​രുന്ന ഫ്രഞ്ച്‌ നാവിക ഉദ്യോ​ഗ​സ്ഥ​നായ ഗബ്രി​യേൽ മത്തിയൂ ദെ ക്ലിയു ഫ്രാൻസിൽനി​ന്നു മടങ്ങി​പ്പോ​കു​മ്പോൾ മാർട്ടി​നി​ക്കി​ലുള്ള തന്റെ തോട്ട​ത്തിൽ വെച്ചു​പി​ടി​പ്പി​ക്കാൻ ഒരു കാപ്പി​ച്ചെ​ടി​യും കൂടെ കൊണ്ടു​പോ​കണം എന്നത്‌ വ്യക്തി​പ​ര​മായ ഒരു ദൗത്യ​മാ​യി ഏറ്റെടു​ത്തു. പാരീ​സിൽനി​ന്നുള്ള ഒരു കാപ്പി​ത്തൈ​യു​മാ​യി 1723 മേയിൽ അദ്ദേഹം മാർട്ടി​നി​ക്കി​ലേക്കു യാത്ര തിരിച്ചു.

യാത്രാ​വേ​ള​യിൽ ചെടിക്ക്‌ സൂര്യ​പ്ര​കാ​ശം ആഗിരണം ചെയ്യു​ന്ന​തി​നും മൂടി​ക്കെ​ട്ടിയ ദിവസ​ങ്ങ​ളിൽ ഊഷ്‌മാവ്‌ നിലനി​റു​ത്തു​ന്ന​തി​നും വേണ്ടി ദെ ക്ലിയു തന്റെ വിലപ്പെട്ട ചെടി ഭാഗി​ക​മാ​യി ചില്ലു​കൊ​ണ്ടു നിർമിച്ച ഒരു പെട്ടി​ക്കു​ള്ളിൽ പ്രതി​ഷ്‌ഠി​ച്ചു എന്ന്‌ ഓൾ എബൗട്ട്‌ കോഫി വിശദീ​ക​രി​ക്കു​ന്നു. ദെ ക്ലിയു അങ്ങനെ നേട്ടം കൊ​യ്യേ​ണ്ടെന്നു വിചാ​രിച്ച, അദ്ദേഹ​ത്തോട്‌ അസൂയ തോന്നി​യി​രി​ക്കാ​വുന്ന ഒരു സഹയാ​ത്രി​കൻ അദ്ദേഹ​ത്തിൽനി​ന്നു ചെടി പിടി​ച്ചു​പ​റി​ക്കാൻ ശ്രമിച്ചു. പക്ഷേ വിജയി​ച്ചില്ല, ചെടി അതിജീ​വി​ച്ചു. ടുണീ​ഷ്യൻ കടൽക്കൊ​ള്ള​ക്കാ​രിൽനി​ന്നു കപ്പലിനു നേരി​ടേ​ണ്ടി​വന്ന ആക്രമണം, ശക്തമായ കൊടു​ങ്കാറ്റ്‌, ഡോൾഡ്രം​സു​ക​ളിൽ (കാറ്റി​ല്ലാത്ത കടൽ) കപ്പൽ മുന്നോ​ട്ടു നീങ്ങാതെ വന്നപ്പോ​ഴു​ണ്ടായ ശുദ്ധജല ദൗർല​ഭ്യം എന്നിവ​യെ​യും അതിജീ​വി​ക്കാൻ ചെടിക്കു കഴിഞ്ഞു. ദെ ക്ലിയു ഇപ്രകാ​രം എഴുതി. “ഞാൻ സുന്ദര പ്രതീ​ക്ഷകൾ അർപ്പി​ച്ചി​രുന്ന, എന്റെ ആനന്ദത്തി​ന്റെ ഉറവായ ആ ചെടി​യു​മാ​യി ഒരു മാസത്തി​ല​ധി​കം സമയ​ത്തേക്ക്‌ എന്റെ പരിമി​ത​മായ ജലവി​ഹി​തം പങ്കു​വെ​ക്കാൻ ഞാൻ നിർബ​ന്ധി​ത​നാ​യി. അത്രമാ​ത്രം ജലദൗർല​ഭ്യ​മു​ണ്ടാ​യി​രു​ന്നു.”

