করম্বা ৱাহংশিংগী পাউখুম্বুনো? মীওইবনা মতম পুম্বদা হংনদুনা লৈরিবা ৱাহংশিং অদুবুনী। করিগুম্বদা অসিগুম্বা ৱাহংশিং অসিগী মরমদা অদোম্না খল্লম্বা য়াই:

• ঈশ্বরনা ঐখোয়বু তশেংনা ঙাকপী শেনবীব্রা?

• লান অমসুং অৱা অনাগী অরোইবা লৈগদ্রা?

• ঐখোয়না শিরবা কান্দা করি ফীভম ওইবগে?

• শিখ্রবশিংগা ঐখোয়গা অমুক উনখীগদ্রা?

• ঐনা করম্না প্রার্থনা তৌরগা ঈশ্বরনা তাবিগনি?

• ঐ করম্না পুন্সিদা নুংঙাইবা ফংগনি?

হায়রিবা ৱাহংশিং অসিগী পাউখুম কদাইদা থিরুগনী? করিগুম্বা অদোম্না ধর্ম্মগী লুচিংবশিংদা হংলুবা নত্রগা লাইব্রেরী অমসুং লাইরিক য়োনফমশিংদা থিরুবদা হায়রিবা ৱাহংশিং অসিগী পাউখুম্নি হায়বা কয়া ফংবিগনী। অদুবু হায়রিবা পাউখুমশিংদু অমগা অমগা মান্নদে।

অদুম ওইনমক, হায়রীবা ৱাহংশিং অসিগী থাজবয়াবা পাউখুম য়াউবা লাইরীক অমা লৈ। মসি অচুম্বখক্তা হায়বা লাইরিক্নী। যীশুনা ঈশ্বরদা প্রার্থনা তৌবা মতমদা হায়রমই: “ইবুংঙোগী ৱাদি অচুম্বনী।” (যোহান ১৭:১৭) ঙসিদি হায়রিবা ৱা অদু ঐখোয়না অশেঙবা বাইবল হায়না খঙনরে। মথক্তা হঙখ্রিবা ৱাহংশিং অসিগী থাজবা য়াবা অমসুং বাইবলদগী ওইবা শেংলবা পাউখুমশিং খরা মখাদা লাকইবা লমায়শিংদা উবিগনী।

ৱাহং অসি করিগী লাকইবনো: নুংশিহৈতবা অমসুং ৱায়েন চুমদবনা পিক থল্লবা তাইবঙপান অমদা ঐখোয় হিংলি। ঐখোয়না থেংনরীবা অৱা অনা অসি ঈশ্বরগী অপাম্বনী হায়না ধর্ম্ম কয়ানা তম্বীরি।

বাইবলনদি করি হায়রিবগে: ফত্তবা হায়বশিংসী কৈদৌঙৈদসু ঈশ্বরদগী নত্তে। যোব ৩৪:১০ দা হায়, “পাঙ্গল্লবা মপু ইবুংঙোনা অরানবা তৌবা হৌনব্রা?” মীওইবশিংগীদমক নুংশিরবা ঈশ্বরগী পান্দম লৈ। মরম অদুনা যিশুনা ঐখোয়দা অসুম্না প্রার্থনা তৌননবা তম্বীরম্মী, “স্বর্গদা লৈবা ঐখোয়গী ইপা, ইবুংঙো নহাক্কী মিং অশেংবা ওইসনু। নহাক্কী লৈবাক লাকসনু, স্বর্গদা নহাক্না নিঙবা তৌবগুম্না তাইবঙপান্দা ওইসনু।” ঈশ্বরনা ঐখোয়বু কয়ামুক চ্যেকশিন্না য়েংশিনবিবগে হায়ববু, মহাক্না মশাগী করিসু পামূবা লৈতবমখৈ মহাক্কী পান্দমবু শোইদনা পাঙথোক্ননবা শিল্লি।—যোহান ৩:১৬.

অসিদশু য়েংবিয়ু, মৈহৌরোন ১:২৬-২৮; যাকোব ১:১৩; অমসুং ১ পিতর ৫:৬, ৭.

