ആരോ​ഗ്യ​ക​ര​മായ ആശയവി​നി​മയം—ദാമ്പത്യ വിജയ​ത്തി​ന്റെ താക്കോൽ

റോബർട്ട്‌ ബാരൻ, 1778-ൽ ഡബിൾ ആക്ടിങ്‌ ലിവർ ടംബ്ലർ ലോക്ക്‌ കണ്ടുപി​ടി​ച്ചു. ആധുനി​ക​കാല ലോക്കി​ന്റെ അടിസ്ഥാ​ന​മാ​യി വർത്തി​ക്കു​ന്നത്‌ അതാണ്‌. അദ്ദേഹ​ത്തി​ന്റെ ഡിസൈൻ പ്രകാരം, ഒരു താക്കോൽ കൊണ്ടു​തന്നെ താഴി​നു​ള്ളി​ലെ രണ്ടു ലിവറു​ക​ളും ഒന്നിച്ച്‌ ഉയർത്താൻ സാധി​ക്കു​മാ​യി​രു​ന്നു.

സമാന​മാ​യി, ഒരു വിജയ​പ്ര​ദ​മായ വിവാ​ഹ​ജീ​വി​തം ഭാര്യാ​ഭർത്താ​ക്ക​ന്മാ​രു​ടെ ഐക്യ​ത്തോ​ടെ​യുള്ള പ്രവർത്ത​നത്തെ ആശ്രയി​ച്ചി​രി​ക്കു​ന്നു. ഉത്തമ ദാമ്പത്യ​ബ​ന്ധ​ത്തി​ലെ വിലതീ​രാത്ത സന്തോഷം നുകരു​ന്ന​തിന്‌ അത്യാ​വ​ശ്യ​മാ​യി​രി​ക്കുന്ന ഒരു സംഗതി ആരോ​ഗ്യ​ക​ര​മായ ആശയവി​നി​മ​യ​മാണ്‌.

ആരോ​ഗ്യ​ക​ര​മായ ആശയവി​നി​മ​യ​ത്തിൽ ഉൾപ്പെ​ട്ടി​രി​ക്കുന്ന കാര്യങ്ങൾ

ആരോ​ഗ്യ​ക​ര​മായ ആശയവി​നി​മ​യ​ത്തിൽ ഉൾപ്പെ​ട്ടി​രി​ക്കു​ന്നത്‌ എന്താണ്‌? ഒരു നിഘണ്ടു ആശയവി​നി​മ​യത്തെ നിർവ​ചി​ക്കു​ന്നത്‌ “ആശയങ്ങൾ, അഭി​പ്രാ​യങ്ങൾ എന്നിവ​യു​ടെ​യോ ഭാഷണം, ആലേഖനം, ആംഗ്യങ്ങൾ എന്നിവ മുഖാ​ന്ത​ര​മുള്ള വിവര​ങ്ങ​ളു​ടെ​യോ പകരൽ അല്ലെങ്കിൽ കൈമാ​റ്റം” എന്നാണ്‌. അതു​കൊണ്ട്‌ ആശയവി​നി​മ​യ​ത്തിൽ ഉൾപ്പെ​ട്ടി​രി​ക്കു​ന്നത്‌ വികാ​ര​ങ്ങ​ളു​ടെ​യോ ആശയങ്ങ​ളു​ടെ​യോ പങ്കു​വെ​ക്ക​ലാണ്‌. കെട്ടു​പണി ചെയ്യുന്ന, നവോ​ന്മേ​ഷ​ദാ​യ​ക​മായ, സത്‌ഗു​ണ​മുള്ള, സ്‌തു​ത്യർഹ​മായ, ആശ്വാ​സ​ദാ​യ​ക​മായ കാര്യങ്ങൾ ആരോ​ഗ്യ​ക​ര​മായ ആശയവി​നി​മ​യ​ത്തിൽ ഉൾപ്പെ​ടു​ന്നു.—എഫെസ്യർ 4:29-32; ഫിലി​പ്പി​യർ 4:8.

