“യഹോവയുടെ സാക്ഷികളെ കുറിച്ചുള്ള എന്റെ വീക്ഷണത്തിനു നിങ്ങൾ മാറ്റം വരുത്തിയിരിക്കുന്നു”
“യഹോവയുടെ സാക്ഷികളെ കുറിച്ചുള്ള എന്റെ വീക്ഷണത്തിനു നിങ്ങൾ മാറ്റം വരുത്തിയിരിക്കുന്നു”
ഈ മാസികയുടെ 1998 ഒക്ടോബർ 15 ലക്കത്തിൽ യഹോവയുടെ സാക്ഷികളുടെ വേലയെക്കുറിച്ചു വന്ന ഒരു ലേഖനത്തോട് പോളണ്ടിലെ ഒരു ജയിൽ അധികാരി പ്രതികരിച്ചത് അങ്ങനെയാണ്. പോളണ്ടിലെ വോവൂഫിലുള്ള ജയിൽ അന്തേവാസികളോടൊപ്പം പ്രവർത്തിക്കുന്നതിൽ യഹോവയുടെ സാക്ഷികൾക്കുണ്ടായ വിജയത്തെ “ശിലാഹൃദയങ്ങൾ പ്രതികരണക്ഷമത നേടുമ്പോൾ” എന്ന ആ ലേഖനം വിവരിച്ചിരുന്നു.
മുകളിൽ പ്രസ്താവിച്ച വീക്ഷാഗോപുരം മാസിക പൊതുജനങ്ങളുടെ കൈകളിൽ എത്തിക്കുന്നതിനു മുമ്പ് അന്തേവാസികൾക്കു കൊടുക്കാനായി 1998 സെപ്റ്റംബർ 13-ന് വോവൂഫിലെ ജയിലിൽ ഒരു പ്രത്യേക യോഗം ക്രമീകരിച്ചു. ക്ഷണിക്കപ്പെട്ടവരായി ആ പ്രദേശത്തുള്ള സാക്ഷികളും സ്നാപനമേറ്റവരും താത്പര്യക്കാരുമായ ജയിൽപ്പുള്ളികളും അനവധി ജയിൽ അധികൃതരും ഉണ്ടായിരുന്നു. സന്നിഹിതരായവരുടെ ചില അഭിപ്രായങ്ങളാണ് താഴെ കൊടുക്കുന്നത്.
അഞ്ചിലധികം വർഷം മുമ്പ് ജയിലിൽ വെച്ചു സ്നാപനമേറ്റ യെഴ്സി എന്ന ഒരു യഹോവയുടെ സാക്ഷി ഇങ്ങനെ പറഞ്ഞു: “ഞങ്ങളെ സഹായിക്കാൻ സമീപ പ്രദേശത്തുള്ള സഹോദരങ്ങൾ എന്തുമാത്രം ശ്രമം ചെയ്തിരിക്കുന്നുവെന്നു വായിക്കാൻ കഴിയുന്നതിൽ ഞാൻ സന്തുഷ്ടനാണ്.” അദ്ദേഹം ഇങ്ങനെ കൂട്ടിച്ചേർത്തു: “പുരോഗതി പ്രാപിക്കാൻ കഠിന ശ്രമം നടത്തുന്ന എന്നെ യഹോവ രൂപപ്പെടുത്തുന്ന വിധം എനിക്കു മനസ്സിലാക്കാൻ കഴിയുന്നു.”
ജയിലിലെ സാക്ഷീകരണ വേലയെ കുറിച്ച് സ്ജഷ്വാഫ് എന്നു പേരുള്ള ഒരു ജയിൽപുള്ളി ഇങ്ങനെ പറഞ്ഞു: “ഇപ്പോൾ നാലു കുറ്റവാളികൾ സ്നാപനത്തിന് ഒരുങ്ങുകയാണ്, ഞങ്ങളുടെ ഹാളിൽ യോഗങ്ങൾക്ക് ഇപ്പോഴും പുതിയ താത്പര്യക്കാരുണ്ട്. ഈ വയലിൽ കൂടുതൽ പ്രവർത്തിക്കാൻ പ്രസ്തുത ലേഖനം ഞങ്ങൾക്കു ശക്തമായ ഒരു പ്രേരണയാണ്.” സ്ജഷ്വാഫിന് ഇനി
19 വർഷം കൂടി ജയിലിൽ കഴിയണം എന്നതു പരിചിന്തിക്കുമ്പോൾ എത്ര ക്രിയാത്മകമായ മനോഭാവമാണ് അത്!വോവൂഫ് ജയിലിനെ കുറിച്ചുള്ള ലേഖനം വായിച്ച ശേഷം ഒരു ജയിലധികാരി ഇങ്ങനെ അഭിപ്രായപ്പെട്ടു: “ഞങ്ങൾക്കു പ്രത്യേക ബഹുമതി കൈവന്നിരിക്കുന്നു. ലോകമെമ്പാടും 130 ഭാഷകളിലായി ഈ ജയിലിന് അനുകൂലമായ ഇത്തരമൊരു പ്രചാരം ലഭിക്കുമെന്നു ഞാൻ ഒരിക്കലും ചിന്തിച്ചിരുന്നില്ല. ഞാൻ നിങ്ങളെ വളരെ ഇഷ്ടപ്പെടുന്നു, കുറ്റവാളികളെ പ്രതി നിങ്ങൾ ചെയ്യുന്ന പ്രയത്നങ്ങളെ ഞാൻ വിലമതിക്കുകയും ചെയ്യുന്നു.” മറ്റൊരു ഉദ്യോഗസ്ഥൻ ഇങ്ങനെ കൂട്ടിച്ചേർത്തു: “യഹോവയുടെ സാക്ഷികളെ കുറിച്ചുള്ള എന്റെ വീക്ഷണത്തിനു നിങ്ങൾ മാറ്റം വരുത്തിയിരിക്കുന്നു. മുമ്പ് ഞാൻ നിങ്ങളെ മതഭ്രാന്തരായിട്ടാണ് വീക്ഷിച്ചിരുന്നത്. എന്നാൽ നിങ്ങൾ തത്ത്വദീക്ഷയുള്ളവരാണെന്ന് എനിക്കിപ്പോൾ ബോധ്യമായിരിക്കുന്നു.”