ৱাহং অসি করিগী লাকইবনো: লান্না মশিং থিবা ঙমদবা মখৈ মীওইবগী পুণ্সি কয়া অরেপ্পা লৈতনা মাংহল্লি। মীওইবগী অৱা অনা কয়ানা ঐখোয় পুম্নমকপু শোকহল্লী।

বাইবলনদি করি হায়রিবগে: মতম অমদা পৃথিবী শিনবা থুংনা শান্তি পুরক্কনি হায়না ঈশ্বরনা মাংজৌননা তাকপিরম্মী। মহাক্না পানবা, শ্বর্গগী ওইবা সরকার অদুগী মখাদা, মীশিংনা “তাররোই মখোয়না লান হায়বদু অমুক হন্না” মদুগী মহুৎতা, “মখোয়গী থাংদগী লাঙ্গোনগী লোংখুম শাগনি, তাদগীনা মখোয়না লৌ খাওনবা থাঙ্গোল শেমগনি। জাতি অমনা জাতি অমগী মথক্তা থাংশাং হাইগৎলরোই,” (য়সাইয়া ২:৪; মিকা ৪:৩) ৱায়েন চুমদবা অমসুং অৱা অনাশিংগী অরোইবা ঈশ্বরনা পুরক্কনি। বাইবলনা অসুম্না ৱাশকলি: “ইবুংঙো মহাক্না মখোয়গী মমিত্তগী মপি পূম্নমক তৈথোকপিগনি, শিবসু অমুক হন্না লৈররোই, অদুগা তেংথাবা, কপ্পা অমসুং নাবা অমুক হন্না লৈররোই; অহানবা পোৎ মখৈ [ঙসিগী ৱায়েল চুমদবা অমসুং অৱা-অনা পুম্নমক] অদু লান্থোকখ্রে।”—ফোংদোকপিবা ২১:৩, ৪.

অসিদশু য়েংবিয়ু: লাইশোন ঈশৈ ৩৭:১০, ১১; ৪৬:৯; অমসুং মিকা ৪:১-৪.

ৱাহং অসি করিগী লাকইবনো: মী অমনা শিরবা মতুংদা হকচাং মনুংদগী থৱায় অমা হিংদুনা লৈহৌই হায়না পৃথিবীদা লৈরিবা অয়াম্বা ধর্ম্মশিংনা তম্বী। কনাগুম্বা খরনদি শিখ্রবশিংনা হিংলিবশিংবু অৱাবা তাহন্বা ঙম্মী হায়না থাজনৈ। অমসুং ঈশ্বরনা ফত্তবশিংবু নোরোক্তা লোম্বা নাইদনা লাক্নদুনা দন্দী পী হায়না খন্নৈ।

বাইবলনদি করি হায়রিবগে: মীওইবনা শিরবা কান্দা করিগুম্বা অমত্তা হিংদুনা অমুক লৈহৌদ্রে। পাউ শন্দোকপা ৯:৫ না অসুম্না হায়রি, “অশেঙবমক হীংলিবশিংনা শিগনি হায়বসি খঙই। অশিবনা মদু খঙদে।” অশিবশিংনা পুক্নিং, লৌশিং, নত্রগা করিগুম্বা অমত্তা খংবা ঙমদ্রবা মরম্না, মখোয়না হীংলিবশিংবু অৱাবা তাহনবা নত্রগা মতেং পাংবা ঙমদে। মখোয়না মাংনবা তৌবা ঙমদে অদুগা অহিংবদা মতেংসু পাংদে। লাইশোন ঈশৈ ১৪৬:৩, ৪.

অসিদশু য়েংবিয়ু: মৈহৌরোন ৩:১৯ অমসুং পাউ শন্দোকপা ৯:৬, ১০.

ৱাহং অসি করিগী লাকইবনো: ঐখোয় পুম্নমক হিংবা পামই, অমসুং ঐখোয়না নুংশিজবাশিংগসু লোইননা নুংঙাইনা হিংবা পুণ্সি পামই। ঐখোয়গী শিখ্রবা নুংশিবশিংবু য়ারগদী, অমুক হন্না উনিংবা হায়বশি মহৌশানি।

