1. നമ്മൾ ജീവിക്കുന്നത്‌ ഏതു കാലഘട്ടത്തിലാണ്‌?

നമ്മൾ ജീവിക്കുന്നത്‌ “വിശേഷാൽ ദുഷ്‌കരമായ സമയങ്ങ”ളിലാണ്‌. 1914-ൽ ‘അന്ത്യനാളുകൾ’ ആരംഭിച്ചതുമുതൽ ലോകത്തിന്‍റെ അവസ്ഥകൾ മുമ്പെന്നത്തെക്കാളും മോശമായിരിക്കുകയാണ്‌. (2 തിമൊ. 3:1-5) അത്‌ ഇനിയും വഷളാകുമെന്ന് നമുക്ക് അറിയാം. കാരണം ബൈബിൾപ്രവചനം പറയുന്നത്‌, “ദുഷ്ടമനുഷ്യരും കപടനാട്യക്കാരും . . . ദോഷത്തിൽനിന്നു ദോഷത്തിലേക്ക് അധഃപതിക്കും” എന്നാണ്‌.—2 തിമൊ. 3:13.

2. ഇന്ന് മിക്ക ആളുകളും ഏതുതരം വിനോദമാണ്‌ ആസ്വദിക്കുന്നത്‌? (ലേഖനാരംഭത്തിലെ ചിത്രം കാണുക.)

² ഇന്ന് മിക്ക ആളുകളും വിനോദത്തിനുവേണ്ടി, അക്രമം, അധാർമികത, മന്ത്രവാദം, ഭൂതവിദ്യ എന്നിവയൊക്കെ ഉൾപ്പെടുന്ന കാര്യങ്ങൾ കാണുകയോ ചെയ്യുകയോ ചെയ്യുന്നു. ഉദാഹരണത്തിന്‌, ഇന്‍റർനെറ്റ്‌, ടെലിവിഷൻ പരിപാടികൾ, സിനിമകൾ, പുസ്‌തകങ്ങൾ, മാസികകൾ എന്നിവയെല്ലാം മിക്കപ്പോഴും അക്രമവും അധാർമികതയും തികച്ചും സാധാരണ സംഗതികളാണെന്ന മട്ടിൽ അവതരിപ്പിക്കുന്നു. ഒരിക്കൽ ആളുകളെ ഞെട്ടിച്ചിരുന്ന പെരുമാറ്റരീതികൾ ഇപ്പോൾ അവർക്ക് സ്വീകാര്യമാണെന്നു മാത്രമല്ല, ചില സ്ഥലങ്ങളിൽ അവയ്‌ക്ക് നിയമാംഗീകാരംപോലും നൽകിയിരിക്കുന്നു. എന്നാൽ, യഹോവ ഇത്തരം പെരുമാറ്റം അംഗീകരിക്കുന്നു എന്ന് ഇതിന്‌ അർഥമില്ല.—റോമർ 1:28-32 വായിക്കുക.

3. ദൈവത്തിന്‍റെ നിലവാരങ്ങൾക്കു ചേർച്ചയിൽ ജീവിക്കുന്നവരെ ഇന്ന് അനേകരും എങ്ങനെയാണ്‌ വീക്ഷിക്കുന്നത്‌?

 ³ ഒന്നാം നൂറ്റാണ്ടിൽ, ആളുകൾ വിനോദത്തിനുവേണ്ടി അക്രമവും അധാർമികതയും നിറഞ്ഞ കാര്യങ്ങളും കണ്ടിരുന്നു. പക്ഷെ യേശുവിന്‍റെ അനുഗാമികൾ അങ്ങനെ ചെയ്‌തില്ല; അവർ ദൈവത്തിന്‍റെ നിലവാരങ്ങൾക്ക് ചേർച്ചയിലാണ്‌ ജീവിച്ചത്‌. ഇത്‌ മറ്റുള്ളവരെ ‘അതിശയിപ്പിച്ചു.’ ഫലമോ? അവർ ക്രിസ്‌ത്യാനികളെ കളിയാക്കുകയും പീഡിപ്പിക്കുകയും ചെയ്‌തു. (1 പത്രോ. 4:4) ഇക്കാലത്തും, ദൈവത്തിന്‍റെ നിലവാരങ്ങൾ അനുസരിച്ച് ജീവിക്കുന്നവരെ ‘വിചിത്രജീവികളായിട്ടാണ്‌’ പലരും കാണുന്നത്‌. വാസ്‌തവത്തിൽ, ക്രിസ്‌തുയേശുവിന്‍റെ മാതൃക അനുകരിക്കുന്നവർക്ക് “പീഡനമുണ്ടാകും” എന്ന് ബൈബിൾ മുന്നറിയിപ്പു നൽകുന്നു.—2 തിമൊ. 3:12.

