Аудио Библи гэж юу вэ? Шинэчлэгдсэн «Шинэ ертөнц орчуулга»-ын аудио хувилбар юм. Үүнийг аль болох олон хэлээр бага багаар гаргаж байна. Аудио Библи ямар онцлогтой вэ? Дүр бүрд нь өөр өөр хүн дуу оруулдаг. Бас Библийн мэдээг үнэн зөв дамжуулахын тулд хэрэгтэй үгийг онцолж, сэтгэл хөдлөл, мэдрэмжийг гаргаж уншдаг.

Аудио Библи сонсохын ач тус юу вэ? Бурхны Үг илүү бодит санагддаг учраас олон хүн аудио Библийг тогтмол сонсох дуртай байдаг. Дүр болгонд өөр өөр хүн дуу оруулсан байдаг учраас сонсогчид үйл явдлыг илүү сайн төсөөлж, бичигдсэн бүхнийг зөв ойлгож авдаг (Су 4:5). Бас олон хүн санаа зовсон үедээ аудио Библи сонсоод тайвширдаг (Ду 94:19).

Бурхны Үгийг сонсвол бидний зүрх сэтгэлд хүчтэй нөлөөлнө (Ш.дэ 34:19–21). Таны ойлгодог хэлээр аудио Библи бүтнээрээ юм уу хэсэгчилж гарсан бол сонсох хэвшилтэй болж болохгүй нь юу билээ?

«БИБЛИЙН АУДИО ХУВИЛБАРЫГ ЯАЖ ХИЙДЭГ ВЭ?» ВИДЕОНЫ ХЭСГЭЭС ҮЗЭЭД ДАРААХ АСУУЛТАД ХАРИУЛААРАЙ.

Библийн аудио хувилбар гаргах ажлын юу нь таны сэтгэлийг хөдөлгөсөн бэ?