അവർ യഹോ​വ​യു​ടെ ഹിതം ചെയ്‌തു

സധൈ​ര്യം സംസാ​രിച്ച ഒരു കൊച്ചു പെൺകു​ട്ടി

പൊ.യു.മു. (പൊതു​യു​ഗ​ത്തി​നു​മുമ്പ്‌) പത്താം നൂറ്റാ​ണ്ടിൽ ഇസ്രാ​യേ​ലും അരാമും (സിറിയ) തമ്മിൽ ഉലഞ്ഞ ബന്ധമാ​യി​രു​ന്നു ഉണ്ടായി​രു​ന്നത്‌. യുദ്ധം പൊട്ടി​പ്പു​റ​പ്പെ​ടു​ന്നത്‌ ഒരു പതിവു സംഭവ​മാ​യി​രു​ന്നു. തന്മൂലം, യുദ്ധമി​ല്ലാ​തെ മൂന്നു വർഷം കടന്നു​പോ​വുക എന്നത്‌ ചരി​ത്ര​പ്രാ​ധാ​ന്യം അർഹി​ക്കുന്ന ഒരു വസ്‌തു​ത​യാ​യി​രു​ന്നു.—1 രാജാ​ക്ക​ന്മാർ 22:1.

അരാമ്യ കവർച്ചപ്പട അക്കാലത്തു പ്രത്യേ​കി​ച്ചും ഭീഷണി ഉയർത്തി​യി​രു​ന്നു. അവയിൽ ചിലതിൽ നൂറു​ക​ണ​ക്കി​നു പടയാ​ളി​ക​ളു​ണ്ടാ​യി​രു​ന്നു. ഈ പോരാ​ളി​കൾ ഇസ്രാ​യേ​ല്യ​രു​ടെ​മേൽ മിന്നലാ​ക്ര​മണം നടത്തി അവരെ കൊള്ള​യ​ടി​ക്കു​ക​യും അനേകരെ—കുട്ടി​ക​ളെ​പ്പോ​ലും—അപഹരി​ക്കു​ക​യും അടിമ​ക​ളാ​ക്കു​ക​യും ചെയ്‌തു.

അത്തര​മൊ​രു മിന്നലാ​ക്ര​മ​ണ​ത്തിൽ അക്കൂട്ടർ, “ഒരു ചെറിയ പെൺകു​ട്ടി​യെ” അവളുടെ ദൈവ​ഭ​യ​മുള്ള കുടും​ബാം​ഗ​ങ്ങ​ളിൽനി​ന്നു നിർദയം പിടി​ച്ചു​കൊ​ണ്ടു​പോ​യി. (2 രാജാ​ക്ക​ന്മാർ 5:2) അരാമ്യ​യി​ലേക്കു കൊണ്ടു​പോ​ക​പ്പെട്ട അവൾ, തന്നെ സംബന്ധി​ച്ചി​ട​ത്തോ​ളം, പേടി​പ്പെ​ടു​ത്തു​ന്ന​വ​രും അപരി​ചി​ത​രു​മായ ആളുകൾക്കി​ട​യിൽ—സൂര്യ-ചന്ദ്ര-താരാ​ദി​ക​ളെ​യും മരങ്ങ​ളെ​യും കല്ലുക​ളെ​യും​പോ​ലും ആരാധി​ക്കു​ന്നവർ—ജീവി​ക്കാൻ നിർബ​ന്ധി​ത​യാ​യി. ഏക സത്യ​ദൈ​വ​മായ യഹോ​വയെ ആരാധി​ച്ചി​രുന്ന അവളുടെ കുടും​ബം, സുഹൃ​ത്തു​ക്കൾ എന്നിവ​രിൽനിന്ന്‌ എത്ര വ്യത്യ​സ്‌ത​രാ​യി​രു​ന്നു അവർ! എന്നിരു​ന്നാ​ലും, അപരി​ചി​ത​മാ​യി​രുന്ന ഈ ചുറ്റു​പാ​ടി​ലും യഹോ​വ​യു​ടെ ആരാധ​ന​യോ​ടുള്ള ബന്ധത്തിൽ ഈ പെൺകു​ട്ടി ശ്രദ്ധേ​യ​മായ ധൈര്യം പ്രകട​മാ​ക്കി. തത്‌ഫ​ല​മാ​യി, അരാമ്യ രാജാ​വി​ന്റെ കീഴിൽ വേല​ചെ​യ്‌തി​രുന്ന ഒരു പ്രമുഖ ഉദ്യോ​ഗ​സ്ഥന്റെ ജീവി​ത​ത്തിൽ അവൾ മാറ്റം വരുത്തി. അതെങ്ങ​നെ​യാ​യി​രു​ന്നു​വെന്നു നമുക്കു കാണാം.

