Korintiyu oobajha 11:1-34
11 Mugitajhihege miyo, ninga ginamutajhihimi Kiristu.
2 Miyo ginowutamalelani mwaha nyu munogubuwela mwa dhatedhene teto munohara dholaga guwaddenlimini.
3 Mbwenye, ginafuna munone wi musolo wa alobwana aateene di Kiristu, vano musolo wa muhiyana di mulobwana teto musolo wa Kiristu di Mulugu.
4 Mulobwana analobela obe anavuhulela agawanre ethu-sithu mmuruni, anamuthukuliha manyazo ole ali musolo waye;
5 teto muhiyana analobela obe anavuhulela ahiwarile ethu mmuruni, anamuthukuliha manyazo ole ali musolo waye, mwaha anakala ninga muhiyana igile muguru.
6 Mbwenye, muhiyana aahiwara ethu mmuruni, onofwanelela wavugula mathithi aye; teto akala enomukaliha manyazo wavugula mathithaaye obe wiiga muguru onohowela amage murwaye.
7 Mowindo, mulobwana kanahowela omaga murwaye woona wi oliye nladdaniho ni nthithimiho na Mulugu, mbwenye muhiyana nthithimiho na mulobwana.
8 Mwaha mulobwana kadhele wa muhiyana, mbwenye muhiyana adheele wa mulobwana.
9 Ohiya eyo, mulobwana kapadduseliwe muhiyana mbwenye muhiyana dipadduseliwe mulobwana.
10 Bumwahaya, muhiyana onohowela okanna yintelelo mmuruni enatonyihedha owedha waye ni mwaha wa angero.
11 Mowindala, mwa Nabwiya muhiyana kanakalawo ahiliwo mulobwana teto mulobwana kanakalawo ahiliwo muhiyana.
12 Woona wi muhiyana adheele wa mulobwana, ni makalelo mamodhave mulobwana akalelewo wodhela muhiyana; mbwenye dhithu dhatedhene dhinadhela wa Mulugu.
13 Katorihani mwaannya: Enofwanelela muhiyana olobela wa Mulugu ahimagile muru?
14 Makalelo epaddusiwe athu, kinuhudhihani wi mulobwana akanna mathithi oolapa enoomuronya,
15 mbwenye, muhiyana akanna mathithi oolapa, nno thi nthithimiho naye? Mwaha mathithi avahiwe wihina ekuneelege murwaye.
16 Mowindo, akala ohukalawo muthu anafuna ovaanyiha, anone wi iyo ni mulogo dha Mulugu, kaninna yolaga emodhaya.
17 Mbwenye guvahagani dholaga ndha kaginutamalelani mwaha mwatugumana kamunatugumanela dhithu dhapama mbwenye dhabure.
18 Vobajhavene, gihiwa wihina mwatugumana ninga mulogo vinokala ogawanyeya vaari veenyu, teto ni miyoya ginorumedha eyo.
19 Mwebaribarene wineere okala ogawanyeya vikalelinyu wihina ooneye baani asakuliwe ni Mulugu.
20 Mwatugumana vikalelinyu wihina mujhe yoojha ya emahiyu ya Nabwiya, kamunerana ni nriho.
21 Mwaha wi mwaafunaga ojha yoojha ela, kadda muthu anarajhiha ojha yoojha yaye adhiliyena, mwaha wa yeyo athu amodha enakala oovoliwene mbwenye amodha enakala oolezelene.
22 Nyu kamunna mmavaade mwinyu wihina mujhegemo ni mung’wegemo? Obe munanyemula mulogo wa Mulugu mwawerihaga ale ehinna ethu okanna manyazo? Munafuna guwaddeleni ddi? Guutamaleleni? Akala siyeno miyo kaginutamaalelani.
23 Mwaha ethu gakenlimi wa Nabwiya siyeyo guwaddenlimini: wihina emahiyu Nabwiya Yesu aagulihiwiye, oliye othukula pawu,
24 vano, nuumala olobela, ogwaddanya ni wera: “Ela enatapulela mwiili waaga, ginafunimi opeleka mwaha weenyu. Mudidele werana ndala mugubuwelaga miyo.”
25 Vano aliwa nuumala ojha, oliye werana emodhave ni kopo ya vinyu, eraga: “Kopo ela ya vinyu enatapulela nipangano nixa mwaha wa nikame naaga. Mudidele werana ndala, mwag’waga, mugubuwelaga miyo.”
26 Mwaha dila dhatedhene munajhinyu pawu ni munang’winyu kopo ela, munavuwiha okwa wa Nabwiya, ofiyedha odha waye.
27 Mowindo, muthu yoole anaajhe pawu obe anang’we kopo ya Nabwiya wula ahifwanelele aneere okanna muladdu wodhela mwiili nnikame na Nabwiya.
28 Vobajhavene, enohoweleya muthuya ipendde ni oone akala onofwanelela, eera ndo podi ojha pawu ni ong’wa kopo.
29 Mwaha muthu yoole anajha ni anang’wa wula ahoonelagamo wihina dhithu ndha dhinatapulela mwiili wa Nabwiya, aniitoriha mwinnya.
30 Bumwahaya owinjhiva wa nyu kamunna kopolo ni muli aredda teto owinjhiva ehifiyedha okwa. *
31 Mbwenye nahere niipendda iyo naannya, kanaatorihiwe.
32 Mowindala, iyo naatorihiwaga ninna osumululiwa ni Yehova wihina nihitorihiwe vamodha ni elabo.
33 Bumwahaya addibila, mwatugumana wihina mujhe yoojha eyo, mujhehanege mmodha ni mukwaye.
34 Muthu avoliwa ajhe vaade vaye, wihina mwatugumana munatorihiwe. Mbwenye wodhela muselu dhimodha dhinahala, ginere owomihedha gafiya wengo.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Enaagiwana okwa epaddi yomuzimuni mwaha oyelela wandana wewa ni Yehova.
