নোহাগী মতমগী ঈশিং ইচাও অদুগী মতুংদা চহি ৩৫০ মুক হৌখ্রে। শাগৈগী কোকহন-লাইহন ওইরম্বা অব্রাহাম ঙসি ইরাক হায়না খংনবা মতমদুদা য়াম্না চাওখৎলম্বা উর হায়বা সহর অদুদা লৈরম্মী। অব্রাহাম থাজবদা শীংথানিংঙাই ওইবা নুপা অমা ওইরম্মী। তৌইগুম্বশুং হৌজিক্তি মহাক্কী থাজবা অদুদা চাংয়েং লাক্লে।

যেহোবানা অব্রাহাম্বু মহাক্কী পোক্নফম লম অদু থাদোক্লগা শকখংদ্রিবা লম অমদা চৎনবা হায়রম্মী। অদুগী লমদু তুংদা কেনাননি হায়বা খংলকখি। নিংজিংনবা লৈতনা অব্রাহাম্না য়াথংদু ইঞ্জরম্মী। মহাক্না মহাক্কী ইমুং-মনুংগী মীওইশিং, মহাক্কী লোয়নবি সারা অমসুং মহাক্কী মচিন মনাওগী মচানুপা লোট য়াওনা পুরম্মী। অশাংবা খোংচৎ অদুগী তুংদা কেনান্দা দম্বুর খল্লগা লৈবা মীওই ওইখি। অব্রাহামগা ৱারেপ্নবা অমদা যেহোবানা মঙোন্দগী অচৌবা জাতি অমা শেম্বিগনি হায়না ৱাশকপিখি। মহাক্কী মপান্দগী পৃথিবীদা লৈরিবা ইমুং-মনুং পুম্নমক থৌজাল ফংজবা হায়বদু ওইগনি অদুগা মহাক্কী মচা-মশুশিংনা কেনানগী লমদুগী মপু ওইগনি ৱাশকপিখি।

অব্রাহাম অমসুং লোট মপান ফরক্তুনা মশিং য়াম্লবা য়াউ শগু অমদি ষণ শল্লুপ কয়াগী মপু ওইজরম্মী। মশাগী ওইজবা থিদনা অব্রাহাম্না লোটপু মহাক্না অপাম্বা লম খঞ্জহনখি। লোটনা যোর্দান তুরেল্লোম থংবা লৈহাও চেন্বা লম শরুক অদু খল্লবা তুংদা সোদোমগী সহর মনাক্তা খুন্দাখি। অদুম ওইনমক সোদোমদা লৈবা মীওইশিং অসি লমচৎ কাম্বা যেহোবাগী মাইয়োক্তা চাওনা পাপ তৌবা মীওইশিং ওইরম্মী।

যেহোবা ঈশ্বরনা তুংদা অব্রাহামদা অমুক হন্না থাজবা পিরম্মী মদুদি মহাক্কী মচা-মশুশিংদু স্বর্গদা লৈবা থৱানমিচাক্কুম মশিং থিঙমদনা য়াম্বা ওইগনি। ৱাশক অদুদা অব্রাহামনা থাজবা থম্লম্মী। অদুম ওইনমক অব্রাহামগী নুংশিজরবি লোইনবি সারা চাবোক্তবী ওইনা লৈরম্মী। অদুদগীদি অব্রাহামনা চহি ৯৯ শুরকপা অদুগা সারাগীনা চহি ৯০ চংলকপা মতমদা ঈশ্বরনা অব্রাহামদা মহাক্কী লোয়নবী সারা অদু মচানুপা অমা পোক্কনি হায়রম্মী। ঈশ্বরনা হায়দোকখিবগুম সারানা ইসাক পোকখি। অব্রাহামগী অতোপ্পা মচাশিংশু লৈরম্মী তৌইগুম্বশুং লান্বিবা মীশক অমা লাক্কনি হায়দুনা ইদেনগী লৈকোন্দা ৱাশকপিখিবা অদুদি ইসাক্কী খুৎথাংদা ওইগদবনি।

তাঞ্জা অসিদা লোট অমদি মহাক্কী ইমুং সোদোমদা লৈরম্মী। তৌইগুম্বশুং ধর্ম্ম চেন্বা লোটতি সহর অদুগী লমচৎ নাইদবা মীশিংদুগা মান্নরমদে। যেহোবানা সোদোমগী মথক্তা ৱায়েল বিচার তৌরগে হায়দুনা লেপ্লবা তুংদা মহাক্না মাংজৌননা স্বর্গ দুত থারক্তুনা লাক্কদৌরিবা মাংতকহন্বা অদুগী মরমদা লোটপু খংহল্লম্মী। স্বর্গ দুতশিংদুনা লোট অমদি মহাক্কী ইমুংবু সোদোম থাদোক্তুনা চেনখিনবা অমসুং তুং হন্না য়েংদনবা তকশিল্লম্মী। অদুদগীদি ঈশ্বরনা সোদোম অমদি মনাক নকপদা লৈবা গোমোরাগী সহরদা মৈ অমসুং গন্ধুপনা নোং ওইনা তাহন্দুনা লৈরিবা মীওই লোইনমক মাংহনখি। লোট অমসুং মহাক্কী মচানুপী অনি নান্থোকহৌই। অদুম ওইনমক লোটকী নুপীদি তুং হন্না য়েংলমখি। মদু মহাক্না হুন্দোক্লগা লাকখ্রবা পোৎ-চৈশিং অদুগীদমক খৌরাংবা পোকপদগী ওইরম্বা য়াই। হায়বা ইল্লুদবগী মরম্না মহাক পুন্সি মাংখি।

​—মৈহৌরোন ১১:১০–১৯:৩৮​দা য়ুম্ফম ওইবা।