4. നമ്മൾ ഈ ലോകത്തെ സ്‌നേഹിക്കരുതാത്തത്‌ എന്തുകൊണ്ട്?

⁴ ദൈവത്തിന്‍റെ ഇഷ്ടം ചെയ്യാൻ നമ്മൾ ആഗ്രഹിക്കുന്നെങ്കിൽ “ലോകത്തെയോ ലോകത്തിലുള്ളതിനെയോ” നമുക്ക് സ്‌നേഹിക്കാൻ കഴിയില്ല. (1 യോഹന്നാൻ 2:15, 16 വായിക്കുക.) “ഈ ലോകത്തിന്‍റെ ദൈവം” സാത്താനാണ്‌. അത്‌ നിയന്ത്രിക്കുന്നതും അവനാണ്‌. ആളുകളെ വഴിതെറ്റിക്കാൻ അവൻ മതങ്ങൾ, ഗവണ്മെന്‍റുകൾ, വാണിജ്യസംഘടനകൾ, മാധ്യമങ്ങൾ എന്നിവയെ ഉപയോഗിക്കുന്നു. (2 കൊരി. 4:4; 1 യോഹ. 5:19) ഈ ലോകം നമ്മളെ സ്വാധീനിക്കാൻ നമ്മൾ ആഗ്രഹിക്കുന്നില്ല, അതുകൊണ്ട് നമ്മൾ മോശമായ ആളുകളുമായി സഹവസിക്കുന്നത്‌ ഒഴിവാക്കണം. ബൈബിൾ വ്യക്തമായി നമുക്ക് ഈ മുന്നറിയിപ്പ് നൽകുന്നു: “വഴിതെറ്റിക്കപ്പെടരുത്‌. ദുഷിച്ച സംസർഗം സദ്‌ശീലങ്ങളെ കെടുത്തിക്കളയുന്നു.”—1 കൊരി. 15:33.

5, 6. നമ്മൾ ആരുമായുള്ള സഹവാസം ഒഴിവാക്കണം, എന്തുകൊണ്ട്?

⁵ യഹോവയുമായുള്ള നമ്മുടെ നല്ല ബന്ധം കാത്തുസൂക്ഷിക്കാൻവേണ്ടി, മോശമായ കാര്യങ്ങൾ ചെയ്യുന്ന ആരുമായും നമ്മൾ സഹവസിക്കുന്നില്ല. യഹോവയെ ആരാധിക്കുന്നുണ്ടെന്നു പറയുകയും എന്നാൽ അവനെ അനുസരിക്കാതിരിക്കുകയും ചെയ്യുന്നവരും ഇതിൽ ഉൾപ്പെടുന്നു. ഇത്തരത്തിലുള്ള ആരെങ്കിലും ഗുരുതരമായ ഒരു പാപം ചെയ്യുകയും അനുതപിക്കാതിരിക്കുകയും ആണെങ്കിൽ നമ്മൾ അവരുമായി സഹവസിക്കുന്നത്‌ നിറുത്തിക്കളയും.—റോമ. 16:17, 18.

⁶ ആളുകൾ സാധാരണഗതിയിൽ കൂട്ടുകാരെ സന്തോഷിപ്പിക്കാനും അവരുടെ പ്രീതി നേടാനും ആഗ്രഹിക്കുന്നു. ദൈവത്തെ അനുസരിക്കാത്തവരുമായി നമ്മൾ സഹവസിക്കുന്നെങ്കിൽ അവർ ചെയ്യുന്ന കാര്യങ്ങൾ ചെയ്യാൻ നമുക്കും തോന്നിയേക്കാം. ഉദാഹരണത്തിന്‌, ലൈംഗിക സദാചാരനിഷ്‌ഠയില്ലാത്തവരുമായി നമ്മൾ അടുത്ത്‌ ഇടപഴകുകയാണെങ്കിൽ നമ്മളും അവരെപ്പോലെ ആയേക്കാം. നമ്മുടെ ചില സഹോദരീസഹോദരന്മാർക്കും അങ്ങനെ സംഭവിച്ചിട്ടുണ്ട്. അനുതപിക്കാതിരുന്ന അത്തരക്കാരെ സഭയിൽനിന്ന് പുറത്താക്കുകയും ചെയ്‌തു. (1 കൊരി. 5:11-13) പിന്നെയും, അനുതാപമില്ലാതെ തുടർന്നാൽ, അവരുടെ അവസ്ഥ പത്രോസ്‌ അപ്പൊസ്‌തലൻ പറഞ്ഞതുപോലെയായിരിക്കും.—2 പത്രോസ്‌ 2:20-22 വായിക്കുക.