തുറന്നു സംസാ​രി​ക്കാ​നുള്ള ധൈര്യം

ബൈബിൾ വൃത്താന്തം ആ കൊച്ചു പെൺകു​ട്ടി​യു​ടെ പേരു വെളി​പ്പെ​ടു​ത്തു​ന്നില്ല. അവൾ, ബെൻ-ഹദദ്‌ II-ാമൻ രാജാ​വി​ന്റെ കീഴി​ലു​ണ്ടാ​യി​രുന്ന പരാ​ക്ര​മ​ശാ​ലി​യായ സേനാ​പതി നയമാന്റെ ഭാര്യ​യു​ടെ ഭൃത്യ​യാ​യി​ത്തീർന്നു. (2 രാജാ​ക്ക​ന്മാർ 5:1) അങ്ങേയറ്റം മാന്യ​നാ​യി എണ്ണപ്പെ​ട്ടി​രു​ന്നു​വെ​ങ്കി​ലും നയമാന്‌ അറപ്പു​ള​വാ​ക്കുന്ന കുഷ്‌ഠ​രോ​ഗം ബാധി​ച്ചി​രു​ന്നു.

ഒരുപക്ഷേ ആ പെൺകു​ട്ടി​യു​ടെ ആദരണീ​യ​മായ പെരു​മാ​റ്റ​മാ​യി​രി​ക്കാം അവളിൽ വിശ്വാ​സ​മർപ്പി​ക്കാൻ നയമാന്റെ ഭാര്യയെ പ്രേരി​പ്പി​ച്ചത്‌. ‘ഇസ്രാ​യേ​ലിൽ കുഷ്‌ഠ​രോ​ഗി​ക​ളു​ടെ കാര്യ​ത്തിൽ എന്താണു ചെയ്യു​ന്നത്‌’ എന്ന്‌ അവർ ആ പെൺകു​ട്ടി​യോ​ടു ചോദി​ച്ചി​രി​ക്കാ​നി​ട​യുണ്ട്‌. “യജമാനൻ ശമര്യ​യി​ലെ പ്രവാ​ച​കന്റെ അടുക്കൽ ഒന്നു ചെന്നെ​ങ്കിൽ അവൻ അവന്റെ കുഷ്‌ഠ​രോ​ഗം മാറ്റി​ക്കൊ​ടു​ക്കു​മാ​യി​രു​ന്നു” എന്നു സധൈ​ര്യം പ്രസ്‌താ​വി​ക്കാൻ ആ ഇസ്രാ​യേല്യ ഭൃത്യ​യ്‌ക്കു ലേശവും ലജ്ജ തോന്നി​യില്ല.—2 രാജാ​ക്ക​ന്മാർ 5:3.

ആ പെൺകു​ട്ടി​യു​ടെ വാക്കുകൾ ബാലി​ശ​മായ വീൺവാ​ക്കാ​യി തള്ളിക്ക​ള​ഞ്ഞില്ല. നേരേ​മ​റിച്ച്‌, അവ ബെൻ-ഹദദ്‌ രാജാ​വി​നെ അറിയി​ച്ചു. രാജാവ്‌ നയമാ​നെ​യും മറ്റുള്ള​വ​രെ​യും ആ പ്രവാ​ച​കനെ അന്വേ​ഷി​ച്ചു 150 കിലോ​മീ​റ്റർ അകലെ​യുള്ള ശമര്യ​യി​ലേക്ക്‌ അയച്ചു.—2 രാജാ​ക്ക​ന്മാർ 5:4, 5.