ദെ ക്ലിയു കാണിച്ച പ്രതി​ബദ്ധത വെറു​തെ​യാ​യില്ല. നല്ല കരു​ത്തോ​ടെ മാർട്ടി​നി​ക്കിൽ എത്തി​ച്ചേർന്ന അദ്ദേഹ​ത്തി​ന്റെ കാപ്പി​ച്ചെടി തഴച്ചു​വ​ള​രു​ക​യും ഉഷ്‌ണ​മേ​ഖലാ കാലാ​വ​സ്ഥ​യിൽ വർധി​ക്കു​ക​യും ചെയ്‌തു. “ഈ ഒരൊറ്റ ചെടി​യിൽനിന്ന്‌ ബ്രസീൽ, ഫ്രഞ്ച്‌ ഗയാന, സുരി​നാം എന്നീ രാജ്യ​ങ്ങ​ളൊ​ഴി​കെ അമേരി​ക്ക​ക​ളി​ലെ മറ്റെല്ലാ രാജ്യ​ങ്ങൾക്കും നേരി​ട്ടോ അല്ലാ​തെ​യോ മാർട്ടി​നിക്‌ വിത്തുകൾ വിതരണം ചെയ്‌തു” എന്ന്‌ കോഫി എന്ന തന്റെ പുസ്‌ത​ക​ത്തിൽ ഗോർഡൻ റിഗ്‌ളി പറയുന്നു.

അപ്പോ​ഴേ​ക്കും ബ്രസീ​ലി​നും ഫ്രഞ്ച്‌ ഗയാന​യ്‌ക്കും കാപ്പി​ച്ചെ​ടി​കൾ വേണ​മെ​ന്നാ​യി. സുരി​നാ​മിൽ, ഡച്ചുകാ​രു​ടെ കൈവശം അപ്പോ​ഴും ആംസ്റ്റർഡാ​മിൽനി​ന്നുള്ള കാപ്പി​ച്ചെ​ടി​യു​ടെ തൈക​ളു​ണ്ടാ​യി​രു​ന്നു, പക്ഷേ അവർ വളരെ രഹസ്യ​മാ​യി​ട്ടാണ്‌ അവ സൂക്ഷി​ച്ചി​രു​ന്നത്‌. എന്നിരു​ന്നാ​ലും, സുരി​നാ​മി​ലേക്കു കടന്ന്‌ അവി​ടെ​നി​ന്നു കുറച്ചു വിത്തുകൾ മോഷ്ടി​ച്ചു​കൊ​ണ്ടു​വന്ന ഒരു കുറ്റവാ​ളി​യിൽനിന്ന്‌ 1722-ൽ ഫ്രഞ്ച്‌ ഗയാന വിത്തുകൾ സമ്പാദി​ച്ചു. വിത്തുകൾ നൽകു​ന്ന​തി​നു പകരമാ​യി അയാളെ മോചി​പ്പി​ക്കാ​മെന്ന്‌ ഫ്രഞ്ച്‌ ഗയാന​യി​ലെ അധികാ​രി​കൾ സമ്മതിച്ചു. അവർ അവനെ സ്വന്തം നാട്ടി​ലേക്ക്‌ അയയ്‌ക്കു​ക​യും ചെയ്‌തു

