Dhoholela dha mutugumano egumi ni mabasa ehu eekiristawu

Dhili muwari

•  Madhu oobajha 2

•  Dhoreela dha madhu a Mulugu 3-5

  •  Mwaha 3

  •  Dhoviteya dhomuzimuni: 4

  •  Wileriwa wa Bibiliya 5

•  Wilibihedhe mmabasani oolaleya 6-14

  •  Obajha othapanya 7

  •  Odideleve omukavihera mwanamurala anna efunelo 8

  •  Wahudhiha athu wi ekale anamahara 9

  •  Owogaga wodhela dhithu onarumedhiwe 10

  •  Mwaha 11

  •  Muselu 12

  •  Makalelo olaleya 13

  •  Makalelo olabihedha vidiyu ni malivuru 14

•  Mweddelo wehu wekiristawu 15-16

  •  Ohudhera wa Bibiliya wa mulogo 16

•  Madhu okuthula 17

•  Otamalela ni dholaga 18

•  Osugwa mudhidhi 19

•  Sumana ya muleddo 20

•  Sumana ya musonkano wa murudda obe wa malabo mararu 21

•  Sumana yowubuwela okwa wa Yesu 22

•  Namaholela a mutugumano Egumi ni Mabasa 23

•  Nameeddiha a mutugumano Egumi ni Mabasa 24

•  Namalaga oosugwera 25

•  Sala dhimodha 26

•  Vidiyu 27

1. Dhoholela ndha dhinere wakavihera aatene yaale enakanna dhipaddi va mutugumanoni Egumi ni Mabasa ehu Eekiristawu. Yahinegeredhe dhipaddi dhewa enohowela wileri dhoholela dhinafwanyeya muwari mwa Mwana Livuru na Mutugumano Egumi ni Mabasa ehu Eekiristawu ni ndha dhili musiddo muna. Ekongomedhiwe anamalaleya aatene, opeleka mandiniwa wihina ethomeliwege epaddi ya anamahudhera. Ale ehili anamalaleya enatugumana malabwene podi othomeliwa epaddi ya anamahudhera, akala enorumedha dhohudhiha dha mBibiliyani ni enowiwelela magano eekiristawu mwigumini mwewa. Namaholela a mutugumano Egumi ni Mabasa anohowela ohara dhoholela afunaga ompendda muthu ahili namalaleya mbwenye anafuna okanna epaddi yanamahudhera, nindo amwaddele akala onofwanelela obe naari. Eyo yeriwena namahudhiha aye agaalivo (obe makolo aye eli makiristawu). Dhoholela dha si dhimodhave anapenddiwana muthu anafuna okala namalaleya ohubaddiziwa.—od Musolo. 8 ddima  8.

 MADHU OOBAJHA

2. Mutala mmodha. Kadda sumana, jhibo ni nlobelo dhavira, nameeddiha a Mutugumano Egumi ni Mabasa awoge mwamakalelo enathukula murima dhithu dhinahudheriwe. Anohowela osoriha thomo dhinakavihere vanlubale mmulogoni.

  DHORELA DHA MADHU A MULUGU

  3. Mwaha: mutala 10. Mwana Livuru na Mutugumano Egumi ni Mabasa nnodhana musoloya ni thomo biili obe tharu dha mwahaya. Mwaha ola owogiwe nnamaholela mulogo obe mudhaari ookavihera ofwanelela. Sumana enabajha wileriwa livuru na mBibiliyani, enere wonihiwa vidiyu yofugulelana livuruna. Namawoga mwaha atapulele makalelo vidiyu eniwananiwa ni musoloya. Indo awoge thomo dhinafwanyeya muwari mwa Mwana Livuru na Mutugumano. Mudhidhi weenya, awoge fotu ni thomo dha Bibiliya dhili muwari mwa Mwana Livuru na Mutugumano, dhinakwaneliha muselu waatene. Namawogaya afuna podi olabihedha referensiya dhimodha mbwenye dhiniwanana ni thomo dha mwana livuru.

4. Dhoviteya Dhomuzimuni: mutala 10. kinna makalelo owambela ni ookuthula. Epaddi ela yeriwena nnamaholela mulogo obe mudhaari ookavihera ofwanelela. Oliye anohowela wera makoho aamenddene. Oliye podi osakula wileri versu dhaatedhene obe naari. Dhowakula dha addibila dhikalege dha mujhebo 30.

