Dhowera Dhaarumiwi 18:1-28
18 Nuwindo, Pawulo okuma wAtena odhowa oKorintiyu.
2 Wengo onfwanya Mujudewu dhaala ithaniwa Akila, oliye aali eelabo yoPontu, akunle nufiya-nufiya Witaliya ni mwariye Pirisila, mwaha Kalawudiyu ahiwoga wihina Majudewu aatene evenyewo oRoma. Nuwindo oliye odha wawona
3 woona wihina yapara mabasa mamodhave oosasanya tenda, oliye okala vaade vewa olabaga vamodha.
4 Ni maSabadu akala musinagoga awogaga mwaha wa vathaddo, oliye owadahinya murima majudewu ni agerego.
5 Vano Silaji ni Timotiyu nudhowa oMasedoniya, Pawulo amala mudhidhi waye wowinjhiva alaleyaga madhu a Mulugu, aavahaga onamoona majudewu ni awonelihagamo wi Yesu di Kiristu.
6 Woona wihina, yodidela onvanyiha ni omuruwana, oliye watata malayaaye ni wawaddela egihina: “Nibili nikale ni nyu. Miyo kaginna muladdu. Obajha peeno odhowa osogolo ginadhowa gaalaleyege athu amalogo.”
7 Nuwindo, oliye nukuma mburo yoole odhowa vaade va mulobwana dhaala ithaniwa Tisiyu Justu, amwebedha Mulugu; teto nyumbaye yaaddamane ni Sinagoga.
8 Mbwenye Kirispu, aali namasogolela a musinagoga, wambela omuroromela Nabwiya vamodha ni athu aatene a vaade vaye. Teto athu owinjhiva oKorintiyu yawiwale madhu a Mulugu, warumedha ni obaddiziwa.
9 Ohiya eyo, mahiyu Nabwiya owoga ni Pawulo murohani egihina: “Kuwoove, mbwenye odideleve olaleya kumaale,
10 mwaha miyo gili ni we ni kawo muthu anuhidde wihina uwerena ethu yabure. Woona wi athu owinjhiva a sidadi yeela baaga.”
11 Nuwindo, oliye okalave wewule yaka modha ni mweeri mitanu nammodha, aahudhihaga madhu a Mulugu.
12 Mudhidhi yoole Galiyu agaali musadoro* a elabo yo aKaya, Majudewu otugumana omwihidda Pawulo omudhowana otiribunale,
13 yegihina: “Mulobwana ola onowawaddihedha athu omwebedha Mulugu mwamakalelo yahiniwanana ni nlamulo.”
14 Mbwenye, Pawulo afunaga wihina awoge, Galiyu owoga ni Majudewu egihina: “Yahakale ninga mwebaribarene ethu eriliyena sabure obe sowopiha, geere wuvuruwanani pama.
15 Akala, munakanganela madhu, mandina obe nlamulo nenyu muladdu oyo bweenyu. Kaginafuna okala namatoriha a dhithu ndho.”
16 Nuwindo oliye wawigaramo mutiribunale.
17 Vano, aliwa omwihidda Sosteni, namasogolela a musinagoga wambela omuukutha mutiribunale mwemune. Mbwenye Galiyu kaafuna wivolosiha muselu yoole.
18 Nuukala wewule malabo owinjhivene, Pawulo wapaganya addibila ni wabuwela oSiriya, aveleliwaga ni Pirisila ni Akila. Agaali oSenkereya wasatha mathithi aye, mwaha aherana nipangano.
19 Nuufiya oEfezu, oliye wahiya wewule. Oliye, ovolowa musinagoga wambela opendda ni Majudewu.
20 Naarive egamulombe wihina akale wewule mudhidhi wowinjhivene, oliye kaarumedhe,
21 mbwenye apaganyaga wawaddela egihina: “Yehova afuna, ginere ohogolowela wewuno.” Nuwindo oliye wabuwa oEfezu
22 ofiya oSezareya. Odhowa* walojhela addibila ammulogoni nuwindo omaga olenddo odhowa wAntiyokiya.
23 Nuuvira mwana mudhidhi agaali wewule, oliye omaruwa weedda mburo dhatedhene dho Galasiya ni dho Firijiya, aalibihaga anamahara aatene.
24 Vano muJudewu ithaniwa Apolu eelabo yo Alexandriya, oddemulela oEfezu. Aali mulobwana ooviheya aanonne pamadhene Dholebela.
25 Mulobwana oyo ahihudhihiwa dila dha Yehova ni aali ooviheya epaddi yomuzimuni, oolaleya ni oohudhiha wodhela Yesu mwamakalelo owoneleyamo, mbwenye aanonile obaddiza wa Juwawu baahi.
26 Apolu nuufiya musinagoga obajha owoga nuuliba murima. Vano Pirisila ni Akila nuumwiwa, aliwa omwithanela okwibi ni obajha omutapulela pamadhene dila ya Mulugu.
27 Ohiya eyo, woona wihina oliye afuna adhowe waKaya, addibila walebela karta anamahara wihina emwakele pama. Nuufiya awule, wakavihera athu owinjhiva yasaddunle murima dhewa ekala makiristawu wodhela opama wohinifwanelela wa Mulugu;
28 mwaha, akala vaari vaathu ni oliba murima, oliye owawonelihamo pamadhene Majudewu wihina dhohudhiha dhewa dhaali dhowoota ni owawoniha dholebela wihina Yesu di Kiristu.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Musadoro ola, athonga epaddi emodha ya murudda.
^ Podi weera oJeruzale.
