പുരാതന കാലത്തെ സഞ്ചികൾ

ആധുനി​ക​കാ​ലത്തെ യഹോ​വ​യു​ടെ സാക്ഷി​കളെ സംബന്ധി​ച്ചി​ട​ത്തോ​ളം ബാഗ്‌ അഥവാ സഞ്ചി ഒരു അവശ്യ വസ്‌തു​വാണ്‌. ക്രിസ്‌തീയ യോഗ​ങ്ങൾക്കുള്ള പാഠ പുസ്‌ത​ക​ങ്ങ​ളും ലോക​വ്യാ​പക പ്രസം​ഗ​വേ​ല​യിൽ വിതരണം ചെയ്യാ​നുള്ള പ്രസി​ദ്ധീ​ക​ര​ണ​ങ്ങ​ളും കൊണ്ടു​പോ​കാൻ അവ ഉപയോ​ഗി​ക്കു​ന്നു. എന്നാൽ ബൈബിൾ കാലങ്ങ​ളി​ലെ സഞ്ചിക​ളു​ടെ കാര്യ​മോ? അവ വ്യാപ​ക​മാ​യി ഉപയോ​ഗി​ച്ചി​രു​ന്നു​വോ? അവ ഏതു തരത്തി​ലു​ള്ളവ ആയിരു​ന്നു?

വ്യത്യ​സ്‌ത തരത്തി​ലുള്ള മൃഗചർമ​ങ്ങ​ളും രോമ​ത്തു​ണി​ക​ളും കൊണ്ട്‌ നിർമിച്ച പുരാ​ത​ന​കാ​ലത്തെ സഞ്ചികൾക്കു ധാരാളം ഉപയോ​ഗങ്ങൾ ഉണ്ടായി​രു​ന്നു. ധാന്യങ്ങൾ, മറ്റു ഭക്ഷ്യവ​സ്‌തു​ക്കൾ, കല്ലു​കൊ​ണ്ടുള്ള തൂക്കക്ക​ട്ടി​കൾ, വിലപി​ടി​പ്പുള്ള വസ്‌തു​ക്കൾ, സ്വർണ-വെള്ളി​ക്ക​ട്ടി​കൾ, നാണയങ്ങൾ, എന്തിന്‌ വെള്ളവും വീഞ്ഞും പോലും അവയിൽ വഹിക്കാൻ കഴിയു​മാ​യി​രു​ന്നു.—യോശുവ 9:4; മത്തായി 9:17.

പദസമ്പ​ത്തിൽ സമ്പന്നമായ എബ്രായ ഭാഷയിൽ സഞ്ചികൾ, മടിശീ​ലകൾ, പൊക്ക​ണങ്ങൾ, ഭാണ്ഡങ്ങൾ എന്നിവയെ സൂചി​പ്പി​ക്കാൻ അനേകം വ്യത്യസ്‌ത പദങ്ങൾ ഉപയോ​ഗി​ക്കു​ന്നു. സാക്വ്‌ എന്ന എബ്രായ പദത്തിൽനി​ന്നാണ്‌ ചാക്കിന്റെ ആംഗലേയ പദമായ സാക്ക്‌ വന്നിട്ടു​ള്ളത്‌. ചണവസ്‌ത്ര​ത്തി​നും ഭക്ഷ്യവ​സ്‌തു​ക്ക​ളും ധാന്യ​ങ്ങ​ളും ഇടുന്ന ചണശീ​ല​കൊ​ണ്ടുള്ള ചാക്കി​നും ബൈബി​ളിൽ സാക്വ്‌ എന്ന പദമാണ്‌ ഉപയോ​ഗി​ച്ചി​രി​ക്കു​ന്നത്‌. യോ​സേ​ഫി​ന്റെ സഹോ​ദ​ര​ന്മാ​രു​ടെ ഈജി​പ്‌തു സന്ദർശ​നത്തെ കുറി​ച്ചുള്ള വിവര​ണ​ത്തിൽ ഈ പദവും “വിരി​ക്കുക” എന്ന്‌ അർഥമുള്ള ഒരു ക്രിയ​യിൽനി​ന്നു വരുന്ന എബ്രായ പദമായ അംറ്റാ​ചാ​ത്തും ഏകദേശം പര്യാ​യ​ങ്ങ​ളാ​യി​ട്ടാണ്‌ ഉപയോ​ഗി​ച്ചി​രി​ക്കു​ന്നത്‌. ഈജി​പ്‌തിൽനി​ന്നു ധാന്യങ്ങൾ കൊണ്ടു​പോ​യി​രുന്ന സഞ്ചികൾക്ക്‌ ഈ രണ്ടു പദങ്ങളും ഉപയോ​ഗി​ച്ചി​രി​ക്കു​ന്നു. അംറ്റാ​ചാത്ത്‌ സഞ്ചി​യെ​യും സാക്വ്‌ അതു നിർമി​ച്ചി​രി​ക്കുന്ന വസ്‌തു​വി​നെ​യും സൂചി​പ്പി​ക്കു​ന്നു​വെന്നു തോന്നു​ന്നു.—ഉല്‌പത്തി 42:25, 27, 28, 35.

