Dhowera Dhaarumiwi 11:1-30
11 Nuwindo, arumiwi ni addibila yaali oJudeya wiwa wihina athu amalogo aamatene yaharumedha madhu a Mulugu.
2 Vano, Peduru nuudhowa oJeruzale, athu yarumedha muselu wowineliwa obajha onvanyiha,
3 yegihina: “We wahivolowa mba mwaathu ohineliwa ojhaga naaliwa.”
4 Mwaha wa yeyo, Peduru wambela watapulelamo dhithu dhatedhene dhaapadduwe, egihina:
5 “Miyo gaali sidadi yoJope gilobelaga, morurumusa miyo woona ethu yaligana ni lensori na linyu nikitaga odhulu, nigamagiwe mapiyo amannayene vano okita ofiyedha galimivo.
6 Miyo nusugwa pamadhene muwarimwa, wawona anenyama aatene a velaboni ya vati enna moddo minnayi, anenyama amukokolani owiburula, ni balame dhodhulu.
7 Nuwindo, miyo wiwa ndhu nadhela odhulu nawoga negihina: ‘Peduru, kavenya, waape watakune!’
8 Mbwenye miyo wakula gegihina: ‘Naari, Nabwiya, mwaha muwano mwaaga kamunavolowege ethu yohijhiwa obe yonyakavala.’
9 Ndhu nne nadhela odhulu, owoga dila yanabili negihina: ‘Oselele withana dhithu dhonyakavala ndhe Mulugu atxenihiliye.’
10 Ndhu nne nuvuruwaniwa dila yanatharu, dhithu dhatedhene ohogoloseliwa odhulu.
11 Mudhidhi yole, alobwana araru yarumiwe oSezareya wihina egisayele, ofiya vaade nakalihuvo.
12 Nuwindo, muzimu wotxena ogaddela wihina gidhowe naaliwa gihanganyedhaga ethu. Addibila ale 6 odhowa vamodha ni miyo vano iyo odhowa vaade va Korneliyu.
13 “Oliye onaaddela wihina ahimoona mungero agadhile vadevaye awogaga egihina: ‘Warume alobwana oJope wihina yamwithane Simawu anoniwe ni ndina na Peduru,
14 oliye aneere wuwaddela dhithu dhinukavihere we vamodha ni athu aatene a vaade vawo wihina nvuluwe.’
15 Miyo nubajha owoga, muzimu wotxena wakitela ni makalelo mamodhave wanikiteliwa omambelelo.
16 Nuwindo miyo wawubuwela madhu awogile Nabwiya, yawoga yegihina: ‘Juwawu ohubaddiza ni manjhe, mbwenye nyu munere obaddiziwa ni muzimu wotxena.’
17 Mowindala, akala Mulugu ohavaha mahala mamodhave anivahiliye enikavihere omurumedha Nabwiya Yesu Kiristu, miyo gili aani oonvanyiha Mulugu?”
18 Nuwawiwa madhu yaala, kihogolowele onvanyiha dila biili, mbwenye aliwa omuthithimiha Mulugu yegihina: “Akala siyeyo, Mulugu ohavaha mahala athu a malogo amatene othwaruwa winavaha oneeti wowakela egumi.”
19 Anamahara amodha yabalalesiwe mwaha oharahariwa wa Estevawu aliwa othawela oFenisiya, oXipere ni Wantiyokiya, mbwenye yaalaleya Majudewu baahi.
20 Vakaleliwa, yahikalavo alobwana amodha yaali oXipere ni oSireni, aliwa omaruwa odhowa Wantiyokiya wambela owoga naathu ni ewogelo yeGerego evuwihaga muthenga wapama wa Nabwiya Yesu.
21 Vano nlada na Yehova okala naaliwa, athu owinjhiva osaddula murima dhewa wambela omurumedha Nabwiya.
22 Addibila amulogo woJeruzale nuwiwa muthenga wodhela aliwa, omuruma Barnabe Wantiyokiya.
23 Oliye nuufiya teto nuwona opama wohinifwanelela wa Mulugu, ohagalala ni wambela walibiha aatene wihina emuroromelegeve Nabwiya ni murima wamutene,
24 mwaha aali mulobwana apama, adhaleliwe muzimu wotxena ni anna nroromelo. Vano athu owinjhiva wambela omuroromela Nabwiya.
25 Ofiyedha oliye odhowa oTarsu wihina amusayele pamadhene Sawulu.
26 Vano nuunfwanya, omuthukulela Wantiyokiya. Yahimala yaka modha wengo etugumanaga ni mulogo ni ehudhihaga muthithi waathu. Teto Anamahara ale yambele withaniwa makiristawu Wantiyokiya eholeliwaga ni muzimu wotxena.
27 Malabo yaale, anamavuhulela amodha okuma oJeruzale odhowa waAntiyokiya.
28 Mmodha wa aliwa ithaniwa Aagabu, ovenya ni ovuhulela akaviheriwaga ni muzimu wotxena wihina elabo yatene yere okumelela dala. Mwebaribarene mudhidhi wa Kalawudiyu dala eyo ofiya.
29 Nuwindo, anamahara opangana wihina kadda muthu mowiwanana niile anniyena, akumihe ethu-sithu wihina aakaviherena addibila yakala oJudeya.
30 Aliwa osokela, onvahedhela Bernabe ni Sawulu wihina yafiyena mmadani mwa anamaholela.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
