Korintiyu oobajha 9:1-27
9 Miyo kaginna ofuru wowerana ethu ginafunimi? Kagili murumiwi? Kagimoonile Yesu Nabwiya ehu? Nyu kamuli mabasa aaga ginamparelimi Nabwiya?
2 Naarive miyo gihili murumiwi aathu amodha, mwebaribarene gili murumiwi vaari veenyu! Mwaha nyu muli etonyihedho enooniha wi miyo gili murumiwi a Nabwiya.
3 Wibarela waaga wodhela ale enaganganyedha fuwula:
4 Gerege kaninna ofuru woojha ni wong’wa?
5 Gerege kaninna ofuru womutela murogola amunroromeloni wihina anivelelege mulenddoni ninga enerana anamahara amodha vamodha ni Sefaji?
6 Obe miyo ni Barnabe baahi dinna ofuru wowahiya mabasa a mwilaboni wihina nandege wijhiha?
7 Ohukala muthu anaapara mabasa oonyakoddo wula igulelaga yeka dhithu anahoweliye? Baani anaala muthanko dha uva wula ahijhaga dhowimadha? Baani anaakukula mambila wula ahing’waga mukaka wa mambilaya?
8 Gerege ginawoga dhithu ndha ni moonelo wemuthu? Teto malamulo kinawoga dhithu ndha?
9 Mwaha malamulo a Moyizeji enawoga yegihina: “Kumage mulomo wa ng’ombe wula ethikithaga bewu.” Eyo enatapulela wi Mulugu anathuwathuwela ng’ombe?
10 Oliye kaawogile madhu ala mwaha wa iyo? Mwebaribarene, eyo elebiwe mwaha wehu woona wi muthu analima ni ole anathikitha bewu enaapara mabasa ala ejheehaga wakela epaddi yewa.
11 Akala iyo naalile dhithu dhomuzimuni vaari veenyu, kannafwanelela okaviheriwa ni dhithu dheenyu dhoomwilini?
12 Akala athu amodha enofwanelela okaviheriwa ni nyu, ki iyo kahi dithabwile ofwanelela okaviheriwa ni nyu? Naarive dhigaali ndo, iyo kannalabihedha ofuru oyo, mbwenye nnovilela mwa dhaatedhene wihina muthenga dhapama wodhela Kiristu dhihikale nibwe nookwakwathusa.
13 Nyu kamunonne wihina athu enaapara mabasa ootaleleya enajha dhithu dha mutempulu, teto ale enaapara mabasa mudhidhi waamuteene waltareni enovahiwamo vang’ono dhithu dhinavahiwa waltareni?
14 Ni makalelo mamodhave, Nabwiya ohuwoga wi ale enalaleya muthenga dhapama yisamalelege wodhela muthenga dhapama.
15 Mbwenye kahiyo wihina miyo ginowerana dhithu ndha. Teto kagilebele wi mugerelege dhithu ndha, mwaha yere okala yapama okwa ohiya . . . Miyo kaginarumedha oyelela ofuru ginnimina wolaleya muthenga dhapama gihinkedhiwaga!
16 Akala miyo ginolaleya muthenga dhapama, kahiyo wihina ginowithukula mbwenye mwaha bi mabasa githomeliwimi. Mwebaribarene, odduru bwaaga gakoodda olaleya muthenga dhapama.
17 Teto akala miyo ginaapara mabasa ala ni murimaaga waamuteene gihikanna yowakela; mbwenye naarive gihapare ni murimaga waateene gineerege waparave mwaha mutholo givahiwimi.
18 Ki yowakela yaaga siivi? Yowakela yaaga fulaleya muthenga dhapama ebewene. Ni makalelo yaala kaginahowela oloba dhithu ginnimina ofuru wooloba wihina gilaleye muthenga dhapama.
19 Mbwenye, naarive nganna ofuru wowerana ethu-siithu vaari vaathu aateene, miyo gihiikaliha mudhaari aathu aateene, wihina dhandeya gaakavihere athu owinjhiva.
20 Gakala ni majudewu, gineedda ninga mujudewu, wihina gaakavihere majudewu. Gakala naathu enaakoya malamulo, * gineedda ninga muthu anaakoya malamulo, wihina gaakavihere athu enaakoya malamulo, naari nganonne wihina kaginaakoya malamulo.
21 Gakala naathu ehinna malamulo, gineedda ninga muthu ahinna malamulo, wihina gaakavihere athu ehinna malamulo, naari nganonne wihina ginowawiwelela malamulo a Mulugu ni ginowaakoya malamulo a Kiristu.
22 Gakala naathu ookwerebeya, gineedda ninga muthu ookwerebeya, wihina gaakavihere athu ookwerebeya. Gihilawiha mweeddelo waathu aateene, wihina dhakala dhoowedheya gaakavihere ovuluwa athu angasi-angasi.
23 Mbwenye ginerana dhithu ndha, mwaha wa muthenga dhapama, wihina gaafihedhe athu amodha.
24 Nyu kamunonne wihina vamapokani oothamaga, anamathamaga aatene enothamaga, mbwenye mmodha baahi dinamwakela padamari? Mowindala, muthamage nuuviheya wihina mmwakele.
25 Vaari vothamaga, anamathamaga aatene enowivanyiha mwa dhatedhene. Ebaribari, aliwa enowilibihedha wihina yakele kara enanongeya mbwenye yehu kinanongeya.
26 Mowindala, kaginathamaga bure-bure, kaginavonya gihonagawo, ginathawa ovudula.
27 Teto ginowoniha goyi mwiili waga ni ginoweddiha ninga mudhaari mwaha gaherana ndo ginere okoddiwa ni Mulugu naarive ngamanle walaleya athu owinjhiva.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Malamulo ala ba Moyizeji.