നയമാന്റെ സൗഖ്യ​മാ​കൽ

ബെൻ-ഹദദ്‌ നൽകിയ, പരിച​യ​പ്പെ​ടു​ത്തി​ക്കൊ​ണ്ടുള്ള കത്തും ഒട്ടനവധി പണപര​മായ സമ്മാന​വു​മാ​യി നയമാ​നും അവന്റെ ആളുക​ളും ഇസ്രാ​യേൽ രാജാ​വായ യെഹോ​രാ​മി​ന്റെ അടുക്ക​ലേക്കു പോയി. കാളക്കു​ട്ടി​യെ ആരാധി​ച്ചി​രുന്ന യെഹോ​രാം രാജാ​വിന്‌, ദൈവ​ത്തി​ന്റെ പ്രവാ​ച​ക​നിൽ ആ ദാസ്യ പെൺകു​ട്ടി​ക്കു​ണ്ടാ​യി​രു​ന്ന​തു​പോ​ലത്തെ വിശ്വാ​സം ഇല്ലായി​രു​ന്നു​വെ​ന്ന​തിൽ അതിശ​യി​ക്കാ​നില്ല. മറിച്ച്‌, നയമാൻ ശണ്‌ഠ​യ്‌ക്കു കാരണ​മ​ന്വേ​ഷി​ച്ചു വന്നതാ​ണെന്ന്‌ അവൻ ധരിച്ചു. യെഹോ​രാ​മി​ന്റെ ആശങ്ക​യെ​ക്കു​റി​ച്ചു ദൈവ​ത്തി​ന്റെ പ്രവാ​ച​ക​നായ എലീശ കേട്ട​പ്പോൾ, നയമാനെ തന്റെ ഭവനത്തി​ലേക്ക്‌ അയക്കാൻ അപേക്ഷി​ച്ചു​കൊണ്ട്‌ ഉടനടി അവൻ രാജാ​വി​നു സന്ദേശ​മ​യച്ചു.—2 രാജാ​ക്ക​ന്മാർ 5:6-8.

നയമാൻ എലീശ​യു​ടെ വീട്ടിൽ എത്തിയ​പ്പോൾ പ്രവാ​ചകൻ ഒരു സന്ദേശ​വാ​ഹ​കനെ അയച്ച്‌ ഇങ്ങനെ പറയിച്ചു: “നീ ചെന്നു യോർദ്ദാ​നിൽ ഏഴു പ്രാവ​ശ്യം കുളിക്ക; അപ്പോൾ നിന്റെ ദേഹം മുമ്പി​ല​ത്തെ​പ്പോ​ലെ​യാ​യി നീ ശുദ്ധനാ​കും.” (2 രാജാ​ക്ക​ന്മാർ 5:9, 10) നയമാൻ ക്രോ​ധ​പ​ര​വ​ശ​നാ​യി. അത്ഭുത​പ്ര​വൃ​ത്തി​യി​ലൂ​ടെ പ്രകട​നാ​ത്മ​ക​മായ ഒരു കൃത്യം പ്രതീ​ക്ഷി​ച്ചു​കൊണ്ട്‌ അവൻ ചോദി​ച്ചു: “ദമ്മേ​ശെ​ക്കി​ലെ നദിക​ളായ അബാന​യും പർപ്പരും യിസ്രാ​യേൽദേ​ശ​ത്തി​ലെ എല്ലാ വെള്ളങ്ങ​ളെ​ക്കാ​ളും നല്ലതല്ല​യോ? എനിക്കു അവയിൽ കുളിച്ചു ശുദ്ധനാ​ക​രു​തോ?” നയമാൻ ക്രുദ്ധ​നാ​യി എലീശ​യു​ടെ വീട്ടിൽനി​ന്നു പുറ​പ്പെട്ടു. എന്നാൽ  നയമാന്റെ ഭൃത്യ​ന്മാർ അവനു​മാ​യി ന്യായ​വാ​ദം ചെയ്‌ത​പ്പോൾ, ഒടുവിൽ അവൻ വഴങ്ങി. യോർദാൻ നദിയിൽ ഏഴു പ്രാവ​ശ്യം മുങ്ങി​യ​പ്പോൾ, “അവന്റെ ദേഹം ചെറിയ ബാലന്റെ ദേഹം പോലെ ആയി; അവൻ ശുദ്ധനാ​യി​ത്തീർന്നു.”—2 രാജാ​ക്ക​ന്മാർ 5:11-14.

എലീശ​യു​ടെ അടുക്കൽ മടങ്ങിവന്ന നയമാൻ ഇങ്ങനെ പറഞ്ഞു: “യിസ്രാ​യേ​ലിൽ അല്ലാതെ ഭൂമി​യിൽ എങ്ങും ഒരു ദൈവം ഇല്ല എന്നു ഞാൻ ഇപ്പോൾ അറിയു​ന്നു.” താൻ “ഇനി യഹോ​വെ​ക്ക​ല്ലാ​തെ അന്യ​ദൈ​വ​ങ്ങൾക്കു ഹോമ​യാ​ഗ​വും ഹനനയാ​ഗ​വും കഴിക്ക​യില്ല” എന്നു നയമാൻ ശപഥം ചെയ്‌തു.—2 രാജാ​ക്ക​ന്മാർ 5:15-17.

