Korintiyu anabiili 13:1-14
13 Ola olenddo wanatharu ginadhimi wuwaredhelani. “Muladdu waateene onanoneya ebaribariya akala ehikalavo anamoona abiili obe araru.”
2 Naarive peeno ngaali wolapela ni nyu, enakala ninga gilive vamodha ni nyu dila yanabili, teto ginowawaddela mutaneene gihinafiye ale etheegile kale ni athu amodhaya wihina labo ginafunimi odha wengo ginere wasinyusa aateene,
3 woona wihina nyu munafuna mukanne ebaribari wi Kiristu kanuweddihani ninga muthu oolodhowa, mbwenye dakopolo vaari veenyu ni onowoga agilabihedhaga miyo.
4 Mwebaribarene, oliye ohupiwa vantxikwani na goyi ninga muthu oolodhowa, mbwenye peeno ohukanna egumi mwaha wa kopolo dha Mulugu. Ebaribarene iyo nnooniwa ninga athu oolodhowa vamodha nuliye, mbwenye nihikanna egumi vamodha nuliye mwaha wa kopolo dha Mulugu dhili ni nyu.
5 Mudidele wipendda akala muli oolibeene munroromeloni; mudidele wipendda wi moone emuthu yenyu. Kamunonne wi Yesu Kiristu ali mwimodhani ni nyu? Yere okala yapama onona, akala kamukooddiwe.
6 Miyo ginojhehedha wi mukanne ebaribari wihina kanikooddiwe.
7 Nnolobela wa Mulugu wihina mwaherena ethu yabure, kannerana eyo wihina nikalege ninga neere orumeedhiwa, mbwenye nnerana eyo wihina mweregena dhithu dhapama naarive nikalaga ninga neere okoddiwa.
8 Mwaha kannafuna werana ethu enaviriganiha ebaribari, mbwenye nnerana dhithu dhiniwanana ni ebaribari.
9 Mwebaribarene iyo nnohagalala malabo aamatene nyu mwakanna kopolo, naarive iyo nigaali ookwerebeyene. Naalobelaga ethu nnalobihu sowihina musaddule eguminyu.
10 Bumwahaya ginooleba dhithu ndha ngaali wolapela ni nyu wihina gafiya wengo gahithabwe orusiha dhithudha gaalabihedhaga owedha givahiwimi ni Nabwiya, wihina gaalibihegena athu ohiya wagujhula.
11 Gikuthulaga addibila, munaahiye okala athu oohagalala, mwiisaddulegeve, mulibihiwegeve, mwiwananegeve, mukalege a murenddele; vano Mulugu oodhivela ni a murenddele aneere okala ni nyu.
12 Mulojhelanege mmodha ni mukwaye ni beju yoweela.
13 Addibila aatene oweela enowaaruma malojhelo.
14 Opama wohinifwanelela wa Nabwiya Yesu Kiristu, odhivela wa Mulugu ni muzimu wotxena yoyo onanikavihera iyo aateene, okale ni nyu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
