Korintiyu oobajha 14:1-40
14 Musayelege odhivela, teto mudidele wilibihedha okanna gari dhomuzimuni, thabwa-thabwa gari yovuhulela.
2 Kawo muthu anoonelamo dhowoga dha muthu aakenle kopolo dha Mulugu wihina awogege dhiwogelo dhohiyana-hiyana, mbwenye Mulugu dinoonelamo. Naarive muthu yoyo awogaga dhoviteya dhotaleleya wodhela muzimu, kaawo muthu anoonelamo.
3 Mowindo muthu yoole anavuhulela onowakavihera, onowalibiha ni onowatodola athu ni madhu aye.
4 Ole anawoga ewogelo emodha oniilibiha mwinya, mbwenye ole anavuhulela onalibiha mulogo.
5 Miyo geere odhiveliwa nyu aatene mwahawogege dhiwogelo dhohiyana-hiyana, mbwenye ginoona wi sapama nvuhulelege. Mwaha sapama ovuhulela ohiya owoga dhiwogelo dhohiyana-hiyana, woona wi ahitapulela dhinawogiye mulogo kunaalibiheye.
6 Mbwenye addibila, miyo gahadhe guwaredhelani giwogaga dhiwogelo mwahinoneliinyumo, eyo yuukavihereni aavi? Mbwenye gafuna wukaviherani ginohowela olabihedha dhohudhiha gakenlimi ni Mulugu, enonelo, yovuhulela ni dhohudhiha.
7 Emodhave enapadduwa ni dhithu dhinaruma mbwenye dhihinna egumi, ninga palaza ni bangwe. Akala kinahiyanihiwa makalelo ewa orumihiwa, muthu anaanone aavi wihina eyo enoobiwa palaza obe bangwe?
8 Vano palaza yahobiwa pama, aniwegeredhe wihina adhowe okoddoni baani?
9 Nimakalelo mamodhave, mwawogaga madhu oorusa wawonelamo, baani anaawonelemo? Mwebaribarene, munawogela ebewene.
10 Naarive mwilaboni muwogiwaga dhiwogelo dhohiyana-hiyana, kadda muthu onowiwa ewogelo yaye.
11 Miyo gahawonelamo madhu enawogiwa ni muthu mmodha, ginakala munyawedda wa muthu yole anawoga teto ole anawoga anakala munyawedda wa miyo.
12 Ni nyunwa: woona wi munohowela vanlubale gari dhoomuzimuni, musayele okanna gari dhowinjhiva dhinaalibihe mulogo.
13 Mowindo, muthu yole anawoga ewogelo emodha, alobele wihina aande otapulela.
14 Mwaha, miyo gaalobelaga ni ewogelo emodha, gari yoomuzimuni ginnimina sinalobela, mbwenye mubuwelo waga kunapuravo ethu.
15 Ki enahoweleya ddi? Ginere olobela ni gari yoomuzimuni ginnimina, wula ni mubuwelwagaya wonelagamo. Ginere wiiba jhibo ni gari yoomuzimuni ginnimina wula ni mubuwelwagaya wonelagamo.
16 Nimakalelo mamodha, akala onomutamalela Mulugu wodhela gari ya muzimu wotxena, ki muthu ole ali vaari veenyu ni ahiniwa dhithu onawogiwe anaakule aavi “amem” wamala olobela, woona wihina kanonelamo dhithu owogiliwe?
17 Ebaribari wihina onna olobela mwamakalelo apama mbwenye muthu mmodhaya kanalibihiwa.
18 Ginomutamalela Mulugu mwaha ginowanda owoga dhiwogelo dhohiyana-hiyana wupithani nyu aatene.
19 Mmulogoni ginasakula wawoga madhu matanu ni enonelo yaga wihina gahudhihe athu ohiya wawoga madhu 10 000 athu ehinawoneliwamo.
20 Addibila, kamubuwelege ninga ahima, mbwenye ni dhithu dhabure mukalege ninga ahima teto mubuwelege ninga apogo.
21 Mwaha Malamulo enihina: “‘Ginere walabihedha athu enawoga dhiwogelo dhohiyana-hiyana ni oohinoneya wihina giwoge ni nlogo nna, naarive dhigaali ndo, nlogo nna kannagiwelele,’ anawoga di Yehova.”
22 Mowindo, owoga dhiwogelo kahi yintelelo yaathu enna nroromelo mbwenye oohukanna nroromelo, mbwenye ovuhulela kahi yintelelo yaathu ehinna nroromelo, mbwenye enna nroromelo.
23 Mowindo, mulogo waatene watugumana ni mwambela owoga dhiwogelo dhohiyana-hiyana vano enovolowamo athu ehinna enonelo ni ehinna nroromelo, kinawoge wihina nyu muli ataduwa?
24 Mbwenye aatene nyu mwavuhulelaga vano anovolowamo muthu ahinna enonelo obe ahinna nroromelo, oliye anere osumululiwa ni anere openddiwa pamadhene naathu aatene.
25 Dhoviteya dha mmurimani mwaaye dhinere woneya, indo anere okokorela vati ni anere omwebedha Mulugu egihina: “Mwebaribarene Mulugu ali ni nyu.”
26 Ki addibila, enahoweleya ddi? Mwatugumana, mmodha anowiiba, mmodha onohudhiha, mmodha onowoga dhithu aaddeliwiye ni Mulugu, mmodha onowoga dhiwogelo dhohiyana-hiyana teto mmodha onotapulela. Mbwenye mweregena dhithu ndha dhaatedhene wihina mulibihane mmodha ni mukwaye.
27 Akala ehikalawo amodha enawoga ewogelo emodha ewogege athu abiili obe araru, mbwenye ejhehanege, vano muthu mmodhaya atapulelege.
28 Mbwenye aahikalawo namatapulela oliye akale oomaleyene akala mmulogoni teto awogege mmurimani mwaaye oliye ni Mulugu.
29 Ewogege anamavuhulela abiili obe araru, vano amodha ependdege yotapulelaya.
30 Mbwenye namavuhulela mmodha aaddeliwa madhu enadhela wa Mulugu agakaratile vevale, ole awoga amaale.
31 Mwaha aatene nyu podi ovuhulela, mbwenye mujhehanege, wihina aatene muhudhere ni mulibihiwe.
32 Teto anamavuhulela esugwerege makalelo enalabihedhiwa gari yewa yoomuzimuni.
33 Mwaha Mulugu kahi Mulugu oodawa, mbwenye a murenddele.
Ninga mukalele mulogo dhaatedhene dhaathu oweela,
34 mmulogoni ahiyana ekalege oomaalene, kinenyiwa owoga. Mbwenye, ninga nnawoga Nlamulo, ekale owiwelela.
35 Mbwenye aliwa yafuna ohudhera ethu, emukohege mamuniwa vade vewa, mwaha ethu yamanyazo muhiyana owoga mmulogoni.
36 Nerege madhu a Mulugu edheele wa nyu? Ki madhu ala yufwannyeni nyu baahi?
37 Akala ohukalawo muthu anoona wihina namavuhulela obe ohukanna gari yoomuzimuni, anohowela onona wihina dhithu ndha ginuulebelimini nlamulo na Nabwiya.
38 Mbwenye muthu apwaza dhithu ndha nuliyeya anere opwaziwa.
39 Mowindala addibila, mudidele olaba nuviheya wihina nvuhulelege, teto kammukoddihe muthu owoga dhiwogelo dhohiyana-iyana.
40 Mbwenye, dhithu dhaatedhene dheddege ni makalelo apama ni dhowegeredheyadhene.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
