Dhowera Dhaarumiwi 10:1-48
10 Osezareya ahikalawo mulobwana dhaala ithaniwa Korneliyu, aali namasogolela* aanyakoddo a nikuru* na Italiyano.
2 Oliye vamodha ni muralaye watene yomwebedha Mulugu; vaari va nlogo nne owakavihera athu ohawa teto mudhidhi wamutene oolobela wa Mulugu ni murimaye watene.
3 Mudhidhi wanetanu nennayi wa mutana,* muurohani oliye omoona mungero a Mulugu amwaaddamelaga ni amwithanaga egihina: “Korneliyu!”
4 Nuwindo, Korneliyu ofugula mento omusugwa, wula oovaga omukoha egihina: “Nabwiya nyuwa muli aani?” Mungero ole omwakula egi: Malobelo awo ni makalelo onaakaviheriwe aliba ohawa ehifiya vamentoni va Mulugu, vano oliye wuwubuwela.
5 Mowindala, warume alobwana sidadi yoJope wihina emudhena mulobwana dhaala anithaniwa Simawu alemeliwe ni ndina na Peduru.
6 Mulobwana oyo muleddo vaade va Simawu muliba watuwa mathebe,* anna nyumbaye sere-sere ya niya.”
7 Mungero ole numala owoga ni Korneliyu omaruwa odhowaga, Korneliyu nuhala wawithana adharaaye abiili ni munyakoddo mmodha amulaba Mulugu,
8 wawaddela dhithu dhatedhene vano waruma sidadi yoJope.
9 Labo noharela, egaali mulenddoni ni yaddamelaga sidadi yele, mudhidhi wanetanu nammodha,* Peduru ogwela nyumba yodhulu wihina alobele.
10 Mbwenye oliye okanna dala ni ofunaga ojha ethu-sithu. Wula yegeredhaga yojha yaye, Peduru obajha oroha;
11 woona odhulu wigafugunwe ni ethu yaligana ni lensori ninlubale ndhelaga odhulu, nigamagiwe mapiyo amannayene.
12 Valensorini vale, yahikalavo anenyama aatene a moddo minnayi ni owiburula a veelaboni yavati ni balamedha.
13 Nuwindo wiwa ndhu nawoga negihina: “Kavenya Peduru, waape watakune!”
14 Mbwenye Peduru wakula egihina: “Miyo naari Nabwiya, mwaha kaginajhege ethu yohijhiwa obe yonyakavala.”
15 Ndhu nne owogave nuliye dila yanabili negihina: “Oselele withana dhithu dhonyakavala ndhe Mulugu amanliye weeliha.”
16 Eyo yahereya dila yanatharu, vano mohulegela lensori nne ohogoloseliwa odhulu.
17 Peduru othuwathuwa ni wambela wikoha wihina oonelemo yoroha ele ethu yatapuleliwa. Mudhidhi yole, alobwana yarumiwe ni Korneliyu wimela vamulago okohedhaga vaade va Simawu.
18 Aliwa omwithana mwanamuralaya ni omukoha akala Simawu aalemeliwe ni ndina na Peduru vaade vafiyendhiye fivevale.
19 Peduru eera wubuwelave yoroha ele muzimu wotxena wawogiliwa wegihina: “Kavuruwana! Alobwana araru enna wusayela.
20 Kavenya, kuwanganyedhe kadhowa naaliwa, mwaha dimiyo aarumme.”
21 Vano Peduru okita odhowa ogumana ni alobwana ale, wakoha egihina: “Gili vala, muthu munanvedinyu dimiyo. Mwadheela ddi?”
22 Aliwa wakula yegihina: “Korneliyu namasogolela aanyakoddo, mulobwana owogowa ni anamoova Mulugu, nlogo naatene namaJudewu nnamuwogiwa opama, mungero ohunvaha dhoholela wihina ndhe nuwithaneni nyu nabwiya, mudhowe vaade va nabwiya ehu wihina mwanvuruwane dhithu anafuniye owoga.”
23 Nuwindo, Peduru wawithanela mba ni wawakela ninga aleddo.
Vano labo noharela odhowa vamodha naaliwa teto addibila amodha oJope onvelela.
24 Labo dhaala Peduru odhowa oSezareya. Korneliyu eera waajheha wengo teto ahimala watugumana amudhaaye ni akwaye oororomeleya.
