Korintiyu anabiili 12:1-21
12 Ginohowela withukula. Naarive gahipuragavo ethu, mbwenye kaginapwatha, ginere owoga wodhela dhowoona dhotikiniha ni dhithu gaaddeliwimi Nnabwiya.
2 Gihimunona mulobwana dhaala ali mwimodhani ni Kiristu muwari mwa yaka 14. Oliye ahithukuleliwa odhulu wanatharu, peeno akala adhowile epaddi yomwiilini obe epaddi yoode, miyo kaginonne, mbwenye Mulugu dinonne.
3 Hee, gihimunona mulobwana oyo, mbwenye kaginonne akala adhowile epaddi yomwilini obe epaddi yoode, Mulugu dinonne
4 oliye ohuthukuleliwa mparayizu ni wawiwa madhu ehinandeya wawoga ni enakoddihiwa muthu wawoga.
5 Miyo gineere withukula mwaha wa muthu yoyo, mbwenye kaginithukule mwaha waaga, ehili wa ndhe gihinandimi werana.
6 Mwaha naarive gahafunege withukula, miyo kagaakale taduwa, mwaha gawogege ebaribari. Mbwenye ginorabela werana ndo githawaga othetheliwa ni dhithu enagooniwana obe enagiwiwana,
7 mwaha wi ginowakela dhowoona ndha dhootikiniha. Mowindala, wihina gihithabwesese withukula gihivahiwa mwinga mmwiilini, mungero a Saddana anaguukutha kadda labo, wihina gihithabwege withukula.
8 Gihimbebedha Nabwiya dila tharu gimulobaga wihina agaangule.
9 Mbwenye oliye ogaakula: “Opama waaga wohifwanelela guvahilimi ohuwakwana, mwaha kopolo dhaaga dhinna wukavihera muukwerebeyani mwawo.” Akala dhili ndo, ginere ohagalala mwaha okwerebeya waaga, wihina kopolo dha Kiristu dhikaleve mwimodhani ni miyo ninga musasa. *
10 Mowindala wodhela Kiristu, okwerebeya waaga winogihagalasa, ginohagalala garuwaniwaga, gaharahariwaga, gahikanna ethu ni gaafwanyiwaga makathamiho. Mwaha gakwerebeya finakannimina kopolo.
11 Peeno gili taduwa mwaha weenyu. Di nyu mugiwaddihedhe okala ndala, mwaha mwahere mugiwogaga nuupama miyo kagawogege ndala, woona wi kagili mung’onoya vaari vaarumiwi eenyu eniwoona ninga bathimaya.
12 Mwebaribarene, miyo ohiya waweranave matikiniho, dhintelelo ni mabasa akopolo, gihuwonihani dhintelelo dhatedhene dhinatonyihedha wi miyo gili murumiwi.
13 Ethu yuthukuleleni oyeva ofiyedha ohiyana ni mulogo dhimodha, sowihina miyo kagaali mutholo wonyemela. Ndala, gerege gihithega? Akala gihithega gileveleleni.
14 Kasugwani, ela dila yanatharu ginafunimi odha wuwaredhelani, teto gafiya wengo kaginaakale mutholo wonyemela. Miyo kaginasayela dhithu munninyuna mbwenye ginuusayelani nyu; mwaha abaabi kinajheeha wihina aniiwa yakoyelege dhoorela makolo ewa mbwenye abaabi binaakoyela aniiwa dhoorela.
15 Wa miyo, ni murimaaga waatene ginere olabihedha dhokanna dhaaga ni egumi yaaga yatene mwaha wa nyu. Akala miyo ginowudhivelani vanlubale, miyo difwanelele wi mugidhivelege vang’ono?
16 Ni makalelo yaala, miyo kaginaakale mutholo wonyemela. Mbwenye naarive dhigali ndo, athu amodha enihina “gihuxagelani” ni gidhiile ni “malango”.
17 Gerege, gihujhelani ethu wodheela athu ale gaarumilimi?
18 Gihimukongomedha Titu ni gihimuruma nddibila mmodha wihina edhe yuwaredheleni. Gerege Titu ohuujhelani ethu? Obe muzimu ninnihuna kahiyo mmodhave ni kannahara dila emodhave?
19 Mudhidhi waatene ola ovirile, mubuwela wihina neera wibarela vamentoni veenyu? Iyo nnawoga vamentoni va Mulugu mowiwanana ni Kiristu. Mbwenye addibila, dhaatedhene nnerihuna nnafuna nulibiheni.
20 Bumwahaya, ginowanganyedha wihina gadha wengo, podi weera kaginuufwanyeni ninga gajhehedhimi teto miyo gahikale ninga mwajhehedhinyu, mbwenye ohiya eyo, ginuufwanyeni mukanganaga, mukalelanaga nrima, mugaamanle wiiddana, muhiwananaga, mwaabanaga, munong’onaga, dhithu dhinooniha wiithukula ni ohiiwanana.
21 Podi weera gahogolowa olenddooyo, Mulugu aaga aneere ogitota manyazo vamentoni veenyu ofiyedha miyo wawunlela athu owinjhiva etheegile kale, mwaha wohutwaruwa wodhela werana dhithu dhootakala, wawerana mararuwo ni mweddelo wonyakavala yanniwana.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “Ddammwa.”