 5. Wileriwa wa Bibiliya: mutala 4. Epaddi ela sa namahudhera, ethomeliwege addibila baahi ohiya arogola. Nameeddiha a mutugumano aakavihere anamahudhera wileri pama, wileri wowoneleyamo, wileri wohiguguma, odhiviha thomodha, ohiyaniha, wimela vego vofwanelela, ni awogege ninga anawogeliye. Malabo mamodha versu dhimodha podi winjhiva bumwahaya namaholela a Mutugumano Egumi ni mabasa anohowela opendda akala muthuya anere wanda mowiwanana ni mwakalelo anileriye.

 WILIBIHEDHE MMABASANI OOLALEYA

6. Mutala 15. Epaddi ela ya mutugumano yegeredhiwe wihina yaxagihe anamaleya, ni yakavihere makalelwiwa oolaleya ni ohudhiha. Akala mmulogoni mwa kimo anamalaleya owakwana, anamaholela mulogo podi othomeliwa epaddi ela. Kadda namahudhera anohowela wileri ni oparidha mabasa buruxura ohudhiha obe wadhivela athu enafwanyeya omakuthulo wa epaddi athomeliwiye na Mwana Livuru na Mutugumano. Malabo mamodha enerege okalawo epaddi ya “mwaha wothapanyedha.” Epaddi ela yeriwegena nnamaholela mulogo obe nimudhaari ookavihera. —Osugwe  ddima 15 enawoga mwakalelo owoga “mwaha wothapanyedha.”

  7. Obajha othapanya: Epaddi ela athomeliwe namahudhera ali mulobwana obe muhiyana. Ethomeliwege alobwanave obe ahiyanave, podi okala avaade vimodhave. Aliwa podi okala owimelene obe okaratene.—Wihina onone dhithu dhimodha wodhela epaddi ela othomeliwiwe, osugwe  ddima 12 ni  13.

 8. Odideleve omukavihera mwanamurala anna efunelo: Epaddi ela athomeliwe namahudhera ali mulobwana obe muhiyana. Ethomeliwege alobwanave obe ahiyanave. (km 5/97 p. 2) Aliwa podi okala owimelene obe okaratene. Namahudhera onihe makalelo omuwogana muthu onihe efunelo labo nobajha.—Wihina onone dhithu dhimodha wodhela epaddi ela othomiliwiwe, osugwe  ddima 12 ni  13.

 9. Wahudhiha athu wi ekale anamahara: Epaddi ela athomeliwe namahudhera ali mulobwana obe muhiyana. Ethomeliwege alobwanave obe ahiyanave. (km 5/97 p. 2) Aliwa podi okala owimelene obe okaratene. Epaddi ela enoniha makalelo omuhudhiha muthu Bibiliya. Kinna makalelo owambela ni ookuthula. Mbwenye namahudhera athomeliwa yoxagiha enawoga thomo yeyo, podi werana. Naarive erumedhiwaga, kinahoweleya wileri ddima dhaatedhene ethomeliwiwa nindhu nootama.

 10. Owogaga wodhela dhithu onarumedhiwe: Epaddi ela akala mwaha, athomeliwe ddibila. Akala si demostrasawu podi othomeliwa murogola obe ddibila, Ethomeliwege alobwanave obe ahiyanave podi okala avaade vimodhave. Namahudhera anohowela wakula nikohona mowiwanana ni musoloya teto mwamakalelo apama. Alabihedhaga dhoholela anathomeliwiye. Namahudheraya dinathoma akala anere owoga referensiya vikumihiwe museluya obe naari.

 11. Mwaha: Epaddi ela athomeliwe namahudhera ali mulobwana ni yeriwena ninga eneriwana mwaha wavathaddo. Akala thomo ya mwahaya ekumihiwe va apendisi A va buruxura wadhivela athu, Namahudheraya onihe makalelo olabihedha dholebela dha mBibiliyani dhithomiwe mmalaleyelo. Motajhiha, oliye podi wonelihamo mudhidhi baani enahoweleya olabihedha yolebelaya, yotapulelaya ni makalelo opendda yolebelaya vamodha ni muthuya. Akala thomo ya mwahaya ekumihiwe va buruxura wadhivela athu, namahudhera anohowela wooniha makalelo oparihedha mabasa mmalaleyelo musoloya. Oliye podi owoga pontu 1 ele va musoloya obe yolebela si yolebela enafwanyeya va musoloya, akala enokavihera.

