Хоёрдугаар Коринт 6:1–18
6 Бурхантай хамтран ажилладаг бид та нарт үүнийг уриалж байна. Бурхан та нарыг ямар зорилгоор нигүүлссэнийг бүү умартаарай.
2 Учир нь Бурхан: «Тааламжтай үед би чамайг сонссон. Авралын өдөр чамд тусалсан» хэмээсэн билээ. Одоо бол онцгой тааламжтай үе, одоо бол авралын өдөр.
3 Үйлчлэлийг маань хэн ч бүү муулаасай гэсэндээ бид хэнд ч ямар нэгэн байдлаар саад болдоггүй.
4 Харин ч Бурхны үйлчлэгч гэдгээ баталж юм юмыг тэвчдэг. Бид зовдог, гачигддаг, хүнд бэрхийг туулдаг,
5 жанчуулдаг, хоригддог, үймээн самуунд өртдөг, хүнд хүчир ажилд нухлуулдаг, нойр дутуу хоол ундгүй явдаг.
6 Цэвэр ариун явдаг, мэдлэгийн дагуу үйлддэг, тэвчдэг, сайхан сэтгэл гаргадаг, Бурхны агуу хүчээр удирдуулдаг, хоёр нүүр гаргалгүй хайрладаг.
7 Үнэнийг ярьдаг, Бурхны хүчинд найддаг бөгөөд баруун, зүүн гартаа* шударга ёсыг зэвсэг болгон агсдаг,
8 хүндэтгэл хүлээдэг, доромжлуулдаг, сайшаагддаг, муучлагддаг. Биднийг мэхлэгч гэж боддог ч бид үнэнийг хэлдэг,
9 хүмүүст танил биш мэт боловч танил, үхэх шахдаг ч амьд, шийтгүүлсэн мэт боловч алуулаагүй,
10 гашуудаж буй мэт боловч үргэлж баяр хөөртэй, ядуу хоосон мэт боловч олон хүнийг баян болгодог, юу ч үгүй мэт боловч бүх юмыг эзэмшдэг.
11 Коринтын ах дүү нар аа, бид та нартай ярих гэж ам нээсэн*. Бид та нарыг чин сэтгэлээсээ хайрладаг*.
12 Та бүхнийг хайраар дутаадаггүй, харин та нар биднийг хайраар дутаадаг.
13 Тиймээс би та нарыг хүүхдээ гэж үзээд хэлж байна. Та нар ч бидэнд адилхан хандаж, илүү их хайрлах* учиртай.
14 Үл итгэгчтэй хамт нэг буулганд бүү ор. Яагаад гэвэл таарахгүй. Зөв буруу хоёр яаж нэг дор байх вэ? Гэрэл харанхуй хоёр юугаараа адил юм бэ?
15 Үүнчлэн, Христ Белиар* хоёр яаж зохицох вэ? Бурханд итгэдэг* хүн Бурханд итгэдэггүй хүнтэй юугаараа адил юм бэ?
16 Бурхны сүм шүтээнүүдтэй ямар холбоотой юм бэ? Бурхан: «Би тэдэнтэй хамт байна, дунд нь явна. Би тэдний Бурхан болж, тэд миний ард түмэн болно» гэж айлдсан ёсоор бид амьд Бурхны сүм шүү дээ.
17 «“Тиймээс, тэднээс холдож, тусгаар бай”. “Бузар юманд хүрэхээ боль” гэж Ехова* хэлдэг». «“Би та нарыг хүлээж авна”».
18 «“Тийнхүү Би та нарын эцэг, та нар миний хөвгүүд охид болно” гэж төгс хүчит Ехова* хэлдэг».
Зүүлт
^ Эсвэл «довтлох ба хамгаалахын тулд»
^ Эсвэл «илэн далангүй ярьсан»
^ Эсвэл «та нарын төлөө зүрхээ өргөнөөр нээсэн»
^ Эсвэл «зүрхээ өргөнөөр нээх»
^ «Олиггүй» гэсэн утгатай еврей үгнээс үүссэн үг. Сатаныг хэлсэн.
^ Эсвэл «үнэнч»
^ Үгийн тайлбарыг үзнэ үү.
^ Үгийн тайлбарыг үзнэ үү.