തുടക്ക​ത്തിൽ, പ്രത്യു​ത്‌പാ​ദ​ന​ശേ​ഷി​യുള്ള വിത്തു​ക​ളോ തൈക​ളോ ബ്രസീ​ലി​ലേക്കു കൊണ്ടു​വ​രാൻ നടത്തിയ രഹസ്യ ശ്രമങ്ങൾ വിഫല​മാ​യി. അങ്ങനെ​യി​രി​ക്കെ സുരി​നാ​മി​നും ഫ്രഞ്ച്‌ ഗയാന​യ്‌ക്കും ഇടയിൽ ഒരു അതിർത്തി​പ്ര​ശ്‌നം ഉടലെ​ടു​ത്തു. മധ്യസ്ഥത വഹിക്കാൻ ഒരാളെ അയയ്‌ക്ക​ണ​മെന്ന്‌ അവർ ബ്രസീ​ലി​നോട്‌ ആവശ്യ​പ്പെട്ടു. ബ്രസീൽ സൈനിക ഉദ്യോ​ഗ​സ്ഥ​നായ ഫ്രാൻസി​സ്‌കൂ ഡി മേലു പാൽയെ​റ്റയെ ഫ്രഞ്ച്‌ ഗയാന​യി​ലേക്ക്‌ അയച്ചു. പ്രശ്‌നം പരിഹ​രി​ക്കു​ക​യും സ്വദേ​ശ​ത്തേക്കു  കുറച്ചു കാപ്പി​ച്ചെ​ടി​കൾ കൊണ്ടു​വ​രു​ക​യും ചെയ്യണ​മെന്നു ചട്ടം​കെ​ട്ടി​യാണ്‌ അദ്ദേഹത്തെ യാത്ര​യാ​ക്കി​യത്‌.

പ്രശ്‌നം രമ്യമാ​യി പരിഹ​രി​ക്ക​പ്പെ​ട്ട​തി​നെ തുടർന്ന്‌ ഗവർണർ പാൽയെ​റ്റ​യ്‌ക്ക്‌ ഒരു യാത്ര​യ​യപ്പ്‌ വിരുന്ന്‌ നൽകി. തദവസ​ര​ത്തിൽ ആദരണീ​യ​നായ അതിഥി​യെ അഭിന​ന്ദി​ക്കാ​നാ​യി ഗവർണ​റു​ടെ ഭാര്യ, പാൽയെ​റ്റ​യ്‌ക്ക്‌ മനോ​ഹ​ര​മായ ഒരു പൂച്ചെണ്ട്‌ സമ്മാനി​ച്ചു. പൂച്ചെ​ണ്ടിൽ പ്രത്യു​ത്‌പാ​ദ​ന​ശേ​ഷി​യുള്ള കാപ്പി വിത്തു​ക​ളും തൈക​ളും ഒളിപ്പി​ച്ചു​വെ​ച്ചി​രു​ന്നു. അതു​കൊണ്ട്‌, ഇപ്പോൾ നൂറു കോടി ഡോളർ നേടുന്ന ബ്രസീ​ലി​ലെ കാപ്പി വ്യവസാ​യം 1727-ൽ ഒരു പൂച്ചെ​ണ്ടി​ലാണ്‌ ജന്മമെ​ടു​ത്ത​തെന്നു പറയാൻ സാധി​ക്കും.

അങ്ങനെ 1706-ൽ ജാവയിൽനിന്ന്‌ ആംസ്റ്റർഡാ​മി​ലേക്കു പോയ കാപ്പി​ത്തൈ​യും പാരീ​സി​ലുള്ള അതിന്റെ സന്തതി​ക​ളും ചേർന്ന്‌ മധ്യ അമേരി​ക്ക​യ്‌ക്കും തെക്കേ അമേരി​ക്ക​യ്‌ക്കും ആവശ്യ​മായ നടീൽ വസ്‌തു​ക്ക​ള​ത്ര​യും പ്രദാ​നം​ചെ​യ്‌തു. റിഗ്‌ളി വിശദീ​ക​രി​ക്കു​ന്നു: “വളരെ പരിമി​ത​മായ ജീൻ സഞ്ചയത്തിൽനി​ന്നു വികാസം പ്രാപിച്ച അറബിക്ക കാപ്പി​യിൽ അധിഷ്‌ഠി​ത​മാണ്‌ അറബിക്ക കാപ്പി വ്യവസാ​യം.”

