সেমসনগী মতুংদা সমূয়েল ইস্রায়েলদা ঈশ্বরগী ৱা তাকথোকপা অমসুং ৱায়েনবা ওইখি। ইস্রায়েল মচাশিংনা সমূয়েলদা অতোপ্পা জাতিগুমনা মখোয়গীশু মীওইবগী নিংথৌ অমা পীবিনবা হায়জরম্মী। মদুনা যেহোবাবু নুংঙাইহল্লমদে। অদুমওইনমক মখোয়না পাম্লিবদু তৌননবা সমূয়েলদা য়াথং পীখি। ঈশ্বরনা সোল কৌবা য়াম্না নোল্লুকচবা মীওই অমবু নিংথৌ ওইনবা খনখি। তুংদা নিংথৌ সোল ঙকচাও থেকপা হায়বা ইন্দবা ওইরকখি। যেহোবানা মহাকপু নিংথৌ ফমদগী লৌথোক্লগা অতোপ্পা নহা ওইরিবা দেবিদপু হাপ্নবা সমূয়েলদা হায়রম্মী। অদুম ওইনমক দেবিদনা নিংথৌ ওইরকপা হায়বসি চহি কয়াগী মতুংদনি।

দেবিদনা য়াম্না নহা ওইরিঙৈদা সোলগী লান্মী ওইনা থবক তৌরম্বা মাগী মচিন মনাওশিং উন্নবা চৎলম্মী। সোলগী লান্মীশিংদুনা গোলিয়াৎ কৌবা হিংচাবা অদুগা লান শোকনবা অদু য়ামনা কিজরম্মী। হিংচাবা অদুনা মখোয়বু অমদি মখোয়গী ঈশ্বরবু করেম্নরম্মী। মদুদা দেবিদনা শাওরদুনা হিংচাবা অদুগা লান থেংনবা চৎলম্মী। মখুৎতা গুলেন অমগা শুপন্তগী নুং মচা খরা পাইরগা নহা অসিনা ফিত মাপন হেন্না ৱাংবা হিংচাবা অদু থেংননবা থোরকলম্মী। হিংচাবা গোলিয়াৎনা দেবিদপু করেমনবা মতমদা দেবিদনা অসুমনা খুমলম্মী মদুদি মহাকনা ঈশ্বর যেহোবাগী মীংদা মহাকপু থেংনগদৌবা মরমনা মহাকনা খুৎলায় অফবা পাইবা হেল্লী হায়দুনা হায়রম্মী। শুপনগী নুংদুম মচা অমখক্তং শিজিন্নরগা দেবিদনা গোলিয়াৎপু মাইথিবা পিরম্মী। অদুদগী হিংচাবা অদুগী মশাগী থাংদু লৌরগা মকোক ককলম্মী। পলেষ্টীগী লান্মীশিংদু কিদুনা চেনখি।

অহানবদা দেবিদকি থৌনা অদুদা সোলনা পেল্লদুনা মহাক্কী লান্মীগী মকোক ওইহলম্মী। অদুবু দেবিদনা মাইপাকলকপদুদা সোলনা য়ামনা কল্লকপা ফাওরম্মী। চহি কয়া অমা দেবিদনা মথৱাই হিংজনবা কোইচেন চেনদুনা মীচেন অমগুম লৈখি। অদুম ওইনমক মহাকপু হাৎকদৌবগী তান্নরিবা নিংথৌ অদুদা দেবিদনা থাজবা য়ানা লৈখি। মরমদি নিংথৌ সোল অসি যেহোবা ঈশ্বরনা খনখিবা মীশকনি হায়বদু মহাকনা খংলম্মী। অরোইবদা সোলদু লানফমদা শিখি। ইকুই কুইদনা অদুগী মতুংদা যেহোবানা ৱাশকপিখিবগুম দেবিদনা নিংথৌ ওইখি।

নিংথৌ অমা ওইনা দেবিদনা ঈশ্বর যেহোবাগীদমক লাইশং অমা শাজনিংলম্মী। অদুম ওইনমক যেহোবানা মহাক্কী মচা-মশুশিংগী মনুংদগী অমনা মদু শাগনি হায়রম্মী। অদুগী মীশক অদু দেবিদকী মচানুপা সোলোমোন ওইরম্মী। অদুবু ঈশ্বরনা মনা ওইনা দেবিদকা মরুওইবা ৱারেপ্নবা অমা তৌনরম্মী। মরমদুনা মহাক্কী শাগৈদগী য়াম্না তোঙানবা নিংথৌ শাগৈ অমা পুথোকপিগনি। অরোইবদা ইদেনগী লৈকোলদা ৱাশকপিখিবা কনবিবা মীশক নত্রগা ধারা হায়বদু মদুদগী থোক্লক্কনি। মদুগী ধারা অদু ঈশ্বরনা খনবিরবা মশীহ, মদুগী অর্থদি “থাউ হৈবিখ্রবা” হায়বদু ওইগনি। যেহোবানা ৱাশকপিরম্মী মদুদি মশীহ অদুনা লোয়বা নাইররোইদবা সরকার নত্রগা নিংথৌ লৈবাক অদুগী লৈঙাকপা ওইগনি।

য়াম্না হারাওজবগা লোইননা দেবিদনা মশিং য়াম্লবা য়ুম শাবদা চংগদবা মচাক মথুম ময়াম অমা অমসুং মমল য়াম্লবা পোৎলমশিং লাইশং অদুগীদমক লাংশিন্জরম্মী। মহাক্না ঈশ্বরগী ইথিলদগী ঈশৈ কয়াশু লেংজরম্মী। “যেহোবাগী থৱায়না ঐবু শিজিন্নদুনা ৱা ঙাঙখি, মহাক্কী ৱা অদু ঐগী লৈতোন্দা লৈরম্মী।” মহাক্কী পুন্সিনা লোইরমদাই মতমদা মসিগী ৱাফমসি দেবিদনা য়াজখি।—২ সমূয়েল ২৩:২.

​—১ সমূয়েল; ২ সমূয়েল; ১ ইতিহাস; যিশাইয়া ৯:৭; মাথি ২১:৯; লূক ১:৩২; যোহান ৭:৪২​দা য়ুম্ফম ওইবা।