നമുക്കുള്ള പാഠങ്ങൾ

ഒരു കൊച്ചു ദാസ്യ പെൺകു​ട്ടി സധൈ​ര്യം തുറന്നു സംസാ​രി​ച്ചി​ല്ലാ​യി​രു​ന്നെ​ങ്കിൽ നയമാൻ എലീശാ പ്രവാ​ച​കന്റെ അടുക്കൽ പോവു​ക​യി​ല്ലാ​യി​രു​ന്നു. ഇന്ന്‌ ഒട്ടേറെ യുവാക്കൾ സമാന​മായ വിധത്തിൽ പ്രവർത്തി​ക്കു​ന്നുണ്ട്‌. ദൈവത്തെ സേവി​ക്കു​ന്ന​തി​നു തീരെ താത്‌പ​ര്യ​മി​ല്ലാത്ത വിദ്യാർഥി​കൾ സ്‌കൂ​ളിൽ അവരെ വലയം​ചെ​യ്യു​ന്നെ​ന്നു​വ​രാം. എന്നിരു​ന്നാ​ലും, തങ്ങൾ വിശ്വ​സി​ക്കുന്ന കാര്യങ്ങൾ അവർ തുറന്നു പറയുന്നു. അവരിൽ ചിലർ തീരെ ചെറു​താ​യി​രി​ക്കു​മ്പോൾതന്നെ അപ്രകാ​രം ചെയ്‌തു തുടങ്ങു​ന്നു.

ഓസ്‌​ട്രേ​ലി​യ​യി​ലുള്ള അലിഗ്‌സാൻഡ്ര എന്ന അഞ്ചു വയസ്സു​കാ​രി​യു​ടെ കാര്യം പരിചി​ന്തി​ക്കുക. അവൾ സ്‌കൂ​ളിൽ പോകാൻ തുടങ്ങി​യ​പ്പോൾ, യഹോ​വ​യു​ടെ സാക്ഷി​ക​ളു​ടെ വിശ്വാ​സ​ങ്ങ​ളെ​ക്കു​റി​ച്ചു വിശദീ​ക​രി​ക്കാൻ അവളുടെ അമ്മ അധ്യാ​പി​ക​യു​മാ​യി സമയം മുൻകൂ​ട്ടി നിശ്ചയി​ച്ചു​റ​പ്പി​ച്ചു. എന്നാൽ അലിഗ്‌സാൻഡ്ര​യു​ടെ അമ്മയെ ഒരു കാര്യം അതിശ​യി​പ്പി​ച്ചു. “നിങ്ങളു​ടെ വിശ്വാ​സ​ങ്ങ​ളിൽ പലതി​നെ​ക്കു​റി​ച്ചും അലിഗ്‌സാൻഡ്ര സ്‌കൂ​ളിൽ എന്തു ചെയ്യും എന്തു ചെയ്യു​ക​യില്ല എന്നതി​നെ​ക്കു​റി​ച്ചും എനിക്ക്‌ ഇപ്പോൾത്തന്നെ നല്ലവണ്ണം അറിയാം” എന്ന്‌ അധ്യാ​പിക പറഞ്ഞു. സ്‌കൂ​ളിൽ, സാക്ഷി​ക​ളായ വേറെ കുട്ടികൾ ഇല്ലാത്ത സ്ഥിതിക്ക്‌ അലിഗ്‌സാൻഡ്ര​യു​ടെ അമ്മയ്‌ക്ക്‌ ആകെ അത്ഭുത​മാ​യി. “അലിഗ്‌സാൻഡ്ര ഞങ്ങളോ​ടു പറഞ്ഞി​ട്ടുണ്ട്‌,” അധ്യാ​പിക വിവരി​ച്ചു. അതേ ഈ കൊച്ചു പെൺകു​ട്ടി തന്റെ അധ്യാ​പി​ക​യു​മാ​യി നയപൂർവം നേര​ത്തെ​തന്നെ ചർച്ച നടത്തി​യി​രു​ന്നു.

അത്തരം കുട്ടികൾ സധൈ​ര്യം തുറന്നു സംസാ​രി​ക്കു​ന്നു. അങ്ങനെ, അവർ സങ്കീർത്തനം 148:12, 13-നു ചേർച്ച​യിൽ പ്രവർത്തി​ക്കു​ക​യാണ്‌: “യുവാ​ക്ക​ളും യുവതി​ക​ളും, വൃദ്ധന്മാ​രും ബാലന്മാ​രും, ഇവരൊ​ക്കെ​യും യഹോ​വ​യു​ടെ നാമത്തെ സ്‌തു​തി​ക്കട്ടെ. അവന്റെ നാമം മാത്രം ഉയർന്നി​രി​ക്കു​ന്നതു. അവന്റെ മഹത്വം ഭൂമി​ക്കും ആകാശ​ത്തി​ന്നും മേലാ​യി​രി​ക്കു​ന്നു.”