   12. Muselu: Muselu dhinafwanyeya vaddimani vala ni enaharela dhinowiwanana ni dhipaddi dhinathomeliwa anamahudhera ninga “ Obajha othapanya ” ni “Woonihe efunelo.” Akala kaawo yoholela emodha. Yoluba ya namahudheraya fuhudhiha ebaribari ya mBibiliyani enampatha muthuya anathapanyiyena wihina ande othapanya nuliye dila yanabili. Oliye podi othoma olabihedha obe naari buruxura obe vidiyu dhinafwanyeya mu kit yehu yohudhihana. Ohiya odidela owoga makalelo owambela othapanyawa, anamahudhera enohowela wixagiha makalelo ewa othapanya yonihaga dhikalelo ninga wapwatha athu ni owoga ninga enawogeliwa kadda labo.

   13. Makalelo olaleya: Namahudhera anohowela olabihedha epaddi athomeliwiye ni wisaddula mowiwanana ni makalelo dhineedda dhithudha vamuruddani. Motajhiha:

1.  (1) Olaleya nyumba ni nyumba: Makalelo ala olaleya enovolowelavo—olaleya nyumba ni nyumba, nitelefoni obe ni makarta—teto enovolowelavo wooniha efunelo wa kadda epaddi ndha tharu nsorihilihu dhinoniwe ninga olaleya nyumba ni nyumba.

2.  (2) Olaleya wogumanyedha: makalelo ala olaleya enonivaha ofuru wosaddula othapanya ninnihuna ni muthu wihina ekale makalelo omulaleya. Podi ovolowelavo owoga yolebela ya mbibiliyani ni muthu omabasani, oskola, neddaga vamuruddani vehu, nakala mukaroni obe mburo bu mburo venvo nnaparihu mabasa a kadda labo.

3.  (3) Olaleya wamurampani: makalelo ala olaleya enovolowela olaleya ni karinya, owoga naathu mmerkadu, mudila, oparki, mburo vinimela karo obe mburo bu mburo wikala athu.

 14. Makalelo olabihedha vidiyu ni malivuru: kadda namahudhiha podi othoma wooniha thomo ya vidiyu obe buruxura. Akala epaddi ya namahudhera ehikanna vidiyu obe athoma wooniha vidiyu podi owoga musoloya mbwenye karumihe mudhidhi eragana epaddaaye.

  MWEDDELO WEHU WEKIRISTAWU

15. Jhibo yavira, mutala 15 dhobajha, dhinalabihedhiwa epaddi modha obe biili wihina dhakavihere addibila waparihedha mabasa Madhu a Mulugu mwigumini mwewa. Yahikalawo ethu emodha, Dhipaddi dhabilidhene dhiwogiwe ni anamaholela mulogo obe adhaari ookavihera ofwanelela. Dhofuneya dha mmulogoni, dhiwogiwege ni anamaholela mulogo baahi. Akala epaddi modha ehikanna epaddi ya “mwaha wothapanyedha, ” namawoga mwahaya podi wawerena makoho mudhidhi bu mudhidhi awogaga mwahaye ohiya makoho ethomiwe. Oliye anohowela ofugulela mwaha yaye ni madhu vang’no wihina akanne mudhidhi wowoga thomo dhofuneya wihina athu enavuruwana mwahaya epurelemo. Akala mwahaya ohukanna yokohedha muthuya anakohedhiwe anohowela wakula agaali opaalkuni ohiya agaali mburo vinakaratiye.