വിശ്വാ​സം, ആശ്രയം, പരസ്‌പര ധാരണ എന്നിവ ഉണ്ടായി​രി​ക്കു​മ്പോ​ഴാണ്‌ ആരോ​ഗ്യ​ക​ര​മായ ആശയവി​നി​മയം സാധ്യ​മാ​യി​ത്തീ​രു​ന്നത്‌. വിവാ​ഹത്തെ ഒരു ആജീവ​നാന്ത ബന്ധമായി വീക്ഷി​ക്കു​ക​യും അതിനെ വിജയി​പ്പി​ക്കാൻ യഥാർഥ​മായ പ്രതി​ബദ്ധത ഉണ്ടായി​രി​ക്കു​ക​യും ചെയ്യു​മ്പോ​ഴാണ്‌ ഈ ഗുണങ്ങൾ പ്രകട​മാ​ക്കാ​നാ​കുക. അത്തര​മൊ​രു ബന്ധത്തെ പരാമർശി​ച്ചു​കൊണ്ട്‌ 18-ാം നൂറ്റാ​ണ്ടി​ലെ ഒരു ഉപന്യാ​സ​കർത്താ​വായ ജോസഫ്‌ അഡിസൺ ഇങ്ങനെ എഴുതി: “പരസ്‌പരം ആശ്വാ​സ​വും ആനന്ദവും പ്രദാനം ചെയ്യുക എന്ന ഉദ്ദേശ്യ​ത്തോ​ടെ പങ്കാളി​കൾ ആയിത്തീ​രാൻ തീരു​മാ​നി​ച്ചി​രി​ക്കുന്ന രണ്ടു പേർ, അങ്ങനെ ചെയ്യു​ക​വഴി, ഇരുവ​രു​ടെ​യും കുറവു​ക​ളു​ടെ​യും നിറവു​ക​ളു​ടെ​യും കാര്യ​ത്തിൽ വിട്ടു​വീഴ്‌ച ചെയ്യാ​നും ആർദ്ര​ത​യും വിവേ​ക​വും ക്ഷമയും സഹനവും സന്തോ​ഷ​വും ഉള്ളവരാ​യി​രി​ക്കാ​നും തങ്ങളെ​ത്തന്നെ ആജീവ​നാ​ന്തം ബാധ്യ​സ്ഥ​രാ​ക്കി​ത്തീർത്തി​രി​ക്കു​ന്നു.” അത്തര​മൊ​രു ബന്ധം എത്ര സന്തോ​ഷ​ക​ര​മാണ്‌! ഇത്തരം അമൂല്യ ഗുണങ്ങൾ നിങ്ങളു​ടെ വിവാ​ഹ​ത്തിന്‌ ഒരു ഭൂഷണം ആയിരി​ക്കാ​വു​ന്ന​താണ്‌. ആരോ​ഗ്യ​ക​ര​മായ ആശയവി​നി​മ​യ​ത്തി​ലൂ​ടെ നിങ്ങൾക്കവ സ്വന്തമാ​ക്കാൻ കഴിയും.

