“কনাগুম্বা অমনা কনাগুম্বা অমগী মথক্তা নুঙাইতবা লৈরবদি . . . অমনা অমগী পাপ কোক্নৌ।”—কোলোসীয়া ৩:১৩.

ঐখোয় খুদিংমক অশোয়বা তৌই। অদুনা ঐখোয়না অতোপ্পশিংবু নুংঙাইহন্দবা য়াই নত্ত্রগা অতোপ্পশিংনসু ঐখোয়বু নুংঙাইহন্দবা য়াই। মরম অসিনা, ঐখোয়না অমনা অমবু ঙাকপীবা হায়বসি দরকার ওই। ঐখোয়বু নুংঙাইহন্দ্রিবা মীওই অদুবু ঐখোয়না ঙাকপীরবদি মঙোন্দা লৈরম্বা ঐখোয়গী শাউনিংবা, নুংঙাইতবা পুম্নমক কোকখিগনি। ঐখোয়না “ফত্তবগীদমক ফত্তবা” হায়বদু তৌরোইদবনি অদুগা মীওই অদুগী অশোয়বদুসু হঞ্জিন হঞ্জিন পুথোক্লোইদবনি। (রোমীয় ১২:১৭) অদুবু কনাগুম্বা অমনা শাথিনা থম্মোয় শোকহল্লকপা তাঞ্জাদদি মদুবু কাউথোকপা ঙমদবা য়াই অমসুং মীওই অদুবু ঙাকপীবা হায়বসি ৱানা থোকপা য়াই। মতমদুদা ঐখোয়না করি তৌবা য়াবগে? মীওই অদুগা উন্নদুনা ঈং-তপ্না ৱারী শাদুনা চমথোক্নগদবনি। মদু কনানা চুম্মী নত্ত্রগা কনানা লাল্লি থিনবগী নত্তে অদুবু হান্নগুম্না অমুক হন্না অফবা মরী থম্নবনি।—রোমীয় ১২:১৮.

“পূক্নীং নোল্লুকপগা লোয়ননা নখোয় খুদিংমক্না নশা নশাদগী মী অতৈনা হেন্না ফৈ হায়না খল্লু।”—ফিলিপ্পীয়া ২:৩.

ঐখোয়সি নোল্লুকপা অমসুং অতোপ্পশিংবু ইকায়খুম্নবা মীশক ওইরবদি মীশিংনা ঐখোয়গা লোয়নবদা নুংঙাইবা ফাওগনি। ঐখোয়না  মখোয়গী খনবীগনি,মখোয়বু থৌজাল হৈনা লোয়নবিগনি অমসুং থৌওইনা মখোয়গী থম্মোয় শোকহল্লোই হায়বসি মখোয়না খঙগনি। অদুবু ঐখোয়না অতোপ্পশিংবু হন্থনা য়েংবা, অতোপ্পশিংনা ঐখোয়গী ৱা ঙাক্তা ইনগদবনি হায়বগী ৱাখল্লোন লৈরবদি নুংঙাইনদবা কয়া লাক্কনি অদুগা মীশিংনা ঐখোয়গা মরুপসু ওইনিংলোই।

“ঈশ্বরনা মীশক মীমায় য়েংদে . . . অদুবু জাতি খুদিংমক্তা ঈশ্বরবু কিবা অমসুং ধর্ম্মচেনবগী থবক তৌবা মী অদু ঈশ্বরনা য়াবি।”—পাখোনচৎপশিংগী থবক ১০:৩৪, ৩৫.

শেম্বীবা মপুগী মীৎয়েংদদি মীওইবা খুদিংমক চপ মান্নৈ। লম, জাৎ-কুচু, লোনগী খেৎনবা অদুগা লাইরবা ইনাকখুনবা হায়বা করিসু লৈতে। “মহাক্না ঈ অমতদগী মীওইবগী জাতি খুদিংবু . . . শেম্বীখি।” (পাখোনচৎপশিংগী থবক ১৭:২৬) মরম অসিনা ঐখোয় মীওইবা খুদিংমক ইচিন ইনাও ঙাক্তনি। ঐখোয়না অতোপ্পশিংবু ইকায়খুম্নবা অমসুং থৌজাল হৈবা মওংদা লোয়নবা মতমদা মখোয়না হরাউই অদুগা ঐখোয়সু হরাউই। অদুমাইনা তৌবা মতমদদি ঐখোয়গী শেম্বীবা মপুবুসু ঐখোয়না হরাউহল্লি।

‘পূক্নীং তপ্পবু . . . নখোয়না শেৎলু।’—কোলোসীয়া ৩:১২.

ঐখোয় পুক্নীং তপ্পা মীশক ওইরবদি অতোপ্পশিংনা ঐখোয়গা ৱারী ৱাতাই শাবদা লায়না থোক্কনি। অদুগা ঐখোয়না হেক্তা শাউগৎপা হায়বদু তৌদবনিনা ঐখোয়গী অশোয়বা লৈরবসু মখোয়না চুমথোকপীগনি। কনাগুম্বা অমনা ঐখোয়দা অশাউবা উৎলকপা মতমদসু ঐখোয়গী পুক্নীং তপ্পা মওং মতৌদুনা মীদুবু ঈঙথহনবা ঙমগনি। মরমদি, “অঈংবা পাউখুম্না মৈ হৌনা শাউবা ঈঙথহল্লি, অদুবু অকনবা ৱাহৈ ৱাতানা শাউগৎহল্লি।”—পাউরৌ ১৫:১.

“ফংবদগী পীবনা হেন্না য়াইফবনি।”—পাখোনচৎপশিংগী থবক ২০:৩৫.

ঙসি মীওই অয়াম্বনা মশাগীদা খনবা অমসুং মীহৌচাওবা ওই। অদুবু পুকচেল চাউবা ওইবনা অশেংবা নুংঙাইবা ফংই। (লূক ৬:৩৮) পুকচেল চাউবা মীওইশিংনা মীশিংবু নুংশি অদুগা পোৎ চৈ হেন্না পাম্বা তৌরুদে। মদুনা মখোয়বু তশেংনা নুংঙাইহল্লি। কনাগুম্বনা মখোয়গীদমক করিগুম্বা অমা তৌবীরকপা মতমদসু হরাউবা অমসুং থম্মোয়দগী থাগৎপা ফোঙদোকচৈ। (কোলোসীয়া ৩:১৫) ঐখোয় ইশাদা অসুম্না হংজবা য়াই,‘ঐ অরিকপা অমসুং মীবু থাগৎপা উত্তবা মীগা লোয়নবা পাম্ব্রা নত্ত্রগা পুকচেল চাউবা মীগা লোয়নবা পাম্ব্রা?’ ঐখোয়না মীবু থাগৎপা উৎপা অমসুং পুকচেল চাউবা মীশক্কা লোয়নবা পাম্মী। অদুনা ঐখোয় ইশামকসু অদুগুম্না ওইগদবনি।—মাত্থি ৭:১২.