Korintiyu oobajha 7:1-40
7 Vano wodhela dhithu mulebilinyu, sapama mulobwana ohumuliga * muhiyana;
2 mbwenye, woona wihina wihithabwa okala mararuwo, sapama kadda mulobwana okanna mwariye, teto kadda muhiyana okanna mamune.
3 Mulobwana ootela anvahege mwariye yele anahoweliye teto muhiyana ooteliwa eregena emodhave ni mamune.
4 Muhiyana ooteliwa kanna ofuru wolamulela mwiili waye mbwenye mamune dinna ofuru wolamulela; ni makalelo mamodhave, mulobwana ootela kanna ofuru wolamulela mwiili waye mbwenye mwariye dinna ofuru wolamulela.
5 Kamukooddanege mmodha ni mukwaye, mbwenye akala mulobwana ni mwariye ehiwanana ohugonihana muwari mwa mudhidhi epanganiwa teto wula elobelaga, eyo sapama. Yindo, aliwa enere ohogolowela ogonihana wihina Saddana anaadhe aweehe mwaha woohanda ovilela.
6 Mowindo, dhithu giwogilimi mundduli nyu podi werana, mbwenye kahiyo nlamulo.
7 Geere odhiveliwa athu aateene yahakale ninga miyo. Mbwenye kadda muthu ohukanna gari yaye avahiwiye ni Mulugu, bumwahaya amodha enootela mbwenye amodhaya enosakula okala addiye.
8 Vano ginawoga naale ehitenle obe ehiteliwe ni amaamukwele wihina sapama okala ndo ninga miyo.
9 Mbwenye, mwahandaga ovilela, podi otela obe oteliwa, mwaha sapama otela obe oteliwa, ohiya owanagana ethakwithakwi yogonihana.
10 Waathu yaale etenle, ginowavaha yolaga ela, ohiya miyo, mbwenye Nabwiya dinawoga wihina muhiyana ateliwe ahimwalane ni mamune.
11 Mbwenye oliye amwalana ni mamune, akale ndo ahiteliwe obe etxokotxele muladduya ni mamune, teto mulobwana ahimwalane ni mwariye.
12 Mbwenye waathu amodhaya miyo ginowoga gegi, ohiya Nabwiya. Akala ddibila ohukanna mwariye ahili mukiristawu teto akala muhiyanaya onofuna okala ni mamune, oliye kamuhiye mwariye;
13 emodhave, muhiyana akala ohukanna mamune ahili mukiristawu, vano mamuneya onofunave okala nuliye, ahimuhiye mamune.
14 Mwaha mamune oyo ahili mukiristawu ohutxenihiwa wodhela mwariye, emodhave, mwariye ahili mukiristawu ohutxenihiwa mwaha wa ddibila yoyo; yahere yahikala yeyo anaayeya yakale ootakala mbwenye vano boweela.
15 Mowindala muthuya ahili mukiristawu athoma omwihiya, amwihiye; mwaha ddibila obe murogola oyo, kanawaddihedhiwa okala ni mulobwana obe ni muhiyana ahili mukiristawu, mwaha Mulugu anafuna wi nikanne murenddele.
16 Muhiyana ooteliwa ononne addi wi kunanvuluse mamuno? Mulobwana ootela ononne addi wi kunanvuluse mwariyo?
17 Mowindala, kadda muthu eddelege yeele avahiwiye ni Yehova, mowiwanana ni makalelo ithaniwiye ni Mulugu. Nlamulo nna ginavaha mulogo dhatedhene.
18 Akala ali mukiristawu wula agamanle wineliwa? Akale ndo. Akala ali mukiristawu wula ahinineliwe? Nuliyeya akale ndo.
19 Wineliwa* kawinatapulela ethu teto ohiineliwa kawinatapulela ethu; mbwenye yathimaya fuwawiwelela malamulo a Mulugu.
20 Kadda muthu akale ndo ninga ithaniwiye.
21 We withaniwe ogaali mudhaari? Kuthuwathuwe, mbwenye akala ohukanna ofuru wowoobowa opathe ofuru yoyo.
22 Mwaha muthu yoole ithaniwe wa Nabwiya agaali mudhaari uhoobowa vano da Nabwiya; ni makalelo mamodhave, ole aali owoobowa ithaniwaga vano mudhaari a Kiristu.