ഇന്ന്‌, ഏകദേശം 80 രാജ്യ​ങ്ങ​ളി​ലാ​യി 2.5 കോടി​യി​ല​ധി​കം കുടും​ബങ്ങൾ തങ്ങളുടെ കൃഷി​യി​ട​ങ്ങ​ളിൽ 1,500 കോടി കാപ്പി​ച്ചെ​ടി​കൾ വളർത്തു​ന്ന​താ​യി കണക്കാ​ക്ക​പ്പെ​ടു​ന്നു. അവരുടെ ഉത്‌പന്നം ഓരോ ദിവസ​ത്തെ​യും ഉപഭോ​ഗ​മായ 225 കോടി കപ്പ്‌ കാപ്പി തയ്യാറാ​ക്കു​ന്ന​തിൽ കലാശി​ക്കു​ന്നു.

വൈരു​ധ്യ​മെ​ന്നു പറയട്ടെ, ഇപ്പോ​ഴുള്ള പ്രശ്‌നം കാപ്പി​യു​ടെ അമിത ഉത്‌പാ​ദ​ന​മാണ്‌. കൂടാതെ രാഷ്‌ട്രീ​യ​സ്ഥി​തി, ധനതത്ത്വ​ശാ​സ്‌ത്രം, ശക്തമായ കാർട്ടെ​ലു​കൾ (വിപണി​യി​ലെ മത്സരം നിയ​ന്ത്രി​ക്കു​ന്ന​തി​നോ വിലകൾ നിശ്ചയി​ക്കു​ന്ന​തി​നോ സ്വതന്ത്ര വ്യാപാര, വ്യവസായ സ്ഥാപനങ്ങൾ രൂപീ​ക​രി​ക്കുന്ന സംഘട​നകൾ) എന്നിവ​യെ​ല്ലാം സാഹച​ര്യം സങ്കീർണ​മാ​ക്കു​ന്നു. ഇവയെ​ല്ലാം​കൂ​ടി പല രാജ്യ​ങ്ങ​ളി​ലു​മുള്ള കൃഷി​ക്കാ​രെ നിർധ​ന​രാ​ക്കി​യി​രി​ക്കു​ന്നു, എന്തിന്‌ ചിലരെ പാപ്പരാ​ക്കു​ക​പോ​ലും ചെയ്‌തി​രി​ക്കു​ന്നു. ഈ സാഹച​ര്യം അമ്പരപ്പി​ക്കു​ന്ന​താണ്‌, വിശേ​ഷി​ച്ചും ഏകദേശം 300 വർഷങ്ങൾക്കു​മുമ്പ്‌ ദുർല​ഭ​മായ തന്റെ ജലവി​ഹി​തം ഒരു കാപ്പി​ച്ചെ​ടി​യു​മാ​യി പങ്കു​വെ​ക്കുന്ന ദെ ക്ലിയു​വി​നെ ഭാവന​യിൽ കാണു​മ്പോൾ.

[20-ാം പേജിലെ ചതുരം/ചിത്രം]

ഏറ്റവും പ്രചാ​രം​സി​ദ്ധിച്ച രണ്ടു കാപ്പി ഇനങ്ങൾ

“കോഫിയ ജനുസ്സിൽപ്പെട്ട കുറഞ്ഞത്‌ 66 സ്‌പീ​ഷീ​സു​കൾ അടങ്ങു​ന്ന​താണ്‌ റൂബി​യേസി കുടും​ബം, പച്ച കാപ്പി​ക്കു​രു ആ കുടും​ബ​ത്തിൽപ്പെട്ട ചെടി​ക​ളു​ടെ വിത്താണ്‌” എന്ന്‌ സയന്റി​ഫിക്‌ അമേരി​ക്കൻ പത്രിക പറയുന്നു. “വാണിജ്യ പ്രാധാ​ന്യ​മുള്ള രണ്ടു സ്‌പീ​ഷീ​സു​ക​ളാണ്‌, ലോ​കോ​ത്‌പാ​ദ​ന​ത്തി​ന്റെ മൂന്നിൽ രണ്ടു ഭാഗം പ്രദാനം ചെയ്യുന്ന കോഫിയ അറബി​ക്ക​യും മൂന്നിൽ ഒരു ഭാഗം ലഭ്യമാ​ക്കുന്ന റോബസ്റ്റ കാപ്പി എന്നറി​യ​പ്പെ​ടുന്ന കോഫിയ കാനി​ഫേ​റ​യും.”

