‘യോഗ്യരായവരെ അന്വേഷിപ്പിൻ’

പൊതുയുഗം ഒന്നാം നൂറ്റാണ്ടിലെ സമ്പദ്‌സമൃദ്ധമായ ഒരു നഗരമായിരുന്നു ദമസ്‌കൊസ്‌. ഫലവൃക്ഷത്തോപ്പുകളാൽ ചുറ്റപ്പെട്ട ആ നഗരം കിഴക്കുള്ള ദേശങ്ങളിൽനിന്നു വരുന്ന മരുയാത്രാസംഘങ്ങൾക്ക്‌ ഒരു മരുപ്പച്ച പോലെയായിരുന്നു. യേശുക്രിസ്‌തുവിന്റെ മരണശേഷം അധികം താമസിയാതെ അവിടെ ഒരു ക്രിസ്‌തീയ സഭ രൂപംകൊണ്ടു. അതിലെ അംഗങ്ങളുടെ കൂട്ടത്തിൽ, പൊ.യു. 33-ൽ യെരൂശലേമിൽവെച്ചു നടന്ന പെന്തെക്കൊസ്‌തു പെരുന്നാളിൽ യേശുവിന്റെ അനുഗാമികൾ ആയിത്തീർന്ന യഹൂദരും ഉണ്ടായിരുന്നിരിക്കാം. (പ്രവൃത്തികൾ 2:⁠5, 41) സ്‌തെഫാനൊസിനെ കല്ലെറിഞ്ഞു കൊന്നതിനെ തുടർന്ന്‌ ഉണ്ടായ പീഡനസമയത്ത്‌ യെഹൂദ്യയിൽ നിന്നുള്ള ചില ശിഷ്യന്മാർ ദമസ്‌കൊസിലേക്കു മാറിപ്പാർത്തിരിക്കാനിടയുണ്ട്‌.​—⁠പ്രവൃത്തികൾ 8:⁠1.

സാധ്യതയനുസരിച്ച്‌ പൊ.യു. 34-ൽ, ദമസ്‌കൊസിലെ ഒരു ക്രിസ്‌ത്യാനിയായിരുന്ന അനന്യാസിന്‌ അസാധാരണമായ ഒരു നിയമനം ലഭിക്കുകയുണ്ടായി. കർത്താവ്‌ അവനോട്‌ ഇങ്ങനെ പറഞ്ഞു: “നീ എഴുന്നേററു നേർവ്വീഥി എന്ന തെരുവിൽ ചെന്നു, യൂദയുടെ വീട്ടിൽ തർസൊസുകാരനായ ശൌൽ എന്നു പേരുള്ളവനെ അന്വേഷിക്ക; അവൻ പ്രാർത്ഥിക്കുന്നു.”​—⁠പ്രവൃത്തികൾ 9:⁠11.

ഏകദേശം 1.5 കിലോമീറ്റർ നീളമുണ്ടായിരുന്ന നേർവ്വീഥി എന്ന തെരുവ്‌ ദമസ്‌കൊസിന്റെ മധ്യഭാഗത്തുകൂടിയാണ്‌ കടന്നുപോയിരുന്നത്‌. പുരാതന നാളിൽ ആ വീഥി എങ്ങനെ കാണപ്പെട്ടിരിക്കുമെന്നു വിഭാവന ചെയ്യാൻ, ഇവിടെ കൊടുത്തിരിക്കുന്ന 19-ാം നൂറ്റാണ്ടിലെ കൊത്തുപണി നമ്മെ സഹായിക്കും. അതിന്റെ നിർമാണരീതി കാണിക്കുന്നതനുസരിച്ച്‌, അനന്യാസിന്‌ യൂദയുടെ വീട്‌ കണ്ടെത്തുന്നതിനു കുറെനേരത്തെ ശ്രമം ആവശ്യമായിവന്നിരിക്കാം. എന്നിരുന്നാലും, അനന്യാസ്‌ അതു കണ്ടെത്തി. മാത്രമല്ല, ആ സന്ദർശനം, ശൗൽ ഒരു തീക്ഷ്‌ണ സുവാർത്താഘോഷകനായ അപ്പൊസ്‌തലനായ പൗലൊസ്‌ ആയിത്തീരുന്നതിലേക്കു നയിക്കുകയും ചെയ്‌തു.​—⁠പ്രവൃത്തികൾ 9:12-19.

സുവാർത്തയ്‌ക്കു ‘യോഗ്യരായവരെ അന്വേഷിക്കാൻ’ യേശു തന്റെ ശിഷ്യന്മാരോടു പറഞ്ഞിരുന്നു, അതിനായി അവരെ അയയ്‌ക്കുകയും ചെയ്‌തു. (മത്തായി 10:⁠11) അനന്യാസ്‌ ശൗലിനെ അക്ഷരാർഥത്തിൽത്തന്നെ അന്വേഷിച്ചതായി നാം കാണുന്നു. അനന്യാസിനെ പോലെ, യഹോവയുടെ സാക്ഷികളും യോഗ്യരായവരെ അതായത്‌ അർഹരായവരെ കണ്ടെത്താനായി സന്തോഷത്തോടെ അന്വേഷണം നടത്തുകയും ആളുകൾ രാജ്യസുവാർത്ത സ്വീകരിക്കുമ്പോൾ അത്യധികം ആനന്ദിക്കുകയും ചെയ്യുന്നു. അർഹരായവരെ കണ്ടത്തുമ്പോൾ എല്ലാ ശ്രമത്തിനും തക്ക ഫലമുണ്ടാകുന്നു.​—⁠1 കൊരിന്ത്യർ 15:⁠58.

[32-ാം പേജിലെ ചിത്രം]

“നേർവ്വീഥി” ആധുനിക നാളിൽ

[32-ാം പേജിലെ ചിത്രത്തിന്‌ കടപ്പാട്‌]

From the book La Tierra Santa, Volume II, 1830