PART 4
Si Ta Na e Fula Mai i Nunufana Kero Roṉo Uria Tha Satan?
Tha Adam bia ni Eve kero adefasia tha God, ma keka fulato’ona maea. Genesis 3:6, 23
Ni Eve e roṉo uria loi eri ma ka ania foana ai ba. I buirana nia ka falea tha Adam ka ania lau bo’o.
Si do eri na kero ilia e garo. Nia naṉa abula ta’a la. Tha God ka tari keroa fasia fanua falu lea ba na kero toto iei.
Keroa bia wela keroa ki keka fulato’ona tola ka afetai na’a. Toto ma araia ka fulato’odaroa na’a ma keko mae na’a. Keroa keko ai na’a, ma kesi lae lau uria kula anoedo ki kera to iei.
To’a na kera mae kera ‘uria lau bo’o gegeona thaegano ne ai si to ana ta marukia. Genesis 3:19
Kulu fulato’ona maea sulia kulu futa mai faisia tha Adam bia ni Eve. To’a na kera mae e ai si tala’ana keki rikia, roṉoa, mado keki ilia lau tesi do.—Ecclesiastes 9:5, 10.
Tha Jehovah e ai si manato’ona ubo’o uria imole ki keki fulato’ona maea. E kwaikaraṉi na’a uria tha Jehovah kai fa’amarukia toa na kera mae. Masa keka roṉo uri nia, keki fulato’ona marukia tatha.
