Korintiyu anabiili 7:1-16
7 Vano addibila, woona wihina nnojheha wakwanela wa mpaganyo ndha, nikale oweela, nisukumaga dhithu dhaatedhene dhonyakavala dhinanonga mwiili ni murima wehu, nilibihedhaga wihina nimoovege Mulugu.
2 Munifugulele murima weenyu. Kaawo muthu nimwerelihu obure, nimutotelihu makathamiho ni kaawo muthu nimujhenlihu.
3 Kaginawoga ndo wihina gutoriheni. Mwaha miyo gihiwoga wi nyu muli mmurimani mwehu wihina nikwe vamodha ni nikanne egumi vamodha.
4 Ginawoga ni nyu gahukuwileni ethu. Miyo ginowithukula vanlubale mwaha wa nyu. Miyo gihilibihiwa vanlubale; ni gihikanna ohagalala winlubale mmakathamihoni mwehu mwaatemwene.
5 Mwebaribarene nigafiyile oMasedoniya, kananna vovumela mwaha nahisegedheya mwa makalelo aatene. Ode athu yoonidda mbwenye iyo nakala oothuwathuwene mwaha wa mulogo.
6 Mbwenye, Mulugu anaatodola ale ekwerebeye, ohunitodola Titu nuufiya;
7 ohiya odhave waye baahi, mbwenye ni otodoliwa aakenliye mwaha wa nyu. Oliye ohunaaddela efunelo munninyuna yogoona, wikubanyedha weenyu ni ogithuwathuwela weenyu; nuwindo, miyo othabwa ohagalalawa.
8 Mwaha, naarive miyo nguwukuleni wodhela karta gulebelimini, kaginakubanya. Naarive miyo ngakubanye omambelelowene (mwaha gihoona wihina gihuwukuulani, mudhidhi vang’ono),
9 vano ginohagalala, kahiyo mwaha miyo wuwukuulani, mbwenye mwaha wukuuwa weenyu wihuthukulelani othwaruwa. Nyu muukuliwe mowiwanana ni efunelo ya Mulugu, mowindo kanfwanyiwe makathamiho mwaha weehu.
10 Mwaha wukuuwa mowiwanana ni efunelo ya Mulugu winomuthukulela muthu othwaruwa ni ovulusiwa, mwaha wa eyo kaawo muthu anaakubanye; mbwenye wukuuwa wa mwilaboni winadhana okwa.
11 Kasugwani dhowima dhikumelele mwaha wukuuwa weenyu mowiwanana ni efunelo ya Mulugu: wuhuwerihani nyu otxeniha ndina neenyu, muhuukuwa mwaha dhothega mwerilinyuna, muhumoova Mulugu, muhuthwaruwa, muhumulabela Mulugu ni murima weenyu waatene ni muuhiya werana dhothega mweresinyuna! Dhaatedhene ndho mwerilena mwamakalelo apama wihina mutonyihedhe wi muli athu oweela.
12 Naarive miyo ngulebeleni nyu aatene, kagerilena eyo mwaha wa ole atheegile newene mwaha wa ole atheegeliwe, mbwenye wihina yoneye vamentoni va Mulugu wi munowiwelela.
13 Bumwahaya nihilibihiwa.
Ohiya onilibihave, iyo nnothabwa ohagalala mwaha wa Titu, woona wi aatene nyu muhagalasa murima waye.
14 Mowindo, akala gihimwaddela wodhela nyu nuuwithukula, kagaathukunle manyazo; mbwenye woona wihina dhithu dhaatedhene nuwaddenlihuni seebaribari, ehoneya wihina ele nimwaddenlihu Titu nuwithukula, ebaribari.
15 Ohiya eyo, oliye onothabwa wudhivelani ubuwela makalelo eenyu aamateene owiwelela ni makalelo mmwakenlinyu ni nthithimiho ninlubale.
16 Teto miyo ginohagalala mwaha wi dhithu munerinyuna dhinogilibiha.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
