Tha God e ofua kwalafana tha Abraham ma keka tata’e mai keka te’e kule’e wane bia ka falea ṉa loa ki i fada. Nia ka fa’athataa kule’e wane eri ana “Israel,” ma keka takwe sukwa’i uria lae la sulia ba’elana bia fo’aa na e mamana. (Psalm 147:19, 20) I nunufana Israel, kule’e wane ana fanua ki sui bana keki fulato’ona le’a la.​—Te’emania Acts 3:25.

 Tha God e filia kule’e wane eri i Israel uria keki too ura fa’amamane lana la. Abula lana kule’e wane eri e fata’i lala’a ania, asi maṉa na imole ki kera adesulia ṉa loa tha God ki, keka fulato’ona le’a la. (Deuteronomy 4:6) Adelana bo’o, asi maṉa na imole ki kera rikia bia keka to’odo fasia kule’e wane i Israel, keki thaito’omana God mamana eri.​—Te’emania Isaiah 43:10, 12.

 Sula’ania kule’e wane baaki i Israel kera adefasia tha God, lalae tha Jehovah ka lalakwata’i kera maka taala kera ana figute’e Kristin mamana. (Matthew 21:43; 23:37, 38) I tara’ena, Kristin mamana ki na’a, na kera too uria fa’amamane lana tha Jehovah.​—Te’emania Acts 15:14, 17.

 Tha Jesus e ’olosia to’a na kera lae i buriana uria keki ṉata sulia si fa’aroṉoa le’a bia keki to’odo i sana imole ki i la fanua ki sui bana. (Matthew 10:7, 11; 24:14; 28:19, 20) I la si maṉa eri na fanua nei iano e lae na’a ura susui lana, raa eri e ba’ita ka talua bona’a si maṉa ne sui toli. Tha Jehovah e ofua mole’e imole oro fasia fanua ki sui bana uria i lana to’odoa ne mamana. Eta bo’o tha Jehovah e ilia si do eri neri. (Revelation 7:9, 10) Kristin mamani ki kera ofu ura fa’asukwa’i lada la bia adomi lada la kwailiu. I fei bana i la fanua nei iano, abula lada i la ofu la kera ki ura to’o lana Baebol e bobolo bana.​—Te’emania Hebrew 10:24, 25.

 I la fa ṉali ana 1870 lae ka fula ana 1879, te’e kali figute’e wane na kera to’oa Baebol kera thafali rikia la’u mamana la eri  na e dola ka tau na mai. Kera riki thaito’omana tha Jesus e ’olosia Kristin mamana ki uria keki ṉata sulia si fa’aroṉoa le’a, adelana bo’o keka thafalia raa eri na kai fula i la fanua nei iano rereba’a ura ṉata la sulia Inotoa eri. I la fa ṉali ana 1931, keka thafali alaṉi kera ana Jehovah’s Witness Ki.​—Te’emania Acts 1:8; 2:1, 4; 5:42.

 I la si maṉa kera aposol ki, te’e figute’e to’a nana’o e too. To’a eki kera ’olosia figute’e Kristin mamana ki i la fanua oro e’eta kwailiu, ma figute’e Kristin eki keka fulato’ona kwaiadomia fasi kera. Figute’e to’a eki keka riki thaito’omana Gwauna figute’e Kristin mamana ki natha Jesus. (Acts 16:4, 5) I tara’ena mena, te’e Figute’e To’a Nana’o kera too la’u bo’o. Jehovah’s Witness Ki i la fanua nei iano rereba’a kera fulato’ona kwai’adomia fasia kera. Figute’e to’a eri kera ’olosia raa ki i la branch ’ofis kera Jehovah’s Witness Ki. Raa tale’e ’ofis eki na keki bulasia, keka thauṉania, ma keka ukalia buka eki ura to’o lana Baebol. E talua 600 ṉata la e’eta kwailiu ki na kera kedaa sui na’a ana buka eki. Figute’e to’a eri kera aruto’ona Baebol uria adomi lana bia fa’asukwa’i lana 100,000 figute’e Kristin ki na kera too i la fanua ni sui bana. I ma’alutana figute’e Kristin eki, tei to’a nana’o ki na kera farana kera too. To’a eki kera kwaialami uria thai le’a la sulia sifsif tha God ki.​—Te’emania 1 Peter 5:2, 3.

 Jehovah’s Witness Ki kera raa ofu uria ṉata la sulia si fa’aroṉoa le’a bia to’odo la i sana imole ki. Kera ṉata sulia si fa’aroṉoa le’a i ma’afera ki sui bana mala’ana aposol ki. (Acts 20:20) Ni kera keka kwaialami la’u bo’o uria to’odo la sulia Baebol bia imole na kera ato’ia mamana la. Ma Jehovah’s Witness Ki do mala ta to’odoa ni bana e a’i neri. Kera ṉa bare’e wela na kera too ana Maka ne liothau. Kera sui bo’o ṉa do’ora ki bia waiwaena ki na kera thai le’a suli kera kwailiu. (2 Thessalonica 1:3) Sula’ania imole tha Jehovah ki kera raa ofu uria fa’ase’ethathala lana tha God bia adomi lana imole ki, ni kera bona’a te’e bare’e wela na kera se’ethathala asia na’a i la fanua nei iano.​—Te’emania Psalm 33:12; Acts 20:35.