7. ആരെയാണ്‌ നമ്മൾ ഉറ്റ സുഹൃത്തുക്കൾ ആക്കേണ്ടത്‌?

⁷ സകലരോടും ദയയുള്ളവരായിരിക്കാൻ ആഗ്രഹിക്കുന്നുണ്ടെങ്കിലും ദൈവത്തെ അനുസരിക്കാത്തവരെ നമ്മൾ ഒരിക്കലും നമ്മുടെ അടുത്ത കൂട്ടുകാരാക്കരുത്‌. യഹോവയുടെ സാക്ഷികളിൽപ്പെട്ട ഏകാകിയായ ഒരു വ്യക്തി, ജീവിതം യഹോവയ്‌ക്ക് സമർപ്പിക്കുകയോ അവനോട്‌ വിശ്വസ്‌തനായിരിക്കുകയോ അവന്‍റെ നിലവാരങ്ങൾ ആദരിക്കുകയോ ചെയ്യാത്ത ഒരാളെ പ്രണയിക്കുന്നത്‌ തെറ്റാണ്‌. ദൈവത്തെ സ്‌നേഹിക്കാത്തവരുടെ അംഗീകാരത്തെക്കാൾ നമുക്ക് പ്രധാനം ദൈവത്തിന്‍റെ അംഗീകാരമാണ്‌. ദൈവത്തിന്‍റെ ഇഷ്ടം ചെയ്യുന്നവരെ മാത്രമേ നമ്മുടെ ഉറ്റ സുഹൃത്തുക്കൾ ആക്കാവൂ. യേശു പറഞ്ഞു: “ദൈവത്തിന്‍റെ ഇഷ്ടം ചെയ്യുന്നവരത്രേ എന്‍റെ സഹോദരനും സഹോദരിയും അമ്മയും.”—മർക്കോ. 3:35.

8. മോശമായ സഹവാസം പുരാതന ഇസ്രായേല്യരെ എങ്ങനെ ബാധിച്ചു?

⁸ മോശമായ ആളുകളോടൊപ്പം സമയം ചെലവിടുന്നതിന്‍റെ ഫലം ദാരുണമായിരിക്കും. ഇസ്രായേല്യരുടെ കാര്യമെടുക്കുക. അവർ വാഗ്‌ദത്തദേശത്ത്‌  എത്തുന്നതിന്‌ മുമ്പുതന്നെ, നേരത്തെ അവിടെ താമസിച്ചിരുന്നവരെക്കുറിച്ച് യഹോവ മുന്നറിയിപ്പ് കൊടുത്തിരുന്നു. അവൻ ഇങ്ങനെ പറഞ്ഞു: “അവരുടെ ദേവന്മാരെ നമസ്‌കരിക്കരുതു; അവയെ സേവിക്കരുതു; അവരുടെ പ്രവൃത്തികൾപോലെ പ്രവർത്തിക്കരുതു; അവരെ അശേഷം നശിപ്പിച്ചു അവരുടെ വിഗ്രഹങ്ങളെ തകർത്തുകളയേണം. നിങ്ങളുടെ ദൈവമായ യഹോവയെ തന്നേ സേവിപ്പിൻ.” (പുറ. 23:24, 25) എങ്കിലും ഇസ്രായേല്യരിൽ മിക്കവരും ദൈവത്തിന്‍റെ നിർദേശം അനുസരിക്കാതെ അവിശ്വസ്‌തരായിത്തീർന്നു. (സങ്കീ. 106:35-39) ഫലമോ? യഹോവ ഇസ്രായേൽ ജനതയെ തള്ളിക്കളഞ്ഞ് പകരം ക്രിസ്‌തീയ സഭയെ തന്‍റെ ജനമായി തിരഞ്ഞെടുത്തു.—മത്താ. 23:38; പ്രവൃ. 2:1-4.