ആരോ​ഗ്യാ​വ​ഹ​മായ ആശയവി​നി​മ​യ​ത്തി​നുള്ള പ്രതി​ബ​ന്ധ​ങ്ങൾ

അനേക​രും ശുഭാ​പ്‌തി​വി​ശ്വാ​സ​ത്തോ​ടെ​യാണ്‌, അത്യാ​ഹ്ലാ​ദ​ത്തോ​ടെ പോലു​മാണ്‌, വിവാ​ഹി​ത​രാ​കു​ന്നത്‌. അനേക​രു​ടെ​യും കാര്യ​ത്തിൽ പെട്ടെ​ന്നു​തന്നെ ആ അത്യാ​ഹ്ലാ​ദം കെട്ടട​ങ്ങു​ന്നു, ശുഭാ​പ്‌തി​വി​ശ്വാ​സ​ത്തി​നു മങ്ങലേൽക്കു​ന്നു. നിരാശ, ദേഷ്യം, ശത്രുത, കടുത്ത അനിഷ്ടം എന്നിവ​യെ​ല്ലാം ശുഭാ​പ്‌തി​വി​ശ്വാ​സ​ത്തി​ന്റെ സ്ഥാനം അപഹരി​ച്ചേ​ക്കാം. വിവാഹം അപ്പോൾ, “മരണം വേർപി​രി​ക്കും വരെ”യുള്ള സഹിച്ചു​നിൽപ്പി​ന്റെ ഒരു അവസ്ഥ മാത്ര​മാ​യി​ത്തീ​രു​ന്നു. ഒരു ഉത്തമ വിവാ​ഹ​ജീ​വി​ത​ത്തിന്‌ അവശ്യം വേണ്ട  ആരോ​ഗ്യ​ക​ര​മായ ആശയവി​നി​മ​യത്തെ മെച്ച​പ്പെ​ടു​ത്തു​ന്ന​തി​നോ നിലനിർത്തു​ന്ന​തി​നോ ചില പ്രതി​ബ​ന്ധങ്ങൾ തരണം ചെയ്യേ​ണ്ട​തുണ്ട്‌.

ചില വിവര​ങ്ങ​ളോ ആഗ്രഹ​മോ അറിയി​ക്കു​മ്പോൾ ഇണ എങ്ങനെ പ്രതി​ക​രി​ക്കും എന്ന ഭയമാ​യി​രി​ക്കാം ആരോ​ഗ്യ​ക​ര​മായ ആശയവി​നി​മ​യ​ത്തി​നുള്ള ഒരു യഥാർഥ വിലങ്ങു​തടി. ഉദാഹ​ര​ണ​ത്തിന്‌, തന്നിൽ വികാസം പ്രാപി​ക്കുന്ന ഗുരു​ത​ര​മായ രോഗ​ത്തെ​യോ വൈക​ല്യ​ത്തെ​യോ കുറിച്ച്‌ അറിഞ്ഞാൽ, താൻ നിരസി​ക്ക​പ്പെ​ട്ടേ​ക്കു​മോ എന്ന ഭയം ഒരു ഇണയിൽ ഉടലെ​ടു​ത്തേ​ക്കാം. ഒരു ചികി​ത്സാ​ന​ട​പടി തന്റെ ആകാര​ത്തി​നോ പ്രവർത്തന ക്ഷമതയ്‌ക്കോ മൊത്ത​ത്തിൽ മാറ്റം വരുത്തു​മെന്ന്‌ എങ്ങനെ​യാണ്‌ ഒരുവൻ തന്റെ ഇണയ്‌ക്കു വിശദീ​ക​രി​ച്ചു​കൊ​ടു​ക്കുക? അത്തരം സാഹച​ര്യ​ങ്ങ​ളിൽ, ആത്മാർഥ​മായ ആശയവി​നി​മ​യ​വും ഭാവി സംബന്ധിച്ച ശ്രദ്ധാ​പൂർവ​ക​മായ ആസൂ​ത്ര​ണ​വും പൂർവാ​ധി​കം ആവശ്യ​മാണ്‌. സ്‌നേ​ഹി​ക്കു​ന്നു​വെന്ന വാഗ്രൂ​പേ​ണ​യുള്ള ഉറപ്പും ഒപ്പം ദയാർദ്ര പ്രവൃ​ത്തി​ക​ളും യഥാർഥ​ത്തിൽ സംതൃ​പ്‌തി​ക​ര​മായ വിവാ​ഹ​ജീ​വി​ത​ത്തിന്‌ സഹായ​ക​മായ വ്യക്തി​പ​ര​മായ താത്‌പ​ര്യ​ത്തെ പ്രകട​മാ​ക്കു​ന്ന​വ​യാണ്‌. വിവാ​ഹ​ജീ​വി​ത​ത്തിൽ പിൻവ​രുന്ന സദൃശ​വാ​ക്യം ഏറ്റവും അന്വർഥ​മാ​കണം: “സ്‌നേ​ഹി​തൻ എല്ലാകാ​ല​ത്തും സ്‌നേ​ഹി​ക്കു​ന്നു; അനർത്ഥ​കാ​ലത്തു അവൻ സഹോ​ദ​ര​നാ​യ്‌തീ​രു​ന്നു.”—സദൃശ​വാ​ക്യ​ങ്ങൾ 17:17.

