Dhowera Dhaarumiwi 19:1-41
19 Wula Apolu agaalive oKorintiyu, Pawulo ovira murudda dholapela dha sidadi yele, odhowa wEfezu. Wewule oliye wafwanya anamahara amodha
2 oliye wakoha egihina: “Nyu nuukala makiristawu, muhakela muzimu wotxena?” Aliwa omwakula yegihina: “Iyo kanniwege ewogiwaga wihina ohukalawo muzimu wotxena.”
3 Oliye wakohave egihina: “Kito mbaddiziwe aavi?” Aliwa omwakula yegihina: “Ni obaddiziwa wa Juwawu.”
4 Pawulo wawaddela egihina: “Obaddiziwa wa Juwawu watapulela othwaruwa; oliye owawaddela athu wihina emuroromele ole aadhe osogolo waye, ali Yesu.”
5 Numala wawiwa madhu yaala, aliwa obaddiziwa mwa ndina na Nabwiya Yesu.
6 Vano Pawulo nuwatapulela nlada naye, muzimu wotxena wakitela ni obajha owooga dhiwogelo ni ovuhulela.
7 Vakaleliwa, yahakwana alobwana 12.
8 Muwari mwa mweri miraru, oliye ahidhowa musinagoga ni aalaleyaga nuuliba murima, awogaga mwaha dhavathaddo ni apenddaga naaliwa mwamakalelo owadahinya murima wodhela Omwene wa Mulugu.
9 Mbwenye, woona wihina athu amodha kiyafuna warumedha madhu awogiye ni yowoga obure Dila yeebaribari * vaari vaathu, oliye wahiya ni wathukulavo anamahara ale; teto malabo aamatene oowoga mwaha dhavathaddo osogolo * wa Eskola ya Tiranu.
10 Eyo yahereya muwari mwa yaka biili, ofiyedha athu aatene yakala sidadi yoAziya, Majudewu vamodha ni Agerego wawiwa madhu a Nabwiya.
11 Mulugu, owawerana mabasa manlubale ootikiniha amulabihedhaga Pawulo,
12 ohiya eyo, athu yowathukula masaala,* aaventale a Pawulo waadhowana waali aredda, yindo athuya yoovulumuwa teto muzimu dhotakala dhokumamo mmwiilini mwewa wahiddave baahi.
13 Mbwenye, Majudewu amodha yeedda murudda ni murudda yawigaraga ademoniyu, yahixixa olabihedha ndina na Nabwiya Yesu wodhela athu yaale yonihiwa goyi ni muzimu dhabure; yegihina: “Miyo ginowuwaddelani ni ndina na Yesu, ole Pawulo anamulaleyiye wihina mukumemo.”
14 Waanamakutha aatene amaJudewu, ahikalavo mmodha ithaniwa Seva anna anaaye 7, naaliwaya yowerana emodhave.
15 Mbwenye muzimu ole wabure wawaddela wegihina: “Miyo gihimunona Yesu vamodha ni Pawuloya. Ki nyu muli aani?”
16 Nuwindo, mulobwana ole anna muzimu wabure, walupela ofiyedha wagonjhiha aatene, vano aliwa othawa vaade vale madave egaali makwaddave.
17 Yopadduwa ele ovuwa, ofiyedha maJudewu ni aGerego aatene yakala oEfezu onona; vano athu aatene wambela woova, mbwenye ndina na Nabwiya Yesu, odhowagave nthithimihiwagave.
18 Athu owinjhiva yasaddunle murima dhewa ekala makiristawu, yoodha wihina ewoge dhothega dhewa ni dhithu yeresiwana.
19 Mwebaribarene, muthithene waathu yaweresana masenga, wawugela malivuru ewa wapaha athu yaasugwaga. Nuukontariwa korowa yakwimme malivuru ale, wakwana 50 000 korowa dha parata.
20 Nuwindo, ni kopolo dha Yehova madhu aye odhowagave yenjhedhedheyaga.
21 Dhatedhene ndho nupadduwa, Pawulo othoma wihina amala ovira oMasedoniya ni waKaya, eere odhowa oJeruzale. Oliye owoga egihina: “Gakuma wengo, ginaya oRoma.”
22 Nuwindo oliye waruma anamakaviheraye abiili, Timotiyu ni Erastu wihina edhowe oMasedoniya, mbwenye oliye ohala mwana mudhidhi vang’ono elabo yoAziya.