കടുപ്പ​വും കടുത്ത മണവു​മുള്ള റോബസ്റ്റ കാപ്പി മിക്ക​പ്പോ​ഴും ഇൻസ്റ്റന്റ്‌ കാപ്പി​പ്പൊ​ടി ഉണ്ടാക്കാൻ ഉപയോ​ഗി​ക്കു​ന്നു. ഈ ഇനം സമൃദ്ധ​മായ വിളവു നൽകു​ന്ന​തും രോഗ​പ്ര​തി​രോ​ധ​ശ​ക്തി​യു​ള്ള​തു​മാണ്‌. അത്‌, വെട്ടി​യൊ​തു​ക്കി നിറു​ത്താ​ത്ത​തും കൂടുതൽ ലോല​വും കുറഞ്ഞ തോതിൽ വിളവ്‌ ഉത്‌പാ​ദി​പ്പി​ക്കു​ന്ന​തു​മായ അറബിക്കാപ്പി​യു​ടെ ഇരട്ടി ഉയരത്തിൽ അതായത്‌ 12 മീറ്റർ വരെ ഉയരത്തിൽ വളരാ​റുണ്ട്‌. റോബസ്റ്റ കുരു​വിൽ 2.8 ശതമാനം കഫീനാണ്‌, എന്നാൽ അറബിക്ക കുരു​വിൽ കഫീൻ ഒരിക്ക​ലും 1.5 ശതമാനം കടക്കാ​റില്ല. അറബി​ക്ക​യിൽ 44 ക്രോ​മോ​സോ​മു​ക​ളുണ്ട്‌. എന്നാൽ റോബ​സ്റ്റ​യി​ലും മറ്റെല്ലാ കാട്ടു കാപ്പി​യി​നങ്ങളിലും 22 എണ്ണമേ​യു​ള്ളൂ. എന്നിരുന്നാലും ചില ഇനങ്ങളെ സങ്കരണം നടത്തി സങ്കരയി​നങ്ങൾ ഉത്‌പാ​ദി​പ്പി​ക്കാൻ കഴിഞ്ഞി​ട്ടുണ്ട്‌.

[20-ാം പേജിലെ ചതുരം/ചിത്രം]

കാപ്പിയെ “മാമോ​ദീസ മുക്കുന്നു”

17-ാം നൂറ്റാ​ണ്ടിൽ കാപ്പി ആദ്യമാ​യി യൂറോ​പ്പിൽ എത്തി​ച്ചേർന്ന​പ്പോൾ, ചില കത്തോ​ലി​ക്കാ പുരോ​ഹി​ത​ന്മാർ അതിനെ സാത്താന്റെ മിശ്രി​ത​പാ​നീ​യ​മെന്നു മുദ്ര​കു​ത്തി. ക്രിസ്‌തു​വി​നാൽ വിശു​ദ്ധീ​ക​രി​ക്ക​പ്പെ​ട്ട​തെന്നു കരുതി​യി​രുന്ന വീഞ്ഞിനു പകരമാ​കാൻ സാധ്യ​ത​യുള്ള പാനീ​യ​മാ​യി അവർ അതിനെ വീക്ഷിച്ചു. എന്നിരു​ന്നാ​ലും പോപ്പ്‌ ക്ലെമെന്റ്‌ എട്ടാമൻ ആ പാനീയം രുചി​ച്ചു​നോ​ക്കു​ക​യും കാപ്പി​യെ​പ്പ​റ്റി​യുള്ള തന്റെ അഭി​പ്രാ​യ​ത്തി​നു പെട്ടെ​ന്നു​തന്നെ മാറ്റം വരുത്തു​ക​യും ചെയ്‌തെന്നു പറയ​പ്പെ​ടു​ന്ന​താ​യി കാപ്പി (ഇംഗ്ലീഷ്‌) എന്ന പുസ്‌തകം പറയുന്നു. പാനീ​യത്തെ ആലങ്കാ​രി​ക​മാ​യി മാമോ​ദീസ മുക്കു​ന്ന​തി​ലൂ​ടെ, അത്‌ ക്രിസ്‌ത്യാ​നി​കൾക്കു സ്വീകാ​ര്യ​മാ​ക്കി​ത്തീർത്തു​കൊണ്ട്‌ മതപര​മായ ധർമസ​ങ്ക​ട​ത്തിന്‌ അദ്ദേഹം പരിഹാ​രം കണ്ടു.