ആരോ​ഗ്യ​ക​ര​മാ​യ ആശയവി​നി​മ​യ​ത്തി​നുള്ള മറ്റൊരു തടസ്സം നീരസ​മാണ്‌. ആത്മാർഥ​മാ​യി ക്ഷമിക്കുന്ന രണ്ടു പേരുടെ കൂടി​ച്ചേ​ര​ലാണ്‌ സന്തോ​ഷ​ക​ര​മായ വിവാ​ഹ​ജീ​വി​തം എന്ന്‌ ഉചിത​മാ​യി പറയ​പ്പെ​ട്ടി​ട്ടുണ്ട്‌. അങ്ങനെ ആയിത്തീ​രു​ന്ന​തിന്‌, അപ്പൊ​സ്‌ത​ല​നായ പൗലൊ​സി​ന്റെ പിൻവ​രുന്ന പ്രാ​യോ​ഗിക ബുദ്ധി​യു​പ​ദേശം ബാധക​മാ​ക്കാൻ ദമ്പതികൾ സർവ​ശ്ര​മ​വും ചെയ്യും: “സൂര്യൻ അസ്‌ത​മി​ക്കു​വോ​ളം നിങ്ങൾ കോപം വെച്ചു​കൊ​ണ്ടി​രി​ക്ക​രു​തു.” (എഫെസ്യർ 4:26) ദേഷ്യ​മോ നീരസ​മോ വെച്ചു​കൊ​ണ്ടി​രി​ക്കു​ന്ന​തി​നു പകരം ആ ബുദ്ധി​യു​പ​ദേശം ബാധക​മാ​ക്ക​ണ​മെ​ങ്കിൽ താഴ്‌മ​യോ​ടെ​യുള്ള ആശയവി​നി​മയം ആവശ്യ​മാണ്‌. ഏതു നേരവും ദേഷ്യ​പ്പെ​ടാ​നോ വഴക്കി​ടാ​നോ വിദ്വേ​ഷം വെച്ചു​പു​ലർത്താ​നോ ചായ്‌വു​ള്ള​വ​രാ​യി​രി​ക്കില്ല നല്ല വിവാ​ഹ​ജീ​വി​തം നയിക്കുന്ന ദമ്പതികൾ. (സദൃശ​വാ​ക്യ​ങ്ങൾ 30:33) നീരസം വെച്ചു​പു​ലർത്തു​ന്നി​ല്ലാത്ത ദൈവത്തെ അനുക​രി​ക്കാ​നാണ്‌ അവർ ആഗ്രഹി​ക്കു​ന്നത്‌. (യിരെ​മ്യാ​വു 3:12, NW) യഥാർഥ​ത്തിൽ, അവർ ഹൃദയം​ഗ​മ​മാ​യി ക്ഷമിക്കു​ന്നു.—മത്തായി 18:35.

