Korintiyu anabiili 8:1-24
8 Addibila, vano nnafuna munone opama wohinifwanelela wa Mulugu ovahiwe mulogo dho Masedoniya.
2 Naarive egaali mmakathamihoni ni yehiwaga, ohagalala wewa ni ohaawa wewa, wihenjhedhedha oreela wewa mwaha woovaha.
3 Mwaha aliwa evahile mowiwanana ni yele yanniwana. Ehe, miyo ginookalela onamoona wihina aliwa ehivaha okwaranya yeele yanniwana;
4 teto dila dhowinjhivadhene aliwa yoniloba wihina naavahe ofuru woovaha ni murimiwa waamuteene dhovelela dhewa wi yakaviheriwena oweela.
5 Ni yaherana nimakalelo nahijhehedhihu, woona wihina vobajhavene ehimurumedha Nabwiya vamodha ni iyo, eharaga ele Mulugu anafuniye.
6 Mowindo, iyo omulibiha Titu wi amarihe othukula nvaho dhatedhene nvahilinyu nuupama weenyu woona wi mabasa ala ahawambela agaali vamodha ni nyu.
7 Mowindala, dhenyu dhinna wuweddelani pama mwaha muhukanna nroromelo nooliba, muhukanna makalelo apama oowoga, muhukanna enonelo yowinjhiva, munowilibihedha vanlubale mwa dhaatedhene munerinyuna, ni munowadhivela athu amodha ninga iyo nnadhivelihu. Bumwahaya mudideleve okala athu oovaha.
8 Kahi wihina ginowurumani, mbwenye ginafuna guwaddeleni oviheya wa athu amodha ni goone akala odhivela weenyu fwebaribari.
9 Bumwahaya nyu muhunona opama wohinifwanelela wa Nabwiya eehu Yesu Kiristu: naarive agaali ooreela oliye ahihaawa mwaha weenyu wihina ni nyunwa mukale ooreela wodheela ohaawa waaye.
10 Wodheela muselu yoola, moonelo waaga buula: wapara mabasa ala eneere wukaviherani, woona wi ehivira yaka modha mwawambelinyu mabasa ala teto ohiya eyo muhooniha efunelo yowapara mabasaya.
11 Vano, akala siyeyo, mwaamarihe mabasa mwawambelinyu wihina efunelo munninyuna yowapara mabasa ala yakwanele mowiwanana ni dhithu munninyuna.
12 Ovaha ni murima waamuteene winomuhagalasa Mulugu mwaha Oliye anafuna wi nivahege mowiwanana ni yeele ninnihuna.
13 Mwaha kaginafuna wavugulela athu amodha teto gunyemeliheni nyu.
14 Mowindala, mwakanna dhithu dhowinjhiva mwakaviherena ale enahowela teto naaliwaya yakanna dhithu dhowinjhiva enere wukaviherani nyu mwahowelaga ni makalelo yaala kavinaakale ohiyana.
15 Nga dholebela dhinawogiwa: “Ole anna dhithu dhowinjhiva kathabwile okanna, teto ole anna vang’ono kathabwile ohukanna ethu.”
16 Ootamaleliwa akale Mulugu mwaha onvaha Titu murima mmodhave ninnihuna wowuthuwathuwelani,
17 mwaha oliye ohurumedha nikongomedho nehu, ni oofuna wihina eerena ele nimulobilihu, bumwahaya ni efunelo yaye anna odha wengo wihina uwaredheleni.
18 Nihiyoya, nnomuruma vamodha nuliye ddibila anathabwesa othetheliwa ni mulogo dhaatedhene mwaha wa mabasa anapariye wodhela muthenga dhapama.
19 Ohiya eyeneve, oliye ohuthomiwa ni mulogo dhaatedhene wihina akale mukwihu amulenddoni ni anikaviherege nadhowagana nvaho ndha dhapama dhinathithimihiwana Nabwiya, ninga makalelo owoniha wihina nnofuna wakavihera athu amodha.
20 Nnoova wihina mangwaana ahikalewo muthu ananikohege wodhela nvaho ndha nnakabelelihu dhipelekiwe ni murima wateene.
21 Mwaha ‘nnookabelela dhithu dhaatedhene mwamakalelo oororomeleya ohiya vamentoni va Yehova baahi, mbwenye vamentoni vaathu aateene.’
22 Ohiya eyo, ninna omuruma ddibilihu vamodha naaliwa, teto nihimweha ni nihoona oviheya waye wihina onokavihera nuviheya muselu dhohiyana-iyana; mbwenye peeno oviheya waye winna othabwa wenjhedhedheya mwaha wi onowuroromelani vanlubale.
23 Mowindo, akala munomwanganyedha Titu, munone wi di mukwaaga ni ginalaba vamodha nuliye teto onothuwathuwela opama weenyu; obe akala munowawanganyedha addibila narumilihu, munone wi aliwa enarumiwa mmulogoni wihina emuthithimihe Kiristu.
24 Ni mutoonyihedhe wihina munowadhivela addibila ayo ni muriminyu waateene, ohiya eyo, mwaatonyihedhe athu aateene ammulogoni ele enanthukulela withukula nawogaga wodhela nyu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
