Eikhoina Ishworgi Ningthouleibak Karigi Darkar Oiribano?
Meeoibagi puwarida, eikhoigi Sembiba Mapu Jehovahna ihan hanna Adam amasung Hawabu sembikhi. Aduga makhoina leinabagidamak Edengi ingkholda phajaraba leipham ama mahakna pibikhi. Mahakna makhoigi chana thaknaba chinjaksu marang kaina pibikhi. Adugisu mathakta makhoina tounaba thabaksu pibirammi. (Meihouron 1:28, 29; 2:8, 15) Matam aduda Jehovah khaktana Leingakpa oirammi. Mahakna yamna nungsiheina sashan tourammi. Adam amasung Hawana Ishworgi sashan makhada haiba injana leiramlabadi ngasi phaoba meeoibasingna nungaina, shanti leina hingba phanglamgadabani.
Ahanba meeoibasingduna Ishworbu makhoigi Leingakpani haiba yakhide
Biblena khanghalli madudi Seitan haina khangnaba sargadut amana Ishworgi maiyokta hourakkhi, aduga Ishwordi matik chaba Leingakpa natte haina mahakna singnarakkhi. Mahakna haininglibasi meeoibana Ishworgi lamjing lamtak yaodana hingbana henna nungaigani haibasini. Adubu yamna nungaitaba wapham amadi eikhoigi ihan hanba ima ipa oiriba Adam amasung Hawana Seitangi tung induna Ishworgi maiyokta lepkhi.—Meihouron 3:1-6; Phongdokpiba 12:9.
Adam amasung Hawana Ishworbu makhoigi Leingakpani haiba yajakhidaba aduna, makhoigi nungairaba leipham amasung makhoina lomba naidana hingnabagi asha adusu mangkhi. (Meihouron 3:17-19) Makhoigi warep aduna makhoigi macha masusingdasu awaba oihallakkhi. Adamna pap toukhiba maramna, “taibangpanda pap, aduga papki maramna siba changkhi” haina Biblena khanghalli. (Romiya 5:12) Papki atoppa phattaba mahei amadi: “Masagi amangba oinaba mee amana atoppa amagi mathakta panba oigani” haibasini. (Pao Sandokpa 8:9) Amaromda hairagana, meeoibana meeoibagi mathakta sashan touba matamda madugi mahei matam pumnamakta phattaba oigani haibani.
MEEOIBAGI SASHAN HOURAKPA
Nimrodna Jehovahgi maiyokta lepkhi
Meeoibasinggi maraktagi Nimrodna ahanba Ningthouni haina Biblena khanghalli. Aduga mahakna Jehovahgi maiyokta lepkhi. Nimrodki matamdagi houna meeoibagi angam athousingna makhoigi shakti lanna sijinnaduna lak-ee. Chahi 3,000 lomgi mamangda Ningthou Solomonna irammi: “Yengu, ot-neikhrabasinggi pirangsing, aduga makhoibu themjinbiba kana amatta leiramde. Aduga makhoibu otpiribasinggi maigeida matik leirammi.”—Pao Sandokpa 4:1.
Asigumba phibamsi ngasigi taibangpandasu chap mannana uba phangi. “Eikhoigi samaj asida thokliba phattaba pumnamakki maruoiba hourakpham amadi” phattaba leingak sashannani haibasi henna henna mayek senglakli haina sok 2009 gi United Nationski chephong amada khanghalli.
AHONGBA LAKKADABA MATAM YOURAKLE!
Ngasigi taibangpan asida aphaba makhalgi leingak amasung aphaba leingakpasing darkar oi. Aduga madumak pibigani haina eikhoigi Sembiba Mapuna washakli!
Khwaidagi phaba meeoibagi leingaksingnasu taibangpan asida thengnariba achouba samashyasing kokhanba ngamde
Ishworna Ningthouleibak ama haibadi leingak ama semgatkhre, maduna meeoibagi leingaksinggi mahut sinkhragani aduga “madu matam pumnamakta leigani.” (Daniyel 2:44) Meeoi lakh kayana Ishworda haijaduna laklibasi hairiba Ningthouleibak asigidamakni. (Maathi 6:9, 10) Adubu Ishwor masamaknadi masigi leingakpa oiroi. Matam amada prithibida meeoiba oina hinglamba meesak amabu Ningthouleibak asigi Leingakpa oinaba Ishworna khankhre. Mahakna khankhraba meesak adu kanano?