ഏതൊരു ആശയവി​നി​മ​യ​ത്തി​നു​മുള്ള ഒരു വലിയ പ്രതി​ബന്ധം ഇണയോട്‌ മനഃപൂർവം സംസാ​രി​ക്കാ​തി​രി​ക്കു​ന്ന​താണ്‌. മുഖം വീർപ്പി​ച്ചി​രി​ക്കൽ, കടുത്ത ദീർഘ​നി​ശ്വാ​സങ്ങൾ, യാന്ത്രി​ക​മായ പ്രവർത്ത​നങ്ങൾ, സംസാ​രി​ക്കാൻ കൂട്ടാ​ക്കാ​തി​രി​ക്കൽ എന്നിവ ഇതിൽ ഉൾപ്പെ​ട്ടേ​ക്കാം. ഈ വിധത്തിൽ പ്രവർത്തി​ക്കുന്ന ഒരു ഇണ അപ്രീ​തി​യാ​ണു പ്രകടി​പ്പി​ക്കു​ന്നത്‌. ഒന്നും മിണ്ടാതെ മുഖം വീർപ്പി​ച്ചി​രി​ക്കു​ന്ന​തി​നെ​ക്കാൾ വ്യക്തി​പ​ര​മായ വികാ​രങ്ങൾ തുറന്ന്‌, സുഖക​ര​മായ രീതി​യിൽ സംസാ​രി​ക്കു​ന്ന​താണ്‌ വിവാ​ഹ​ജീ​വി​തം മെച്ച​പ്പെ​ടു​ത്താൻ സഹായി​ക്കു​ന്നത്‌.

വിവാ​ഹ​ബ​ന്ധ​ത്തി​ലെ നല്ല ആശയവി​നി​മ​യ​ത്തി​നു പ്രതി​ബന്ധം ആയിരു​ന്നേ​ക്കാ​വുന്ന മറ്റൊരു സംഗതി ഇണ സംസാ​രി​ക്കു​മ്പോൾ നന്നായി അല്ലെങ്കിൽ ഒട്ടും​തന്നെ ശ്രദ്ധി​ക്കാ​തി​രി​ക്കു​ന്ന​താണ്‌. ചില​പ്പോ​ഴൊ​ക്കെ ക്ഷീണമോ തിരക്കോ നിമിത്തം പരസ്‌പരം ശ്രദ്ധി​ക്കാൻ കഴിയാത്ത മാനസി​ക​മോ വൈകാ​രി​ക​മോ ആയ അവസ്ഥയി​ലാ​യി​രി​ക്കാം നാം. ഒരു ഇണ താൻ വ്യക്തമാ​യി പറഞ്ഞു എന്നു വിചാ​രി​ക്കുന്ന, അതേസ​മയം മറ്റേ ഇണ തെറ്റായി മനസ്സി​ലാ​ക്കു​ക​യോ ഇതിനു മുമ്പു തന്നോടു പറഞ്ഞി​ട്ടില്ല എന്നു ശഠിക്കു​ക​യോ ചെയ്യുന്ന കാര്യ​ങ്ങളെ പ്രതി വാദ​പ്ര​തി​വാ​ദങ്ങൾ അണപൊ​ട്ടി​യൊ​ഴു​കി​യേ​ക്കാം. അത്തരം വൈഷ​മ്യ​ങ്ങൾക്കു കാരണം നല്ല രീതി​യി​ലുള്ള ആശയവി​നി​മ​യ​ത്തി​ന്റെ അഭാവ​മാണ്‌.

ആരോ​ഗ്യാ​വ​ഹ​മായ ആശയവി​നി​മയം വളർത്തി​യെ​ടു​ക്കുന്ന വിധം

സ്‌നേ​ഹ​പു​ര​സ്സ​ര​വും ആരോ​ഗ്യ​ക​ര​വു​മായ ആശയവി​നി​മ​യ​ത്തി​നു സമയം നീക്കി​വെ​ക്കു​ന്നത്‌ എത്ര പ്രധാ​ന​മാണ്‌! ചിലർ ടിവി​യിൽ മറ്റുള്ള​വ​രു​ടെ ജീവിതം വീക്ഷി​ച്ചു​കൊണ്ട്‌ അതിനു മുമ്പിൽ വളരെ​യ​ധി​കം സമയം ചെലവി​ടു​ന്ന​തി​നാൽ അവർക്കു സ്വന്തം കാര്യ​ങ്ങൾക്ക്‌ ഒട്ടും​തന്നെ സമയമില്ല. അക്കാര​ണ​ത്താൽ ടെലി​വി​ഷൻ ഓഫ്‌ ചെയ്യേ​ണ്ടത്‌ മിക്ക​പ്പോ​ഴും ആരോ​ഗ്യ​ക​ര​മായ ആശയവി​നി​മ​യ​ത്തിന്‌ അത്യന്താ​പേ​ക്ഷി​ത​മാണ്‌.