  16. Ohudhera wa Bibiliya wa mulogo: Mutala 30. Ethomeliwege anamaholela mulogo ofwanelela. (Mulogo mwiyevile anamaholela podi othomeliwaga adhaari ookavihera oofwanelela, yakala yahoweleyaga). Nikuru nanamaholela mulogo nnowathoma addibila enafwanelela weddiha ohudhera wa Bibiliya wa mulogo. Addibila enasakuliwe, yeeddihege epaddiya pamadhene, egawe pama mudhidhi ni ewoge dholebela dhinna thomodha ni yakavihere addibila wonelamo makalelo oparihedha mabasa ndhe dhinahudheriwa mwigumini mwewa. Ale ethomiwe enere opurelamo yasugwa dhoholela enawoga makalelo oweddiha dhipaddi dhinna makoho ni dhowakula. (Namasugwera a Abril a 2023 ddima  24, kwaduru) Ddibila aneddiha ohudhera wa Bibiliya wa Mulogo amariha epaddaaye mbwenye woona wi ohuhala mudhidhi vang’ono kinahoweleya wenjhedhedha dhithu dhimodha wihina akwanihedhe mudhidhi onahalawo. Dhandeyaga podi olabihedhiwa addibila ohiyanahiyana ethomiwe ni anamileriya, akala nameeddiha a mutugumano Egumi ni Mabasa aloba wi ohudhera wule waguvihiwe, ddibila aneddiha epaddiya dinathome makaleloya owaguviha. Podi osakula ohiileri ddima dhaatedhene.

  MADHU OKUTHULA

17. Mutala 3. Nameeddiha a Mutugumano Egumi ni Mabasa avirisedhe thomo dha mutugumano. Awoge thomo dhinahudheriwe sumaneyo. Wahalawo mudhidhi podi wawoga mandina anamahudhera enna dhipaddi sumaneyo, Yahikalawo ethu emodha, nameeddiha mutugumano podi walabihedha madhu ookuthula wihina awoge dhovuwiha obe ileri karta. Mabasa amalabwene, ninga odhowa mmalaleyelo, oxela, kiwogiwege otiribuna, ebandihedhiwege va kwaduru ya dhovuwiha. Podi wera mutala miraru dha madhu ookuthula kadhinaakwana wileri makarta ni ovaha dhovuwiha dhiliwo, eyo yapadduwa nameeddiha a mutugumano podi waloba addibila enakanne epaddi ya Mweddelo Wehu Wekiristawu wihina evugule mudhidhiwa. (Osugwe  ddima 16 ni  19.) Mutugumano onakuthula ni jhibo vamodha ni nlobelo.

  OTAMALELA NI DHOLAGA

18. Namahudhera amala werana epaddaaye, nameeddiha a Mutugumano Egumi ni Mabasa anna mutala mmodha, wihina amutamalele ni anvahe dholaga dhili muwari mwa ohudhera athomeliwiye. Namahudhera ahinathi werana epaddaaye, nameeddiha a mutugumano kaaguvele owoga yoxagiha anapenddiwiye. Vano, namahudhera erana epaddaaye nameeddiha mutugumano amala omutamalela pamadhene, afuna podi osoriha yoxagiha ya namahudhera ole. Ni awoge akala namahudhera ohuhariha pama. Kaharihe pama, nuuriha amwaddele wihina onohowela ahogolowela dila biili wileri yohudhera athomeliwiye. Nameeddiha podi owoga thalo dhinamukavihere namahudhera obe dhinaakavihere anamavuruwana. Nameeddiha mwaha podi owoga dhithu dhimodha akala eyo enere omukavihera namahudheraya. Afuna, mutugumano wamala obe mudhidhi mmodha nameeddiha mutugumano podi onvaha dholaga dhimodha okwibi, dhiri mburuxurani wadhivela athu, ohudhiha obe dhiri mulivuruni Beneficie-se, podi okala yoxagiha yele obe emodhene.—Wafunaga wanonave mabasa mamodha a nameeddiha a Mutugumano Egumi ni Mabasa, obe mabasa a namalaga oosugwera, osugwe  ddima 19,  24, ni  25.

     OSUGWA MUDHIDHI

19. Dhipaddi dhaatedhene dhihilupege mudhidhi, eyo enovolowelavo ni epaddi ya nameeddiha Mutugumano Egumi ni Mabasa. Naarive kadda epaddi ya Mwaana Livuru na Mutugumano, egathomeliwe mudhidhi wewa akala ddibila kalabihedhe mudhidhi waatene athomeliwiye, kinahoweleya wenjhedhedha dhithu dhimodha wihina olabihedhe mudhidhi onahalawo. Ddibila alupiha mudhidhi avahiwe dholaga okwibi ni Nameeddiha Mutugumano Egumi ni Mabasa obe ni Namalaga oosugwera. (Osugwe  ddima 24 ni  25.) Mutugumano waatene, onabajha ni jhibo ni onakuthula ninlobelo dhikalege dha wora 1 ni mutala 45.