23 Mudhidhi yoole, wahikala ovanyihana winlubale wodhela athu ale yahara dila Yeebaribari.
24 Mulobwana dhaala ithaniwa Demetiriyu, namahana a dhikwamuthu dha parata dhakala osantuwariyu ya Artemiji, mabasaaye, yowavaha mpurelo ameesili.
25 Oliye watugumana athu aatene aaparesiyena mabasa mamodhave ni wawaddela egihina: “Alobwana, nyu muhunona wihina mpurelo wehu onadha ni malondda yaala.
26 Kivala munna woona ni munna wiwa ni mabaru eenyu wihina, ohiya oEfezuve, mbwenye elabo yaatene yoAziya, oyoya aneeriwa Pawulo onna watujela athu owinjhiva asaddulaga moonelo wewa, awogaga wihina amulugu oosasanyiwa ni mada aathu, kahiyo amulugu eebaribari.
27 Ohiya eyo, oliye kanaapweha vangovinive baahi malonddihu, iyo podi waamorana, mbwenye nnokubanya wihina tempulu ya mulugu munlubale Artemiji yahivahiwege thima. Teto ole aneebedhiwa sidadi yaatene yo Aziya ni athu a elabo yaatene, afiyedhe obibiddeleya nthithimiho naye.
28 Nuwawiwa madhu ale aliwa otakaleliwa ni wambela okuwa yegihina: “Munlubale di Artemiji, mulugu aakudda Efezu!”
29 Nuwindo, okangana wule odhaala sidadi yaatene, vano aatene othamaga odhowa mburo ole vakosiwesa saliyapa, wula emburulaga Gayu ni Aristarku yaali aMasedoniyu, akwaye a mulenddoni Pawulo eddesiyena.
30 Pawulo afuna adhowevo wihina awoge ni nlogo nne, mbwenye anamahara omukoddiha.
31 Naarive athu amodha yawegeredhesa mathanga ni jogu egamunonne, aliwa oruma muthenga emulobaga wihina ahixixe odhowawo osaliyapani wule.
32 Mwahaya bowi, athu amodha yakuwa ewogaga ethu emodha mbwenye amodhaya yakuwa ewogaga ethu emodheene: muthithi ole waathu kawiwanana teto athu owinjhiva kayanonne mwahaya bwaddi edhe etugumanege mburo yoole.
33 Nuwindo aliwa omukumiha Alixandere vaari vamuthithi yole waathu; Majudewu omutukumela osogolo. Teto Alixandere owoga ni mada asayelaga makalelo owiwakihedha vaari va nlogo nne.
34 Mbwenye aliwa nuunona wihina Mujudewu, athu aatene obajha okuwa ni ndhu nimodhave ofiyedha mawora menli yegihina: “Munlubale di Artemiji, mulugu aakudda Efezu!”
35 Nuumaliha muthithi watene waathu, namasogolela * a sidadi ele, owoga egihina: “Athu nyo owEfezu, elabo yatene yela baani ahinonne wihina sidadi yo Efezu sinasugwera tempulu ya mulugu munlubale Artemiji ni ekwamuthu emothile odhulu?
36 Woona wihina dhithu ndha kadhinakanganeliwa, enahoweleya mpwaseye ni mwahikanne marulu.
37 Nyu muhaadhana alobwana ala, ehiniiya mutempulu newene yahinamuruwana mulugu ehu.
38 Mowindala, akala Demetiriyu ni ameesili akwaye enomoonana muladdu muthu, ehikalawo malabo tiribunale vamodha ni amusadoro * enatugumaniwa, mudhowe wengo mwasumelane mmodha ni mukwaye.
39 Mbwenye akala nyu munasayela ethu emodheene, muladduya onohoweleya owogiwe vamutugumanoni mowiwanana ni nlamulo.
40 Mwaha iyo mwebaribarene podi wipweha vangovini ofiyedha winkedhiwa wihina nnowarugunuwela malamulo wodhela ethu yeela epadduwe peeno. Mwaha kannonavo muladduya wanthukulele wakulela ethu etatamule okangana wula.”
41 Numala wawoga madhu yaala, muthithi watene waathu obalaleya.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “dila ya Nabwiya.”
^ Obe: “vasala.”
^ podi wera yaali malenso, Pawulo aamagesiyena musolo wihina oviha obe nikurumela nahinvolowe mwintoni.
^ Obe: “namaleba.”
^ Musadoro ola kaathonga elabo yaatene, mbwenye athonga murudda mmodha baahi.