23 Nyu muhuguliwa ni muthengo munlubale; bumwahaya muhiye okala adhaari aathu.
24 Addibila, kadda muthu adidele okala vamentoni va Mulugu mwa makalelo ithaniwiiye.
25 Vano wodhela ale ehinagonege ni mulobwana obe ni muhiyana, kaginna nlamulo nnadhela wa Nabwiya, mbwenye ginovaha mubuwelo waaga ninga muthu oororomeleya wodhela thagaraga dha Nabwiya.
26 Mowindo, ginoona wi sapama muthu okalave ndo ninga aliye mwaha wa makathamiho a peeno.
27 We ohutela? Kusayelege omwalana. We kutenle? Kumusayelege muhiyana.
28 Mbwenye, naarive otele, kutheegile. Teto akala muthu kanagonege ni mulobwana obe ni muhiyana, vano anootela obe anooteliwa, katheegile. Mowindo ale enafuna otelana, enere okanna makathamiho mwigumini mwewa. Mbwenye miyo ginafuna guuvuguleleni makathamiho ayo.
29 Ohiya eyo, ginowuwaddelani addibila: mudhidhi ohanlewo kahi munene. Bumwahaya, obajha peeno odhowa osogolo ale etenle ekalege ninga kitenle;
30 ale enunla ekalege ninga kinunla, teto ale enahagalala ekalege ninga kinahagalala; ale enagula dhithu ekalege ninga kinna ethu;
31 teto ale enalabihedha elabo, ekalege ninga kinalabihedha mowakwana. Mwaha elabo ela enna osadduwa.
32 Mwebaribarene ginafuna wihina muhuthabwege othuwathuwa. Mulobwana ahitenle anathuwa-thuwela dhithu dha Nabwiya ni makalelo anafuniye omuhagalasa Nabwiya.
33 Mbwenye, mulobwana ootela anathuwathuwela dhithu dha mwilaboni, ni makalelo oomuhagalasa mwariye,
34 ni ohugaweya. Mbwenye muhiyana ahiteliwe ni ole ahinagonege ni mulobwana anathuwathuwela dhithu dha Nabwiya, wihina akale oweela epaddi yomwiilini ni yomuzimuni. Mbwenye muhiyana ooteliwa anathuwathuwela dhithu dha mwilaboni, ni makalelo oomuhagalasa mamune.
35 Ginawogela ndo mwaha opama weenyu, kaginowukadelihani, mbwenye ginafuna gukavihereni werana ele eli yapama ni wihina mudhowegeve mmulabelaga Nabwiya muhunna ethu yowunyonyani.
36 Muthu oona wi kananda okala muddiye, teto akala kananda osugwera munigwa waye wogonihana ni oona wi ohunnuwa, oliye podi werana ele anafuniye; kanatheega. Muthu oyo podi otela.
37 Mowindo, akala muthu ohuthoma mmurimani mwaaye ni kanafuna otela teto aandaga osugwera munigwa waye wogonihana ni ohuthoma ni murimaye wamutene wihina ahitele, oherana pama.
38 Teto ole anatela obe anateliwa oherana pama, mbwenye ole ahinaatele obe ahinaateliwe onothabwa werana pama.
39 Muhiyana ooteliwa ohumageya mudhidhi waamuteene mamune aliye mento. Mbwenye mamune akwa, ohutapuwa, podi oteliwa ni muthu ananfuniye, mbwenye ateliwe mwa nabwiya.
40 Mubuwelo waaga, ginoona wi adidela okala ndo ninga aliye aneere ohagalala; teto gihikanna ebaribari wihina muzimu wa Mulugu oli ni miyo.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Ni madhu mamodha: “ohumutela obe ohumugoniha.”
^ Obe: “ogwaddiwa nthuba.”
