Korintiyu anabiili 5:1-21
5 Mwaha nihinona wi nyumba yehu ya velaboni yavati, ddammwa ela, yagujhuliwa, Mulugu anere onivaha nyumba, nyumba yamukalakala odhulu, ehimagiwe naathu.
2 Mwaha nyumba ela nnakalihu nnowunlamo, nunlelaga owara * nyumba yehu yodhulu,
3 wihina nawara nyumba eyo nihifwanyiwe nigaali madave.
4 Mwebaribarene, iyo nili muddammwani muna, nnowunla mwaha kannafuna orula mbwenye nnafuna niware emodhaya, wihina ele ehinakwa ekale vamburoni va ele enakwa.
5 Mulugu anivahile muzimu waye onanikavihera ororomela dhithu dhinaadhe osogolo, duliyene anivahile egumi ela.
6 Mowindo, mudhidhi waateene iyo nnooliba murima, mwaha nihinona wi mudhidhi yola nnakalihu ni mwiili ola, nihilapelana ni Nabwiya,
7 mwaha nnedda ni nroromelo ohiya ni dhithu nnoonihu ni mento.
8 Mbwenye nihikanna oliba murima ni nnafuna nikale wolapela ni mwiili wihina nikale vamodha nNabwiya.
9 Mowindo, naarive nikale vamodha nuliye obe nikale wolapela, efunelo yehu fumuhagalasa oliye.
10 Mwaha iyo aateene nnere ofwanyeya oTiribunale ya Kiristu wihina kadda muthu aakele ele anafwaneleliye mowiwanana ni mabasa apanriye agaali mmwiilini, naarive ekale apama obe abure.
11 Mowindala, woona wi nihinona ethu enatapulela omoova Nabwiya, nnowathukulela athu orumedha ele nnahudhihihu, teto nihinoniwa pamadhene ni Mulugu. Ni ginoojheha wihina nnoniwe pamadhene ni nyu.
12 Kahi wihina nnafuna niwooneyihe dila biili vamentoni veenyu, mbwenye nnowukongomedhani wihina muniwogege nimakalelo apama, wi mwande wawakula ale eniithukula mwaha wa ekalelo yeewa enooneya ohiya mwaha wa ele eli mmurimani mwewa.
13 Akala naali ataduwa namutaduwela Mulugu mbwenye akala nnowubuwela pama nnerela opama weenyu.
14 Odhivela wa Kiristu winonithukulela, mwaha nihifiyedha orumedha wihina: mulobwana mmodha aakwele athu aateene, mwaha aateene yahimala okwa.
15 Oliye aakwele aateene, wihina ale enakalawo ehikalegewo ni efunelo yewa, mbwenye ya ole aakwele ni avenyihiwe muukwani.
16 Okuma peeno odhowa osogolo iyo kannawona athu mowiwanana niile nnoonihu. Naarive amodha wa iyo kale egamoonile Kiristu mowiwanana ni ekalelo enooneya, mbwenye vano kannanda werana yeyo.
17 Mowindo, akala muthu ali mwimodhani ni Kiristu, yopaddusiwa exa. Dhithu dhakale dhihivira. Kasugwani! Dhihikumelela dhithu dhixa.
18 Mbwenye dhaatedhene dhendha dhinadhela wa Mulugu, anandanihe nuliye wodhela Kiristu ni ohunivaha mabasa owakavihera athu amodha wandana Nuliye
19 eyo enatapulela wi Mulugu anamulabihedha Kiristu wihina awandanihe athu Nuliye, teto oliye kanaatoriha mwaha dhothega dhewa. Vano oliye onivaha mabasa owawaddela athu wi aliwa podi wandana Nuliye.
20 Iyo nili amwimeleli enaapara mabasa a Kiristu ekalaga ninga Mulugu anawoga anilabihedhaga iyo. Ninga athu ehanle vamburoni va Kiristu, iyo nnowulobani neegi: “Mwandane ni Mulugu.”
21 Kiristu kanathegege, vano Mulugu onivaha ninga mukutho wodhela dhothega dhehu, wihina wodhela oliye nikale owogowa vamentoni va Mulugu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “waakela”
