ঐখোয়না ইমুংগী দরকার ওইবশিং ফংনবা শেল দরকার ওই। (পাউরৌ ৩০:৮) “শেন্না ঙাক-শেল্লি” হায়না বাইবলনসু খঙহল্লি। (পাউ শন্দোকপা ৭:১২) মতৈ মনাও অনীগী মরক্তা শেল থুমগী মতাংদা ৱারী শান্নবসি লুনা থোকপা য়াই। অদুবু শেলনা মরম ওইরগা নখোয়গী য়ুম্বান পুন্সিদা অকায়বা ওইহনগনু। (এফিসা ৪:৩২) মতৈ মনাও অনীগী মরক্তা থাজনবা লৈগদবনি অমসুং শেল করম্না শীজিন্নগদগে হায়বদু পুন্না ৱারেপ লৌমীন্নগদবনি।

বাইবলনা করি হায়রি: “নখোয়গী নরক্তগী অমনা অৱাংবা য়ূম অমা শানীংলবদি, মহাক্না মদু লোইবা ঙম্নবা শেন লৈগদ্রা হায়না ফমদুনা চঙগদবা অদু হান্না পারোইদ্রা?” (লূক ১৪:২৮) শেল করম্না শীজিন্নগদগে হায়বদু পুন্না থৌরাং তৌমিন্নবা তঙাইফদে। (আমোস ৩:৩) নহাক্না করি করি লৈগদগে অমসুং শেল কয়া য়াম্না শীজিন্নগদগে হায়বদু ফজনা লেপথোকউ। (পাউরৌ ৩১:১৬) করিগুম্বা পোৎ অমা লৈনবা শেল লৈরে হায়রগসু মদু লৈদবা য়াদে হায়বদি লৈতে। শেল তোনশিনদনবা হোৎনৌ। নহাক্কী লৈজবা শেল অদুখক শীজিন্নৌ।—পাউরৌ ২১:৫; ২২:৭

নহাক্না তৌবা য়াবদি:

• থা লোইশিল্লকপদা শেল লেম্লবদি, মদু করিদা শীজিন্নগদগে হায়বদু পুন্না তান্নমিন্নৌ

• শেল পুৎথরবদি, চাদিং হন্থনবা ফজনা থৌরাং তৌবিয়ু। খুদম ওইনা মপান্দা অতাঙবা মথেলশিং চারুবগী মহুত্তা য়ুমদা থোংলগা চাবা য়াই

বাইবলনা করি হায়রি: ‘ঐখোয়না ইবুংঙোগী মিৎয়েংদা অচুম্বা তৌবতা নত্তনা মীশিংগী মিৎয়েংদসু অচুম্বা অদু তৌ।’ (২ কোরিন্থীয়া ৮:২১) নহাক্কী নপুরোইবা নত্রগা নুপীদা নহাক্না শেল কয়া য়াম্না তাল্লি অমসুং কয়া য়াম্না শীজিন্নথোকখ্রে হায়বদু থম্মোয় শেংনা হায়দোকনৌ।

শেল থুমগা মরী লৈনবা অচৌবা ৱারেপশিং লৌবা মতমদা নহাক্কী নপুরোইবা নত্রগা নুপীগা মতম পুম্নমক্তা তান্নবিয়ু। (পাউরৌ ১৩:১০) শেল থুমগী মতাংদা থম্মোয় শেংনা পাউ ফাওনবনা নহাক্কী য়ুম্বান পুন্সিদু ঈংনা চিকনা লৈবা ঙমগনি। নহাক্না তাল্লকপা শেলদু ইশাগীনি হায়না খনবগী মহুত্তা, ইমুংগী শেলনি হায়না খনবীয়ু।—১ তীমোথি ৫:৮

নহাক্না তৌবা য়াবদি:

• অমনা অমগী মফমদা হংনদ্রগসু শীজিন্নথোকখিবা য়াবা শেলগী চাং অমা লেপথোকপিয়ু

• শেল থুমগী খুদোংচাদবা অমা লাকত্রিবা ফাওবা শেলগী মতাংদা ৱারী শান্নদবা তৌবিগনু