വോവൂഫ് ജയിലിന്റെ ഡയറക്ടറായ മാരെക് ഗയോസ് പുഞ്ചിരി തൂകിക്കൊണ്ട് ഇങ്ങനെ പറഞ്ഞു: “നിങ്ങൾക്ക് കാര്യമായി ഒന്നും ചെയ്യാനാവില്ല എന്നാണ് ഞങ്ങൾക്ക് ആദ്യം തോന്നിയത്. കുറ്റപ്പുള്ളികളെ ബൈബിൾ ഉപയോഗിച്ചു നേരെയാക്കാൻ ആഗ്രഹിക്കുന്ന ഏതോ ഒരു മതക്കാരാണു നിങ്ങളെന്നാണ് ഞങ്ങൾ വിചാരിച്ചത്. എങ്കിലും, നിങ്ങളുടെ പ്രവർത്തനത്തിന്റെ പ്രാരംഭ ദശയിൽത്തന്നെ ഫലം കണ്ടുതുടങ്ങിയപ്പോൾ നിങ്ങളോടു ചേർന്നു പ്രവർത്തിക്കാൻ ഞങ്ങൾ തീരുമാനിച്ചു. കഴിഞ്ഞ 9 വർഷമായി നിങ്ങൾ യാതൊരു മടിയും കൂടാതെ ഇവിടെ വന്നുകൊണ്ടിരിക്കുന്നു, നിങ്ങളുടെ പ്രവർത്തനത്തെ ഞാൻ വളരെയധികം വിലമതിക്കുന്നു.”
എന്നാൽ, മൊത്തത്തിൽ വോവൂഫിലെ ജയിൽപ്പുള്ളികൾ എങ്ങനെയാണ് ആ ലേഖനത്തോടു പ്രതികരിച്ചത്? അന്തേവാസികൾക്കു മാസിക വളരെ ഇഷ്ടപ്പെട്ടതിനാൽ ജയിലിലെ സാക്ഷികളുടെ പക്കലുണ്ടായിരുന്ന മാസികകൾ മുഴുവനും തീർന്നുപോയി. തങ്ങൾക്കായി 40 പ്രതികൾ ആവശ്യപ്പെട്ടുകൊണ്ട് ജയിലധികാരികളും അതിൽ താത്പര്യം പ്രകടിപ്പിച്ചു. കൂടുതലായ ആവശ്യം വന്നതിനാൽ പ്രാദേശിക സഭകൾ ജയിലിലെ സഹോദരങ്ങൾക്ക് 100 മാസികകൾകൂടി നൽകിക്കൊണ്ട് സഹായഹസ്തം നീട്ടി. അതേസമയം ജയിലിലെ യോഗഹാജരും വർധിച്ചു.
യഹോവയുടെ സാക്ഷികളോടു വളരെ അടുത്ത് സഹകരിച്ചിട്ടുള്ള ഒരു ജയിലധികാരിയായ പ്യൊട്ട് ഹൊഡൂയെൻ ഇങ്ങനെ പറഞ്ഞു: “ജയിലിലെ എല്ലാ ഷോകേസുകളിലും ഈ ലേഖനം പ്രദർശിപ്പിക്കാൻ ഞങ്ങൾ തീരുമാനിച്ചു. നിങ്ങളോടൊത്തു ബൈബിൾ പഠിക്കുന്നില്ലാത്ത എല്ലാ അന്തേവാസികളും ആ മാസിക വായിക്കാൻ ഇടയാകുമെന്നാണ് ഞങ്ങളുടെ പ്രത്യാശ.”
സാക്ഷികളുടെ നല്ല മാതൃകയും നിശ്ചയദാർഢ്യത്തോടെയുള്ള പ്രസംഗവേലയും നല്ല ഫലങ്ങൾ ഉളവാക്കുന്നു. പുരോഗതി നേടി സ്നാപനമേറ്റ 15 ജയിൽപുള്ളികളെ കൂടാതെ 2 ജയിലധികൃതരും തങ്ങളുടെ ജീവിതം യഹോവയ്ക്കു സമർപ്പിച്ചിരിക്കുന്നു. മറ്റൊരു അധികാരി ഒരു ബൈബിൾ അധ്യയനം ആവശ്യപ്പെട്ടിട്ടുണ്ട്. തീർച്ചയായും, വോവൂഫ് ജയിലിൽ സുവാർത്ത പ്രസംഗിക്കുന്ന സഹോദരങ്ങൾ തങ്ങളുടെ വിജയത്തിനുള്ള സകല ബഹുമതിയും യഹോവയാം ദൈവത്തിനു നൽകുന്നു.—1 കൊരിന്ത്യർ 3:6, 7 താരതമ്യം ചെയ്യുക.
[28-ാം പേജിലെ ചിത്രം]
മൂന്നു സാക്ഷികളും ഒരു അന്തേവാസിയും ജയിലിലെ പ്രസംഗഹാളിൽ നടത്തിയ മാസികാവതരണ വേളയിൽ