സംസാ​രി​ക്കാൻ തക്ക സമയമു​ള്ള​തു​പോ​ലെ മിണ്ടാ​തി​രി​പ്പാ​നും ഒരു സമയമുണ്ട്‌. ജ്ഞാനി​യായ മനുഷ്യൻ ഇങ്ങനെ പറഞ്ഞു: “എല്ലാറ​റി​ന്നും ഒരു സമയമു​ണ്ടു; . . . മിണ്ടാ​തി​രി​പ്പാൻ ഒരു കാലം, സംസാ​രി​പ്പാൻ ഒരു കാലം.” തീർച്ച​യാ​യും ഉചിത​മായ വാക്കുകൾ  പറയു​ന്ന​തും പ്രധാ​ന​മാണ്‌. “തക്കസമ​യത്തു പറയുന്ന വാക്കു എത്ര മനോ​ഹരം!” എന്ന്‌ ഒരു സദൃശ​വാ​ക്യം പറയുന്നു. (സഭാ​പ്ര​സം​ഗി 3:1, 7; സദൃശ​വാ​ക്യ​ങ്ങൾ 15:23) നിങ്ങളു​ടെ ആഗ്രഹ​മോ അഭിലാ​ഷ​മോ പറയു​ന്ന​തി​നുള്ള നല്ല സമയം എപ്പോ​ഴാ​ണെന്നു തീരു​മാ​നി​ക്കുക. സ്വയം ഇങ്ങനെ ചോദി​ക്കുക: ‘എന്റെ ഇണ ക്ഷീണിച്ച അവസ്ഥയി​ലാ​ണോ അതോ പിരി​മു​റു​ക്ക​മി​ല്ലാത്ത ഉന്മേഷ​ഭ​രി​ത​മായ മാനസിക നിലയി​ലാ​ണോ? ഞാൻ പറയാൻ പോകുന്ന സംഗതി ഒരു പൊട്ടി​ത്തെറി ഉണ്ടാക്കു​മോ? ഈ കാര്യ​ത്തെ​ക്കു​റിച്ച്‌ ഞങ്ങൾ കഴിഞ്ഞ തവണ സംസാ​രി​ച്ച​പ്പോൾ ഇണ എന്റെ ഏതു വാക്കു​ക​ളി​ലാ​ണു കയറി​പ്പി​ടി​ച്ചത്‌?’

ഒരു പ്രത്യേക കാര്യ​ത്തിൽ സഹകര​ണ​വും വിട്ടു​വീ​ഴ്‌ച​യും കാട്ടു​ന്നത്‌ തങ്ങൾക്ക്‌ എങ്ങനെ പ്രയോ​ജനം ചെയ്യു​ന്നു​വെന്നു മനസ്സി​ലാ​ക്കു​മ്പോൾ ആളുകൾ നന്നായി പ്രതി​ക​രി​ക്കു​ന്നു എന്ന്‌ ഓർത്തി​രി​ക്കു​ന്നതു നല്ലതാണ്‌. ഇണകളു​ടെ ഇടയിൽ സംഘർഷാ​വസ്ഥ വളർന്നു​വ​ന്നി​ട്ടു​ണ്ടെ​ങ്കിൽ, ഒരാൾ ഇങ്ങനെ പറയാൻ ചായ്‌വു കാണി​ച്ചേ​ക്കാം: “എന്നെ അലട്ടുന്ന ചില കാര്യ​ങ്ങ​ളുണ്ട്‌, നമ്മൾ അതു പരിഹ​രി​ച്ചി​ട്ടേ ബാക്കി കാര്യ​മു​ള്ളൂ!” തീർച്ച​യാ​യും, സാഹച​ര്യ​ങ്ങൾക്ക​നു​സ​രിച്ച്‌ പറയുന്ന വാക്കുകൾ വ്യത്യാ​സ​പ്പെ​ട്ടി​രി​ക്കു​മെ​ങ്കി​ലും ഏതാണ്ട്‌ ഇതു​പോ​ലെ പറയു​ന്ന​താ​യി​രി​ക്കും ഏറെ മെച്ചം: “പിന്നേ, നമ്മൾ നേരത്തെ പറഞ്ഞ ആ സംഗതി​യെ​ക്കു​റിച്ച്‌, അത്‌ എങ്ങനെ ഒന്ന്‌ നേരെ​യാ​ക്കാൻ കഴിയു​മെന്നു ഞാൻ ചിന്തി​ക്കു​ക​യാ​യി​രു​ന്നു.” ഇതിൽ ഏതു സമീപ​ന​മാ​യി​രി​ക്കും നിങ്ങളു​ടെ ഇണയ്‌ക്കു കൂടുതൽ സ്വീകാ​ര്യം?