ദാവീ​ദി​ന്റെ​യും നയമാ​ന്റെ​യും സഞ്ചികൾ

ഗോലി​യാ​ത്തു​മാ​യുള്ള ഏറ്റുമു​ട്ട​ലി​നു തയ്യാ​റെ​ടു​ക്കവേ ദാവീദ്‌ ഒരു ഇടയസ​ഞ്ചി​യിൽ അഞ്ച്‌ കല്ലുകൾ എടുത്തു. തോളിൽ കുറുകെ തൂക്കി​യി​ടുന്ന ഒരുതരം സഞ്ചിയാ​യി​രു​ന്നു അതെന്നു തോന്നു​ന്നു. (1 ശമൂവേൽ 17:40) എന്നിരു​ന്നാ​ലും, ഇവിടെ ഉപയോ​ഗി​ച്ചി​രി​ക്കുന്ന കെലി എന്ന എബ്രായ പദത്തിന്‌ മണ്ണോ മരമോ ലോഹ​മോ ചർമ​മോ​കൊ​ണ്ടുള്ള വെറു​മൊ​രു പാത്ര​ത്തെ​യും പരാമർശി​ക്കാൻ കഴിയും.

സിറി​യ​യി​ലെ പട്ടാള ഓഫീസർ ആയിരുന്ന നയമാന്റെ ഭയാന​ക​മായ കുഷ്‌ഠ​രോ​ഗം സൗഖ്യ​മാ​ക്കി​യ​തി​നെ കുറി​ച്ചുള്ള വിവര​ണ​ത്തിൽ, അവൻ അത്യാ​ഗ്ര​ഹി​യായ ഗേഹസിക്ക്‌ “രണ്ടു സഞ്ചിയിൽ രണ്ടു താലന്തു വെള്ളി​യും രണ്ടു കൂട്ടം വസ്‌ത്ര​വും​കെട്ടി തന്റെ ബാല്യ​ക്കാ​രിൽ രണ്ടു​പേ​രു​ടെ പക്കൽ കൊടു​ത്തു; അവർ അതു ചുമന്നു​കൊ​ണ്ടു അവന്റെ മുമ്പിൽ നടന്നു,” എന്നു നാം വായി​ക്കു​ന്നു. (2 രാജാ​ക്ക​ന്മാർ 5:23) ഇവിടെ സഞ്ചിക്ക്‌ ഉപയോ​ഗി​ച്ചി​രി​ക്കുന്ന എബ്രായ പദം ചാറിറ്റ്‌ ആണ്‌. ഒരു താലന്ത്‌ ഏകദേശം 34 കിലോ​യ്‌ക്കു തുല്യ​മാണ്‌. അപ്പോൾ അത്തരം സഞ്ചി ഒരു താലന്തു വെള്ളി​യും ഒപ്പം ഒരു കൂട്ടം വസ്‌ത്ര​വും കൊള്ളാൻ തക്ക വലിപ്പ​വും ബലവും ഉള്ളത്‌ ആയിരു​ന്നി​രി​ക്കണം. അതു​കൊണ്ട്‌, സഞ്ചികൾ നിറച്ചു കഴിഞ്ഞ​പ്പോൾ അത്‌ ഒരാൾക്ക്‌ എടുപ്പത്‌ ഉണ്ടായി​രു​ന്ന​തിൽ അതിശ​യി​ക്കാ​നില്ല. എന്നിരു​ന്നാ​ലും, നിഗളി​ക​ളായ സീയോൻ പുത്രി​മാർ ആഡംബ​ര​പൂർണ​മായ അലങ്കാര വസ്‌തു​ക്ക​ളാ​യി ഉപയോ​ഗിച്ച ചെറു​സ​ഞ്ചി​കളെ പരാമർശി​ക്കാ​നും ഇതേ പദംതന്നെ ഉപയോ​ഗി​ച്ചി​രി​ക്കു​ന്ന​തി​നാൽ ചാറിറ്റ്‌ എല്ലായ്‌പോ​ഴും വളരെ വലിയ സഞ്ചിയെ അർഥമാ​ക്കു​ന്നില്ല.—യെശയ്യാ​വു 3:16, 22.

