Дэд хууль 8:1–20
8 Өнөөдөр миний та нарт өгч байгаа бүх тушаалыг чанд сахигтун. Тэгвэл та нар урт удаан амьдарч, өнөр өтгөн болж, эцэг өвгөдөд чинь Еховагийн тангарагласан тэр нутагт очиж, эзэмшинэ.
2 Ехова Бурхан чинь та нарыг даруу болгож, зүрх сэтгэлд чинь юу байгааг мэдэж, тушаалуудыг нь сахих нь уу үгүй юү гэдгийг шалгах гээд та нарыг энэ 40 жилийн турш цөлөөр удирдаж, урт зам туулуулсныг санагтун.
3 Хүн зөвхөн талхаар биш, Еховагийн амнаас гарах үг бүрээр амьдардгийг та нарт ойлгуулахын тулд тэрбээр та нарыг өлсгөж даруу болгон, та нарын ч мэддэггүй, эцэг өвгөдийн чинь ч мэддэггүй маннагаар хооллосон.
4 Энэ 40 жилд хувцас чинь ч элэгдээгүй, хөл чинь ч хавдаагүй.
5 Эцэг нь хүүгээ засаж залруулдаг шиг Ехова Бурхан чинь та нарыг засаж залруулж байсныг та нар сайн мэднэ.
6 Ехова Бурхандаа дуулгавартай байж*, түүнээс эмээн тушаалуудыг нь сахиж байгтун.
7 Яагаад гэвэл Ехова Бурхан чинь та нарыг сайхан нутагт аваачиж байна. Энэ нутаг бол гол горхи* элбэгтэй, тал хөндий, уулархаг нутгаар нь булаг шанд урссан,
8 буудай, арвай ихтэй, усан үзэм, инжир, анарын модод, чидуны тос, бал бурмын орон.
9 Идэх хоол хүнсээр дутахгүй, өөр юугаар ч гачигдахгүй тийм газар. Хад чулуу нь төмрийн хүдэртэй, уул толгодыг нь ухаж малтвал зэс гарах нутаг билээ.
10 Та нар идэж цадахаараа тэр сайхан газрыг өгсөн Ехова Бурхнаа магтах ёстой.
11 Өнөөдөр миний та нарт өгч байгаа Ехова Бурхныхаа хууль, тушаал, зарлигийг сахилгүй түүнийг мартахаас болгоомжил.
12 Та нар идэж цадаад, сайхан байшин барьж түүндээ амьдран
13 үхэр, хонь чинь өсөж үржин, алт мөнгө чинь арвижиж, арвин их юмтай болох үедээ
14 бардам болуузай. Улмаар Египетийн боолчлолоос чөлөөлсөн Ехова Бурхнаа мартуузай.
15 Тэрбээр та нарыг өргөн уудам, аймшигт цөл дундуур галт могой, хилэнцэт хорхойтой, усгүй ангамал газраар удирдан дагуулж явсан билээ. Мөн цахиур чулуунаас ус гарган өгч
16 эцэг өвгөдийн чинь мэддэггүй байсан маннагаар цөлд та нарыг хооллосон. Ингэсэн нь ирээдүйн сайн сайхны чинь төлөө та нарыг даруу болгож, шалгах гэснийх байсан юм.
17 Хэрэв та нарт “Бид өөрсдийнхөө хүч, гарынхаа бядаар хөрөнгө чинээтэй болсон” гэж бодогдвол
18 хөрөнгө чинээтэй болох хүч чадлыг Ехова Бурхан чинь өгснийг санаарай. Тэрбээр эцэг өвгөдөд чинь тангарагласан гэрээгээ өнөөдрийнх шиг биелүүлж та нарт хүч чадал өгсөн гэсэн үг.
19 Хэрэв та нар Ехова Бурхнаа мартаж, өөр бурхдыг шүтэж, тэдэнд үйлчлэн, мөргөвөл та нар гарцаагүй устгагдана гэдгийг би өнөөдөр батлан хэлье.
20 Ехова Бурхныхаа дуу хоолойг сонсоогүйн чинь төлөө Ехова өмнө чинь байгаа үндэстнүүдийг устгаж байгаа шигээ та нарыг ч устгах болно.
