বাইবলনা খঙহল্লি মদুদি সৈতান হায়না খঙনবা স্বর্গদুত অমনা ঈশ্বরগী মাইয়োক্তা হৌরকখি, অদুগা ঈশ্বরদি মতিক চাবা লৈঙাকপা নত্তে হায়না মহাক্না শীংনরকখি। মহাক্না হায়নীংলিবসি মীওইবনা ঈশ্বরগী লমজিং লমতাক য়াওদনা হিংবনা হেন্না নুংঙাইগনি হায়বসিনি। অদুবু য়াম্না নুংঙাইতবা ৱাফম অমদি ঐখোয়গী ইহান হানবা ইমা ইপা ওইরিবা আদম অমসুং হৱানা সৈতানগী তুং ইনদুনা ঈশ্বরগী মাইয়োক্তা লেপখি।—মৈহৌরোন ৩:১-৬; ফোংদোকপিবা ১২:৯.

আদম অমসুং হৱানা ঈশ্বরবু মখোয়গী লৈঙাকপনি হায়বা য়াজখিদবা অদুনা, মখোয়গী নুংঙাইরবা লৈফম অমসুং মখোয়না লোম্বা নাইদনা হিংনবগী আশা অদুসু মাঙখি। (মৈহৌরোন ৩:১৭-১৯) মখোয়গী ৱারেপ অদুনা মখোয়গী মচা মশুশিংদসু অৱাবা ওইহল্লকখি। আদম্না পাপ তৌখিবা মরম্না, “ তাইবংপান্দা পাপ, অদুগা পাপকী মরম্না শিবা চঙখি “ হায়না বাইবলনা খঙহল্লি। (রোমীয়া ৫:১২) পাপকী অতোপ্পা ফত্তবা মহৈ অমদি: “ মশাগী অমাঙবা ওইনবা মী অমনা অতোপ্পা অমগী মথক্তা পানবা” ওইগনি হায়বসিনি। (পাউ শন্দোকপা ৮:৯) অমরোমদা হায়রগনা, মীওইবনা মীওইবগী মথক্তা সাশন তৌবা মতমদা মদুগী মহৈ মতম পুম্নমক্তা ফত্তবা ওইগনি হায়বনি।

মীওইবশিংগী মরক্তগী নিম্রোদনা অহানবা নিংথৌনি হায়না বাইবলনা খঙহল্লি। অদুগা মহাক্না যেহোবাগী মাইয়োক্তা লেপখি। নিম্রোদকি মতমদগী হৌনা মীওইবগী অঙম অথৌশিংনা মখোয়গী শক্তি লান্না শীজিন্নদুনা লাকই। চহি ৩,০০০ লোমগী মমাঙদা নিংথৌ সোলোমোন্না ইরম্মী: “য়েংউ, ওৎনৈখ্রবশিংগী পিরাংশিং, অদুগা মখোয়বু থেমজিনবিবা কনা অমতা লৈরমদে। অদুগা মখোয়বু ওৎপিরিবশিংগী মায়গৈদা মতিক লৈরম্মী।”—পাউ শন্দোকপা ৪:১.

অসিগুম্বা ফিভমসি ঙসিগী তাইবংপান্দসু চপ মান্ননা উবা ফংই। “ঐখোয়গী সমাজ অসিদা থোক্লিবা ফত্তবা পুম্নমক্কী মরুওইবা হৌরকফম অমদি” ফত্তবা লৈঙাক শাসন্ননি হায়বসি হেন্না হেন্না ময়েক শেংলক্লি হায়না শোক ২০০৯ গী য়ুনাইটেত নেসন্সকী চেফোং অমদা খঙহল্লি।

ঙসিগী তাইবংপান অসিদা অফবা মখলগী লৈঙাক অমসুং অফবা লৈঙাকপশিং দরকার ওই। অদুগা মদুমক পীবিগনি হায়না ঐখোয়গী শেম্বীবা মপুনা ৱাশক্লি!

ঈশ্বরনা নিংথৌলৈবাক অমা হায়বদি, লৈঙাক অমা শেমগৎখ্রে, মদুনা মীওইবগী লৈঙাকশিংগী মহুৎ শিনখ্রগনি অদুগা “মদু মতম পূম্নমক্তা লৈগনি।” (দানিয়েল ২:৪৪) মীওই লাখ কয়ানা ঈশ্বরদা হায়জদুনা লাক্লিবসি হায়রিবা নিংথৌলৈবাক অসিগীদমক্নি। (মাত্থি ৬:৯, ১০) অদুবু ঈশ্বর মশামক্নদি মসিগী লৈঙাকপা ওইরোই। মতম অমদা পৃথিবীদা মীওইবা ওইনা হিংলম্বা মীশক অমবু নিংথৌলৈবাক অসিগী লৈঙাকপা ওইনবা ঈশ্বরনা খনখ্রে। মহাক্না খনখ্রবা মীশক অদু কনানো?