আদম অমসুং হৱাগী মচাশিং লৈরম্মী অমসুং পৃথিবীগী লৈমায়দা মিশিংগী মশিং য়ামথোরকখি। মতম খরা লৈরগা স্বর্গদুত খরনা সৈতানগী লালহৌবগী থবক অদুদা য়াওশিনখি।

মখোয়না পৃথিবীদা লাক্লম্মী অমসুং নুপিশিংগা লুহোংবা য়ানবগীদমক নুপাশিংগী শক্লোন লৌরম্মী। নুপিশিং অদুনা য়াম্না শাথিবা অমদি মপাঙ্গল কন্বা থোইদোক হেন্দোকপা মচা নুপাশিং পোক্লম্মী।

ফত্তবা তৌবা মীশিংনা তাইবংপান অসি পীক থনলম্মী। মসিগী মরমদা বাইবলনা হায়: “মালেমদা মীগী ফত্তবা অসি য়াম্না হেল্লক্লে অমসুং মহাক্কী থম্মোইনুংদা খল্লিবা ৱাখল খুদিং তত্তনা ফত্তবা ঙাক্তনি।”

নোহা অফবা মী অমা ওইরম্মী। যেহোবানা নোহাদা হায়রম্মী মদুদি মহাক্না ফত্তবা মীয়ামশিংদু অচৌবা ঈশিং ইচাও অমনা মাঙহল্লগনি।

ঈশ্বরনা নোহাদা অচৌবা হি অমা শাদুনা মদুদা মহাক্কী ইমুং মনুং অমদি মখল খুদিংগী শা উচেকশিং পুশিন্নবা হায়রম্মী।

নোহানা লাক্কদৌরিবা ঈশিং ইচাও অদুগী মরমদা মীয়ামদা মাংজৌননা চেকশিন ৱাহৈ হায়রম্মী, তৌইগুম্বসুং মখোয়না মদু তাখিদে। খরনা নোহাবু নোক্নবীখি, অতোপ্পশিংনদি মহাকপু তাথীরম্মী।

হি অদু শাবা লোইরবা তুংদা নোহানা শা-উচেকশিংদু মনুংদা পুশিনলম্মী।