9. ലോകത്തിലെ മാധ്യമങ്ങൾ അപകടകരമായേക്കാവുന്നത്‌ എന്തുകൊണ്ട്?

⁹ ടെലിവിഷൻ പരിപാടികൾ, വെബ്‌സൈറ്റുകൾ, പുസ്‌തകങ്ങൾ തുടങ്ങിയ ലോകത്തിലെ മിക്ക മാധ്യമങ്ങൾക്കും യഹോവയുമായുള്ള നമ്മുടെ അടുപ്പത്തിന്‌ തുരങ്കം വെക്കാനാകും. യഹോവയിലും അവന്‍റെ വാഗ്‌ദാനങ്ങളിലും വിശ്വാസമുണ്ടായിരിക്കാൻ ക്രിസ്‌ത്യാനികളെ സഹായിക്കുക എന്ന ലക്ഷ്യത്തിൽ തയ്യാറാക്കിയിട്ടുള്ളതല്ല ഇവയൊന്നും. പകരം, സാത്താന്‍റെ ദുഷ്ടലോകത്തിൽ വിശ്വാസം അർപ്പിക്കാൻ ആളുകളെ പ്രേരിപ്പിക്കുന്നവയാണ്‌ ഇവ. ‘ലൗകികമോഹങ്ങൾ’ ഉണർത്തിയേക്കാവുന്ന എന്തെങ്കിലും കാണുകയോ കേൾക്കുകയോ വായിക്കുകയോ ചെയ്യാതിരിക്കാൻ നമ്മൾ നല്ല ശ്രദ്ധയുള്ളവരായിരിക്കണം.—തീത്തൊ. 2:13.

10. ഈ ലോകത്തിന്‍റെ മാധ്യമങ്ങൾക്ക് എന്ത് സംഭവിക്കും?

¹⁰ ഉടൻതന്നെ സാത്താന്‍റെ ലോകവും അതിന്‍റെ വിഷം തുപ്പുന്ന മാധ്യമങ്ങളും നശിപ്പിക്കപ്പെടും. ബൈബിൾ ഇങ്ങനെ പറയുന്നു: “ലോകവും അതിന്‍റെ മോഹവും നീങ്ങിപ്പോകുന്നു. ദൈവേഷ്ടം ചെയ്യുന്നവനോ എന്നേക്കും നിലനിൽക്കുന്നു.” (1 യോഹ. 2:17) സമാനമായി, സങ്കീർത്തനക്കാരനും ഇങ്ങനെ പറഞ്ഞു: “ദുഷ്‌പ്രവൃത്തിക്കാർ ഛേദിക്കപ്പെടും.” അവൻ ഇങ്ങനെയും കൂട്ടിച്ചേർത്തു: “സൌമ്യതയുള്ളവർ ഭൂമിയെ കൈവശമാക്കും; സമാധാനസമൃദ്ധിയിൽ അവർ ആനന്ദിക്കും.” എത്രകാലത്തേക്ക്? “നീതിമാന്മാർ ഭൂമിയെ അവകാശമാക്കി എന്നേക്കും അതിൽ വസിക്കും.”—സങ്കീ. 37:9, 11, 29.

11. യഹോവയോട്‌ വിശ്വസ്‌തരായിരിക്കാൻ അവൻ നമ്മളെ എങ്ങനെയാണ്‌ സഹായിക്കുന്നത്‌?