[18, 19 പേജു​ക​ളി​ലെ ചാർട്ട്‌/മാപ്പ്‌]

(പൂർണ​രൂ​പ​ത്തിൽ കാണു​ന്ന​തിന്‌ പ്രസി​ദ്ധീ​ക​രണം നോക്കുക)

കാപ്പി വ്യാപിച്ച വിധം

1. 1400-കൾഅ​റേ​ബ്യൻ ഉപദ്വീ​പിൽ അറബിക്ക കാപ്പി കൃഷി ചെയ്യ​പ്പെ​ടു​ന്നു

2. 1616 ഡച്ചുകാർ കാപ്പി ചെടി​ക​ളോ പ്രത്യു​ത്‌പാ​ദ​ന​ശേ​ഷി​യുള്ള വിത്തു​ക​ളോ കൈവ​ശ​മാ​ക്കു​ന്നു

3. 1699 ഡച്ചുകാർ ജാവയി​ലേ​ക്കും ഈസ്റ്റ്‌ ഇൻഡീ​സി​ലുള്ള മറ്റ്‌ ദ്വീപു​ക​ളി​ലേ​ക്കും ചെടികൾ കൊണ്ടു​പോ​കു​ന്നു

4. 1700-കൾമധ്യ അമേരി​ക്ക​യി​ലും കരീബി​യ​നി​ലും കാപ്പി കൃഷി​ചെ​യ്യ​പ്പെ​ടു​ന്നു

5. 1718 ഫ്രഞ്ചു​കാർ റീയൂ​ണി​യൻ ദ്വീപി​ലേക്ക്‌ കാപ്പി കൊണ്ടു​പോ​കു​ന്നു

6. 1723 ജി. എം. ദെ ക്ലിയു ഫ്രാൻസിൽനി​ന്നു മാർട്ടി​നി​ക്കി​ലേക്ക്‌ ഒരു കാപ്പി​ച്ചെടി കൊണ്ടു​പോ​കു​ന്നു

7. 1800-കൾഹവാ​യി​യിൽ കാപ്പി കൃഷി​ചെ​യ്യ​പ്പെ​ടു​ന്നു

[കടപ്പാട്‌]

ഉറവിടം: “അൺകോ​മൺ ഗ്രൗണ്ട്‌സ്‌” എന്ന പുസ്‌ത​ക​ത്തിൽനിന്ന്‌

[18, 19 പേജു​ക​ളി​ലെ ചിത്രം]

മാർട്ടി​നി​ക്കി​ലേ​ക്കുള്ള യാത്ര​യിൽ ഗബ്രി​യേൽ മത്തിയൂ ദെ ക്ലിയു തന്റെ കുടി​വെള്ളം കാപ്പി​ച്ചെ​ടി​യു​മാ​യി പങ്കു​വെ​ക്കു​ന്നു, 1723

[19-ാം പേജിലെ ചിത്ര​ങ്ങൾക്ക്‌ കടപ്പാട്‌]

ഭൂപടം: © 1996 Visual Language; ദെ ക്ലിയു: Tea & Coffee Trade Journal