 SUMANA YA MULEDDO

20. Mulogo wakanna sumana yavayekiwa, mutugumano dheddege mowiwanana ni Mwana Livuru na Mutugumano Egumi ni Mabasa. Epaddi ya Ohudhera wa Bibiliya wamulogo winakale mwaha mabasa wa mutala 30 onaadhe nnameddela mulogo. Mwaha wa mabasa ohunawogiwe nameeddiha mutugumano arajhihe ovirisedha thomo dhihudheriwe ni wawoga mandina a addibila enakanne epaddi sumaneyo. Dhakalawo dhovuwiha avuwihe, nakalawo karta ileri. Amala amwithane nameeddela mulogo. Mwaha wamabasa wamala, nameeddela mulogo onokuthula mutugumano ni jhibo anathomiye. Oliye podi omuloba ddibila mmodha wihina erena nlobelo nookuthula. Sumana ya muleddo, kawo namahudhera anaakanne epaddi sala emodha. Teto sumana ya muleddo, nikuru podi werana mutugumano dhewa. Mbwenye wafiya mudhidhi wa mwaha wa mabasa aliwa enohowela otugumana vamodha ni mulogo.

 SUMANA YA MUSONKANO WA MURUDDA OBE WA MALABO MARARU

21. Sumana ya musonkano wa murudda obe wa malabo mararu, mutugumano kadhinakalewo. Kadda muthu ahudhere yeka obe ni emudhaye dhithu dhafuna ohudheriwa sumana yele.

 SUMANA YOWUBUWELA OKWA WA YESU

22. Labo nowubuwela okwa wa Yesu naliganyedha vaari vasumana, mutugumano Egumi ni Mabasa kadhinakalewo.

 NAMAHOLELA A MUTUGUMANO EGUMI NI MABASA

23. Nikuru na anamaholela mulogo emuthome namaholela mmodha wihina akale namaholela a Mutugumano Egumi ni Mabasa. Mutholwaye fusugwera pamadhene mutugumano ni woona akala dhoholela dhaatedhene dhinere ohariwa. Namaholela a mutugumano iwananege pamadhene ni namalaga oosugwera. Mwana Livuru na Mutugumano Egumi ni Mabasa nahalaga vang’ono wihina nimale namaholela a mutugumano Egumi ni Mabasa athome addibila enakanne dhipaddi mweri minddi dhinaharela. Eyo enovolowelavo wathomela anamahudhera ni anameeddiha a mutugumano dha vaari va sumana. (Osugwe  ddima 3-16 ni  24.) Athomelaga anamahudhera dhipaddi dhewa oliye onohowela wubuwela yaka enniwana ni dhithu enonniwa akala oliye anere wanda owoga nuuhova muselu ole athomeliwiye. Oliye podi ohariha dhoholela ndha afunaga wathomela amodhaya dhipaddi dha mutugumano. Kadda namahudhera aakelege epaddi athomeliwiye dhaahalaga sumana tharu. Designação para a Reunião Nossa Vida e Ministério Cristão (S-89) dhilabihedhiwege wihina elebiwegevo mandina anamahudhera enna dhipaddi. Namaholela a Mutugumano Egumi ni Mabasa anohowela opweha va kwaduruni ya dhovuwiha kopiya ya dhipaddi dhaatedhene dhithomeliwe addibila. Nikuru na anamaholela mulogo podi omuthoma namaholela mmodha obe mudhaari ookavihera wihina aakavihere. Mbwenye, anamaholela mulogo baahi binathomiwa wihina yathomelege anamahudhera obe addibila enakannege dhipaddi.