বাইবলনদি করি হায়রিবগে: শিখ্রবা অয়াম্বা মীশিংনা অমুক হীংগৎলকখীগনি। যিশুনা ৱাশকপিরম্মী মদুদি, “মোংফমদা লৈবা পুম্নমক্না মহাক্কী খোঞ্জেল তারগা, . . . থোক্লক্কনি।” (যোহান ৫:২৮, ২৯) ঈশ্বরগী পাণ্দমগা চান্ননা হীংগৎলক্লবা মীত্তই শিংনা ফজরবা, অৱা-অনা লৈত্রবা পৃথিবীদা হীংবগী খুদোংচাবা ফংগনি। (লূক ২৩:৪৩) হায়রীবা শোয়দ্রবা তুংদা ওইগদৌরীবা ৱাফম অসিদা, হায়বা ইনবা মীওইশিংনা অনা-অয়েক লৈতনা লোম্বা নাইদবা পুণ্সি ফংগনি। বাইবলনা হায়রী: “অচুম্বা মীশিংনা মালেমসিগী মপু ওইগনি, অরোই-অখম নাইদনা মফমসিদা লৈগনি।”—লাইশোন ঈশৈ ৩৭:২৯.

অসিদশু য়েংবিয়ু: যোব ১৪:১৪, ১৫; লূক ৭:১১-১৭; অমসুং পাখোনচৎপশিংগী থবক ২৪:১৫.

ৱাহং অসি করিগী লাকইবনো: তশেংনা হায়রবদা ধর্ম্ম খুদিংগী মীওইশিংনা প্রার্থনা তৌই। অদুম ওইনমক, ময়াম অমনদি মখোয়গী প্রার্থনাদু ঈশ্বরনা তাবিদে হায়না খল্লি।

বাইবলনদি করি হায়রিবগে: ঐখোয়না প্রার্থনা তৌবা মতমদা হনজন হনজন্না হায়দনবা অমসুং শেমসাদুনা থমখ্রবা প্রার্থনাশিং তৌদনবা যিশুনা তম্বীরমই। মহাক্না হায়রম্মী মদুদি, ‘প্রার্থনা তৌবা মতমদা’, “অরেম্বাদা হঞ্জিন হঞ্জিন্না হায়জগনু” (মাত্থি ৬:৭) করিগুম্বা ঐখোয়গী প্রার্থনাবু ঈশ্বরনা তাবিবা পামলবদি, মহাক্না আয়াবা মওংদা ঐখোয়না তৌবা তাবনী। অদুগা মদু তৌননবগীদমক ঐখোয়না ঈশ্বরগী আয়াবনা করিনো হায়বা তম্বা তারে অমসুং মদুগি মতুং ইন্না প্রার্থনা তৌবা তাই। অহানবা যোহানগী ৫:১৪ দা শুগাইনা হায়রি: “ইবুংঙো মহাক্কী নিঙবা মতুং ইন্না করিগুম্বা ঐখোয়না নীজরবদি, ইবুংঙো মহাক্না ঐখোয়গী নিজবা তাবী।”

অসিদশু য়েংবিয়ু: লাইশোন ঈশৈ ৬৫:২; যোহান ১৬:২৩, ২৪ অমসুং অহানবা যোহানগী ৩:২২.

ৱাহং অসি করিগী লাকইবনো: অয়াম্বা মীশিংনা থাজনৈ মদুদি পৈসা, মিংচৎ নত্রগা শক ফজবনা মখোয়বু নুংঙাইহল্লী। হায়রিবসিগী মতুং ইন্না মখোয়না মদুশিংদুবু ফংনবা হোৎনৈ। অদুবু মদুখক্তা ফংনবা হোৎনরিঙৈদা মখোয়গী নুংঙাইগে হায়না খল্লিবদুদি ফংদ্রে।

বাইবলনদি করি হায়রিবগে: নুংঙাইবা ফংনিংঙাইগী মরু ওইবা লম্বী যিশুনা তাকপিবা কান্দা অশুম্না খংহল্লম্মী: “ঈশ্বরগী ৱা তাদুনা ঙাকপশিং অদুনা য়াইফবনি।” (লূক ১১:২৮) ঐখোয়দা য়াম্না দরকার ওইবা—ঈশ্বরগী মরমদা খৌরাংজবা অমসুং মহাক্না ঐখোয়গীদমক্তা করি পান্দম থমলিবগে হায়বশিংসি খংননবা খোঙথাং লৌরবখক্তদা অশেঙবা নুংঙাইবা হায়বদু ফংগনি। মদুগী অচুম্বদু বাইবলদা য়াওই। মদুগী অচুম্বদু খংবগী মপান্না, তশেংনা, মরুওইবদুনা করিনো অমসুং ওইদবদুনা করিনো হায়বদু খঙবা ঙমহল্লী। বাইবলগী অচুম্বনা ঐখোয়গী ৱারেপ্তা অমসুং থবক শিংদা লমজিংবা তারবদি পুণ্সিসি হেন্না অর্থ থোকই।

