Korintiyu anabiili 2:1-17
2 Miyo gihithoma mmurimani mwaaga wihina gadha wuwaredhelani gihuwuukuleni.
2 Mwaha miyo guwukulani, baani anagihagalalihege ehili ale gawukulimi?
3 Bumwahaya gidhe gulebelegeni, wihina gadha wengo gihukuwe mwaha wa ale yagihagalalihege; miyo gihikanna ebaribari wihina ethu enagihagalasa simodhave enuhagalasani.
4 Mwaha miyo gulebeleni karta ngaali oosegedheyene, ngukuwile mmurimani ni gimothihaga mitori, ohiya wihina guwukuleni mbwenye munone odhivela winlubale ginnimina ni nyu.
5 Akala ohukalawo muthu uwukuleni, kagukunle miyo, mbwenye uwukuleni nyu aateene. Ginawoga ndo, mwaha kaginafuna othabwa owoga muselu ola.
6 Makalelo asinyusiwe mulobwana oyo naathu owinjhiva ehakwana;
7 vano, ginowuwaddelani wihina mmulevelele ni murima waateene ni mmutodole. Eyo eneere omukavihera oliye ohugonjhihiwa ni wukuuwa winlubale.
8 Miyo ginowukongomedhani wihina mmoonihe odhivela weenyu winlubale.
9 Bumwahaya gidhe gulebelegeni: wihina goone akala nyu mweere wooniha wi muli owiwelela mwadhaatedhene.
10 Muthu munamulevelelinyu ni miyoya ginere omulevelela. Mowindo, akala gihilevelela (akala ehikalawo ethu gahowelimi olevelela) waali mwaha opama weenyu, vamentoni va Kiristu,
11 wihina nnadhe nigonjhihiwe ni Saddana, mwaha nihinona murako dhaye.
12 Miyo nufiya oTorowadi wihina gilaleye muthenga dhapama wodhela Kiristu, teto naarive ngafuguleliwe musiwo wihina gaapare mabasa a Nabwiya,
13 murimaga kuwahagalale mwaha kagagumanne ni Titu, ddibilaga. Mwaha wa yeyo miyo wapaganya addibila awewule odhowa oMasedoniya.
14 Mbwenye nnomutamalela Mulugu ananeddiha mwimodhani ni Kiristu. Enakala ninga athu eneedda mwimodhani ethabelaga wihina yaajhe mathanga oogonjhiha. Enonelo ya Mulugu siithu enanukwela pama teto Oliye onolabihedha mabasa nnaparihu wihina athu a murudda dhaatedhene yoonege onukwela!
15 Mwaha vamentoni va Mulugu nili onukwela wa Kiristu, vaari va athu enaavulusiwe ni va athu yaale enatolosiwe
16 wa ale enaatolosiwe, winowafwanya onukwela wa okwa winaathukulele okwa; wa ale enaavulusiwe, winowafwanya onukwela wa egumi winaathukulele ovulusiwa. Ki baani anafwanelela wapara mabasa ala?
17 Iyo nnofwanelela, mwaha kanili ninga athu owinjhiva enaaguliha Madhu a Mulugu, mbwenye nnawoga ni ebaribari yaateene ninga athu erumiwe ni Mulugu, hee, vamentoni va Mulugu vamodha ni Kiristu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