    NAMEEDDIHA A MUTUGUMANO EGUMI NI MABASA

24. Kadda sumana namaholela mulogo akalege nameeddiha a mutugumano Egumi ni Mabasa. (Mulogo mwiyevile anamaholela podi othomeliwaga adhaari ookavihera oofwanelela). Nameeddiha mutugumano awegeredhe madhu oobajha ni ookuthula. Oliyeneve dinawithana addibila enna dhipaddi, akala anamaholela a mulogo ehiyevamo oliyeya podi othomeliwa werana dhipaddi dhimodha dha mutugumano, thabwa-thabwa dhipaddi dhinahoowela wonihiwa vidiyu ehinna yoholela emodhaya. Dhowakula dha kadda epaddi dhikalege dhokwiva. Nikuru na anamaholela mulogo, binasakula anamaholela oofwanelela, enaathomiwege okala a nameeddiha mutugumano. Yamala osakuliwa yakakanihiwege kadda sumana. Mowiwanana ni kadda mulogo, namaholela a Mutugumano Egumi ni Mabasa, dineddiha dila dhowinjhiva wapitha anamaholela akwaye esakuliwe wi yeeddihege mutugumano. Anamaholela erumedhiwe ovahiwa epaddi ohudhera wa Bibiliya wa mulogo, podi wera enoofwanelela okala nameeddiha a mutugumano. Mbwenye mubuwele wi, ddibila aneeddihe mutugumano anohowela watamalela ni wavaha dholaga dhinahoweleya nuudhivela yaale enerana epaddi dha anamahudhera. Oliyeneve asugwe pama mudhidhi wihina mutugumano waatene ohulupe wora ya oweruwa. (Osugwe  ddima 17 ni  19.) Opalku wakala mburo, nameeddiha mutugumano oona wi enohoweleya, podi olabana mikorofoni mmodha owimelene wihina awithane addibila enna dhipaddi. Mudhidhi aawogaga, ddibila aneeddihe epaddaaye agwele otiribunawa. Nameeddiha mutugumano, podi okala okaratene opalukuni wafiya mudhidhi wa Wileriwa wa Bibiliya, ni epaddi yaatene ya Wilibihedhe Mmabasani Oolaleya. Eyo enere okavihera ohunonga mudhidhi.

   NAMALAGA OOSUGWERA

25. Dhandeyaga, epaddi ela athomeliwe namaholela mulogo anawoga pama mwaha dhaye. Yahoweleyaga omulaga ddibila, namalaga oosugwera avahege dholaga agaalivo ni muthu anamulagiye baahi, oliyeene dinaalaga anamaholela mulogo ni adhaari ookavihera akala kerilena pama epaddi si epaddi mmulogoni. Yahoweleyaga oliye dinaava dholaga adhaari ookavihera obe anamileri ni anamaholela mulogo yawoga mwaha wavathaddo, yamweddiha Namasugwera, yeeddiha ohudhera wa Bibiliya wa mulogo, yerana epaddi si epaddi ya Mutugumano Egumi ni Mabasa. (Osugwe  ddima 19.) Mmulogoni yakalamo anamaholela owinjhiva enawoga pamadhene mwaha dhavathaddo ni enahudhiha pama, kadda yaka podi wakakanaga mabasa ala. kinahoweleya onvaha dhoolaga kadda ddibila eeddiha epaddi athomeliwiye.

 SALA DHIMODHA

26. Anamahudhera yathabwa winjhiva, mulogo podi okunga sala dhimodha dha anamahudhera eneregiwana dhipaddidhiwa. Kadda sala akalegemo namasogolela owedha, mbwenye akalege namaholela mulogo. Yahikalawo anamaholela mulogo owinjhivene, mudhaari okavihera ofwanelela podi ovahiwa mabasa yala obe akala mabasaya enerege wakakanihiwa vasumanani. Nameeddiha a epaddi ela aharege dhoholela dhili  ddima 18. Anamahudhera yithaniwe ovolowa sala dhimodha epaddi Dhoviteya Dhomuzimuni yavira. Epaddi ela yanamahudhera yamala aatene ehogolowele mumburoni mwewa.

 VIDIYU

27. Kadda mutugumano dhinowonihiwa vidiyu dhisakuliwe. Vidiyu dha mutugumano dha vaari va sumana dhinafwanyeya mu JW Library^® ni podi wonihiwaga ni epano si epano.

© 2023 Watch Tower Bible and Tract Society of Pennsylvania

S-38-MYW 11/23