ഒരു സംഗതി പറയുന്ന വിധം വളരെ പ്രധാ​ന​മാണ്‌. അപ്പൊ​സ്‌ത​ല​നായ പൗലൊസ്‌ ഇങ്ങനെ എഴുതി: “നിങ്ങളു​ടെ വാക്കു എപ്പോ​ഴും കൃപ​യോ​ടു​കൂ​ടി​യ​തും [“പ്രസാ​ദ​ക​ര​വും,” NW] ഉപ്പിനാൽ രുചി​വ​രു​ത്തി​യ​തും ആയിരി​ക്കട്ടെ.” (കൊ​ലൊ​സ്സ്യർ 4:6) നിങ്ങളു​ടെ സംസാ​ര​രീ​തി​യും വാക്കു​ക​ളും പ്രസാ​ദ​ക​ര​മാ​ക്കാൻ ശ്രമി​ക്കുക. “ഇമ്പമുള്ള വാക്കു തേൻക​ട്ട​യാ​കു​ന്നു; മനസ്സിന്നു മധുര​വും അസ്ഥികൾക്കു ഔഷധ​വും തന്നേ” എന്നത്‌ മനസ്സിൽ പിടി​ക്കുക.—സദൃശ​വാ​ക്യ​ങ്ങൾ 16:24.

വീട്ടു​കാ​ര്യ​ങ്ങൾ ഒരുമി​ച്ചു ചെയ്യു​ന്നത്‌ ചില ദമ്പതി​കൾക്ക്‌ ആശയവി​നി​മ​യ​ത്തി​നുള്ള സാഹച​ര്യം ഒരുക്കി​യേ​ക്കാം. അത്‌ ആരോ​ഗ്യ​ക​ര​മായ ആശയവി​നി​മ​യ​ത്തി​നു സമയം പ്രദാനം ചെയ്യു​ന്ന​തോ​ടൊ​പ്പം തങ്ങൾ ആലോ​ചി​ച്ചാ​ണു കാര്യങ്ങൾ ചെയ്യു​ന്നത്‌ എന്ന ബോധ്യം വളർത്തി​യെ​ടു​ക്കു​ക​യും ചെയ്യും. മറ്റു ചില ദമ്പതി​ക​ളു​ടെ കാര്യ​ത്തിൽ ജോലി​യൊ​ന്നും ചെയ്യാതെ ഒരുമി​ച്ചു സമയം ചെലവ​ഴി​ക്കു​ന്നത്‌ ഉത്തമവും ആരോ​ഗ്യ​ക​ര​മായ ആശയവി​നി​മ​യ​ത്തി​നു കൂടുതൽ സഹായ​ക​വു​മാണ്‌.

