Эдүгээ дэлхий дээр болж байгаа ёс бус бүхэн Диваажин ойрхон байгааг заан хэлж байна. Диваажин болохоос наахна бидэнд аймшигтай цаг үе тулгарна гэдгийг Библид зөгнөсөн. Өнөөдөр бид чухам тийм цаг үед амьдарч байна. Библид зөгнөн бичсэн зарим үйл явдлыг авч үзье:

Их дайн. «Үндэстэн үндэстнийхээ эсрэг, хаанчлал хаанчлалынхаа эсрэг босно» (Матай 24:7). Энэ зөгнөл биелсэн. 1914 оноос хойш дэлхийн хоёр том дайн, бусад олон жижиг дайн болсон. Эдгээр дайнд олон сая хүн амь үрэгдсэн.

Өргөн олныг хамарсан өвчин. «Тахал бий болно» (Лүүк 21:11, ШГ). Энэ зөгнөл биелсэн үү? Тийм ээ. Хорт хавдар, зүрхний өвчин, сүрьеэ, хумхаа, ДОХ болон өөр олон өвчин сая сая хүний амь насыг авч одсон.

Хоол хүнсний хомсдол. Дэлхий дахинд хоол хүнсээр дутагдаж байгаа хүмүүс хаа сайгүй байна. Жил бүр сая сая хүн өлсгөлөнгөөс болж үхэж байна. Энэ бол Диваажин удахгүй болохын бас нэгэн шинж тэмдэг юм. «Өлсгөлөн болно» гэж Библид бичсэн буй (Марк 13:8).

 Газар хөдлөлт. «Хаа сайгүй... газар хөдлөлт болно» (Матай 24:7). Энэ нь мөн л бидний цаг үед биелж байна. 1914 оноос хойш газар хөдлөлтөөр сая гаруй хүн үхжээ.

Муу хүмүүс. «Хүмүүс өөрсдийгөө хайрлагчид, мөнгийг хайрлагчид» болно. Тэд «Бурхныг хайрлагчид байхаас илүү зугаа цэнгэлийг хайрлагчид» болно. Хүүхдүүд «эцэг эхдээ захирагдахгүй» болно (2 Тимот 3:1—5). Өнөөдөр маш олон хүн чухам яг ийм болчихоод байгаатай та санал нийлэхгүй гэж үү? Тийм хүмүүс Бурхныг үл хүндэтгэдэг төдийгүй Бурхны тухай таньж мэдэхийг хичээж байгаа хүмүүст саад болдог.

Гэмт хэрэг. Тэрчлэн «ёс бус байдал өснө» (Матай 24:12). Хэдэн жилийн өмнөхтэй харьцуулбал өнөөдөр гэмт хэргийн тоо өссөн гэдэгтэй та лав санал нийлэх байх. Хүмүүс хаа сайгүй л хулгай, заль мэх болон бусад ёс бус явдлын золиос болон хохирч байна.

Энэ бүхэн бол Бурхны Хаанчлал ойрхон байгааг зааж байна. «Эдгээрийг болох үед Бурхны хаанчлал ойрхон байгааг мэдтүгэй» гэж Библид бичжээ (Лүүк 21:31). «Бурхны Хаанчлал» гэж юу вэ? Энэ бол Бурхны тэнгэрийн засгийн газар бөгөөд дэлхийг Диваажин болгон хувиргах юм. Бурхны Хаанчлал хүний засгийн газрыг халах болно (Даниел 2:44).