¹¹ സാത്താന്‍റെ ലോകത്തിൽനിന്ന് വ്യത്യസ്‌തമായി, യഹോവയുടെ സംഘടന, നിത്യജീവൻ നേടാൻ സഹായിക്കുന്ന വിധത്തിൽ ജീവിക്കാൻ നമ്മെ സജ്ജരാക്കുന്നു. യേശു യഹോവയോട്‌ ഇങ്ങനെ പ്രാർഥിച്ചു: “ഏകസത്യദൈവമായ നിന്നെയും നീ അയച്ച യേശുക്രിസ്‌തുവിനെയും അവർ അറിയുന്നതല്ലോ നിത്യജീവൻ.” (യോഹ. 17:3) തന്നെ അറിയാൻ ആവശ്യമായതെല്ലാം യഹോവ തന്‍റെ സംഘടനയിലൂടെ നമുക്ക് നൽകുന്നു. ഉദാഹരണത്തിന്‌, ദൈവത്തെ സേവിക്കുന്നതിൽ തുടരാൻ സഹായിക്കുന്ന ധാരാളം മാസികകൾ, ലഘുപത്രികകൾ, പുസ്‌തകങ്ങൾ, വീഡിയോകൾ, വെബ്‌ പേജുകൾ എന്നിവയെല്ലാം നമുക്കുണ്ട്. ലോകമെമ്പാടുമുള്ള 1,10,000-ത്തിലധികം വരുന്ന സഭകളിൽ ക്രമമായി യോഗങ്ങൾ നടത്തുന്നതിനുള്ള ക്രമീകരണവും അവന്‍റെ സംഘടന ചെയ്യുന്നുണ്ട്. ഇത്തരം യോഗങ്ങളിലൂടെയും സമ്മേളനങ്ങളിലൂടെയും, ബൈബിളിൽനിന്നു നമ്മൾ പഠിക്കുന്ന കാര്യങ്ങൾ യഹോവയിലും അവന്‍റെ വാഗ്‌ദാനങ്ങളിലും ഉള്ള നമ്മുടെ വിശ്വാസം ശക്തമാക്കും.—എബ്രാ. 10:24, 25.

12. “കർത്താവിൽ മാത്രമേ” വിവാഹം കഴിക്കാവൂ എന്ന കല്‌പന വിശദീകരിക്കുക.

¹² വിവാഹം കഴിക്കാൻ ആഗ്രഹിക്കുന്ന ക്രിസ്‌ത്യാനികൾ ആരോടൊപ്പമാണ്‌ സമയം ചെലവഴിക്കുന്നതെന്ന കാര്യത്തിൽ വളരെ ശ്രദ്ധയുള്ളവരായിരിക്കണം. ദൈവത്തിന്‍റെ വചനം നമുക്ക് ഈ മുന്നറിയിപ്പു നൽകുന്നു: “അവിശ്വാസികളുമായി ചേർച്ചയില്ലാത്ത പങ്കാളിത്തം അരുത്‌. നീതിക്കും അധർമത്തിനും തമ്മിൽ എന്തു കൂട്ടായ്‌മ? വെളിച്ചത്തിന്‌ ഇരുളുമായി എന്തു പങ്കാളിത്തം?” (2 കൊരി. 6:14) “കർത്താവിൽ മാത്രമേ” വിവാഹം കഴിക്കാവൂ എന്ന് ബൈബിൾ ദൈവദാസരോട്‌ പറയുന്നു. അതായത്‌, യഹോവയ്‌ക്കു സമർപ്പിച്ച് സ്‌നാനമേറ്റ്‌ യഹോവയുടെ നിലവാരങ്ങൾക്ക് ചേർച്ചയിൽ ജീവിക്കുന്ന  ഒരാളെ മാത്രം. (1 കൊരി. 7:39) അത്തരം ഒരു വ്യക്തിയെ, യഹോവയെ സ്‌നേഹിക്കുന്ന ഒരാളെ, വിവാഹം കഴിക്കുമ്പോൾ നിങ്ങൾക്ക് ലഭിക്കുന്നത്‌ ദൈവത്തോടുള്ള വിശ്വസ്‌തതയിൽ തുടരാൻ നിങ്ങളെ സഹായിക്കുന്ന ഒരു പങ്കാളിയെയായിരിക്കും.

13. വിവാഹത്തെക്കുറിച്ച് ദൈവം ഇസ്രായേല്യർക്ക് എന്ത് കല്‌പന കൊടുത്തു?

