Korintiyu oobajha 16:1-24
16 Wodhela dhovelela munafuninyu wavaha oweela, muharege dhoholela givahilimi mulogo dhooGalasiya.
2 Omabajho wa kadda sumana, kadda muthu wa nyu apwehege ethu-siithu nikukuru, mowiwanana ni ndhe anniyena, wihina dhoveleladha dhiheriwena miyo ngafiyile.
3 Mbwenye miyo gafiya wengo, ginere waruma oJeruzale alobwana muwogilinyu wi nnowaroromela ninga mulebilinyu vakartani, wihina yathukule korowa ndho mpelekinyu ni murima weenyu wamutene.
4 Teto, yahoweleyaga wihina ndhowewo vamodha, ginere odhowa naaliwa.
5 Mbwenye, ginodha guwaredheleni gaakumaga oMasedoniya, woona wi ginaya oMasedoniya;
6 teto podi wera ginere okala mudhidhi wowinjhivene ni nyu, ofiyedha ovira mudhidhi woridha, mwamala munere ogivelela vang’ono dila ginayelimi.
7 Mwaha kaginafuna wuwoonani giviraga baahi; mbwenye, Yehova afuna ginere okala mudhidhi wowinjhivene ni nyu.
8 Mbwenye ovanene, ginaroma okala oEfezu wuno, ofiyedha Muthupo wa Pentekoste,
9 mwaha gihifuguleliwa musiwo munlubale wa mabasa a Nabwiya, mbwenye amwiddani eli gwe.
10 Timotiyu afiya wengo, mmwakele pama wihina oliye ahovege ethu-siithu, mwaha anaapara mabasa a Yehova ndala ninga miyo.
11 Mowindo, ahikalewo muthu anafuna ompwaza. Mmuholele ni murenddele mulenddoni mwaye, wihina oliye adhe agumane ni miyo mwaha miyo vamodha naaddibila ninna omujheha.
12 Vano wodhela ddibilihu Apolu, gihimuloba ni ntidi wihina adhe uwaredheleni nyu vamodha ni addibila. Oliye kanande odha wengo ovanene mbwenye akanna mudhidhi anere odha.
13 Mukale mento, mwiimele txithi munroromeloni, mulibe murima ni mukale akopolo.
14 Mweregena dhaatedhene nuudhivela.
15 Ginafuna gukongomedheni addibila: nyu muhunona wihina emudhi ya Estefana sili dhowiima dhoobajha dho Akaya teto aliwa ehiipeleka wihina yaalabelege oweela.
16 Ni nyuwa mwawiwelelege athu ninga aliwa ni aatene enalaba vamodha nuuviheya.
17 Mbwenye miyo ginohagalala ni Estefana, Fortunatu ni Akayiku eli wuno vamodha ni miyo, mwaha eli vamburoni veenyu.
18 Mwaha aliwa ehihagalasa vanlubale murima waaga ni weenyu. Bumwahaya mwavahege thima alobwana ninga yala.
19 Mulogo dho Aziya dhinowaruma malojhelo. Akila ni Priska, vamodha ni mulogo onatugumana vaade vewa, enowaaruma malojhelo ni murima weewa wamutene mwa Nabwiya.
20 Addibila aatene enowaaruma malojhelo. Mulojhelanege mmodha nimukwaye ni beju yoweela.
21 Vano mwawakele malojhelo aaga, miyo Pawulo, gaalebilimi ni madaaga.
22 Muthu ahimudhivelaga Nabwiya, uulumeliwe. Nabwiya, kamwerena, mudhe!
23 Opama wohinifwanelela wa Nabwiya Yesu, okale ni nyu.
24 Odhivela waaga oli mwimodhani ni Kiristu Yesu, okale ni nyu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