വ്യാപാ​രി​ക​ളു​ടെ സഞ്ചി

വ്യാപാ​രി​കൾ വഹിച്ചി​രുന്ന സഞ്ചിയു​ടെ എബ്രായ പദം കിസ്‌ ആണ്‌. നിസ്സം​ശ​യ​മാ​യും അവ അടുത്ത​കാ​ലം വരെ പൂർവ​ദേ​ശ​ങ്ങ​ളിൽ ഉപയോ​ഗ​ത്തി​ലി​രുന്ന സഞ്ചിക​ളോ​ടു വളരെ സമാന​മാ​യി​രു​ന്നു. ഈ പിൽക്കാല ഇനങ്ങളെ വെച്ചു​നോ​ക്കു​മ്പോൾ, അവ നെയ്‌ത പരുത്തി​കൊ​ണ്ടോ വഴക്കമുള്ള കോര​പ്പു​ല്ലു​കൊ​ണ്ടോ തുകൽകൊ​ണ്ടോ ഉണ്ടാക്കി​യവ ആയിരു​ന്നി​രി​ക്കാം. ഉത്‌പ​ന്ന​ങ്ങ​ളോ ധാന്യ​ങ്ങ​ളോ അമൂല്യ ലോഹ​ങ്ങ​ളോ തൂക്കി​നോ​ക്കാൻ വേണ്ട തൂക്കക്ക​ട്ടി​കൾ കൊണ്ടു​പോ​കാൻ വ്യാപാ​രി​കൾ ഇവ ഉപയോ​ഗി​ച്ചി​രു​ന്നു. കിസിനെ പരാമർശി​ച്ചു​കൊ​ണ്ടുള്ള, വഞ്ചനാ​പ​ര​മായ ബിസി​നസ്‌ നടപടി​കൾക്ക്‌ എതിരായ മോ​ശൈക ന്യായ​പ്ര​മാ​ണ​ത്തി​ലെ ഒരു മുന്നറി​യിപ്പ്‌ ഇപ്രകാ​ര​മാണ്‌: “നിന്റെ സഞ്ചിയിൽ തൂക്കം ഏറിയ​തും കുറഞ്ഞ​തു​മായ രണ്ടുതരം പടി [“തൂക്കക്കട്ടി,” NW] ഉണ്ടാക​രു​തു.” (ആവർത്ത​ന​പു​സ്‌തകം 25:13)  തന്റെ പ്രവാ​ച​ക​നി​ലൂ​ടെ യഹോവ ചോദി​ച്ചു: “കള്ളത്തു​ലാ​സ്സും കള്ളപ്പടി​കൾ ഇട്ട സഞ്ചിയു​മു​ള്ള​വനെ ഞാൻ നിർമ്മ​ല​നാ​യി എണ്ണുമോ?” (മീഖാ 6:11) പണവും വിലപി​ടി​പ്പുള്ള വസ്‌തു​ക്ക​ളും കൊണ്ടു​പോ​കാ​നുള്ള ഒരു സഞ്ചിയോ മടിശീ​ല​യോ ആയും കിസ്‌ ഉപയോ​ഗി​ക്കു​മാ​യി​രു​ന്നു.—യെശയ്യാ​വു 46:6.