¹³ നമുക്ക് ഏറ്റവും നല്ലത്‌ എന്താണെന്ന് യഹോവയ്‌ക്ക് നന്നായി അറിയാം. “കർത്താവിൽ മാത്രമേ” വിവാഹം കഴിക്കാവൂ എന്ന കല്‌പന അതുപോലെയുള്ള ഒന്നാണ്‌. അത്‌ പുതിയ ഒന്നല്ലതാനും. ഉദാഹരണത്തിന്‌, തന്നെ ആരാധിക്കാത്ത ആളുകളെക്കുറിച്ച് യഹോവ ഇസ്രായേല്യരോട്‌ പറഞ്ഞത്‌ എന്താണെന്ന് നോക്കുക. മോശയിലൂടെ അവൻ ഇങ്ങനെ കൽപ്പിച്ചു: “അവരുമായി വിവാഹസംബന്ധം ചെയ്യരുതു; നിന്‍റെ പുത്രിമാരെ അവരുടെ പുത്രന്മാർക്കു കൊടുക്കയോ അവരുടെ പുത്രിമാരെ നിന്‍റെ പുത്രന്മാർക്കു എടുക്കയോ ചെയ്യരുതു. അന്യദൈവങ്ങളെ സേവിപ്പാൻ തക്കവണ്ണം അവർ നിന്‍റെ പുത്രന്മാരെ എന്നോടു അകറ്റിക്കളയും; യഹോവയുടെ കോപം നിങ്ങൾക്കു വിരോധമായി ജ്വലിച്ചു നിങ്ങളെ വേഗത്തിൽ നശിപ്പിക്കും.”—ആവ. 7:3, 4.

14, 15. യഹോവയുടെ കല്‌പന അവഗണിച്ചതുകൊണ്ട് ശലോമോന്‌ എന്ത് സംഭവിച്ചു?

¹⁴ ഇസ്രായേലിന്‍റെ രാജാവായി അധികം വൈകാതെ ശലോമോൻ ജ്ഞാനത്തിനായി പ്രാർഥിച്ചു; യഹോവ അവന്‍റെ പ്രാർഥന കേൾക്കുകയും ചെയ്‌തു. അതുകൊണ്ട് സകല വിധത്തിലും സമൃദ്ധി അനുഭവിച്ച ഒരു ജനതയുടെ രാജാവെന്ന നിലയിൽ അവൻ പ്രശസ്‌തനായി. ശലോമോന്‍റെ ജ്ഞാനത്തിൽ അത്ര മതിപ്പ് തോന്നിയ ശെബാരാജ്ഞി അവനോട്‌ ഇങ്ങനെ പറഞ്ഞു: “ഞാൻ കേട്ട കീർത്തിയെക്കാൾ നിന്‍റെ ജ്ഞാനവും ധനവും അധികമാകുന്നു.” (1 രാജാ. 10:7) എങ്കിലും, ഒരു വ്യക്തി ദൈവത്തിന്‍റെ കല്‌പന അവഗണിക്കുകയും യഹോവയെ സേവിക്കാത്ത ഒരാളെ വിവാഹം കഴിക്കുകയും ചെയ്‌താൽ എന്ത് സംഭവിക്കുമെന്ന പാഠവും ശലോമോന്‍റെ അനുഭവം നമ്മളെ പഠിപ്പിക്കുന്നു.—സഭാ. 4:13.

¹⁵ യഹോവ ശലോമോനെ അനുഗ്രഹിച്ചെങ്കിലും അവൻ നൽകിയിരുന്ന വ്യക്തമായ കല്‌പന ശലോമോൻ ലംഘിച്ചു. അവൻ, യഹോവയെ സേവിക്കാത്ത ‘അന്യജാതിക്കാരത്തികളായ അനേകം സ്‌ത്രീകളെ സ്‌നേഹിച്ചു.’ പിൽക്കാലത്ത്‌, അവന്‌ 700 ഭാര്യമാരും 300 വെപ്പാട്ടികളും ഉണ്ടായിരുന്നു. അതിന്‍റെ ഫലമെന്തായിരുന്നു? ശലോമോൻ വൃദ്ധനായപ്പോൾ ഭാര്യമാർ “അവന്‍റെ ഹൃദയത്തെ അന്യദേവന്മാരിലേക്കു വശീകരിച്ചു.” അങ്ങനെ അവൻ “യഹോവെക്കു അനിഷ്ടമായുള്ളതു ചെയ്‌തു.” (1 രാജാ. 11:1-6) മോശമായ ആളുകളോടൊപ്പം സമയം ചെലവഴിച്ചത്‌, യഹോവയെ ആരാധിക്കുന്നത്‌ നിറുത്തിക്കളയാൻ അവനെ പ്രേരിപ്പിച്ചു. ശലോമോന്‌ ഇങ്ങനെ സംഭവിച്ചെങ്കിൽ ആർക്കും ഇങ്ങനെ സംഭവിക്കാം. അതുകൊണ്ടാണ്‌ യഹോവയെ സ്‌നേഹിക്കാത്തവരെ വിവാഹം കഴിക്കുന്നതിനെക്കുറിച്ച് നമ്മൾ ചിന്തിക്കുകപോലും ചെയ്യാത്തത്‌!

