Dhowera Dhaarumiwi 2:1-47
2 Vano, nuufiya labo na Mathanga a Pentekoste, athu aatene otugumana mburo mmodhave.
2 Morurumusa, wiweya oruma wadhela odhulu, waligana nnipevo nakopolo, odhaala nyumba yatene yakaratiliwamo.
3 Vano aliwa wambela woona ethu yakala ninga malumi a mootho, omwadheya ni omothela vamuru va kadda muthu;
4 athu aatene odhaaleliwa muzimu wotxena ni wambela owoga dhiwogelo, mowiwanana ni makalelo muzimu wamwenyiwa owoga.
5 Mudhidhi yoole oJeruzale yahikalawo majudewu yamuthithimiha Mulugu, yadhela malogo aamatene a velaboni yavati.
6 Nuwindo, nuwiweya oruma wule, athu owinjhiva otugumana ni otikina vanlubale, mwaha kadda muthu awiiwa aanamahara ale ewogaga ni ewogelo yewa.
7 Mwebaribareene, aliwa yahitikina vanlubale ni owoga yegihina: “Aatene ala enawoga kahiyo aGalilewu?
8 Enandeya addi kadda muthu wa iyo wiiwa ewogelo abaliwiyena?
9 Vikalelihu ehikalavo athu ooPartu, ooMedu, aElamita, a elabo yo Mezopotamiya enakala oJudeya ni ooKapadosiya, ooPontu ni a elabo yo Aziya,
10 ooFrijiya, ooPanfiliya, oWijipitu ni murudda dho Libiya ni Osireni ni aleddo amodha enadhela oRoma, Majudewu ni athu amodha erumedhe okala majudewu,
11 athu oKereta ni oArabe. Iyo nihawiiwa ewogaga dhithu dhotikiniha dha Mulugu ni ewogelo yehu.”
12 Hee, athu aatene otikina ni kuhukanna yowoga, mbwenye yokohana vikaleliwa yegihina: “Elaya enatapulela ddi?”
13 Mbwenye amodha, yowanyemula yegihina: “Yere olezela ni vinyu.”
14 Nuwindo, Peduru ovenya naarumiwi ale 11 ni owoga ni ndhu nootaama egihina: “Nyu athu oJudeya, ni aatene nyu munakala oJeruzale, mwaavuruwane pama madhu ginafunimi wawoga:
15 Mwebaribareene, athu ala kayere olezela, ninga nyu munubuwelinyu, mwaha visile ovanene.*
16 Ohiya eyo, siyeyo awonge namavuhulela Joweli egihina:
17 Mulugu onowoga egihina: ‘“Malabo ookuthula” “ginere wavaha athu aatene muzimu waaga wotxena teto aninyu anaalobwana ni anaahiyana enerege ovuhulela, azombwe enyu enere woona dhithu dhotikiniha teto anakalaba eli vaari veenyu enere oroha,
18 ohiya eyo ni adharaagaya aanalobwana ni anahiyana, malabo yayo ginere wavaha muzimu waaga wotxena vano naaliwaya enerege ovuhulela.
19 Ni ginere wawerana matikiniho odhulu ni velaboni yavati: a nikame, a mootho ni a murabo dha mwiisi.
20 Nihinathi ofiya labo nno ninlubale ni nothithimiheya na Yehova, nduwa nnere osadduliwa nikale yiihi mweri okale nikame.
21 Mwaha muthu yoole anaavuwihe ndina na Yehova anere ovulusiwa.”’
22 Nyu athu oWizarayeli, mwaavuruwane madhu ginafunimi wawoga: Yesu Munazareno, aali muthu arumedhiwe ni Mulugu vamentoni veenyu ni mabasa akopolo, ni matikiniho Mulugu aweriliyena vaari veenyu wodhela oliye ninga munonilinyu.
23 Mulobwana oyo, ohupelekiwa ni efunelo ya Mulugu, vano nnikavihero naamwiddani nyu omukomela vantxikwani nagoyi ni ompa.
24 Mbwenye Mulugu omutapula muukwani* wodhela onvenyiha, mwaha okwa kawandile omugonjhiha.
25 Mwaha Davidi ohuwoga wodhela oliye egihina: ‘Ginoompweha Yehova osogolo waaga malabo aamatene, oliye ali moono waaga woojha wihina miyo gahigonjhihiwe.