കെട്ടി മുദ്ര​വെച്ച ഭാണ്ഡങ്ങൾ

“പൊതി​ഞ്ഞു കെട്ടുക” എന്ന്‌ അർഥമുള്ള ഒരു ക്രിയാ​പ​ദ​ത്തിൽനി​ന്നാണ്‌ സ്‌റ്റെ​റോ​ഹർ എന്ന എബ്രായ പദം വന്നിട്ടു​ള്ളത്‌. ചരടു​കൊ​ണ്ടോ നൂലു​കൊ​ണ്ടോ കെട്ടിയ ഒരു സാധാരണ സഞ്ചി​യെ​യാണ്‌ അതു സൂചി​പ്പി​ക്കു​ന്നത്‌. അത്‌ ഒരു ഭാണ്ഡമോ വായ്‌ഭാ​ഗം മാത്രം കൂട്ടി​ക്കെ​ട്ടുന്ന ഒരു സഞ്ചിയോ ആകാം. തന്റെ സഹോ​ദ​ര​ന്മാർ വാങ്ങിയ ധാന്യ​ത്തി​ന്റെ പണം യോ​സേഫ്‌ തിരി​ച്ചു​കൊ​ടു​ത്തത്‌ ഇത്തരം സഞ്ചിയി​ലാ​യി​രു​ന്നു. ഓരോ ചാക്കി​ലെ​യും “പണക്കിഴി” എന്ന്‌ അതെക്കു​റി​ച്ചുള്ള ആ വിവരണം പറയുന്നു.—ഉല്‌പത്തി 42:35, പി.ഒ.സി. ബൈബിൾ.

ആലയ ഭണ്ഡാര​ത്തിൽനി​ന്നു ലഭിച്ചി​രുന്ന പണം, നിസ്സം​ശ​യ​മാ​യും തുല്യ അളവി​ലുള്ള, ഇത്തരം കിഴി​ക​ളാ​യി കെട്ടി​യി​രു​ന്നു​വെന്നു തോന്നു​ന്നു. പുരാ​ത​ന​കാ​ലത്ത്‌, വലിയ തുകകൾ ഉൾപ്പെ​ട്ടി​രുന്ന ബിസി​നസ്‌ ഇടപാ​ടു​ക​ളിൽ ചില​പ്പോൾ നാണയ​ത്തു​ട്ടു​കൾ തൂക്കി​നോ​ക്കി​യിട്ട്‌ ഇത്തരം കിഴി​ക​ളി​ലോ സഞ്ചിക​ളി​ലോ ഇട്ടു കെട്ടിയ ശേഷം കെട്ടിനു മുദ്ര​വെ​ക്കു​മാ​യി​രു​ന്നു. തുടർന്ന്‌ ആവശ്യ​മെ​ങ്കിൽ, കരാർ അനുസ​രി​ച്ചുള്ള തുക ഉൾക്കൊ​ള്ളു​ന്നു എന്ന്‌ ഉറപ്പാ​ക്ക​പ്പെട്ട ആ സഞ്ചി മറ്റൊ​രു​വനു കൈമാ​റാൻ കഴിയു​മാ​യി​രു​ന്നു. അതു​കൊണ്ട്‌, അതിലുള്ള വെള്ളി​യു​ടെ​യോ സ്വർണ​ത്തി​ന്റെ​യോ മറ്റു ലോഹ​ങ്ങ​ളു​ടെ​യോ തുകയു​ടെ ഒരു ഉറപ്പാ​യി​രു​ന്നു പൊട്ടി​ക്കാത്ത മുദ്ര. ഇയ്യോബ്‌ 14:17-ൽ ദൈവ​ത്തോ​ടു സംസാ​രി​ക്കവേ ഇയ്യോബ്‌ വ്യക്തമാ​യും അപ്രകാ​ര​മൊ​രു സൂചന ഉപയോ​ഗി​ക്കു​ന്നു: “എന്റെ അതി​ക്രമം ഒരു സഞ്ചിയി​ലാ​ക്കി മുദ്ര​യി​ട്ടി​രി​ക്കു​ന്നു; എന്റെ അകൃത്യം നീ കെട്ടി പററി​ച്ചി​രി​ക്കു​ന്നു.” ഒരു ശത്രു ദാവീ​ദി​നെ പിന്തു​ടർന്ന​പ്പോൾ, അവന്റെ പ്രാണൻ “യഹോ​വ​യു​ടെ പക്കൽ ജീവഭാ​ണ്ഡ​ത്തിൽ കെട്ട​പ്പെ​ട്ടി​രി​ക്കും” എന്നു പറഞ്ഞു​കൊണ്ട്‌ ദാവീ​ദി​നെ യഹോവ സംരക്ഷി​ക്കു​മെന്ന ഉറപ്പ്‌ അബീഗ​യിൽ പ്രകട​മാ​ക്കി.—1 ശമൂവേൽ 25:29.