16. അവിശ്വാസിയായ ഇണയുള്ള ഒരു വ്യക്തിക്ക് ബൈബിൾ എന്ത് ഉപദേശം നൽകുന്നു?

¹⁶ വിവാഹ ഇണകളിൽ ഒരാൾ മാത്രം ബൈബിൾ പഠിച്ച് സത്യത്തിൽ വരുന്നെങ്കിലോ? വിശ്വാസിയായ ആ ഇണയോട്‌ ബൈബിൾ പറയുന്നത്‌ ഇതാണ്‌: “ഭാര്യമാരേ, നിങ്ങളുടെ ഭർത്താക്കന്മാർക്കു കീഴ്‌പെട്ടിരിക്കുവിൻ. അങ്ങനെ, അവരിൽ ആരെങ്കിലും വചനം അനുസരിക്കാത്തവരായിട്ടുണ്ടെങ്കിൽ ഭയാദരവോടെയുള്ള നിങ്ങളുടെ നിർമലമായ നടപ്പു കണ്ടിട്ട് ഒരു വാക്കും കൂടാതെ നിങ്ങളുടെ നടപ്പിനാൽ വിശ്വാസികളായിത്തീരാൻ ഇടവന്നേക്കാം.” (1 പത്രോ. 3:1, 2) യഹോവയെ ആരാധിക്കാത്ത ഭാര്യമാരുള്ള ഭർത്താക്കന്മാർക്കും ഇത്‌ ബാധകമാണ്‌. ദൈവത്തിന്‍റെ വാക്കുകൾ വളരെ വ്യക്തമാണ്‌: ഒരു നല്ല ഭർത്താവോ ഭാര്യയോ ആയിരിക്കുക; വിവാഹം സംബന്ധിച്ച ദൈവികനിലവാരങ്ങൾ പാലിക്കുക. അങ്ങനെ നിങ്ങൾ നല്ലനല്ല മാറ്റങ്ങൾ വരുത്തിയെന്ന് ശ്രദ്ധിക്കുമ്പോൾ ഇണയും യഹോവയെ സേവിക്കാൻ ആഗ്രഹിച്ചേക്കാം. പല ദമ്പതികളുടെയും കാര്യത്തിൽ ഇതു സത്യമായിരുന്നിട്ടുണ്ട്.

17, 18. (എ) ജലപ്രളയത്തെ അതിജീവിക്കാൻ നോഹയെ സഹായിച്ചത്‌ എന്താണ്‌? (ബി) യെരുശലേമിന്‍റെ നാശത്തെ അതിജീവിക്കാൻ ഒന്നാം നൂറ്റാണ്ടിലെ ക്രിസ്‌ത്യാനികളെ സഹായിച്ചത്‌ എന്താണ്‌?

¹⁷ ചീത്ത ആളുകളുമായി സഹവസിക്കുകയാണെങ്കിൽ യഹോവയുടെ കല്‌പനകൾ അനുസരിക്കാതിരിക്കാൻ  അതിനു നിങ്ങളെ പ്രേരിപ്പിക്കാനാകും. എന്നാൽ നല്ല സഹവാസത്തിന്‌ യഹോവയോട്‌ വിശ്വസ്‌തരായിരിക്കാൻ നിങ്ങളെ സഹായിക്കാനുമാകും. ഇക്കാര്യത്തിൽ നോഹ നല്ലൊരു മാതൃകയാണ്‌. “ഭൂമിയിൽ മനുഷ്യന്‍റെ ദുഷ്ടത വലിയ”തായിരുന്ന ഒരു കാലത്താണ്‌ അവൻ ജീവിച്ചിരുന്നത്‌. അന്നുള്ള ആളുകളുടെ “ഹൃദയവിചാരങ്ങളുടെ നിരൂപണമൊക്കെയും എല്ലായ്‌പോഴും ദോഷമുള്ള”തുമായിരുന്നു. (ഉല്‌പ. 6:5) ആളുകളുടെ സ്വഭാവം വളരെ മോശമായിരുന്നതുകൊണ്ട് ആ ദുഷ്ടലോകത്തെ നശിപ്പിക്കാൻ യഹോവ തീരുമാനിച്ചു. എന്നാൽ നോഹ വ്യത്യസ്‌തനായിരുന്നു. ബൈബിൾ അവനെ, ‘ദൈവത്തോടുകൂടെ നടന്ന’ ‘നീതിമാനെന്ന്’ വിളിക്കുന്നു.—ഉല്‌പ. 6:7-9.