മനപ്പൊ​രു​ത്ത​മു​ള്ള ദമ്പതികൾ പരസ്‌പരം ആശയവി​നി​മയം നടത്തു​ന്നതു ശ്രദ്ധി​ച്ചാൽ മിക്ക​പ്പോ​ഴും അനേകം കാര്യങ്ങൾ പഠിക്കാൻ കഴിയും. അവരെ ആ വിധത്തിൽ ആക്കിത്തീർത്തത്‌ എന്താണ്‌? വ്യക്തി​പ​ര​മായ ശ്രമം, ക്ഷമ, സ്‌നേ​ഹ​പു​ര​സ്സ​ര​മായ പരിഗണന എന്നിവ​യു​ടെ ഫലമാണ്‌ അവരുടെ പൊരു​ത്ത​വും ആശയവി​നി​മ​യ​ത്തി​ലെ ശാന്തത​യും. അവർ അനേകം കാര്യങ്ങൾ പഠി​ക്കേ​ണ്ടി​വന്നു എന്നു വ്യക്തമാണ്‌, കാരണം ഉത്തമ വിവാ​ഹ​ബന്ധം തനിയേ ഉണ്ടാകു​ന്നതല്ല. ഇണയുടെ വീക്ഷണ​ത്തി​നു പരിഗണന കൊടു​ക്കു​ന്ന​തും പങ്കാളി​യു​ടെ ആവശ്യ​ങ്ങളെ വിലമ​തി​ക്കു​ന്ന​തും വിവേ​ക​പൂർവ​ക​മായ വാക്കു​ക​ളാൽ സമ്മർദ​പൂ​രി​ത​മാ​യേ​ക്കാ​വുന്ന സാഹച​ര്യ​ങ്ങളെ മയപ്പെ​ടു​ത്തു​ന്ന​തും എത്ര പ്രധാ​ന​മാണ്‌. (സദൃശ​വാ​ക്യ​ങ്ങൾ 16:23) നിങ്ങൾ വിവാ​ഹി​ത​നാ​ണെ​ങ്കിൽ സൗമ്യ​പ്ര​കൃ​ത​നും ക്ഷമ ചോദി​ക്കാൻ ഒരുക്ക​മു​ള്ള​വ​നും ആകാൻ ശ്രമി​ക്കുക. അതു നിശ്ചയ​മാ​യും നിങ്ങളു​ടെ വിവാ​ഹ​ജീ​വി​തത്തെ വിജയ​പ്ര​ദ​മാ​ക്കും.

ആളുകൾ സന്തുഷ്ട​മായ, നിലനിൽക്കുന്ന വിവാ​ഹ​ജീ​വി​തം ആസ്വദി​ക്കണം എന്നതാണ്‌ യഹോ​വ​യാം ദൈവ​ത്തി​ന്റെ ആഗ്രഹം. (ഉല്‌പത്തി 2:18, 21) പക്ഷേ, അതിനുള്ള താക്കോൽ വിവാഹ ഇണകളു​ടെ പക്കലാണ്‌. ഇണകൾ ഇരുവ​രും സ്‌നേ​ഹ​ത്തോ​ടെ ഐക്യ​ത്തിൽ പ്രവർത്തി​ക്കു​ന്നവർ ആയിരു​ന്നാ​ലേ ആരോ​ഗ്യ​ക​ര​മായ ആശയവി​നി​മയം എന്ന കല അഭ്യസി​ച്ചു​കൊണ്ട്‌ വിവാ​ഹ​ജീ​വി​തം വിജയ​പ്ര​ദ​മാ​ക്കാ​നാ​കൂ.

[22-ാം പേജിലെ ചിത്രം]

ടിവി ഓഫ്‌ ചെയ്‌താൽ ആശയവി​നി​മ​യ​ത്തി​നു കൂടുതൽ സമയം ലഭിക്കും

[23-ാം പേജിലെ ചിത്രം]

നിലനിൽക്കുന്ന സ്‌നേ​ഹ​ത്തിൽ ഹൃദയ​ങ്ങളെ ബന്ധിപ്പി​ക്കാൻ ആരോ​ഗ്യാ​വ​ഹ​മായ ആശയവി​നി​മയം സഹായി​ക്കു​ന്നു