Korintiyu anabiili 10:1-18
10 Miyo Pawulo ginowulobani nuwiyeviha vamodha ni opama wa Kiristu, mbwenye athu amodha enagoona ninga muthu owiyeviha gakala ni nyu ni owumma murima gakala wolapela ni nyu.
2 Ginaloba wihina gadha wengo gaafwanye athu yayo enubuwela wihina nneeddela dhithu dhoomwilini egaamanle osaddula egumiwa, wihina yahigithukulele wasinyusa mwamakalelo abure ninga ginuubuwelimi wawerana.
3 Mwaha, naarive nikalagawo mowiwanana ni mwiili, kannawana koddo mowiwanana ni ekalelo yehu yomwilini.
4 Mwaha futhi nnawanihuna koddo yehu kahiyo dhomwiilini, mbwenye kopolo dhinadhela wa Mulugu, bumwahaya dhinowedha obwanyula dhithu dhooliba.
5 Ni makalelo yala nnowanda ogujhula mubuwelo ni dhithu dhaatedhene dhinaabarela athu omunona Mulugu, teto ninna othukulela mubuwelo dhaatedhene mukambura * wihina dhimwiwelelege Kiristu;
6 ni nili owiwegeredhene wihina naasinyuse athu aatene ehiniwelela, ofiyedha nyu aatene okala owiwelela mwa dhaatedhene.
7 Nyu munatoriha dhithudha mowiwanana niile munooninyu odeve wule. Akala muthu ohukanna ebaribari mmurimani mwaaye wihina namahara a Kiristu, arajhihe wubuwela ebaribari ela: mowindala ninga oliye aliye a Kiristu ni iyoya nili anamahara a Kiristu.
8 Mowindo, naarive miyo gahere githabwaga withukula mwaha wa mutholo Nabwiya anivahiliye wihina nuulibiheni ohiya wugujhulani, miyo kagakanne manyazo.
9 Mbwenye, miyo kaginafuna wihina mubuwelege wi makarta aaga ginafuna guuthusenani.
10 Mwaha aliwa enoowoga yegi: “Makarta aye enoowoga dhithu dhoofuneya ni ehikanna kopolo, mbwenye oliyeya akala wuno kanoopiha, teto madhu aye kinadahinya murima.”
11 Athu yayo enawoga ndo, enone wihina dhithu dhinawogihu mukartani nigaali wolapela ni nyu, sidhendho nnafunihu werana nadha wengo.
12 Iyo kannafuna oligana naliwa eli athu owithukula. Mbwenye aliwa enowitoriha annya niile enooniwa wihina sapama, ni makalelo yaala enowoneya wi kinna enonelo.
13 Iyo kanniithukula ni mabasa nahithomeliwihu wihina naaparege, mbwenye nniithukula baahi ni mabasa nthomeliwihu ni Mulugu, teto ni nyuwa munookosa epaddi.
14 Mwebaribarene, iyo nigaali vamodha ni nyu, kanerilena ethu nahathomeliwihu ni Mulugu, mbwenye naali oobajha wulaleyani muthenga dhapama wodhela Kiristu.
15 Iyo kannithukula ofiyedha walupa manddile nipimeliwihu, enatapulela wihina kannithukula ni mabasa aathu amodha. Mbwenye nnoojheha wihina nroromelo nenyu nenjhedhedheyaga mabasa ehu enerege wenjhedhedheya muwari mwa murudda wehu. Mowindala mabasa nnaparihu nnerege odhowa nawenjhedhedhagave,
16 wihina nilaleye muthenga dhapama murudda dhimodha dholapela ni murudda weenyu, mowindala nahiithukulege ni mabasa epariwe naathu amodha murudda dhimanliwa othomeliwa.
17 “Mbwenye ole anithukulela, ithukulege mwaha wa Yehova.”
18 Mwaha Yehova anamurumedha muthu anamuthomiye, mbwenye ole aniithoma yeka oliye kanamurumedha.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Mukadeya.”