25 Peduru nuufiya, Korneliyu odhowa wawakela, okokora vamentoni vaye omuthithimiha.
26 Mbwenye Peduru onvenyiha egihina: “Kugikokorele! Miyo gili muthu ninga we.”
27 Mudhidhi yoole athapanyaga nuliye, aliwa ovolowa mba, vano wafwanya athu owinjhiva egaatugumane.
28 Oliye wawaddela egihina: “Nyu muhunona wihina malamulo kinamwenya Mujudewu witaganyihedha ni malogo mamodha. Mbwenye Mulugu ohugooniha wihina gihikanne nsakulo naathu obe kagimonege muthu di muthu ninga ethu yonyakavala.
29 Bumwahaya miyo nuwithaniwa, kagikooddile. Vano ginafuna ginone, ethu mwagithanelinyu.”
30 Nuwindo, Korneliyu omwakula egihina: “Malabo mannayi mundduli, miyo gaali vaadevaga gilobelaga mudhidhi yola wanetanu nennayi, vano ofiya mungero awanre dhowara dhojerimela;
31 oliye owoga egihina: ‘Korneliyu, malobelo awo ehivuruwaniwa teto makalelo onakaviheriwe aliba ohawa ehifiya vamentoni va Mulugu, vano oliye wuwubuwela.
32 Mowindala, omurume muthu sidadi yoJope wihina emudhena mulobwana dhaala anithaniwa Simawu alemeliwe ni ndina na Peduru. Mulobwana oyo muleddo vaade va Simawu muliba watuwa mathebe, anna nyumbaye sere-sere ya niya.’
33 Mohilegela miyo wuwithanihani, teto nyu nabwiya nuupama weenyu orumedha odha wuno. Vano iyo aatene nili vamentoni va Mulugu wihina nivuruwane dhithu dhatedhene Yehova urumiliyeni onaddela.”
34 Nuwindo, Peduru obajha owoga egihina: “Vano ginowonelamo pamadhene wi Mulugu kanna nsakulo,
35 mbwenye muwari mwa malogo aamatene oliye onomurumedha ole anerana dhithu dhapama ni anamoova.
36 Oliye oharuma madhu aye wamwaana Ezarayeli awaddelaga muthenga dhapama dha murenddele wodhela Yesu Kiristu, yoyo ali nabwiya aathu aatene.
37 Nyu muhunona muselu baani wawogiwa murudda watene woJudeya, obajha oGalileya, Juwawu numala olaleya wodhela obaddiziwa:
38 mwaha wa Yesu aali oNazare, makalelo Mulugu amuthikitheliye muzimu wotxena ni kopolo anvahiliye; oliye ohedda murudda watene awerelaga opama ni aavulumusaga athu aatene yonihiwa goyi ni Ddiyabo, woona wi Mulugu aali vamodha nuliye.
39 Iyo nili anamoona a dhithu dhatedhene ndha eriliyena elabo ya maJudewu ni oJeruzale. Mbwenye aliwa ompa, omutomeya vantxikwani na goyi.
40 Mulugu onvenyiha labo nanatharu ni omweenya wihina ooneye dila biili,
41 mbwenye kooniwe naathu aatene, ahili iyo baahi naathomiwe kale ni Mulugu, naajhile ni naang’wile vamodha nuliye agamanle ovenyihiwa muukwani.
42 Oliye ohuniruma, olaleya nlogo ni ovaha onamoona wowakwana wowi oliye dithomiwe ni Mulugu wihina akale namatoriha aathu eliwo ni ale ekwile.
43 Anamavuhulela aatene enovaha onamoona waye wihina muthu yole anamuroromela, anere oleveleliwa dhothega dhaye wodhela ndina naye.”
44 Peduru awogagave dhithu dhendha, muzimu wotxena wamorela athu aatene yavuruwana madhu a Mulugu.
45 Vano anamahara yineliwe yadhile ni Peduru, otikina vanlubale mwaha naaleya yahali maJudewu yowakela muzimu wotxena.
46 Mwaha aliwa yahawiwa ewogaga dhiwogelo ni emuthithimihaga Mulugu. Nuwindo, Peduru owoga egihina:
47 “Athu ala ehakela muzimu wotxena mowindala ninga iyo; ohukalavo muthu anaakoddihe wihina ebaddiziwe ni manjhe?”
48 Vano, Peduru oruma wihina ebaddiziwe ni ndina na Yesu Kiristu. Nuwindo, aliwa omuloba wihina akaleve wewule malabo vang’ono.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Komadanti aatoropa 100.
^ Nikuru nanyakoddo oRoma nakanna atoropa 600.
^ Obe: “mudhidhi wa 15 wora.”
^ Obe: “makupa.”
^ Obe: “Mudhidhi wa 12 wora.”
