খৃষ্টিয়ান ওইরবা মতুংদা পোলনা ঈশ্বরগী নিংথৌ লৈবাক্কী অফবা ৱা পাউ অদু থৱায় য়াওনা শন্দোক্লম্মী। মতম অমদা পাখোনচৎপা অসিনা খৃষ্টিয়ানশিংবু অথিংবা পীরম্মী। হৌজিক মহাক্না য়াম্না কনবা মখলগী অথিংবা কয়া থেংনরম্মী। চোকথবা তৌদনা পাখোনচৎপা অসিনা তোঙান তোঙান্বা মফমদা চৎতুনা ঈশ্বরগী নিংথৌ লৈবাক্কী অফবা ৱা পাউ শন্দোক্লম্মী। মসিগী নিংথৌ লৈবাক অসিনা মীওইবশিংগীদমক ঈশ্বরগী পান্দমদু মপুংফাহনবিগনি।

পোলগী অহানবা পাউ শন্দোকপগী খোংচৎতা লিস্ত্রা সহরদা মহাক্না খোংতেকপা অমা ফহনবিরম্মী। মফম অদুদা মীওই কাংলুপ খরনা পোল অমসুং মহাক্কা লোয়নবা বর্নবাস্তা লাওরক্লম্মী। মীয়ামদুনা মখোয়বু লাইনি হায়দুনা খল্লম্মী। মখোয় অনিনা য়াম্না কন্না হোৎনদুনা মখোয়দা অথেনপোৎ কৎনবা হোৎনবদু তোকহনখি। পোলগী য়েক্নবশিংনা হায়রিবা মীশকশিংদু পোলগী মাইয়োক্তা শিজিন্নরকখি। তুংদা মীয়ামদুনা পোলবু নুংনা থারম্মী অমসুং শিরে হায়না হুন্দোক্লম্মী। তৌইগুম্বশুং পোল মদুদগী হিংহৌই অদুগা তুংদা সেবোকশিংদুবু পুক্নিং থৌগৎনবা সহরদুদা অমুক হল্লকখি।

যিহূদিদগী ওল্লকপা খৃষ্টিয়ান খরনা হায়রম্মী মদুদি যিহূদি নৎতবশিংনা মৌশিগী খুথাংদা পীরম্বা ৱায়েল য়াথংশিং অদুগী শরুক খরদি ইনগদবনি। ৱাফমসি পোলনা যেরূশালেমদা লৈবা পাখোনচৎপশিং অমদি অহলশিংগা খন্নরম্মী। য়াম্না কুপ্না শাস্ত্রগী ৱাফম নৈনরবা তুংদা অমদি ঈশ্বরগী থৱায় অশেংবগী মতেংগা লোইননা মখোয়শিং অদুনা শীংলুপ্তা পাউতাক খরা পীবিরম্মী। মখোয়না মূর্ত্তি লাৎপদগী লৈথোক্ননবা ঈ চাদনবা অমদি লাকহত্তুনা শিবা শা চাদনবা লোইননা চুমদবা লমচৎতগী থাপতোক্নবা খংহল্লম্মী। হায়রিবা য়াথংশিং অসি ‘তঙাইফদ্রবা ৱাফমশিংনি।’ তৌইগুম্বশুং হায়রিবা য়াথং অসি ঙাক্না চৎপা হায়বসিনা মখোয়না মৌশিগী খুৎথাংদা পীরম্বা ৱায়েল য়াথংশিং অদু ইনগদবনি হায়বা ৱাফমদি নত্তে।—পাখোনচৎপশিংগী থবক ১৫:২৮, ২৯.

মহাক্কী অনিশুবা পাউ শন্দোকপগী খোংচত্তা পোলনা বেরীয়াদা চৎলম্মী। হায়রিবা মফম অদু ঙসিদি গ্রীস হায়না খংনৈ। মফম অদুদা লৈরিবা যিহূদিশিংনা পোলবু থৱায় য়াওনা তাজরম্মী। মখোয়না শাস্ত্রবু কুপ্না য়েংশিন্দুনা মহাক্না তম্বিরীবশিং অদু বাইবলদগী ওইব্রা হায়বদু খংদোক্নবা তৌরম্মী। য়ৈখায় থিনগায়বা অমুক হৌরক্লম্মী। মতম অসিদা পোল এথেনদা চৎপা তারম্মী। মফম অদুদা এথেনগী লাইরিক হৈরবা মীওইশিং অদুগী মমাংদা পোলনা শক্তি লৈরবা ভাষন অমা পীরম্মী। মদুগী ভাষন অদু য়াম্না হৈ-শিংনা ভাব তাবা য়াবা অমদি মপুংফাবা ওইরম্মী।

মহাক্কী অহুমশুবা পাউ শন্দোকপগী খোংচৎ অদুগী তুংদা পোল যেরূশালেমদা চৎলম্মী। মহাক্না লাইশংদা চৎলুবা মতমদা যিহূদি খরনা ইরাং শাগৎলম্মী। মখোয়না মহাকপু হাৎপা পাম্লম্মী। মদুদা রোমগী লান্মীশিংনা খুৎ থিংজিল্লক্লম্মী অমসুং মহাকপু ৱাহং পাউহং তৌখি। পোল রোমগী নাগরিক অমা ওইরম্মী। মতাংসিদা মহাকপু ঙাকথোকচনবা রোমগী লৈঙাকপা ফিলিক্সকী মমাংদা ৱা ঙাংলম্মী। যিহূদিশিংদুনা পোলগী মাইয়োক্তা করিগুম্বা প্রমান অমত্তা পীবা ঙমখিদে। পোলনা রোমগী লৈঙাকপা ফেষ্টস্না মহাকপু যিহূদিশিংদা খুৎশিন্নবা অদু মহাক্না পাম্লমদে। পোলনা হায়রম্মী: “ঐনা কৈসারদা ৱাকৎচরি।” ফেষ্টস্না খুমলক্লম্মী: “নহাক্না কৈসারদা . . . চৎকদবনি।”—পাখোনচৎপশিংগী থবক ২৫:১১, ১২.

মদুগী তুংদা পোলবু ৱায়েল বিচারগীদমক ইতালি তম্না পুরম্মী। লম্বীদা জহাজ কায়বদগী নিংথমথা অদু মালতাদা লেনবা তাখি। ইকোন কোন্বদা পোল রোমদা লাকখি অদুগা অৱায়বা য়ুম অমদা চহি অনি চুপ্না লৈখি। মহাকপু লান্মীশিংনা ঙাক্তুনা থমলম্লবশু পাখোনচৎপা অদুনা ঈশ্বরগী নিংথৌ লৈবাক অদুগী মরমদা মহাকপু উনবা লাকপা মী খুদিংদা লেপ্তনা পাউ শন্দোক্লম্মী।

​—পাখোনচৎপশিংগী থবক ১১:২২–২৮:৩১​দা য়ুম্ফম ওইবা।