¹⁸ യഹോവയെ സ്‌നേഹിക്കാത്തവരുമായി നോഹ സഹവസിച്ചതേ ഇല്ല, അവനും കുടുംബവും പെട്ടകം പണിയുന്ന തിരക്കിലായിരുന്നു. അവൻ ഒരു ‘നീതിപ്രസംഗിയുമായിരുന്നു.’ (2 പത്രോ. 2:5) നോഹയും ഭാര്യയും, അവന്‍റെ മൂന്നു മക്കളും അവരുടെ ഭാര്യമാരും ഉൾപ്പെട്ട ആ കുടുംബം അന്യോന്യം നല്ല സ്‌നേഹവും സഹവാസവും ആസ്വദിച്ചിരുന്നു. ദൈവത്തിന്‌ ഇഷ്ടമുള്ള കാര്യങ്ങൾ ചെയ്യുന്നതിലായിരുന്നു അവരുടെ മുഴു ശ്രദ്ധയും. അതുകൊണ്ട് അവർ ജലപ്രളയത്തെ അതിജീവിച്ചു. നമ്മളെല്ലാം അവരുടെ പിന്മുറക്കാരാണ്‌. അതിനാൽ, നോഹയും കുടുംബവും യഹോവയോട്‌ അനുസരണമുള്ളവരായിരുന്നതിലും ചീത്ത സഹവാസം ഒഴിവാക്കിയതിലും നമ്മൾ അവരോട്‌ നന്ദിയുള്ളവരായിരിക്കണം. സമാനമായി, ഒന്നാം നൂറ്റാണ്ടിലെ ക്രിസ്‌ത്യാനികളും യഹോവയെ സ്‌നേഹിക്കാത്ത ആളുകളുമായി സഹവസിച്ചിരുന്നില്ല. അവർ യഹോവയെ അനുസരിക്കുകയും എ.ഡി. 70-ൽ യെരുശലേം നശിപ്പിക്കപ്പെട്ടപ്പോൾ രക്ഷപ്പെടുകയും ചെയ്‌തു.—ലൂക്കോ. 21:20-22.

19. യഹോവയോട്‌ വിശ്വസ്‌തരായി തുടരാൻ നമ്മളെ എന്ത് സഹായിക്കും?

¹⁹ നോഹയെയും കുടുംബത്തെയും പോലെ, ഒന്നാം നൂറ്റാണ്ടിലെ ക്രിസ്‌ത്യാനികളെപ്പോലെ, നമ്മളും യഹോവയെ സേവിക്കാത്തവരുമായി ചങ്ങാത്തം കൂടാൻ പോകില്ല. സുഹൃത്തുക്കളാക്കാൻ നമുക്ക് വിശ്വസ്‌തരായ ലക്ഷക്കണക്കിന്‌ സഹോദരീസഹോദരന്മാരുണ്ട്. ഇന്നത്തെ പ്രയാസകരമായ സാഹചര്യങ്ങളിൽ ‘വിശ്വാസത്തിൽ ഉറച്ചുനിൽക്കാൻ’ അവർ നമ്മളെ സഹായിക്കും. (1 കൊരി. 16:13; സദൃ. 13:20) ഈ ദുഷ്ടലോകത്തിന്‍റെ അന്ത്യത്തെ അതിജീവിച്ച് പടിവാതിൽക്കൽ എത്തിനിൽക്കുന്ന പുതിയ ലോകത്തിൽ ജീവിക്കാൻ കഴിയുന്നത്‌ എത്ര സന്തോഷകരമായിരിക്കും! അതുകൊണ്ട് ഇപ്പോൾ മോശമായ സഹവാസം ഒഴിവാക്കേണ്ടത്‌ വളരെ പ്രധാനമല്ലേ?