ക്രിസ്‌തീയ ഗ്രീക്കു തിരു​വെ​ഴു​ത്തു​ക​ളി​ലെ പൊക്ക​ണ​ങ്ങൾ

ക്രിസ്‌തീയ ഗ്രീക്കു തിരു​വെ​ഴു​ത്തു​ക​ളിൽ പൊക്ക​ണ​ങ്ങ​ളെ​യും മടിശീ​ല​ക​ളെ​യും ഭക്ഷ്യസ​ഞ്ചി​ക​ളെ​യും പരാമർശി​ക്കു​ന്നുണ്ട്‌. സ്വർണ​മോ വെള്ളി​യോ ചെമ്പോ നാണയ​ത്തു​ട്ടു​ക​ളോ മറ്റു വസ്‌തു​ക്ക​ളോ കൊണ്ടു​പോ​കാൻ സ്‌ത്രീ​പു​രു​ഷ​ന്മാർ ഉപയോ​ഗി​ച്ചി​രുന്ന ഒരു സഞ്ചി ആയിരു​ന്നു പൊക്കണം. (ലൂക്കൊസ്‌ 10:4) സ്‌ത്രീ​കൾ ചില​പ്പോൾ അലങ്കാര പൊക്ക​ണങ്ങൾ അഥവാ ഹാൻഡ്‌ ബാഗുകൾ ഉപയോ​ഗി​ച്ചി​രു​ന്നു. അവ നീണ്ടു വൃത്താ​കൃ​തി​യിൽ ഉള്ളവ ആയിരു​ന്നി​രി​ക്കാം. ഇത്തരം പൊക്ക​ണ​ങ്ങളെ സൂചി​പ്പി​ക്കാൻ എബ്രായ ഭാഷയിൽ ചാറിറ്റ്‌, കിസ്‌ എന്നീ വാക്കുകൾ ഉപയോ​ഗി​ച്ചി​രു​ന്നു. (യെശയ്യാ​വു 3:22; 46:6) ആദ്യകാല പൊക്ക​ണങ്ങൾ തുകലോ നെയ്‌തെ​ടുത്ത കോര​പ്പു​ല്ലോ പരുത്തി​യോ​കൊണ്ട്‌ ഉള്ളവയാ​യി​രു​ന്നു. അവയുടെ വായ്‌ഭാ​ഗം തുകൽ നൂലോ ചരടോ ഉപയോ​ഗിച്ച്‌ കൂട്ടി​ക്കെ​ട്ടി​യി​രു​ന്നു.

സാധ്യ​ത​യ​നു​സ​രിച്ച്‌ യഹൂദ​യിൽ, യേശു തന്റെ ശിഷ്യ​ന്മാ​രെ ഒരു പ്രസംഗ പര്യട​ന​ത്തിന്‌ അയച്ച​പ്പോൾ അവർ മടിശീ​ല​യോ ഭക്ഷണസ​ഞ്ചി​യോ എടുക്ക​രു​തെന്നു പറഞ്ഞു. സഹയി​സ്രാ​യേ​ല്യ​രു​ടെ ആചാര​പ​ര​മായ ആതിഥ്യ​മ​ര്യാ​ദ​യി​ലൂ​ടെ യഹോവ അവർക്കു​വേണ്ടി കരുതു​മെന്ന്‌ അവൻ സൂചി​പ്പി​ച്ചു. (മത്തായി 10:9, 10) പണം സൂക്ഷി​ക്കുന്ന ഒരു തരം അരക്കച്ച സഞ്ചി ആയിരു​ന്നി​രി​ക്കാം മടിശീല (അക്ഷരീയ അർഥം, ‘അരക്കച്ച’; ഗ്രീക്ക്‌, സോൺ). അരക്കച്ചക്ക്‌ പണം വെക്കാൻ കഴിയുന്ന ഒരു ശൂന്യ​സ്ഥലം ഉണ്ടായി​രു​ന്നു. അരക്കച്ച തുണി​കൊ​ണ്ടു​ള്ള​തും മടക്കു​ക​ളോ​ടെ ധരിക്കു​ന്ന​തും ആയിരു​ന്നെ​ങ്കിൽ, അതിന്റെ മടക്കു​ക​ളിൽ പണം സൂക്ഷി​ക്കാ​മാ​യി​രു​ന്നു.

