“মসি নহাক্কী মিং যেহোবা কৌবা নহাক্তনা মালেম অপূম্বগী মথক্তা ৱাংথোইবনি হায়বা মীশিংনা খঙনবনি।”—থাগৎ ঈশৈ ৮৩:১৮.

বাইবলদা অশেংবা ঈশ্বর অমখক লৈ হায়না খঙহল্লি। মহাক্কী মিং যেহোবা কৌই। মহাক্না মালেম পৃথিবী, অতিয়া নোংদোন, নুমিৎ, থা, থৱানমিচাক অমসুং লেঙলি পাল্লিবা পুম্নমকপু শেম্বীবনি। মরম অসিনা ঐখোয়না মহাক খক্তবু নীংজবা হায়বসি মতিক চায়।—ফোংদোকপিবা ৪:১১.

“ঈশ্বরদি নুংশিবনি।”—১ যোহান ৪:৮.

বাইবলদা ইরম্লিবা ৱাফম কয়াসি পাজবা অমসুং ঐখোয়গী অকোয়বদা লৈরিবা মহাক্কী খুৎশেম কয়াসি য়েংজবা মতমদা ঐখোয়না ঈশ্বর যেহোবাগী মতিক মগুনশিংগী মরমদা ফজনা খঙবা ঙমগনি। মহাক্কী থোইদোক হেন্দোকপা মগুন্দি নুংশিবা হায়বসিনি। মহাক্না তৌবা থবক খুদিংমক নুংশিবদা য়ুম্ফম ওই। মরম অসিনা ঐখোয়না মহাক্কী মরমদা খঙবা হেল্লিবা মখৈ মহাকপু নুংশিবা হেল্লক্কনি।

“নহাক্তি কোকপিগে ঙাইরিবা . . . ঈশ্বরনি।” —নেহেমিয়া ৯:১৭.

ঐখোয় মীওইবশিংসি মপুংফাদবনি হায়বা ঈশ্বর যেহোবানা খঙই। মরম অসিনা মহাক্না ঐখোয়গী অশোয়বশিং “কোকপিগে” হায়বদি ঙাকপীগে হায়না ঙাইদুনা লৈ। মরম অসিনা ঐখোয়না মঙোন্দা ঐখোয়গী অরানবশিং ঙাকপীনবা হায়জরবা অমসুং অমুক হন্না অরানবা থবক তৌরুদনবা কন্না হোৎনজরবদি মহাক্না ঐখোয়বু শোয়দনা ঙাকপীগনি। অদুগা ঐখোয়না তৌখিবা অশোয়বশিং অদুগীদমক ঐখোয়বু চৈরাক পীবসু তৌরোই। —থাগৎ ঈশৈ ১০৩:১২, ১৩.

“যেহোবাবু কৌজবা পূম্নমক্তা মহাক্তি নক্না লৈ . . . মখোয়গী কৌজবদা মহাক্না তাবিগনি।” —থাগৎ ঈশৈ ১৪৫:১৮, ১৯.

যেহোবাদা হায়জনবগীদমক ঐখোয়না অখন্নবা নীতি নীয়ম, ফোতো নত্ত্রগা মুর্ত্তিগী দরকার লৈতে। নুংশিহৈবা মমা মপানা মচাশিংনা হায়বা থৱায় য়াওনা তাবীবগুম্না ঈশ্বর যেহোবানসু ঐখোয়না হায়জবশিং থৱায় য়াওনা তাবী।