26 Bumwahaya murima waaga ni nlumi naaga nnohagalala vanlubale. Vano miyo ginere okalawo ni ejhehedhelo;
27 mwaha kamunaagihiye mmahame, newene kamunenye wihina mudhaari enyu ororomeleya afiyedhe ovudda.
28 Nyu mugihudhihe dila dhenyu dhegumi ni munere wenjhedhedha ohagalala waaga vamentoni veenyu.’
29 “Addibila, mugeenye owoga gihovaga ethu wodhela nikolo nehu Davidi: oliye ohukwa ni ohuvitiwa mmahame, teto mahame aye eli ni iyo ofiyedha peeno.
30 Woona wihina aali namavuhulela ni ahinona wi Mulugu ahimuroromeliha egi, mudhule mmodha eere okarati vampaddoni vaye vomwene,
31 Oliye ahinona ni ahiwoga wodhela ovenyihiwa muukwani wa Kiristu, wihina oliye kaanyanyaliwe mmahame teto mwiili waye kuwavudde.
32 Mulugu ohunvenyiha muukwani Yesu teto iyo aatene nili anamoona a dhithu ndho.
33 Mowindo, woona wihina oliye ohukarati moono woojha wa Mulugu ni ohakela wa Ababe ethu aapaganyiwiye, muzimu wotxena, ohuuvahani dhithu ndha munooninyu ni muniwinyu.
34 Mwaha Davidi kagwenle odhulu, mbwenye oliye ahiwoga egihina: ‘Yehova ohuwoga Nnabwiya aaga egi: “okarati moono waaga woojha
35 ofiyedha miyo wahela amwiddani awo vati va manyalo awo.”’
36 Mowindo, wihina athu aatene a vaade va amwaana Izarayeli ekanne ebaribari wihina Mulugu ohumweriha Nabwiya ni Kiristu, Yesu yoyo mumpilinyu vantxikwani.”
37 Nuwawiwa madhu yaala, murima dhewa wukuuwa ni owoga ni Peduru yegihina: “Addibila neere ddi wihina nivuluwe?”
38 Peduru wawaddela egihina: “Muthwaruwe, vano kadda muthu abaddiziwe ni ndina na Yesu Kiristu, wihina dhothega dhenyu dhileveleliwe, mwindo munere wakela mahala a muzimu wotxena.
39 Mwaha mpaganyo wa Yehova, bweenyu, bwaaninyu ni bwaathu aatene yaale eli wolapela Mulugu ehu anawithaneliye vamentoni vaye.”
40 Oliye oovaha onamoona ni owakongomedha ni madhu owinjhiva egihina: “Nvulusiwe vaari va nlogo nna nabure.”
41 Athu aatene yaarumedhe madhu ewa nuuhagalala obaddiziwa, labo nenne athu owakwana 3000 witaganyihedha naliwa.
42 Aliwa yodidela ohara dhohudhiha dha arumiwi, wodhela ogawana dhithu dhewa naathu amodha yoojha ni yoolobela.
43 Mwebaribarene, arumiwi nuwambela wawerana matikiniho owinjhiva athu aatene wambela woova.
44 Athu aatene yaarumedhe okala makiristawu yakala vamodhave ni yogawana dhithu dhewa mmodha ni mukwaye;
45 Yaguliha dhokanna dhewa yogawana korowaya naathu amodha mowiwanana niile kadda muthu ahoweliye.
46 Kadda labo otempulu kayajhombawo ni yakala mwimodhani ni efunelo emodhave; kadda muthu oojha vaade va mukwaye ni yogawana dhoojha yanniwana nuuhagalala ni murima wamuteene,
47 teto yaamuthithimihaga Mulugu nlogo naatene nodhiveliwa. Mudhidhi mmodhave kadda labo navira Yehova odhowagave awenjhedhedhaga athu yafuna ovulusiwa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Ni Egerego mudhidhi wanatharu wambela nduwa nakuma, aakwana 9 wora.
^ Obe neere: “kabala okwa dhaammagiliwana.”