ഭക്ഷണസഞ്ചി എന്ന്‌ പരിഭാ​ഷ​പ്പെ​ടു​ത്തി​യി​രി​ക്കുന്ന പെറ എന്ന ഗ്രീക്കു പദം, നിസ്സം​ശ​യ​മാ​യും ദാവീദ്‌ തന്റെ ഇടയസഞ്ചി തൂക്കി​യി​ട്ട​തു​പോ​ലെ, യാത്ര​ക്കാർ തോളിൽ തൂക്കി​യി​ട്ടി​രുന്ന ഒരു സഞ്ചിയെ പരാമർശി​ക്കു​ന്നു. അതിൽ ഭക്ഷണവും വസ്‌ത്ര​വും മറ്റു വസ്‌തു​ക്ക​ളും ഉണ്ടായി​രു​ന്നു.

എന്നെന്നും നിലനിൽക്കുന്ന പൊക്ക​ണ​ങ്ങൾ

“ഒരു സഞ്ചിനി​റയെ ജ്ഞാനം [ഒരു സഞ്ചിനി​റയെ] പവിഴ​ത്തെ​ക്കാൾ വില​യേ​റി​യ​താണ്‌” എന്ന്‌ ഇന്നു ദശലക്ഷങ്ങൾ തിരി​ച്ച​റി​ഞ്ഞി​രി​ക്കു​ന്നു. (ഇയ്യോബ്‌ 28:18) ഈ ജ്ഞാനം മറ്റുള്ള​വർക്കു പകർന്നു നൽകാൻ യഹോ​വ​യു​ടെ സാക്ഷികൾ തങ്ങളുടെ ക്രിസ്‌തീയ സുവി​ശേഷ വേലയിൽ അക്ഷരീയ സഞ്ചിക​ളും പൊക്ക​ണ​ങ്ങ​ളും നന്നായി ഉപയോ​ഗി​ക്കു​ന്നു. സങ്കീർത്ത​ന​ക്കാ​രൻ മുൻകൂ​ട്ടി പറഞ്ഞതു​പോ​ലെ അവർ “സഞ്ചി നിറയെ വിത്ത്‌ വഹിക്കു”കയാണ്‌. ദൈവ​രാ​ജ്യ​ത്തി​ലൂ​ടെ ഭൂമി​യിൽ പുനഃ​സ്ഥാ​പി​ത​മാ​കുന്ന പറുദീ​സയെ കുറി​ച്ചുള്ള സുവാർത്ത അടങ്ങുന്ന ദൈവ​വ​ച​ന​ത്തി​ലെ സത്യമാണ്‌ ആ വിത്ത്‌. മറ്റു സത്യാ​ന്വേ​ഷ​ക​രും ദൈവി​ക​ജ്ഞാ​നം പ്രാപി​ക്കവേ അവർ തങ്ങളുടെ അധ്വാ​ന​ത്തി​ന്റെ ഫലം “സന്തോ​ഷാ​ര​വ​ത്തോ​ടെ” കൊയ്യു​ക​യാണ്‌.—സങ്കീർത്തനം 126:6, NW.

ആത്മീയ കാര്യ​ങ്ങ​ളു​ടെ ശ്രേഷ്‌ഠ​മായ മൂല്യം എടുത്തു​കാ​ട്ടി​ക്കൊണ്ട്‌ യേശു തന്റെ അനുഗാ​മി​കളെ ഇങ്ങനെ ഉദ്‌ബോ​ധി​പ്പി​ച്ചു: “സ്വർഗ്ഗ​ത്തിൽ പഴകി​പ്പോ​കാത്ത മടിശ്ശീ​ല​ക​ളും തീർന്നു പോകാത്ത നിക്ഷേ​പ​വും നിങ്ങൾക്കു ഉണ്ടാക്കി​ക്കൊൾവിൻ.” അതേ, ഒരു മടിശീ​ല​യോ സഞ്ചിയോ ചാക്കോ കിഴി​യോ നിറച്ചുള്ള സ്വർഗീയ നിക്ഷേപം യഥാർഥ സുരക്ഷി​ത​ത്വം നൽകു​ക​യും എന്നേക്കും നിലനിൽക്കു​ക​യും ചെയ്യും.—ലൂക്കൊസ്‌ 12:33.