Dhowera Dhaarumiwi 22:1-30
22 “Alobwana, addibila ni nyu abaabi, mugivuruwane ginafunimi owoga wodhela wibarela waaga.”
2 Nuumwiwa awogaga ni ewogelo yEbarayiku, aliwa othabwa omaalawa. Oliye wawaddela egihina:
3 “Miyo gili Mujudewu gibaliwe oTarsu sidadi yoSilisiya, mbwenye gihudhihiwe sidadi yela ni Gamaliyeli. Gihudhihiwa wihina gawiwelelege malamulo aamatene a makolwihu, gikale ooviheya ni mabasa a Mulugu mowindala ninga nyu peeno mulinyu.
4 Miyo gowaharahara ofiyedha waapa athu yahara Dila yela yeebaribari * ni gowamaga gaavolosihaga mukambura, alobwana ni ahiyana;
5 teto anddimuwa aanamakutha, athu aatene ni anamaholelaya enovaha onamoona nda ginawogimi. Naaliwaya yahigivaha makarta wihina gaavahe addibila ooDamasku, miyo gahimaruwa wihina gaamage oJeruzale gaadhena wihina esinyusiwe athu yaale yaali wewule.
6 “Mbwenye ngaali mulenddoni, gaaddamelaga oDamasku mudhidhi wamidiiya,* morurumusa waara wakuma odhulu omoneya mburo gaalimivo,
7 voharela, miyo omothela vati vano miyo wiwa ndhu nawoga negihina: ‘Sawulu, Sawulu, onagiharaharela ddi?’
8 Miyo omukoha gegihina: ‘Nabwiya nyu muli aani? Oliye ogaakula egihina: ‘Miyo gili Yesu muNazarenu, yoyo onamuharahariwe.’
9 Alobwana ale yaali vamodha ni miyo yahoona waara wule, mbwenye kayiwale ndhu nne nawoga ni miyo.
10 Nuwindo, miyo omukoha: ‘Geere ddi Nabwiya?’ Nabwiya waakula egihina: ‘Kavenya, odhowe oDamasku, wengo onere waddeliwa mabasa othomeliwiwe wihina wapare.’
11 Mbwenye, woona wi miyo kaganda woona mwaha waara wule wahigiddendderula * mento, miyo ofiya oDamasku wula ngapareliwe nlada naale yaali vamodha ni miyo.
12 “Vano, mulobwana dhaala ithaniwa Ananiya amoova Mulugu mowiwanana ni nlamulo, teto awogiwa opama ni majudewu aatene yakala murudda yoole,
13 odha ogisayela. Oliye ofiya vaalimi ni ogaddela egihina: ‘Sawulu ddibilaga, mento awo ehogolowele woona!’ Mudhidhi yole miyo wonaga ni omoona Ananiya.
14 Oliye owoga egihina: ‘Mulugu a makolo ehu ohuthoma wihina onone efunelo yaye ni omoone muthu Owogowa * ni wiwe ndhu nnakuma vamulomoni vaye,
15 mwaha we onaakale namoona aye, vamentoni vaathu aatene wodhela dhithu woniliwe ni wiwaliwe.
16 Kivano onajheha ddi? Kavenya obaddiziwe, otxenihe dhothega dhawo wodhela olaleya ndina naaye.’*
17 “Mbwenye nuuhogolowela oJeruzale, gilobelaga mutempulu miyo okalaga ninga geera oroha
18 vano miyo omoona Nabwiya awogaga ni miyo egihina: ‘Kaaguva, kakumamo muJeruzale muna mwaha kaawo muthu anaarumedhe onamoona wawo wodhela miyo.’
19 Mbwenye miyo owoga gegihina: ‘Nabwiya, aliwa ehinona wihina kadda sinagoga gafiyimi, miyo gowamaga ni gowatxapula ale yanna nroromelo ni nyu.
20 Nikuthuliwaga nikame na Estevawu namoona enyu, miyo gahikalavo ni gahirumedha wihina apiwe, teto dimiyene aaparele malaya aathu yaale yampile.’
21 Mowindo, oliye ogaddela egihina: ‘Kadhowa, mwaha miyo ginere wuruma waathu a malogo oolapela.’”
22 Aliwa enere wuvuruwana. Mbwenye enere wawoga madhu ala ni ndhu nootama yegihina: “Kampeni mulobwana oyo mwaha kanafwanelela okalawo!”
23 Woona wihina yokuwa ni yowavoka malayiwa mburo yaliwa ni yovoka nthubi,
24 namasogolela aanyakoddo oruma wihina Pawulo athukuliwe avolosihiwe mukwarteli, ohiya eyo oruma wihina akohiwe wula atxapuliwaga wihina anone ebaribariya yathukulele athu ale okuwa ndale wihina empe.
25 Mbwenye aliwa nuumala ommaga wihina atxapuliwe, Pawulo omukoha namasogolela ole aanyakoddo aali vevale egihina: “Nlamulo nnowenya wihina muRomanu atxapuliwe ahinathi othongiwa?”
26 Namasogolela aanyakoddo nuwawiwa madhu yala, odhowa omwaddela komandanti, egihina: “Nabwiya munere ddi? Mulobwana ola muRomanu!”
27 Vano komandanti ole odhowa vaaliye ni omukoha egihina: “Kagaddele we oli muRomanu?” Oliye wakula egi: “Hee.”
28 Nuwindo komandanti ole omwaddela egihina: “Wihina miyo gikale muRomanu, gihiliva korowa dhowinjhivadhene.” Pawulo owoga egi: “Mbwenye miyo oRomanu waaga geere obaliwana.”
29 Mwaha wa yeyo, alobwana yafuna omuthonga ni omuukutha, vohilegela aliwa omuhiya. Nuwindo komandanti ole wambela woova nuunona wihina muthu yammagiliwa aali muRomanu.
30 Vano labo noharela, afunaga onona ethu yamuthukulele winkedhiwa ni Majudewu, oliye omutapula ni oruma wihina anddimuwa aanamakutha vamodha ni Sinediriyu yaatene etugumane. Numala, oliye omudhana Pawulo ompweha vaari vewa.
News
Português
17/02/2014
Notícias
Manyawa
Liberado
Manyawa
Pendente
(ID#513700)
Dhopadduwa
^ Obe: “dila ya Nabwiya.”
^ Obe: “nduwa nigali vaari.”
^ Obe: “wahigipaha.”
^ Obe: “apama.”
^ Obe: “na Yesu.”
