കുട്ടിയാണ്‌ വാതിൽ തുറന്നുവരുന്നതെങ്കിൽ വീട്ടിൽ മാതാപിതാക്കളുണ്ടോ എന്ന് ചോദിക്കുക. അങ്ങനെ ചെയ്യുമ്പോൾ മാതാപിതാക്കളുടെ ശിരസ്ഥാനത്തെ ആദരിക്കുകയായിരിക്കും നമ്മൾ. (സദൃ. 6:20) എന്നാൽ കുട്ടി നിങ്ങളെ അകത്തേക്ക് ക്ഷണിക്കുന്നെങ്കിൽ അത്‌ നയപൂർവം നിരസിക്കുക. മാതാപിതാക്കൾ വീട്ടിലില്ലാത്തതുകൊണ്ട് മറ്റൊരു സമയത്ത്‌ അവിടേക്ക് മടങ്ങിച്ചെല്ലാവുന്നതാണ്‌.

കുട്ടി കൗമാരത്തിന്‍റെ അവസാനത്തിലാണെങ്കിൽപോലും മാതാപിതാക്കളെ അന്വേഷിക്കേണ്ടത്‌ ആവശ്യമാണ്‌. ഇനി അവർ വീട്ടിലില്ലെങ്കിൽ കുട്ടിയോട്‌ ഇങ്ങനെ ചോദിക്കാം: വായിക്കാനുള്ള പുസ്‌തകങ്ങൾ സ്വന്തമായി തിരഞ്ഞെടുക്കാൻ മാതാപിതാക്കൾ അനുവദിക്കുമോ? അനുവദിക്കുന്നവരാണെങ്കിൽ കുട്ടിക്ക് പ്രസിദ്ധീകരണം കൊടുക്കുകയോ jw.org വെബ്‌സൈറ്റ്‌ പരിചയപ്പെടുത്തുകയോ ചെയ്യാം.

താത്‌പര്യം കാണിച്ച യൗവനാരംഭത്തിലുള്ള ഒരാൾക്ക് മടക്കസന്ദർശനം നടത്തുമ്പോഴും മാതാപിതാക്കളെ അന്വേഷിക്കാവുന്നതാണ്‌. ഇത്‌, ആളുകളെ സന്ദർശിക്കുന്നതിന്‍റെ ഉദ്ദേശ്യം വിശദീകരിക്കാനും കുടുംബങ്ങൾക്ക് ബൈബിൾ നൽകുന്ന ആശ്രയയോഗ്യമായ ഉപദേശങ്ങളെക്കുറിച്ച് സംസാരിക്കാനും നമ്മളെ സഹായിക്കുന്നു. (സങ്കീ. 119:86, 138) ഇങ്ങനെ, മാതാപിതാക്കളോട്‌ ആദരവ്‌ കാണിക്കുകയും അവരെ പരിഗണിക്കുകയും ചെയ്യുന്നത്‌ അവരിൽ മതിപ്പുളവാക്കും. കൂടാതെ അവരോടു സുവാർത്ത പങ്കുവെക്കാനുള്ള അവസരത്തിന്‌ ഇടമൊരുക്കുകയും ചെയ്‌തേക്കാം.—1 പത്രോ. 2:12.