“মী অমগী মরম্না তাইবংপান্দা পাপ, অদুগা পাপকী মরম্না শিবা চঙখিবগুম্না, শিবা অদু মী পূম্নমক্তা থংথরে।”—রোমীয় ৫:১২.

ঈশ্বরনা ঐখোয়গী অহানবা ইমা ইপা হায়বদি আদম অমসুং হৱাবু অশোয়বা অমত্তা য়াওদনা মপুংফানা শেম্বীখি। মখোয় মপুংফানা ৱাখল খনবা ঙম্বা,অনা অয়েক লৈতবা, মশা মউ ফবা হায়বদু ওইরম্মী। অদুগা মখোয়বু এদেনগী ইংখোল হায়না খঙনবা ফজরবা মফম অমদা লৈহল্লম্মী। ঈশ্বরনা মখোয়দা ইংখোল অদুদা হৌরিবা উপাল খুদিংমক্তগী উহৈ চাবা য়াহল্লম্মী। অদুবু উপাল অমখক্কী উহৈদি চাদনবা য়াথং পীরম্মী। হায়রিবা য়াথং অদু মখোয়না ইনখিদে। মখোয়না উপাল অদুগী উহৈদু চাখি, অসুম্না মখোয়না পাপ তৌখি। (মৈহৌরোন ২:১৫-১৭; ৩:১-১৯) মখোয়না হায়বা ইনখিদবা অদুগীদমক ঈশ্বরনা মখোয়বু ইংখোল অদুদগী তান্থোকখি। মদুগী মতুংদদি মখোয় য়াম্না ৱানা হিংলম্মী। অদুগা মখোয়না পোক্লকপা মচাশিংসু অদুমক ৱানা হিংলম্মী। মখোয় পুম্নমক অহল ওইরক্তুনা শিখি। (মৈহৌরোন ৩:২৩; ৫:৫) ঐখোয়সু মখোয়গী চারোন শুরোন ওইরুবনা ঙসি অনা অয়েক নংবা, অহল ওইরকপা অমসুং শিবা নাইরিবনি।

“তাইবংপান অপূম্বা ফত্তবা অদুগী মখূত্তা লৈ।”—১ যোহান ৫:১৯.

মতাং অসিদা “ফত্তবা” হায়রিবসি সৈতান্নি। মহাক ঈশ্বরগী মাইয়োক্তা লেপখিবা মীৎনা উবা ফংদবা স্বর্গদুত অমনি। (যোহান ৮:৪৪; ফোংদোকপিবা ১২:৯) কোন্নদি অতোপ্পা স্বর্গদুত কয়াসু মহাক্কুম্না ওইরকখি অমসুং মহাক্কী মতুং ইনখি। হায়রিবা ফত্তবা  স্বর্গদুতশিং অসিনা মীশিংবু নমথাক তৌদুনা অমসুং ঈশ্বরনা পামদবা থবকশিং তৌনবা ইথিল পীদুনা মখোয়বু ঈশ্বরদগী লাপথোকহল্লি। (থাগৎ ঈশৈ ১০৬:৩৫-৩৮; ১ তীমোথি ৪:১) সৈতান অমসুং ফত্তবা স্বর্গদুতশিং অসিনা ঐখোয়দা অৱা অনা কয়া নংহল্লি অদুগা ঐখোয়না ৱাবা উরগা মখোয়না হরাউই।

“মী অমনা হুনখি হুনখিবা অদু মহাক্না লোক্কনি।”—গালাতীয়া ৬:৭.

আদম অমসুং হৱানা তৌখিবা পাপ অমসুং সৈতান্না ওইহল্লিবা ফত্তবা কয়াসিনা ঐখোয়বু অৱা অনা কয়া নংহল্লি। অদুবু করিগুম্বা তাঞ্জাদদি ঐখোয় ইশানা ইশাবু অৱা অনা নংহল্লি। মরমদি, ঐখোয়না ফত্তবা থবক অমা তৌরুবা নত্ত্রগা ৱারেপ অমা লান্না লৌরুবা মতমদা মদুগী ফত্তবা মহৈ ঐখোয়না শোয়দনা ফংগনি। অদুবু অফবা থবক অমা তৌরুবগীদি অফবা মহৈ শোয়দনা ফংগনি। খুদম ওইনা হায়রবদা, নুপা অমনা পুকচেল শেংলবা, কন্না শু-নোম্লবা অমসুং মহাক্কী নুপী অঙাংশিংবু লুনা চান্না তৌরবদি ইমুংদু য়াম্না নুংঙাইবা ওইগনি। অদুবু কনাগুম্বা অতনবা, জুৱার শান্নরগা, য়ু ঙাওরগা লৈথোকপা নুপা অমগী ইমুংদি লায়রবা ওইগনি। ঈশ্বরনদি ঐখোয়বু ‘য়াম্না ঈঙথনা’ অমসুং নুংঙাইনা লৈহনবা পাম্মী। মরম অসিনা মহাক্না পীবিরিবা পাউতাকশিং অসি ইঞ্জরবদি ঐখোয় খ্বাইদগী অশিংবা হায়বদু ওইগনি। —থাগৎ ঈশৈ ১১৯:১৬৫.

“ অরোইবা মতমদা . . . , মীশিংনা মশাতবু নুংশিজবা, শেন্থুমদা করাম্বা, . . . মমা মপানা হায়বা ইন্দবা, . . . মশা খুদুম চনবা ঙমদবা, শাথিবা অমসুং অফববু পামদবা . . . ওইরক্কনি।”—২ তীমোথি ৩:১-৫.

মাঙজৌননা হায়রম্বা ৱাফমসিগা চপ চান্ননা ঙসি মীওই কয়ানা হায়রিবা ফত্তবা শাজৎ লিচৎশিং অসি চৎলি। মসিনসু ঐখোয় ঙসিগী তাইবংপানসিগী “অরোয়বা মতমদা” হিংলি হায়বসি তাকই। অদুদসু নত্তনা অরোয়বা মতমদদি লান, চাক্তাঙবা, অকনবা য়ুহারাবা অমসুং লায়না কয়াসু থোক্কনি হায়না বাইবলদা মাঙজৌননা হায়রম্মী। (মাত্থি ২৪:৩, ৭, ৮; লূক ২১:১০, ১১) অসিগুম্বা কয়াসিনা মরম ওইরগা ঙসি ঐখোয়গী মতমদা অৱাবা অমসুং অশি-অনা কয়া থোক্লি।