Karta Noobajha nlebiwe ni Juwawu 2:1-29
2 Anaaga, ginulebelani dhithu ndha wihina munaadhe mwerena yothega. Mbwenye muthu athega, nikanna namakavihera oli vamodha ni Ababa: Yesu Kiristu, muthu owogowa.*
2 Vano oliye mukutho wofwanelela olevelela dhoothega dhehu, ohiya dhoothega dhehu baahi, mbwenye dha elabo yaatene.
3 Mwaha wa yeyo nnere omunona: nadidela wawiwelela malamulo aye.
4 Yoole anawoga egihina: “Miyo gihimunona”, mbwenye kanawiwelela malamulo aye, muliba woota, teto ebaribari kili nuliye.
5 Mbwenye, akala muthu onowawiwelela madhu aye, mwebaribareene onowoniha wihina onomudhivela Mulugu. Mwaha wa yeyo nihinona wihina nili mwimodhani nuliye.
6 Muthu yoole anihina ali mwimodhani nuliye, adidele weedda ninga Yesu eddesiye.
7 Addibila ginuudhivelimini, malamulo ala ginuulebelimini kahiyo maxa, mbwenye bakale, yayo munninyuna obajha kale. Malamulo ayo akale, bi madhu mwawiwalinyu.
8 Mbwenye, vano ginna wulebelani malamulo maxa, eli eebaribari mwa oliye ni nyu, mwaha yiihi enna ovira, mbwenye waara webaribari winna omoneya.
9 Muthu yoole anawoga egi ali mowaara, mbwenye amwiiddaga ddibile, alive muyihini.
10 Muthu yoole anamudhivela ddibile alive mowaara, teto mwa oliye kawo ethu yokwakwathusa.
11 Mbwenye ole anamwidda ddibile ali muyihini, ni aneedda muyihini teto kanonne wego winayiye, mwaha yiihi ehimukunela wintoni.
12 Anaaga miyo ginowulebelani, mwaha dhothega dhenyu dhihileveleliwa wodhela ndina naaye.
13 Miyo ginowulebelani, Ababi, mwaha nyu muhunona wihina oliye abanjhe okalawo kale. Ginowulebelani azombwe, mwaha nyu muhumugonjhiha Mwiddani. Ginowulebelani anaaga, mwaha nyu muhumunona Baabi.
14 Miyo ginowulebelani Ababi, mwaha nyu muhunona wihina oliye abanjhe okalawo kale. Ginowulebelani azombwe, mwaha nyu muli akopolo, teto nyu kamunaaddiwala madhu a Mulugu ni muhumugonjhiha Mbure.
15 Kamudhivele elabo newene dhithu dha mwilaboni. Ole anadhivela elabo, odhivela wa Ababa kuli nuliye;
16 mwaha dhithu dhatedhene dhili mwilaboni — munigwa wa mwiili, munigwa wa mento ni withukulana dhokanna, kadhinadhela wa Baabi, mbwenye dhinadhela mwilaboni.
17 Ohiya eyo, elabo enna ovira ni dhofuna dhewa, mbwenye ole oneerana efunelo ya Mulugu anere okalawo ni mukalakala.
18 Anaaga, ola mudhidhi wogomihedha ninga mwiwalinyu wihina enere okumelela amwiddani a Kiristu, teto ehikumelela amwiddani owinjhiva. Mwaha wa yeyo nihinona wihina ola mudhidhi wogomihedha.
19 Aliwa ekumme vaari vehu, mbwenye kiyaali ehu, mwaha yahakale ehu kayanihiye. Mbwenye ekumme vaari vehu wihina yonihe wi kahiyo aatene eli ehu.
20 Vano nyu muthikitheliwa nuule ali oweela, teto nyu aatene muhunona.
21 Miyo kaginulebelani mwaha wi kamunonile ebaribari, mbwenye muhunona teto kayiwo yowoota enadhela mwibaribarini.
22 Muliba woota baani, kahiyo ole anakoodda wi Yesu di Kiristu? Mwiddani a Kiristu di yoyo, anamukoodda Baabi ni Mwaana.
23 Muthu yoole anamukodda Mwaana onamukoodda ni Babiya. Mbwenye amunonne Mwaana umunona ni Babiya.
24 Akala nyu, yeele mwiwalinyu omambelelowene mwahidduwale. Yeele mwiwalinyu omambelelowene mwahidduwala, munere okalave mwimodhani ni Mwaana vamodha ni Baabi.
25 Ohiya eyo, siyeyo mwinnyene Mulugu anapaganyiye: egumi yohimala.
26 Miyo ginowulebelani dhithu ndha mwaha athu enaxixa wuholosani.
27 Mbwenye nyu, othikitheliwa mwakenlinyu ni Mulugu okaleve ni nyu, ni kamunamuhowela muthu wihina uhudhiheni. Mbwenye othikitheliwa winadhela wa Mulugu, oli webaribari ni ohuli wowoota, onowuhudhihani dhithu dhatedhene. Mowindala ninga oliye uhudhihiyeni, mukaleve mwimodhani nuliye.
28 Vano nyu anaaga, mukaleve mwimodhani nuliye wihina oliye ooneyihiwa, nande owoga nuuliba murima teto nihivenyevo vamentoni vaye nigaathukunle manyazo, oliye adha.
29 Akala nyu muhunona wihina oliye dowogowa, eyo enatapulela wihina muhunona wi muthu yoole anerana dhithu dhowogowa * abaliwe nuliye.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “apama.”
^ Obe: “dapama.”