অসিদশু য়েংবিয়ু: পাওরৌ ৩:৫, ৬, ১৩-১৮ অমসুং অহানবা ১ তীমোথিয় ৬:৯, ১০.

 মসিনা মথক্তা পিখ্রিবা ৱাহং তরুকতুগী সমলপ্পা বাইবল দা পীবা পাউখুমনী। অদোম মসিদগী হেন্না খঙবীনিংব্রা? অদোমসু ‘ঈশ্বরগী মরমদা খৌরাংজবা’ মীশক অমা শোইদনা ওইরমগনি। অদোম্না অতোপ্পা ৱাহংশিংগী মরমদশু খল্লম্বা য়াই, খুদম ওইনা: ঈশ্বরনা ঐখোয়বু তশেংনা ঙাকপী শেনবিরবদি ইতিহাস পুম্বদা অৱা-অনা অমসুং ফত্তবশিং লৈহল্লিবা করিগীনো? ঐগী য়ুম্বান-পুন্সিগী মগুণ অসি করম্না হেনগৎহন্বা য়াগনি? মসিদা নত্তনা অতোপ্পা ৱাহং কয়া অমগী পাউখুম বাইবলনা মপুংফানা পীরি। অদুম ওইনমক ঙসিদি মী অয়াম্বনা বাইবলদা য়েংবা হায়বসিদা নীংজিং মাংজিং তৌই।

মখোয়না মসি য়াম্না পাক-চাওবা অদুগা করিগুম্বকান্দাসু ভাবতাবদা ৱাবা লাইরীক অমনি হায়না উই। বাইবলদগী পাউখুমশিং অসি ফংননবগীদমক অদোম মতেং পামবীব্রা? যিহোবাগী শাক্ষীপিবা শিংনা অদোমগী মতেং ওইননবগীদমক উপায় অনিখক পিরী।

অহান্বদা, ঈশ্বরদগী লাকপা নুংঙাইবা পাউ! হায়বা লাইরীক মচা অমা লৈ। হায়রিবা লাইরিকশি, থবকচিনবা মীওইশিংগীদমক্তা য়েংদুনা নিংথীনা শেম শারবা মরুওইবা ৱাহংশিং অসিগী চপ চানা বাইবলদগী ওইবা পাওখুম য়াওরবা লাইরিক্নী। অনিশুবা উপায় অদুদি, য়াম্না মরুপ মপাং ওইবা মওংদা যিহোবাগী শাক্ষী পীবা বাইবল নৈনবদা থৱায় য়াওবা মীওই অমনা, অদোমগী য়ুমদা নত্রগা খুদোংচাগদবা মফম অমদা ঙাইহাক লাক্লগা হাপ্তাগী ওইনা বাইবল নৈনমিন্নবা য়াই। হায়রিবা থৌরম অসিদগী পৃথিবী শীনবা থুংনা মীওই লাখ কয়া অমদা কান্নবা ফংহল্লি। অদুগা মখোয় কয়া অমনা অকোনবদা হরাওনা অসুম্না ফোংদোকই মদুদি: “ঐনা অচুম্বা ফংলে!”

মসিদগী হেনবা লন অমমুক ফংলরোই। বাইবলগী অচুম্বনা ঐখোয়বু অন্ধ-বিশ্ব্যাসতগী, চমম্নহনবদগী অমসুং অকীবা ৱাখলদগী নীঙতমহল্লী। অদুগা মসিনা ঐখোয়দা আশা, পান্দম অমসুং হরাউ-নুংঙাইবা পী। যিশুনা হায়রমই, “নখোয়না অচুম্বা অদু খঙগনি অমসুং অচুম্বা অদুনা নখোয়বু ননিঙ তমহনগনি।”—যোহান ৮:৩২.