বাইবলনা তাকপী-তম্বীবা মরুওইবা ৱাফম খরসি য়েংবা মতমদা অদোম্না যেহোবাবু নুংশিবা শোয়দনা হেনগৎলমগনি। হায়রিবা নুংশিবা অসি হেন্না কনখৎনবা লেপ্তনা হোৎনগদবনি। (১ পিতর ২:২) লোম্বা নাইদবা পুন্সি ফংবগী আশা অসি ঈশ্বরগী ৱাহৈ নৈনদুনা মঙোন্দা লেপ্তনা নকশীনজনবা হোৎনবগী মখা পোল্লি।—যোহান ১৭:৩; যিহূদা ২১ পাবিয়ু।

ঈশ্বর খঙবা হেৎগৎলিমখৈ, ঈশ্বর থাজবসু হেনগৎলক্কনি। থাজবা অদুনা ঈশ্বরবু পেলহনবদা মতেং পাংগনি। (হিব্রু ১১:১, ৬) মসিনা অরানবা তৌরুরবসু পুক্নীং হোংহনবা অমসুং পুন্সিবু অফবা মায়কৈদা পুরকপা ঙমগনি।—পাখোনচৎপশিংগী থবক ৩:১৯ পাবিয়ু।

মহৌশানা নুংঙাইবা পাউ হায়বসি ঐখোয়না অতোপ্পদা তম্বদা নুংঙাই। মরম অসিনা অদোম্না তমখিবশিংদু অতোপ্পদা শোয়দনা হায়নীংগনি। বাইবল লেপ্তনা নৈনরবদি অতোপ্পশিংদা ঐখোয়না বাইবল শীজিন্নদুনা যেহোবাবু থাজবা অমসুং নুংঙাইবা পাউগী মরমদা হায়বা হৈগনি।—রোমীয় ১০:১৩-১৫ পাবিয়ু।

মী অয়াম্বনা ঈশ্বরদগী লাকপা নুংঙাইবা পাউসি মরুপ-মপাং নত্রগা মরী-মতাশিংদা হান্না হায়বা হৌই। অদুবু ঐখোয় হৈশিংগদবনি। মখোয়গী থাজবশিং অদু লাল্লি হায়বগী মহুত্তা ঈশ্বরনা ৱাশকপীবা কয়াগী মরমদা হায়গদবনি। ঐখোয়না হায়বা ৱাহৈদগীদি ঐখোয়গী থৌজাল হৈবা মওংনা হেন্না মীশিংগী থম্মোয়দা মমি তাই হায়বসু কাউরোইদবনি।—২ তীমোথি ২:২৪, ২৫ পাবিয়ু।

ঈশ্বরগী ৱাহৈ নৈনবনা ঈশ্বর নীংবা হেনগৎহল্লি। অকোনবদদি যেহোবাগা অদোমগা অচেৎপা মরী থম্বা ঙম্লগনি। অদোম মহাক্কী ইমুংগী মীওই অমগুম ওইরগনি।—২ কোরিন্থীয়া ৬:১৮ পাবিয়ু।

ঈশ্বরগী ৱাহৈ লেপ্তনা নৈনজদুনা মহাক্কী মরমদা হেন্না খঙবা য়াগনি। (হিব্রু ৫:১৩, ১৪) যেহোবাগী সাক্ষী অমদা বাইবলনা তশেংনমক করি তম্বীবগে? (ইংলিশ) হায়বা লাইরিক অসি শীজিন্নদুনা বাইবল নৈননবা হায়বীয়ু। ঈশ্বরগী ৱাহৈদগী হেন্না তমজরিবা মখৈ অদোমগী পুন্সিদা হেন্না মায়পাকপা ওইগনি।—থাগৎ ঈশৈ ১:১-৩; ৭৩:২৭, ২৮ পাবিয়ু।

নুংঙাইবা পাউ অসি য়াইফবা ঈশ্বর যেহোবাদগী লাকপনি। ঈশ্বরগী মীশিংগা নকশীন্ননা লৈরবদি ঈশ্বরদা হেন্না নকশীনজবা য়াগনি। (হিব্রু ১০:২৪, ২৫) যেহোবাবু পেলহন্নবা লেপ্তনা হোৎনবনা অদোম্না অশেংবা, লোম্বা নাইদবা পুন্সি ফংগদৌরিবনি। ঈশ্বরদা নকশীনজবা হায়বসিমক তশেংনা খ্বাইদগী ফবা থবকনি।—১ তীমোথি ১:১১; ৬:১৯ পাবিয়ু।